Markus Uram 5
5
Er Yesus biryi isa wekamunyi bisi teleb kubdeibmou uram
5:1-20
1Ibalya kum danmou ura, Er Yesus ab Er miliramnyi nang ab me kwan deici banmai. Banmai ani, Galilea me kwan koubkaboka otam katum asi Gerasa mutuk dararbinmai. 2Dararbinmai ura, Er Yesus ab Er miliramnyi nang ab co ngun-ngun deici aryi anaboka tukwe ai tingyurbai uca, isa wekamunyi tentok aryi sun ab ebdanmai. Anyi bira ninyi din nang tukwe dongoramnyi ai aryi anaboka yangau asi sun ab ebdanmai. 3Anyi bira ninyi din nang tukwe dongoramnyi ai akwe iya kuramuryi yu weik kuramwe deyok aryi besi tabwe ababyi debman kum kuramwe. 4Er atei nang aryi liki mitik kum er taruk ab yan ababyi tabwe demnamnyi uca, anyi mikib aryi besi tabwe ababyi bulurloramwe. Ba, anyi bisi ninyi aryi talebkataboka tabwe debman kum kuramwe. 5Ba, anyi bira kitingtam lukunda nirya aryi ninyi din nang tukwe dongoramnyi ai akwe iya kuramuryi, uram weik eboka ngolongnamwe. Anyi er yu weik aryi, erci keil doboka erdamnyi asi molongdaroramwe. 6Anyi biryi Er Yesus yanganmou asi asing eibmouci, Er Yesus dam ola yandoka luknubdongoboka er kutam ikdongobmou. 7-8Ikdongobmou ba, Er Yesus biryi anyi wekamwe isa asi, “Isa, kan anyi umbura dam aryi anaboka bindobdum,” eboka yakdonokmou. Ba, isa aryi ngolok-ngolok eboka uram weik dobmouci, Er Yesus bisi ato ebmai. “Kanda una kubkwansirim ati, yanmarim do? Yesus, Kanda Er Imtamnyi Mi, Er Iya Mikibnyi Mi kurum. Kanci nunsi obsiminyei. Kanci Er Imtamnyi si deib aryi, ‘Niryi sunsi kum obkwinsin,’ ebsurum,” ebmai. 9Ato eboka molobmai ba, Yesus biryi isa wekamunyi bisi, “Ni mi, kan si ara unanyi da?” eboka asibdenmou ba, anyi bira ato ebmou. “Nira isa ilinto seribu baryi kunun ati, ni si ara Legion,” ebdanmou. 10Ura, sun isa mer ilinto wekamnyi aryi sunci Er Yesus bisi, “Kanci nunsi yuk mutuk asi yakdonoksiminyei,” eboka molobmai.
11Ato eboka molobdobmai ba, a mutuk asinabyi asi ninyi winin bisam ilinto mol yinmai. 12Asi, sun isa mer aryi, “Yakdonokwamasiminyi ura, nunda ei mol yinmang bisam umbura asi wengbitibyi tenebmab ati, Kanci teleb ebsurum,” eboka molobdobmai. 13Molobdobmai ba, Er Yesus biryi, “Ur wengbindarur,” ebmou. Ura, isa mer ara sun wekaminyi umbura aryi anaboka a mol yinmai bisam umbura asi wengbinmai. Ura, a bisam mer yubwa ara dua ribu baryi kum ara nirya imun aryi me wengbinsekmai. Ara, mutuk asinabyi aryi cungyurbindoka me kwan umbura wengbindoka me isin daksekmai. 14Ba, sun a bisam mer kalingna nang aryi asing eibmai ura, cungbindoka atei yoka kuramnyi nang ab, bara atei kuramnyi nang ab, nirya asi a kubmou to lak eterebmai. Ura, a nang nirya diryanganmai. 15Sunda Er Yesus dam yanmaici, asing diramnyi uca, isa mer wekamunyi bira Er Yesus biryi ersi teleb kubdeibmou. Ba, anyi bira ninyi kanya sirik bobmouci, nong baning kuramunyi bisi ongon aling ongoboka ur bukmou asi eibmai. Ura, sun diryanmai nang aryi anyi ur bukmou asi asing eibmai ura, sun kanya ilil kubmou. 16Kubmou ba, sun a kubmou to asing eibmai nang aryi sunsi, “Er isa wekamunyi bisi Er Yesus biryi teleb kubdeibmar,” ebmai. Ebmai cok, sunci, “Er Yesus biryi isa asi yakdonokmar uca, isa ara bisam koukwe umbura dam wengbinmai. Ba, a bisam mer ara me kwan umbura wengbinsekmang,” ebmai. 17Ato eboka nukmai ba, a nang aryi kekebmaici, sun ilil kubmou ati, sunci Er Yesus bisi, “Kanda nun mutuk kusin kum. Eda, anabdobminci, yuk mutuk bindobdum,” ebmai. 18Ba, Er Yesus biryi, “Ni binan,” ebmou ura, anaboka weik co ngun-ngun deici asi burwelebinkouci, welebarou. Bok, er isa wekamunyi bisi Er Yesus biryi teleb kubdeibmounyi biryi Ersi, “Nai Du, nira Kansi milibkitinyi,” eboka molobmou. 19Molobmou bok, Er Yesus biryi, “Kum, kanda kan atei biminyi ura, kan ai dam nang asi, ‘Er Imtamnyi biryi nisi bico teneboka abmanir aryi, Erci nisi isa wekanou dinyi yakdonokoka teleb kubdeibmanir,’ eboka lak etererbirum,” ebmou. 20Ato ebmou ura, anyi biryi anabdobmouci, Dekapolis mutuk asi atei takubaryi doramnyi mutuk yibarkirikoka a mutuk nang asi ato eboka lak eterebmou. “Nira isa wekanunyi bisi Er Yesus biryi teleb kubdeibmanir,” eboka lak eterebde yibinmou. Lak eterebde yibinmou ba, sun kekebmai nang nirya aryi, “Nai e,” tenebmai.
Er Yesus biryi Yairus nebnyi kabul kam kum bukeibkou cok, Erci malyi ai ining yibarmururamwe ner ab ebdanmarei asi kwetebmou uram
5:21-43
21Er Yesus ab Er miliramnyi nang ab tonkwa co ngun-ngun burwelebinmai ura, sunci anaboka me kwan deici binmai. Banmai ani, Galilea me kwan katum atam tamuboka yanmai. Yanmai ba, ninyi ilinto aryi Er Yesus banmou me katum dam asi buluryanmai. 22Ninyi ilinto Er Yesus ab tonkwa kunmai bok, ninyi tentok ara Musa Uram eteren ai kalingnamunyi si Yairus yanmou. Yairus er nebnyi dibmanto kunmou ba, erda mambul kanya bobdobmouci, Er Yesus dam yanmou. Yanmou ba, erci Er Yesus bisi ebdanmareici, “Nai,” teneboka er kutam tukwe ai ikdongoboka er urasin tukwetam luknubokmou. 23Ura, erci Er Yesus bisi ato ebmou. “Nai, ni nebnyi youn aryi dibmanto kunmar. Ati, Kanci yandoka er nong deici asi taruk deiboka kwetebminyi uca, ni nebnyi nakibdobkwande,” eboka molobmou. 24Ato eboka molobdobmou ba, Er Yesus bira Yairus miliboka Yairus ai tonkwa banmarei.
Banmareici, bisik ai banmarei bok, ninyi ilinto Er Yesus bisi milirbanmai ba, Er Yesus bisi libdongobmai. 25A banmai nang kankan ara bunga ining yibarmururamwe ner tentok milirbinmou. A ner malyi ai ining yibarmururamwe talak ara kwalina amolbaryi kwaliamnyi. 26A ner aryi ninyi kweten nang ilinto asi, “Kwetebnurum,” eboka bobaramuryi er taruk dam kuamwe bona nirya kwetena kira ilinto ati kareboka dengloramwe. Ato kuramwe bok, er malyi ai ining kum danana kum kuramwe, erda tabakoka ining yibarmururamwe. A deyok aryi, a ner mambul weik dororamwe. 27-28Mambul weik dororamuryi, “Er Yesus bira dib ati ninyi kwetesurur,” en uram sirya kekebmouci, Er Yesus dam yanmou. Ura, erci, “Niryi Yesus alib ongon aling kubkub talebdenyi aryok, Er mikib aryi ni kwetebkwamanir,” tenebmou. Ura, erci Er Yesus dongtam bindoka Er alib ongon aling kubkub asi talebdenmou. 29Ato kuboka talebdenmou uca, er malyi ai ining yibarmururamwe ara kum danmou. Ba, er u yiramwe dinyi sirya kwetebmou asi bikdanmou.
30A ner aryi talebdenmou asi, Er Yesus biryi, “Ninyi kweteran mikib ton anaboka ninyi kwetenmar,” tenen bikmou. Ura, Erci tiklobmouci, sun Er dongtam milibmai nang asi asibdenmou. “Ni alib ongon aling kubkub ara unanyi biryi talebdenmanir do?” eboka asibdenmou. 31Uca, Er miliramnyi nang aryi, “Nai Du, Kanda unato ati ato eboka asibdenmasirim do? A dibderum, ninyi ilinto ibdongoboka milibmaking deyok aryi kubmakir,” ebmai.
32Ato ebmai bok, Er Yesus biryi, “Unanyi kum una ner kum aryi Nisi talebdenmanir do?” tenen dibkankanikdenmou. 33Dibkankanikdenmou bok, Er Yesus dongtam kuboka talerbinmou ner ara, “Nun Du biryi nisi kwetebnir,” tenen bikdanmouci, a ner aryi, “Erci nisi kerebkwamanir ati ebmar do?” tenen er ilil asa aryi sirim talebmou. Bok, sirim asa aryi Er Yesus dam yandoka er kutam ikdongobmou. Ikdongobmou ura, erci Er Yesus bisi ato ebmou. “Nai, niryi Kansi talebdenabkunwe. Ara, ni bunga ining yibarmururanou asi, ‘Kanci ni kwetebnute,’ tenebmakinci, kansi talebdenabkunwe,” ebmou. 34Ato ebmou ba, Er Yesus biryi a ner asi, “Ni nebnyi, kanci Nisi diboka tenebmanirim ati, Niryi kansi sirya kwetebmakin. Iya kwetebmakin ati, kan kanya kilkil kubkiribok, kan ai ur birum,” ebmou.
35Er Yesus biryi a ner ab tonkwa uram tuba sisingmarei ura, Yairus bira er Musa Uram eteren ai kalingnamunyi bira dibde tikmou. Dibde tikmou asi er ai ninyi ton yanmaici, ato ebmai. A nang ara Yairus ai aryi kuboka yanmai ura, Yairus bisi ato ebmai, “Nai, kan nebnyi sirya dibmar. Ati, kanci nun nai eteresinanyi bisi, ‘Ni nebnyi kwetebnurum,’ ena takdum,” ebmai. 36Asi, Er Yesus biryi kekebmouci, a nang enmai uram siklibkweteboka Yairus bisi ato ebmou. “Ni kwit e, kan mambul kanya bona kum. Nira mikibnyi kunun ati, Niryi kan nebnyi asi teleb kubdeibkun. Ati, kanci Nisi dib tenebnurum,” ebmou.
37Ato ebmou ura, Erci sun milibmai nang asi, “Sun nirya ara nunsi milibsin kum, erda Petrus ab, Yakobus ab, Yakobus er weit Yohanes ab sun winiryok nang akwe nun milibsurum,” ebmou. 38Ebmou ura, barabyi ani, Yairus ai bindoka diramnyi uca, akai dam ninyi ilinto bukmai. A nang bukmaici, urumna eboka mot yaboka, “Yairus nebnyi, Yairus nebnyi dibmar,” engenmai asi eibmai. 39Ura, Er Yesus biryi a engenmai nang eibmouci, Erci Yairus ai wekokaburyi, sunsi ato ebmou. “Uram kilikdarur se! Unato ati, sunci urumna eboka mot yaboka engenmarum do? A nebnyi ara iya kum dibmar. Eda, er wi mabmar,” ebmou. 40Ato ebmou asi akai umbura wekmai nang aryi kekebmai ura, ato ebmai. “Bohoi, tola ati ebmara,” tenebmaici, Er Yesus biryi ebmou to dib kum tenebmai. Ba, Er Yesus biryi a ninyi asi, “Baitam bindobdarur,” eboka yakwetebmou.
Ura, Erci er nai ab, er kwin ab, Er miliramnyi nang winiryi nang ab asi inibdobmou ura, a nebnyi maibmai ai binmou. 41Binmai ura, Erci a dibmou nebnyi taruk asi talebdongoboka a nebnyi asi, “Talita kum,” ebmou. Ara, nun uram deib ara, “Ni nebnyi, bukokminci, tikokdum,” ebmou. 42Ba, a nebnyi diba dibmou asi, kam bukokmouci, tikokaburyi, er yuk yibinmou. A nebnyi er kwalina ara kwalina amolbaryi kwaliamnyi nebnyi asi diba dibmou bok, Er Yesus biryi kam bukeibmou. A nebnyi kam bukokmou deyok ara sun akai buluboka wekmai nang nirya aryi, “Nai e,” tenebmai. 43Ato tenebmai ati, Er Yesus biryi sunsi, “Yuk nang asi a kubmar to ebdongobmunyei,” ebkatabmou. Liki bitinyi winiryi ato ebmou ura, Erci sunsi ato ebmou. “A nebnyi asi yina karebmun ba, er ur yibdur,” ebmou.
Currently Selected:
Markus Uram 5: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
