Matio' 21

:Yusu' 'si :Julu'slehn dih, 'de 'beor' ka 'di

(Mk 11.1-11; Lu 19.28-40; Jn 12.12-19)

1:Yee' :yeh an 'koan'-dih-a :Julu'slehn dih, 'de on nyni-a 'o :gwlor an 'da-dih-a :Behfe'yi 'di :or :ne-a 'o 'do 'Orle-tluh ken, :yee' :Yusu' dbo or-a'a: bo :na-nyor⧾-a' nyor⧾ 'sororn' ybei', 2or 'dae:, A mu 'de :gwlor-yu: :dao' :or :ne-a 'de :a ybei' 'di. :Yee' 'do :dha :due' :dao', a mu 'dhornke: :eh :muae-eh dih 'ye-:, :eh :korn-a 'yu :ne-a 'o eh bo. A bhehn-dih-ih, a 'ye-ih 'noror 'on bo :ya. 3:Mor nyor :za deh-' 'de a bo, :yee' a zela-or :gwluhuh', a 'dae:, :Gwlor :baa', or-: 'bhorn-ih. Or mu-ih :dbo :kana.

4Deh :daa, eh :no-eh:-', 'de Nyorsoa-a' wlu 'ye dhih 'jeh-' 'kpa :ka or-a' wele-eh: :po-nyor no-a eh-a' :za-a' see, or no-a,

5A zela: 'Zayorn-nyor⧾ :gwluhuh', a 'da,

A :gbee'e:. A-a'a: 'keen :wor yi 'noror a bo.

Or-: :ya or-a' 'jeh ya, 'de :or :dhe 'o 'dhornke ken dih,

:eh no-a 'dhornke-yu.

6'De :Yusu'-a'a: bo :na-nyor⧾ mu, on no :ka or no-a an-a' wlu worn 'dhu-eh, 7'de on kpa 'de or bo 'dhornke-: 'dekorn: eh-a' 'yu-: on slo 'o en ken an-a'a: 'ylii dih, 'de or :dhe 'o 'zeehn: neh ken dih. 8:Yeh or :dhe-a 'o dih, 'de or mu-a, :yee' :gwlor-nyor:⧾ :dhulu', mo-: :an slo an-a'a: 'ylii dih 'do :gwie 'i. :Yee' nyor⧾ :noo', mo-: :an jla 'kavan⧾ 'do tu⧾ 'i, 'de an po-ih :gwie bo dih. 9:Yee' nyor⧾ :dhulu' :dao' :an na-a 'o or ybei'-: 'dekorn: :yuh :an zi-a 'o or 'de-: an po 'geh⧾, an no, Dhih-a' 'i 'beh-a' 'do :Debe'-a' 'yu bo. :Bhorlie' 'do or bo :or yi-a 'de, 'de :Gwlor :baa'-a' 'nyne 'di. Dhih-a' 'i 'beh-a' 'do Nyorsoa :or :ne-a 'de yai' bo.

10:Yee' :yeh :Yusu' 'si-a :Julu'slehn dih, :yee' gwlor dhile: dih, 'de nyor⧾-a' klehkpeh, an dhele an-a' 'jeh dih, an no, Or-a' 'nyne :or :dhe dih :eh?

11'De :gwlor-nyor:⧾ :doru' :dao', on 'da, Nyorsoa-a' wele-eh: :po-nyor: :Yusu' :oo', :or 'wluh-a 'Nazla-gwlor, 'de :Galali'i-bluhba ken.

:Yusu' no nyor⧾ dih 'do Nyorsoa-a' 'sla ybei'

(Mk 11.15-19; Lu 19.45-48; Jn 2.13-22)

12:Yee' :Yusu' mu 'o Nyorsoa-a' 'sla ybei', 'de or no nyor⧾-a' klehkpeh dih :an plo-a deh⧾-: :korn :yuh :an dhen-a deh⧾-:. Or tba nyor⧾ :an zian-dih-a 'wlii 'i, an-a'a: 'tebo⧾ 'yi glu, de or tba nyor⧾ :an plo-a pabu'⧾ an-a'a: ken :dhe-deh⧾ 'yi glu :ke. 13'De or :wlu 'de on bo, or 'dae:, Eh 'chle-eh:-' 'de Nyorsoa-a' 'chlee-deh 'di, or 'da, 'An-a: 'gbu :korn on 'ye :dha nyor⧾-a wlu-dih-a 'de 'on bo 'da-dih-eh:. Jorwor: a :mor no-uh 'ylii'-nyor⧾-a' 'di 'ti-gbu-'.

14:Yeh or :ne-a 'o, :yee' 'doror'-nyor⧾-: 'dekorn: :kloror-nyor⧾-: mo-: yi 'de or bo, 'de or 'puh-dih-uh. 15Jorwor: :yeh Nyorsoa-a' 'slaa: :za-nyor:⧾ :klaba'⧾-: 'dekorn: nyor⧾ 'tele' :torne-nyor⧾-: on 'ye-a deh⧾ :kolu'⧾ or no-a, 'de on 'ye-a 'nynuu: :nyene' :an po-a 'geh⧾, 'do Nyorsoa-a' 'sla ybei', an no-a, Dhih-a' 'i 'beh-a' 'do :Debe'-a' 'yu bo, :yee' on 'kpa-' 'chehn.

16'De on dhele-or dih, on 'dae:, :An 'worn dhih 'nynuu: :daa, an za-a-' 'weh :e?

'De or 'da, Keen'. 'An 'worn-ih'. Jorwor: a 'see-eh zlo 'de Nyorsoa-a' 'chlee-deh 'di :e? :Ka Nyorsoa 'da-a, or no-a, 'Nynuu: :nyene'-: 'dekorn: 'nynuu: :bleheh'eh⧾-: an mu 'an 'nyne 'ya :po deh 'jeh neh o.

17:Yee' :Yusu' 'wluh 'o on bo :Julu'slehn 'weh, 'de or mu :Behtani'i, 'do :wor or mu 'pehn 'da.

:Yusu' po 'fe-tu 'chlo bo

(Mk 11.12-14, 20-24)

18:Yee' zorn bo-mlai', :yeh :Yusu'-a mu-a 'de :Julu'slehn de, :yee' 'moeh: no-or. 19:Yee' or 'ye 'fe-tu: 'do :gwie: worn 'i. :Yeh or 'ye-uh'-a, :yee' or :pa-dih: 'o on bo, jorwor: or :se-' deh 'ye 'de on ya, wlon⧾ :due', me-: 'yi 'de on ya. :Yee' 'do eh-a' dha, or :wlu-' 'de tu :dao' bo, or 'da, :Mor tu :daa, :on 'se 'ba 'buo' po :neheh'. :Yee' 'do :dha :due' :dao', 'fe-tu: :dao', on :klor-'.

20:Yee' :yeh or-a'a: bo :na-nyor⧾ 'ye-eh, :yee' eh :florn-dih-uh-: worn, 'de on 'da, :Eh no tu :daa, on no :ao' :klor-a' 'yli :a bla-a 'i :eh?

21'De :Yusu' zela-uh :gwluhuh', or 'da, Dhih 'jeh, 'an zela a :gwluhuh', :mor a 'ble dhih 'jeh-' :po-eh, 'de a-a' :porluh⧾ 'ye :ao', en se dhobo:, :yee' deh 'on no-a 'do tu :daa bo, a mu eh-a' no-a' 'beh-dih: :ke. 'De eh :se deh :daa :due', jorwor: keen' :mloror' :mor a :wlu 'de tluh :daa bo, :mor a 'da, :Mor tluh :daa, 'wluh-dih: :gwliin'-', 'kpa 'de yobo' worn, :yee' eh mu :no-eh:. 22:Mor a :taa 'de Nyorsoa bo wlu 'do deh-a' dhih bo, 'de a 'ye-or' dhih 'jeh-' po, :yee' a mu-eh 'ye-:.

:Or 'nyi :Yusu' 'kpih :eh?

(Mk 11.27-33; Lu 20.1-8)

23:Yee' :Yusu' mu 'o Nyorsoa-a' 'sla ybei', or 'ye nyor⧾ deh :torne:. :Yeh or torne-a nyor⧾ deh, :yee' Nyorsoa-a' 'slaa: :za-nyor:⧾ :klaba'⧾-: 'dekorn: :Jueh'-nyor⧾-a' 'bluhba: :korn-nyor⧾-: mo-: yi 'o or bo, 'de on dhele-or dih, on 'dae:, Dha :on :za 'kpih, 'de :an no deh⧾ :daa :eh? :Or 'nyi :on 'kpih :daa :eh?

24:Yeh on dhele-or dih, :yee' or :wlu-' 'de on bo, or 'dae:, 'On 'ble deh :due', 'an mu a dih dhele: :ke. :Mor a zela: 'on :gwluhuh' :weh, 'de 'on 'ye a :gwluhuh' zela: :ke, :dha 'on :za-a 'kpih, 'de 'an no-a deh⧾ :daa. 25Nyor⧾ 'ni 'dlu :po :Jororn'-a' nyor⧾ 'ni 'dlu :po-deh: :daa, eh 'wluh 'de Nyorsoa bo :e? :Ae' eh 'wluh 'de :gwlor-nyor⧾ bo ke?

:Yeh or dhele-uh-a dih, :yee' an polo-ih' 'de an-a' 'jeh 'nyne-', on 'da, :Mor :a 'da, 'De Nyorsoa bo :oo', :yee' or mu :ao', :Eh :korn dhih, 'de a :se-or' dhih 'jeh-' po 'da :eh? 26'De mor :a se 'beh-dih: :a 'ye :ao', 'de :gwlor-nyor⧾ bo :oo'. Deh no-eh, an-a' klehkpeh, on 'duo: :Jororn'-' 'weh, or 'ye Nyorsoa-a' wele-eh: :po-nyor no, 'de :a ple an-a' :fano. 27Eh-a' dhih, on :wlu-' 'de or bo, on 'dae:, :A se-eh yubo:.

:Yeh on 'da :ao', :yee' or 'dae: 'de on bo, :Yee' 'on :se-' a :gwluhuh' zela: i :ke, :dha 'on :za-a 'kpih 'do deh⧾ :daa en-' no-a' bo.

Nyor-kpalu⧾-nynuu 'sororn'-a' 'dlan

28:Yee' :Yusu'-a kpa or-a' wlu 'dlu bo, or 'dae:, :Kaa a-a' :porluh⧾ no eh-a' 'ye-a' :mor nyor-kpalu :due' 'ble nyor⧾-kpalu⧾-nynuu 'sororn', 'de or 'ye 'de :klaba' nor bo mu, 'de or 'ye :ao', 'An 'yu, mu 'de 'gle :on 'ye :koan no 'zean' o. 29:Yeh or :baa' 'da :ao', :yee' or 'da, or :se-' 'worn. Jorwor: :yeh ti-kpor 'pehn-a 'o dih, :yee' or 'bili: wlu-' dih, 'de or mu 'de 'gle. 30:Yee' or :baa' mu 'de 'yu-a' 'sororn' nor bo, 'de or :za deh :due' :dao' :neheh' 'de or bo. :Yeh or :baa' 'da :ao', :yee' or 'da, :Ao, 'on-ba:. Jorwor: or :se-' mu. 31'Do 'nynuu 'sororn' :daa 'nyne bo, :yoror no deh on :baa'-a 'bhorn-a on 'ye-a' no :eh?

'De on 'dae:, :Klaba' :nor 'o.

'De :Yusu' 'dae:, Dhih 'jeh, 'an zela a :gwluhuh', 'taa-deh:⧾ :za-nyor⧾-: 'dekorn: :bhaa'-nynor⧾-: mo-: :an mu :zai'-nyor⧾ :no, :on 'ye 'de a ybei' :korn, 'de a 'ye 'de Nyorsoa-a' nyor⧾ wlu 'ken :korn-eh 'zorn pa. 32Deh no-eh, nyor⧾ 'ni 'dlu :po :Jororn' yi-a 'de a bo, or :torne: a 'yi 'sleh-gwie:, a 'ye-a' kpa 'weh. Jorwor: a se-or-' dhih 'jeh-' po. 'De 'taa-deh:⧾ :za-nyor⧾-: 'dekorn: :bhaa'-nynor:⧾ :dao'-: mo-: po or-a' dhih dhih 'jeh-'. Keen' :mloror' :yeh a 'ye-a deh⧾ :daa :sloror', :yee' a :se-' a-a' deh⧾-zon⧾ dih 'tali: 'gboror:, 'de a 'ye 'de Nyorsoa bo 'bili:, 'de a :se-' or-a' dhih dhih 'jeh-' po.

Nyor⧾ gle :po-eh: 'de 'kwa, an-a' 'dlan

(Mk 12.1-12; Lu 20.9-19)

33:Yee' :Yusu' :wlu-' :neheh', or 'dae:, A :to 'dlan :noror' :daa :dou'⧾ bo. 'Yu :due' :oo', :or 'ble 'kwla, 'de :or no gle, 'de or 'dhu 'glee-dubu'⧾ 'de eh 'di, 'de or za-ih gba-dih-gba 'de dih. :Yeh or no :ao', :yee' or 'blu 'bie', :dha on 'ye-ih'-a' :za-dih:, 'de or po gba :dhorno', :dha nyor⧾ 'ye-a' gle :dao' ken :fuo-dih:. :Yeh deh⧾-a' klehkpeh, en :gweh-a 'i, :yee' or po-eh 'de nyor⧾ 'kwa, on :ne or 'ye en-' 'bi-' gble. :Yee' :yeh or no :ao', :yee' or mu :gwele:. 34:Yeh eh no-a deh⧾ :dao' en-' 'bi-a' 'kpaan'-ti, :yee' or dbo or-a'a: 'bhoi-nynuu 'de nyor⧾ or po-a gle 'de 'kwa bo, on 'ye or-a' ne, or bo dbo. 35:Yee' nyor⧾ :dao', on kpon or-a'a: 'bhoi-nynuu 'weh, 'de on bla :due', on 'dba :due', 'de on :tba-dih: :due' sobu'⧾ dih, or 'ye 'meh. 36:Yee' or dbo 'bhoi-nynuu: :noo', mo-: :zi 'o :zai' no-', 'de :ka on no-a :zai' no-a' dhih, 'de on no :ao', an-a' dhih :neheh'. 37'De or 'bor-dih: 'o, or-a'a: 'yu-a' dbo 'da, 'de on bo, or 'da, An mu 'an-a: 'yu deh-' 'ye-:. 'De or dbo-or. 38Jorwor: :yeh nyor⧾ :an pobo-a 'o or :baa'-a'a: gle bo dih, on 'ye-or, :yee' an wlu-' 'de an-a' 'jeh 'nyne-', an no, 'Yu :or mu-a or :baa'-a'a: :kororn-deh⧾ :korn, or-: 'o, :or 'yle. A 'nyi, :a 'dba-or, 'de :a 'ye or-a'a: :kororn-deh⧾ :korn. 39'De on kpon-or, on za-or 'o 'gle, on 'dba-or.

40:Yeh :Yusu' gweh-a 'dlan :dao', or-a' po-a' 'i, :yee' or dhele-uh-: dih, or 'dae:, :Yee' :mor 'yu :or :korn-a gle, :mor or 'yle, :yee' :kaa or mu nyor⧾ :dao' :an pobo-a 'o or-a'a: gle bo dih, an-a' dhih :no :eh?

41'De on 'dae: 'de or bo, Or mu 'kulu-nyor:⧾ :dao' 'dba-:, 'de or 'ye 'de nyor⧾ :noo' po, :on :ne or mu-a gle-a' dii-deh⧾-' :gble, :mor en-' 'kpaan'-ti nyni 'o.

42'De :Yusu' dhele-uh dih, or 'dae:, Deh :daa :eh :ne-a 'de Nyorsoa-a' 'chlee-deh 'di, a 'see-eh zlo :e? :Eh no-a,

Tu-a' :yuh 'gbu :po-nyor⧾ po-a dih :dee',

tu-a' 'jeh :dao', mo-: no 'gbu-a' :zi-tu :naa.

:Gwlor :baa' :oo', or-: no deh :daa.

'De mor deh or no-a, eh no deh :kolu' 'de :a 'yli-e.

43'Do eh-a' dha, 'an zela a :gwluhuh', Nyorsoa-a' nyor⧾ wlu 'ken :korn-eh-a' 'zorn :pa-eh mu 'de a 'kwa 'wluh-:, eh 'ye nyor⧾ :on :se-a :Jueh'-nyor:⧾ :an mu-a eh-a' 'bi :tlo, eh 'ye-uh' 'nyi-eh:. [ 44'De nyor-beh: :or mu-a 'o tu :daa ken dih 'ga-:, or mu dih :wa-dih-eh:, 'de nyor-beh: tu :daa, an mu-a 'o ken 'kpa-:, or mu :sun-eh:, or 'ye :bhebe' no.]

45:Yee' :yeh Nyorsoa-a' 'slaa: :za-nyor:⧾ :klaba'⧾-: 'dekorn: :Falasi'i-nyor⧾-: on 'worn-a 'dlan⧾ :daa :Yusu' po-a, :yee' on yubo-eh', :ka or wlu-dih-uh-a 'bhun dih. 46:Yee' 'do eh-a' dha, an 'bhorn on 'ye-or' kpon, jorwor: an ple nyor⧾ :doru' :ne-a 'o, an-a' 'yli 'weh. Deh no-eh, an 'duo-or' 'weh, or 'ye Nyorsoa-a' wele-eh: :po-nyor no.

Currently Selected:

Matio' 21: TCHKR

Highlight

Copy