Matius Uram 26

Er Yesus biryi Er miliramnyi nang amolbaryi asi eterenmouci, Erci, “Ninyi aryi mar moun yiboka obkwaning,” ebmou ara liki dumbaryi dinyi lak ebmou uram

26:1-5

1Er Yesus biryi eterenmou ani, a uram nirya sirya eterebmou ura, Erci Er miliramnyi nang amolbaryi asi ato ebmou. 2“Uki bitinyi kunmabyi ani, uki winiryi tum berekci ura, nun Yahudi yala nang weik kwalina si Paskah kubkwamar ati sun bikmarum. Paskah uki tum aryi berekci ura, ninyi aryi Ni Ninyi Dasinyi bisi taleboka, ‘Bing dakoka co lase deib aryi labdarur,’ eboka ninyi taruk dam dobkarebkwamaning,” ebmou.

3A talak ara Er Imtamnyi kan ninyi kan noutam kuboka antanirdeirin deyok nang ab, sun Yahudi yala nang sien nang ab ara, “Uram sisikwayeb,” tenen Er Imtamnyi kan ninyi kan noutam kuboka antanirdeirin sienyi si Kayafas ai dam buluboka wekmai. 4Buluboka wekmai ura, sunci, “Er Yesus bisi taleboka obkwayeb,” tenen, “Tola uram eboka tatabdongobkwamibyi ba, Ersi obkwamai,” tenen mar moun yibmai. 5Ato ebde sisingmai cok, sunci ato ebdanmai, “Er Yesus bisi taleboka obtibyi bok, weik kwalina Paskah tum tuba kubde ba, nunci Ersi talebibyei. Ara, ‘Paskah tum ninyi ilinto buluraming ati, sunci, “Yesus bisi milibkwayeb,” tenen buluboka uram lilim ebingiryi, nunsi dalubsinibibyi ba, kwebdangnyei,’ tenen taklobmabyi ani, yuk tum aryi taleboka obkwayeb,” ebmai.

Er Yesus bira atei Betania dam aryi kunmou ba, ner tentok ara tong teleb co yung taleboka Er Yesus dam yandoka Er kisok deib dikdongobmou uram

26:6-13

6Ura, Er Yesus atei Betania bindoka kunmouci, minob susa taleamwe kweteamunyi si Simon ai bukmou. 7Ura, Er Yesus ab yuk nang ab ara co lamna dam bukoka yinmai ba, ner tentok ara Er Yesus dam yanmou. Ara, keil aryi kikniamnyi moyok asi tong teleb co yung dengna weik me asi kibdeiamwe ani, doubdakoka Er Yesus dam yanmou. Ura, a ner ara a tong teleb co yung asi Er Yesus kisok dub ai dikeibmou.

8A ner ara co yung dengna weik dinyi dikeibmou ba, Er miliramnyi nang aryi asing eibmaici, sunci, “A ner ara dengna weik dinyi talyi ati dikdongobmar ati malyito kunmar,” tenen yu kanya bobmai. Ura, sunci sun mamun asi ato ebdanmai, “Unatoa ati dengna weik me bok, talyi ati dikdongobmar do? 9A co yung ara dengna weiktoto dekeibte uca, co bok ilinto dobdobte uca, sun utotoa kum nang asi karebte,” ebdanmai.

10Ato ebdanmai asi, Er Yesus biryi sun tenebmai kanya bikmouci, sunsi ato ebmou, “Sunda unatoa ati, a ner asi mambul kanya borsininmarum do? A ner aryi co yung dikdongobmanir ara iya teleb dinyi kubmanir aryok. 11-12Sun utotoa kum nang ara aminda ababyi sun ab tonkwa tuba kundarur ati, sunci aminda ababyi a nang asi co bok karebdate. Bok, Ni dibkwaman ati, sun ab tonkwa iya kum kunkwayeb. Ati, a ner ara Nisi tong teleb co yung doboka dikeibmanir ara Ni dibkwaman kum bok, Ni tukwi keil umbura dam deibkwamaning dinyi kiknibdeibmanir. 13Niryi sunsi dib en uram ebkwinsin ati sunci diboka kekebdarur. Ninyi aryi Niti Teleb Uram eterebde bingiryok, sunci im dangna tukwe dangna mutuk nang nirya asi ati ebkwaming, ‘A ner ara tong teleb co yung doboka nun Du Yesus bisi dikeibmou ati tuba-tuba teneibdarur,’ eboka nukde yibinkwaming.” Er Yesus biryi Er miliramnyi nang amolbaryi asi ato ebmou.

Er Yesus bisi Er miliramunyi si Yudas biryi Ersi takloboka kikibmou uram

26:14-16

14A sirya ura, Er Yesus miliramnyi nang amolbaryi nang kankan aryi ninyi tentok si Yudas Iskariot biryi, “Yesus bisi kikibkwan,” tenen anabdobmouci, Er Imtamnyi kan ninyi kan noutam kuboka antanirdeirin deyok nang dam binmou. 15Ura, erci sunsi ato ebmou, “Sunci nisi unatoa karebkwamarum ba, Er Yesus sun taruk dam dobkarebkwamasin do?” Ato eboka asibmou uca, sunci ersi keil uang perak dinyi tiga puluh baryi karebmai. 16Ura, a talak aryi kuboka deyok kounmouci, Yudas biryi, “Er Yesus bisi una tum aryi kuboka sun taruk dam dobkarebkwan do?” tenen bisik ingkiringmou.

Er Yesus ab Er miliramnyi nang amolbaryi ab lukunda aryi Yahudi yala nang weik kwalina yiramnyi tum si Paskah aryi yina yibmai uram

26:17-25

17Ura, sun Yahudi yala nang aryi bungbung eboka welena kum roti yiramnyi tum yuma uki tum berekmou. Ura, Er miliramnyi nang aryi Er Yesus dam yandoka ato eboka asibdenmai, “Nai, Kan tenebmarim ara dan ai asi weik kwalina si Paskah yina kiknibminikniting tenebmasirim do?” eboka asibdenmai. A tum ara sun Israel yala nang Mesir mutuk aryi anaboka Kanaan mutuk binamnyi tum kanya teneibdeboka ninyi nirya aryi Paskah domba oramnyi tum kubmou.

18Uca, Er Yesus biryi ato ebmou, “Banmamunyi ani, weik atei Yerusalem bimunyi ura, abilanyi bisi ato ebkwandarur, ‘Nun eteresururnyi biryi ato ebmar, “Ni dibkwaman uki tum ara Er Imtamnyi biryi teneibnou ara sirya dam kubmar. Ati, Ni ab Ni miliraning nang ab kan ai yandoka nun tonkwa weik kwalina si Paskah kwalina yibkwamab,” ebmar,’ ebkwandarur,” ebmou. 19Ura, Er Yesus biryi sunsi wa karebmou to kuboka Er miliramnyi nang aryi kunubmaici, sunci bindoka weik kwalina si Paskah yina kiknibminikmai.

20Kiknirminingmai ani, sirya inibmou ura, Er Yesus ab Er miliramnyi nang amolbaryi nang ab tonkwa bukoka yina yinmai. 21Ura, sun nirya tonkwa bukoka yinmai ba, Erci sunsi ato ebmou, “Niryi sunsi dib en uram ton ebkwinsin ati diboka kekebdarur. Ninyi tentok ara sun amolbaryi nang kankan akiryi Nisi kikiboka yuk nang taruk dam dobkarebkwamanir,” ebmou.

22Uca, Er miliramnyi nang ara sun boukwe daksakdobmou ba, sun ninyi yuk-yuk aryi Ersi asibdenmai, “Nai Arungdeirisurumnyi, niryi Kansi kum kikibkitinyi. Kanci niti ato ebmanirim do?” eboka asibmai.

23Uca, Er Yesus biryi sunsi ato ebmou, “Anyi bira Ni ab tonkwa neik buna yangana suwa deici asi taruk dongoboka yinmanimnyi biryi Nisi yuk nang taruk dam dobkarebkwamanir. 24Ba, Ni Ninyi Dasinyi bira Er Imtamnyi biryi ebdeibnou to kuboka dibkwaman bok, Ni Ninyi Dasinyi bisi yuk nang taruk dam dobkarebkwamaniranyi bira aminda iya weiktoto wenen dinyi dobdobkwande. Weiktoto wenen dinyi dobdobkwande deyok aryi, anyi bira deirina takanting ura, teleb,” ebmou.

25Ura, Yudas Er kikibkwamunyi biryi Ersi uram dekeibmouci, ato ebmou, “Nai, nun eteresurumnyi. Niryi Kansi kum kikibtinyi bok, Niti ebmanirim do?” eboka asibdenmou. Uca, Er Yesus biryi ersi ato ebmou, “Dib. Nisi kikibkwaniranyi bira kantiba ati ebmakin,” ebmou.

Lukunda yina yinmai ba, Er Yesus biryi Er miliramnyi nang asi, “Sunci aminda ababyi Niti kanya teneiboka roti yiboka anggur me yibde binkwandarur,” ebkarebmou uram

26:26-30

26Er Yesus ab Er miliramnyi nang ab tonkwa yina yinmai cok, yina deirin co lamna arubdongoboka tuba bunmaici, Er Yesus biryi roti dobtaleboka Er miliramnyi nang asi karebmou. Ati, Erci Er Nai Imtamnyi bisi, “Ei, Ni Nai,” eboka kibdobmou ura, toboka-toboka Er miliramnyi nang asi karebmouci, ato ebmou, “A roti ara Ni nong tub a kunum. Ni tub ara sunti lebkwansin deyok ati karebkwamasin ati, sunci a roti asi ur doboka yibdarur,” ebmou.

27A sirya karebmou ba, sirya yibmai ura, Erci anggur me dikdongobmai moyok dobtalebmouci, Er Nai Imtamnyi bisi, “Ei, Ni Nai,” eboka kibdobmou ura, Er miliramnyi nang asi karebmouci, ato ebmou. “A moyok ara ur dobdobmunyi ura, sun nirya ur yibdarur! 28A anggur me ara Ni ining a kunum. Er Imtamnyi biryi, ‘Ninyi ab tonkwa antanirdeibkwayeb,’ tenen Ni ining deib aryi ukuryok mururdeirin dinyi tikeiboka lak kibmasir. Ara, ‘Ni ining deib aryi Er Imtamnyi biryi ninyi ilinto sun malyi kun dinyi kilibkwande ati bikting,’ tenen lak kibmasin ati a anggur me ara sunti dikeibsin,” ebmou. 29Ato ebmou cok, ton ato ebmou, “Niryi sunsi dib en uram ton ebkwinsin ati diboka kekebdarur. Nun ukuryok aryi anggur me yibmab ani, Nira anggur me tubto yibkwan cok, minola kum yibkwan. Aminda aryi sirya kobdob uki tum berekde kum bok, Ni anggur me ton kum yibkwan ati ebman. Ani, sirya kobdob uki tum berekci ura, Er Imtamnyi Weik Sienyi kururci, ninyi ilinto Er amwetam kun nang kibdeibkwande ura, Ni sun ab tonkwa kubibiryok, anggur me ukuryok dinyi sun ab tonkwa tubto yibkwayeb,” ebmou. 30Ura, Er Yesus ab Er miliramnyi nang ab yina sirya yibmaici, sunci Er Imtamnyi si weik en mot sebmai ani, sirya sebmai ura, sunci Yerusalem atei aryi anaboka mutuk kon si Zaitun dam welebinmai.

Er Yesus biryi aminda kunubkwamwe dinyi nirya bikmouci, Petrus bisi, “Kanci, ‘Nira Yesus milinanyi kum kunun,’ eboka lak ebkwamanirim,” ebmou uram

26:31-35

31Zaitun mutuk kon dam sirya binmai ura, Er Yesus biryi Er miliramnyi nang koklombaryi asi ato ebmou, “Arub lukunda ara sun nirya aryi, ‘Nun damnyi lebdandobkwayeb,’ tenen Nisi taklobkwanurum. Ara, Er Imtamnyi minob erdeiriramwe uram umbura aryi ebdeiamwe to kunubkwamar. Ati, Er Imtamnyi Uram umbura ato eboka kerek sekeiamnyi,

‘Er Imtamnyi biryi ato erur, Nira Imtamnyi biryi er domba kalingnanyi bisi obnyi ba, domba mer ara dantam-dantam bindoka bokwalwalabdankwaming.’ (Zakharia 13:7)

Ato eboka kerek sekdeiamnyi to kunubkwamar. 32Ani, Ni Nai Imtamnyi biryi Nisi kam bukeibnici ura, Niryi sunsi menengbisirbindokabsiniryi, Galilea mutuk minob binmanyi ura, tubto ebdankwayeb,” ebmou.

33Uca, Petrus biryi Yesus bisi ato ebmou, “Nai, sun yuk nang nirya aryi Kansi taklobmakitingnyi ababyi, niryi Kansi kum taklobkitinyi,” ebmou.

34Uca, Er Yesus biryi ersi ato ebmou, “Niryi kansi dib en uram ton ebkwinkin ati kanci diboka kekebdum. A lukunda aryok kanci Nisi takloboka, ‘Nira Yesus milinanyi kum kunun,’ ebkwandim. Ara, maka kirim uram kum ngalukabde bok, kanci ninyi urasintam aryi, ‘Nira Yesus milinanyi kuma,’ ebkwandim ara liki winiryi ebkwandim,” ebmou.

35Uca, Petrus biryi Er Yesus bisi ato ebmou, “Nai, ninyi aryi Kansi obkitingnyi ababyi, niryi, ‘Nibabyi obniting ababyi teleb,’ tenen Kansi kum taklobmakin cok, ‘Nira Yesus milinanyi kuma,’ kum ebkwan,” ebmou. Tonda, Er Yesus miliramnyi nang koklombaryi nang yuk nang ababyi neik uram akwe ebmai.

Er Yesus mutuk Getsemani dam binmou uram

26:36-46

36Ura, banmai ani, Er Yesus ab Er miliramnyi nang koklombaryi ab tonkwa mutuk si tentok Getsemani dam binmai. Ura, Er miliramnyi nang asi ato ebmou. “Nira tiya otam bindoka Er Imtamnyi bisi molorbinan ati, sunda atam burandarur,” ebmou. 37Ura, Erci Petrus ab Zebedeus mabwe bitinyi ab inibdobmou ura, sun tonkwa binmai. Ura, Er Yesus Er kanya dam mambul weik kubmou ba, engen kanya bobmou. 38Ura, Erci sun winiryi nang asi ato ebmou, “Ni kanya ara mambul mitik kum kuboka din kanya deinmanir aryi ikin dinyi bobman kumto kubmanir,” ebmou. “Nira otam bindoka Er Imtamnyi bisi molorbinan ati, sunda atam burandarur. Ara, sunbabyi kalikmun cok, Er Imtamnyi bisi molobdarur,” ebmou.

39Ura, Erda ototo bindoka kutam ikdongoboka ngang dakdongoboka Er Imtamnyi bisi molonmou. Ara, Erci ato eboka molobmou, “Ni Nai, Kanci teleb tenebniminyi ura, a mambul weik dobkwaman dinyi ati Kanci bisik sekeibnurum. Bok, Ni teneibmanyi to ara kunubcei ati tenebman. Eda, Kanci teleb tenebmaniminyi tok asi kunubnurur,” eboka molobmou.

40Ato eboka sirya molobmou ura, Erci tamuryandoka dinmou uca, Er miliramnyi nang winiryi nang ara mablalabmai asi asing eibmou. Ura, Erci Petrus bisi ato ebmou, “Sunda Nisi miliboka kiting yakna tentok ababyi kalikmana mikib kum kurandum do? 41Sunci, ‘Mambul dinyi yasici ba, nun dib tenen dinyi taklobibyei,’ tenen bukoka kalikdobmunci, Er Imtamnyi bisi molorondarur. Sunci sun kanya dam aryi, ‘Malyi kun dinyi bisik sektibyi,’ tenerandum bok, sun nong ab sun dib tenena mitang kusurur uca, sunci malyi kun dinyi minola dobdobmunyei,” ebmou.

42Ura, Er Yesus biryi tubto tamuboka liki bitinyi dinyi binmou ura, Erci ato eboka molobmou, “Nai, Ni mambul dobkwaman dinyi ati Kanci, ‘Bisik kum sekwan,’ tenebtenimyi uca, Nai, Kan tenebmaniminyi to da kunubnurur uca, a mambul dinyi nirya bobdobkwan,” eboka molobmou.

43Sirya molobdobmou ura, Erci yandoka diramwe uca, Er miliramnyi nang winiryi ara wi aryi asing elekoka buna ara ikin mitik kum kunmou ba, tubto mablalabmai asi eibmou. 44Uca, Er Yesus biryi sunsi takloboka tubto liki winiryi dinyi Er Imtamnyi bisi molorbinmouci, Erci molonmou to, neik uram akwe eboka molobmou.

45Sirya molobmou ura, Er Yesus biryi Er miliramnyi nang dam yanmouci, sunsi ato ebmou, “Sunda dikdik seboka tuba mabde kuronmarum do? Sunci bukoka ton dibdendarur. Ni Ninyi Dasinyi bisi taleboka malyi kun nang taruk dam dobkarebkwining kiting yakna dam kuabde. 46Ni dobkarebkwiniranyi sirya dam yangar ati, sunci bukokmunyi ura, nun anaboka bankwayeb ati tikokdarur,” ebmou.

Er Yesus Kristus bisi talebmai uram

26:47-56

47Er Yesus biryi Er miliramnyi nang asi uram tuba enmou ba, Er miliramnyi nang amolbaryi kankan aryi ninyi tentoknyi si Yudas bira sun ab tonkwa tuba kum kunmai ura, sun dam yanmou. Tonda, Yudas ab tonkwa yanmai nang ara ninyi yubwa tentok aryi ninyi on ya ab co balala ab doubmaici, Er Yesus dam yanmai. A yanmai nang ara Er Imtamnyi kan ninyi kan noutam kuboka antanirdeirin deyok nang ab sun Yahudi nang sien nang ab aryi, “Yesus bisi taleboka boyandarur,” bokeibmai uca, yanmai. 48Ura, er kikibmounyi biryi sun Yesus bisi talebkwamai nang asi minob ato eboka nukdongobmou, “Niryi iriboka u kunkunubdobninyi bira Yesus a kunum. Ati, sunci anyi bisi talebkwandarur,” eboka nukdongobmou. 49Ura, Yudas bira ukurlona kum uca Er Yesus dam tingbindoka ato ebmou, “Nun eteresurumnyi, teleb,” ebmouci, Er Yesus bisi iribdobmouci, u kunkunubmou.

50Iribdonmou bok, Er Yesus biryi ersi ato ebmou, “Ni kwit e, kanci Nisi kikibkwanirim ati yanmarim do?”

Ura, a ninyi yubwa aryi Yesus dam tingbindoka Ersi taruk talebdongobmai. 51Talebdongobmai bok, Er Yesus miliramnyi nang koklombaryi kankan aryi ninyi tentok aryi, “Bisik sekwan,” tenen taruk lakoka ninyi on ya touna asi dobdobmouci, donokokmou. Dokdonokmou uca, erci Er Imtamnyi kan ninyi kan noutam kuboka antanirdeirin sienyi er wa irmilinanyi a tikmou asi amol dinatam ya sekwetebmou.

52Uca, Er Yesus biryi a ya talenanyi bisi ato ebmou, “Ya touna dongdonongnaming nang sunbabyi ara yuk nang aryi ya touna aryi obkwaming ba, dibkwaming. Ati, kanci a ya touna asi limna umbura tubto kibdongobdum. 53Niryi Ni Nai Imtamnyi bisi, ‘Milibnurum,’ ebmatinyi uca, Erci Er uram eryuryangan nang weik yubwa amolbaryi bisibkaboka bokeibmote ura, a mikib nang nirya yuryating uca, Nisi miliboka lebdobmaniting. Kanci a dinyi kum bikmarim do? 54Bok, Niryi Er Imtamnyi bisi, ‘Kan mikib nang yubwa-yubwa nirya bokeibnurum,’ eboka kum molobkwan. Niryi ato eboka molobmatinyi uca, Er Imtamnyi Uram umbura aryi Niti kerek sekdeiamnyi to, kum kunubmote. Ara, ‘Ninyi aryi Ersi taleboka obkwaming,’ eboka sengdeiamnyi tok, kum kunubmate,” ebmou.

55Ura, a talak aryok Yesus biryi sun Ersi taleryanmai nang ilinto asi ato ebmou, “Sunci Niti, ‘Roma nang asi oboka bai kun nang menengbisinanyi kurur,’ teneranurum do? Ara, ninyi on ya touna ab co balala ab douboka taleryanmarum ati ato eboka asibdenmasin. Nira bai kun nang menengbisinanyi kum kunun. Nira uki weikanun kuransiryok, Bait Allah ai dam bukmaniryi ninyi eterenun. Ninyi eterenun talak aryi sunci Nisi kum talebnindau. 56Bok, a dinyi nirya kubkwamanir ara Er Imtamnyi Uram ebdeibmaci to lak etereramnyi nang aryi kerek sengdeiramnyi to kunubkwamanir,” ebmou. Ura, Er miliramnyi nang koklombaryi nirya aryi Er Yesus deibloboka binsekdobmai.

Er Yesus boboka sun Yahudi yala nang asi uram sengkwetena nang dam bobinmai uram

26:57-68

57Ura, Er Yesus bisi taruk talebmai nang ara Yesus bisi boboka Er Imtamnyi kan ninyi kan noutam kuboka antanirdeirin sienyi si Kayafas dam bobinmai. Akai dam ara Musa kerek sengna etereramnyi nang ab, sun Yahudi nang sien nang ab buluboka wekmai asi bobinmai. 58Akai dam bobanmai bok, Petrus bira aminda dongtam kuboka milibdongobmou. Ani, Er Imtamnyi kan ninyi kan noutam kuboka antanirdeirin sienyi ai dam keta wengbinmou. Akai dam keta wengbinmou ura, erda sun bisik bublan dam kalingna nang kankan dam bindoka bukmouci, “Er Yesus bisi una kubkwaming do?” tenen dibde bukmou.

59Ura, sun Er Imtamnyi kan ninyi kan noutam kuboka antanirdeirin deyok nang ab sun Yahudi yala nang asi uram sengkwetena nang ab aryi, “Er Yesus obibyi ba, dibkwande,” tenebmai. Ara, Yesus Er deyok kum kubmou cok, sunci, “Ninyi aryi tola ati eboka Er Yesus bisi tatabdongobting,” tenen ingkirikmai.

60Ato kuboka ninyi ilinto aryi sun Yahudi yala nang uram sengkweten nang urasin dam yandoka Er Yesus deyok ati tola-tola uram eboka eryanganmai. Bok, a nang aryi eryanganmai uram deib aryi sunci Yesus bisi weneboka obmana kum kubmai.

Ani, sirya kobdob ara ninyi bitinyi yandoka sunbabyi Er Yesus deyok ati tola ati tatab-tatab ebdongoboka ato ebmarei. 61“Nun kekebmanoumwe ba, Anyi biryi ato ebmou, ‘Nira mikibnyi kunun ati Nira Er Imtamnyi biti ninyi dama deirin ai asi dakeibnyi ura, uki winiryi aryok kuboka tubto dobkwan ati mikib kunun,’ ebmou,” ebmarei.

62Ura, Er Imtamnyi kan ninyi kan noutam kuboka antanirdeirin sienyi si Kayafas biryi tikoka Er Yesus bisi ato ebmou, “A nang aryi Kan kurum to ab Kan uram erum to ab asi asing eiboka kekebmarei ani, lak ebmakiring bok, Kanci uram ton kum dekeibkwamarim do?” ebmou. 63Ato ebmou bok, Er Yesus biryi uram ton kum dekeibmouci, uram kilingna akwe kubmou.

Ura, Er Imtamnyi kan ninyi kan noutam kuboka antanirdeirin sienyi biryi Ersi tubto ato ebmou. “Er Imtamnyi iya kam kururnyi si deib aryi molobmakin ati dib en uram eboka nun dam lak ebsurum. Kanda Er Imtamnyi Mi ara ninyi lemna Weik Sienyi Kristus kurum do?” eboka asibdenmou.

64Ato ebmou uca, Er Yesus biryi ato ebmou, “Kanci ebmanirim to, Nira Anyi a kunum. Bok, Niryi sun nirya asi dib en uram ebkwinsin ati diboka kekebdarur. Ni Ninyi Dasinyi bira Er Imtamnyi Iya Erebdobnyi siriktam bukwan asi asing eibkwanurum. Tonda, Nira duwa deici aryi bukoka yuryankwan asi asing eibkwanurum,” ebmou.#Mzm. 110:1; Dan. 7:13

65Ato ebmou uca, Er Imtamnyi kan ninyi kan noutam kuboka antanirdeirin sienyi biryi, “Er Imtamnyi si yan yanibmar se,” tenen yu yaboka er mining alib ongon aling kwiliklobmouci, ato ebmou. “Erci Er Imtamnyi si malyi kiboka co kwemtangninto uram ebmar ati nun nirya kekebmab ati, nunci Ersi tatab-tatab ebkwaming nang tuba kum ingkiringmatibyi. 66Ati, sunda una tenebmarum do?” eboka asibdenmou.

Uca, sun bulubmai sien nang aryi uram dekeiboka ato ebmai, “Anyi bira oboka wenebmanto kubmar ati, Ersi obting,” ebmai.

67Ura, sunci Er urasin asi si maka tulubdeibmaici, taruk inin aryi molong-molong ebokmai ura, yuk nang ara Ersi taruk aryi kulab-kulab eboka obmai. 68Onmai cok, sunci Ersi ato ebmai, “Kanda, ‘Nira Kristus ninyi lemna weik sienyi kunun,’ erdarandimyi biryi, ‘Nisi kulabmaniranyi bira anyi biryi onyi biryi kulabmanir,’ eboka er si sibderum!” ebmai.

Petrus biryi, “Nira Yesus Er milinanyi kum kunun,” eboka ninyi urasintam aryi ebmou uram

26:69-75

69Ura, a talak ara Petrus bira baitam kuboka akai dam keta dam aryi bukmou. Asi, wa irmilin ner tentok aryi yandoka Petrus bisi ato ebmou, “Kanbabyi Er Yesus Galilea mutuknyi ab tonkwa yibarurumnyi bukmarim,” ebmou. 70Ato ebmou ara ai keta dam wekoka bukmai nang aryi kekebmai uca, Petrus biryi a kekebmai nang nirya sun urasintam aryi tola ebmouci, “Ato kuma. Kan enmarim uram ara ni kum bikman,” ebmou.

71Ura, Petrus tikoka bisik lika bublan dam tingdongorbau uca, yuk wa irmilin ner aryi ersi eibdongoboka a wekmai nang asi ato ebmou. “Se, anyi bira Yesus Nazaret ateinyi ab tonkwa kururungnyi bisi yandoka tikmar,” ebmou.

72Ebmou bok, Petrus biryi tubto tola ati ebmouci, uram ebdarabmouci, “Se Anyi bisi ni kum bingnunyi bok, talyi enmanirim,” ebmou.

73A wa irmilin ner aryi eabwe talak uki kum tikabwe bok, akai dam kunmai nang aryi Petrus dam yandoka ato ebmai. “Kan uram dangunmarim ara sun Galilea mutuk nang danguraming to, dangunmarim ati lak kimakir ati bingmakib. Kanbabyi diba ati Er milindarurnyi tikmarim,” ebmai.

74Uca, Petrus biryi uram katabum ebmouci, “Tola uram kuma. Tola uram ebmatinyi uca, Er Imtamnyi biryi wenebnicei,” ebmouci, “Anyi bira ni kum bingnunyi kurur asi talyi enmanurum,” ebmou.

Ato ebmou talak aryok kirim uram ngalukmou. 75Ura, kirim uram ngalukmou asi Petrus biryi kekebmouci, erci Er Yesus biryi er dam eamwe uram asi kanya teneiboka bikmou, “Kirim uram kum ngalukabde bok, kanci Niti liki winiryi kuboka, ‘Ni kum bingnunyi,’ ebkwanirim,” eamwe asi kanya teneibmou. Ura, Er Petrus biryi baitam bindoka engena weik engebmou.

Currently Selected:

Matius Uram 26: MTG

Highlight

Copy