Markus Uram 8
8
Er Yesus biryi ilil tenen dinyi kiknibmou uca, ninyi empat ribu baryi nang aryi roti kwaning kikiman yibmai uram
8:1-10
1Kunmai ani, uki tentok tum aryi ninyi ilinto Er Yesus dam bulubmai. Bulubmaici, mabmai ani, uki winiryi kubmou ura, sun yina yibkwamai bok, yina ton kum kubmou. Ba, Er Yesus biryi Er miliramnyi nang asi, “Ni dam yandarur,” eboka nabmou. 2Nabmou ura, Erci sunsi ato ebmou, “A bulubmang nang asi Ni bico kubmanir. A bulubmang nang ara nun ab tonkwa uki winiryi kunmab uca, yina kum yibmab ati ebman. 3Niryi a nang asi, ‘Sun atei yuk-yuk bindarur,’ ebnyi ba, kwaning atan-atan a baronmangiryi bisik noutam lalakingnyei. Ton nang ara dam kum mutuk aryi kuboka yanmang ati, sun yina kum yibmangiryok, sun atei tamurbanmangnyi ura, kwaning atana aryi diblalakingnyei,” ebmou. 4Er Yesus biryi Er miliramnyi nang asi ato ebmou ba, sunci Ersi ato ebmai. “Nai Du, nunda ninyi kun kum mutuk asi kunmab ati, nunci roti kwaning ara dankiryi dekdobtibyi uca, a nang nirya asi yina yibkarebtibyi do?” eboka asibmai. 5Ato eboka asibdenmai uca, Erci sunsi, “Sunda roti kwaning tokol ara unabaryi bobmarum do?” eboka asibdenmou. Ba, sunci Ersi, “Nunda roti kwaning tokol ara tabaryi a bobmab,” ebmai. 6Ebmai ura, Er Yesus biryi sun bulubmai nang asi, “Tukwe deici bukdarur,” ebmou. Ura, Erci a roti kwaning tokol tabaryi asi dobtalebmou ura, Er Imtamnyi bisi, “Nai Imtamnyi, Kanci nunsi a yina karebmasirim ati, Niryi Kan si weik eboka kibmakin,” ebmou. Ebmou ura, Erci a roti kwaning toboka-toboka Er miliramnyi nang asi karebmouci, sunsi, “Sunci a roti kwaning doboka sun buluboka bukmang nang asi bokeibde yibindarur,” ebmou. 7Ebmou ura, a kubmou mekinaia bitinyi winiryi asi neiktoto dobtaleboka Erci Er Imtamnyi bisi, “Nai Imtamnyi, Kanci nunsi a yina karebsirim ati, Niryi Kan si weik ebkin,” ebmou. Ebmou ura, Erci a mekinaia sekoka Er miliramnyi nang asi karebmou. Karebmou ura, sunci bokeibde yibinmai. 8Bokeibde yibinmai ura, a nang nirya aryi kikiman yibmai ba, boubmou. Sirya yibmai ura, tobdoba kablobmai dinyi ara buluboka weik tower aling tabaryi asi kibdongobmai uca, langdeibmou. 9Sun roti kwaning yibmai nang ara ninyi empat ribu baryi nang kunmaici, antaniboka yibmai. Sirya yibmai ura, Er Yesus biryi sunsi, “Sun atei yuk-yuk bindarur,” ebmou. 10Ebmou ura, Er Yesus ab Er miliramnyi nang ab co ngun-ngun burwelebindoka anabdobmaici, me kwan deici banmai ani, mutuk si Dalmanuta binmai.
Sun Farisi nang aryi Er Yesus bisi, “Kanda Er Imtamnyi biryi Bokwetebmakounyi kurandim asi nun diboka bikwayeb ati, Kanci ilil tenen dinyi kiknibsurum,” ebmai uram
8:11-13
11Binmai ura, sun Farisi nang ara Musa kerek sengna lilibde kunuramnyi nang ton Er Yesus dam yanmai. Ura, sunci Ersi ato ebmai, “Nai, nunci Kansi asirden dinyi ton asibdenkwankib. Ara, nunci kanti, ‘Erda Er Imtamnyi biryi Bokwetebmounyi kurur do kum do?’ tenekunub deyok aryi diboka bikwayeb ati, Kanci ilil tenen dinyi ara Er Imtamnyi biryi diboka kiknin dinyi asi lak kibsurum,” ebmai. A nang aryi ebmaia ara, “Er Yesus bisi malinyi ebtibyi,” tenen Ersi ato eboka ukubdenmai. 12Ato ukubdenmai bok, Er Yesus biryi sun tenen kanya bikmouci, Er kanya dam aryi se tenebmou. Ura, Erci sunsi ato ebmou, “Sun uku kurandum nang aryi unato ati Nisi, ‘Nunci Kansi dib tenebkwayeb ati, ilil tenen dinyi kiknibsurum,’ eboka molobmanurum do? Niryi sunsi diboka ebkwinsin uram asi diboka kekebdobdarur. Sunda Nisi dib kum tenerandum ati, Niryi ilil tenen dinyi sunti lak kum kibkwansin,” ebmou. 13Er Yesus biryi ato ebmou ura, Erci co ngun-ngun dub burwelebinmouci, Er miliramnyi nang ab tonkwa anabdobmai. Ura, “Me kwan otam katum binkwayeb,” teneboka me kwan deici binmai.
“Sun Farisi nang ton er weik sienyi Herodes ton ara malyito kuraming ati, sunci a nang aryi malyi kunuraming to dilibmunyei,” ebmou uram
8:14-21
14Sunda anaboka me kwan deici banmai ura, roti kwaning borona kum uca luba kibloboka binmai ba, co ngun-ngun umbura ara roti kwaning tokol tentok kubmou. 15Asi, Er Yesus biryi sunsi ato ebmou, “Ni kwit yabwe, sun Farisi nang ab, Galilea mutuk kalingnande weik sienyi si Herodes ab ara malyi kun nang kuraming. A nang malyi kuraming to ara roti kwaning asi weik danarande dinyi si ragi ato kurur. Ragi ara roti asi dongoboka inibibyi ura, roti weik danarande. A nang ara neiktoto kuraming. Ara, sunda yuk nang ab tonkwa kuboka malyi kun dinyi kubingnyi uca, sun yuk nang aryi diliboka malyi kun dinyi ilinto kunuraming. Ati, sunci a nang aryi etereraming uram kum kekebmunci, sun malyi kuraming to dilibmunyei.” Ato eboka Er Yesus biryi Er miliramnyi nang asi eterebmou.
16Eterebmou bok, Er miliramnyi nang aryi Er Yesus biryi ebmou to lilibmaici, sunci, “Nunda roti kwaning kum bobmab ati, nun Du Yesus biryi ragi deyok ebmasir,” ebdanmai. 17Ebdanmai bok, Er Yesus bikoka Erci sunsi ato ebmou. “Sunda unato ati ‘Kwaning roti kum bobmab ati, nun Du Yesus biryi ragi deyok ebmasir,’ ebdanmarum do? Sun kanya kat kusurur aryi Ni ebman dinyi ara kum bikmarum do? 18Sunda asing a kubsou bok, asing kum eibmarum do? Sunda amol a kubsou bok, diboka kum kekebmarum do? Sunci Ni kiknibmase ilil tenen dinyi diboka kum teneibmanurum do?” Ato eboka Er Yesus biryi sunsi wenebmou. 19Ato eboka wenebmou cok, Erci sunsi ton ato ebmou, “Ninyi lima ribu baryi nang bulubmai ba, Niryi roti kwaning tokol amubaryok aryi tobmasise ura, a nang nirya yibmai ba, boubmou ara tuba bikmarum do? Ati, a nang nirya yibmai ura, sunci kablobmai dinyi ara buluboka kibdongobmandau uca, weik tower aling unabaryi langdeibmou do?” eboka asibdenmou. Asibdenmou ba, sunci Ersi, “Kibdongobmoubwe uca, weik tower aling amolbaryi langdeibmou,” ebmai.
20Ura, Erci sunsi ato ebmou, “Tonda, yuk tum aryi ninyi empat ribu baryi nang bulubmai ba, Niryi roti kwaning tabaryi tobmasise ura, a nang nirya yinmai ba, boubmou ara sun tuba bikmarum do? A nang nirya sirya yibmai ura, sunci kablobmai dinyi buluboka kibdongobmandau uca, weik tower aling unabaryi langdeibmou do?” Ato eboka asibdenmou ba, sunci Ersi ato ebmai, “Kibdongobmoubwe uca, weik tower aling tabaryi langdeibmou,” ebmai. 21Ba, Erci sunsi, “Ura, unato ati sunbabyi walwal tuba kusurur do?” Ato eboka Er Yesus biryi Er miliramnyi nang asi wenebmou.
Er Yesus atei Betsaida binmouci, asing kuamunyi bisi kwetebmou uram
8:22-26
22Ura, Er Yesus ab Er miliramnyi nang ab me kwan deici banmai ani, me kwan katum tingbinmai atei si Betsaida dam binmai. Ura, ton nang aryi asing kuamunyi bisi Er Yesus dam boyanmaici, Er Yesus bisi ato ebmai, “Nai Du, Kanci nun kwit asing bam asi bol libdeminci, kwetebdum,” eboka molobmai. 23Ba, Er Yesus biryi asing kuamunyi bisi taruk taleboka akatei aryi kuboka baitam bobinmou. Baitam bobinmou ura, Erci si maka tulubdeiboka asing kuamunyi asing bam deici asi likdeiboka Erci Er taruk er asing kuamunyi asing deici tam deibmou. Ura, Er Yesus biryi ersi, “Kanda asing sirya eibmarim do kum do?” eboka asibdenmou. 24Ato eboka asibdenmou ba, erci er asing erekmouci, dibdenmou. Ura, erci Er Yesus bisi ato ebmou, “Nai Du, bita kum eibkatabman. Tonda, ninyi yibanmang ara co asi kumwe aryi dortorande to kunmar,” ebmou.
25Ebmou ura, Er Yesus biryi Er taruk asi asing kuamunyi asing deici tam tubto deibdongobmou. Ba, utotoa-utotoa nirya asi diboka asing eibkatabmou. 26Ura, Er Yesus biryi ersi ato ebmou, “Ni mi, kan atei tamurbirum. Eda, kanci Betsaida atei asi tubto biminyei,” ebmou.
Petrus biryi Er Yesus biti, “Nai Du, Kanda Er Imtamnyi biryi Bokwetebkounyi kurum,” eboka lak ebmou uram
8:27-30
27Ura, Yesus ab Er miliramnyi nang ab Betsaida atei aryi anaboka banmai ani, Kaisarea Filipi mutuk binmai. Bisik noutam banmaici, Er Yesus biryi Er miliramnyi nang asi, “Sun ninyi aryi Nisi unanyi enunung da?” eboka asibdenmou. 28Ba, sunci Ersi ato ebmai, “Ton nang aryi, Kanda, ‘Yohanes ninyi me dongoramunyi kurur,’ eranking. Yuk nang aryi, Kanda, ‘Er Imtamnyi Uram ebdeibmaca bobaramunyi Elia kurur,’ eranking. Tonda, yuk nang aryi, Kanda, ‘Er Imtamnyi Uram ebdeibmaci to lak etereramnyi nang atonyi kurur,’ eranking” ebmai. 29Ebmai ba, Er Yesus biryi sunsi ato ebmou, “Ura, sunda Nisi unanyi teneranurum do?” ebmou. Ato eboka asibdenmou ura, er Petrus biryi Ersi, “Nai Du, Kanda Er Kristus bira Er Imtamnyi biryi bokwetebkounyi Ninyi Lemsurumnyi kurum,” ebmou. 30Ato ebmou ba, Er Yesus biryi ersi ato ebmou, “Kanci dib ebmanirim bok, sunci sun yuk nang asi ato eboka lak eterebmunyei,” ebmou.
Er Yesus biryi Er miliramnyi nang asi, “Ninyi aryi Nisi obningnyi ura, dibmanyi ani, kam bukokwan,” eboka eterebmou uram
8:31–9:1
31Ebmou cok, Er Yesus biryi Er miliramnyi nang asi ato eboka eterebkalibmou. “Ni kwit yabwe, Ni Ninyi Dasinyi kunun bok, sun ninyi aryi duboka Nisi mambul weik kubdeibkwaning. Ara, sun Yahudi yala nang deyok nang ab, sun Er Imtamnyi kan ninyi kan noutam kuboka antanirdeirin deyok nang ab, tonda sun Musa kerek sengna etereraming nang ara niti, ‘Malinyi,’ teneboka dokdonokwaning. Dokdonokoka abningiryi, sunci Nisi, ‘Dobtaleboka obdarur,’ eboka arukingnyi ura, ninyi aryi nisi mambul weik kubdeibningiryok, obkwaning. Ba, dibmanyi ani, uki winiryi tum berekci ura, Ni kam bukokwan,” eboka eterebmou. 32Er Yesus biryi sunsi ato lak eterebmou ba, Petrus biryi Yesus bobinmou ura, er ab tonkwa yuk sisikmareici, Yesus bisi ato ebmou, “Nai Du se, takdum. Ninyi aryi Kansi obkwanking uram kekena ni li.” Ato eboka Petrus biryi Yesus bisi kerebmou. 33Kerebmou ba, Er Yesus biryi tikoka Erci Er miliramnyi nang asi Er urasin deibmouci, Petrus bisi ato ebmou, “Ukurdenmanirimnyi, kanda bindobdum. Kanda Er Imtamnyi biryi teneirinurur dinyi kum bikmarim. Eda, tukwetam dinyi akwe tenebmarim,” eboka wenebmou. 34Er Yesus biryi Petrus bisi ato eboka wenebmou ura, Erci sun miliramnyi nang ab sun yuk bulubmai nang ab asi, “Ni dam yandarur,” eboka nabmou. Ura, Erci sunsi ato ebmou, “Unanyi-unaner aryi, ‘Er Yesus bisi milibtinyi,’ tenebdobci sal kum ner kum ara sun teneramingnyi dinyi asi dongtam kibdeiboka Er Imtamnyi kanya teleb kurdeirin dinyi akwe kununa teleb. Tonda, sun Nisi milibningnyi nang ara ato tenena teleb. Ara, sunci, ‘Co lase ara ikin dinyi takubdeiboka nisi obningnyi ababyi, nira kilkil kanya kuboka ni Du bisi iya milibkwan.’ Sun Nisi miliraniting nang aryi ato tenena teleb. 35Ba, unanyi-unaner aryi, ‘Ninyi aryi obningnyei,’ tenen Nisi kum milibnici ura, Anyi-a ner ara iya dibkwande. Ba, unanyi-unaner aryi Teleb Uram lak etereboka Nisi iya miliranici ura, Anyi-a ner asi ninyi aryi obmangnyi bok, Er Imtamnyi biryi a nang asi kam bukeiboka iya lebkwande. 36Unanyi-unaner aryi im dangna tukwe dangna bona nirya bobdobmate ani, sirya dibci ura, Anyi-a ner aryi er bona asi tuba borante do? Ato tenen kum. 37Unanyi-unaner dibci ura, anyi-a ner aryi er bona nirya karebte obura, kam bukokte do? Ato tenen kum.
38Sun ukuryok kuraming nang ara Er Imtamnyi bisi tangloraming nang kuramiryok, iya malyi kuraming nang kunung. Ati, unanyi-unaner aryi, ‘Ninyi aryi nisi dokdonokningnyei,’ tenen Ni deyok ab Ni eterena deyok ati, alyi kubte ura, Anyi-a ner asi, nibabyi neiktoto alyi kubdeibkwanir. Ara, Ni Ninyi Dasinyi aminda Er Imtamnyi Uram eryuryangan nang ab imtam aryi kuboka tamuryanyi ura, Niryi a nang asi dokdonokwan. Nira Ni Nai Imtamnyi bitonyi kuboka milil weiknyi ton iya mikibnyi kubniryok, tamuryanyi ura, sun imtam ai aryi Uram eryuryangan nang ilinto milibkwaning ba, Niryi a nang asi dokdonokwan.” Ato eboka Er Yesus biryi Er miliramnyi nang ab sun yuk bulubmai nang asi eterebmou.
Currently Selected:
Markus Uram 8: MTG
Highlight
Share
Copy
Want to have your highlights saved across all your devices? Sign up or sign in
@LAI 2007 (New Testament), @LAI2022 (Old and New Testament)
