Matio' 26
26
On 'dhu dhih, on 'ye :Yusu' 'dba
(Mk 14.1-2; Lu 22.1-2; Jn 11.45-53)
1:Yee' :yeh :Yusu' gweh-a deh⧾ :daa, en-' klehkpeh-a' :za-a' 'i, :yee' or :wlu-' 'de or-a'a: bo :na-nyor⧾ bo, or 'dae:, 2A yubo-eh', :mor eh no 'we 'sororn', :yee' 'Meh-a' :bla-dih: 'dlu dih-gor-a' ti nyni 'o 'weh, :yee' 'yu an 'da-dih-a Nyor-kpalu-a' 'yu-a mu 'kwla :za-eh:, 'de on 'ye-or' 'o tu 'i :kor-dih:.
3:Yee' 'do ti :dao' 'di, Nyorsoa-a' 'slaa: :za-nyor:⧾ :klaba'⧾-: 'dekorn: :Jueh'-nyor⧾-a' 'bluhba: :korn-nyor⧾-: mo-: :gweh-dih: 'o Nyorsoa-a' 'slaa: :za-nyor⧾-a' nyor :klaba' bo, an 'da-dih-a :Kai'fa, 'do or 'bli 'sla ya. 4'Do :wor on 'dhu-dih: dhih, on 'ye :Yusu' 'sleh dih :po-dih:, on 'ye-or' kpon, 'de on 'ye-or 'dba. 5Jorwor: an wlu-' 'de an-a' 'jeh 'nyne-', an no, :A 'bor, :a-a' :kpon-or' 'do gor-'. :Mor :a no-eh, :yee' eh mu 'kpunu: 'kpun yaa'e dih :za, 'noror :gwlor-nyor:⧾ :doru' :daa 'nyne-' 'bla.
'Nynor 'chehli: :Yusu' :pofi'orn 'dlu
(Mk 14.3-9; Jn 12.1-8)
6Eh :korn 'we-eh :due', :yee' :Yusu' :ne 'de Samor', :or yau-zon-weh kpon-a :dee', 'de or 'bli 'gbu, 'de :Behtani'i. 7:Yeh or :ne-a 'de, 'de or di-a deh, :yee' 'nynor :due', or-: yi 'o or bo, or-: :ya 'de :zolo-eh: :eh :no-dih-eh sobu' an 'da-dih-a :alaba'ta, :eh :ne-a :pofi'orn: :or 'kpa-a deh ken 'gabaa 'di. Or-: or 'chehli: 'do :Yusu' 'dlu. 8:Yeh or-a'a: bo :na-nyor⧾ 'ye-eh, :yee' on 'kpa-' 'chehn, on 'da, :Eh :korn dhih, 'nynor-a dola :pofi'orn: :nmaa'e: :daa dih :eh? 9:Mor nyor⧾ plo :pofi'orn: :daa :dee', 'wlii: an mu-a 'ye-:, en mu 'wlii: :dhulu' :no. 'Wlii: :dao', me-: :a :korn :a 'ye nyor⧾ :on se-a deh-a' :za-da 'ble 'nyi :dee'.
10Jorwor: :ka :Yusu' yubo-eh 'i, :yee' or dhele-uh-: dih, or 'dae:, :Eh no 'de a 'beh-dih-or 'worn dih :eh? Or no deh :nmaa'e: 'do 'on bo. 11Nyor⧾ :on se-a deh-a' :za-da 'ble, an mu dha a bo :ne, 'do ti-a' klehkpeh bo. Jorwor: 'on :se-' dha a bo :ne i, 'do ti-a' klehkpeh bo. 12:Pofi'orn: :daa, or 'wla-a 'on-', or po 'an yau 'kpa, 'do 'an dih nma-dih-eh bo, :mor 'on 'meh. 13Dhih 'jeh, 'an zela a :gwluhuh', :dha klehkpeh Nyorsoa-a' tubo-wlu:⧾ 'jeh-a mu-a :po-dih-eh, dha yao 'zorn-a' klehkpeh, deh 'nynor :daa or no-a, eh mu-' :za-eh:, 'do or-a' dhih-a' :gwluhuh' bo :po-dih-eh bo.
:Juda' 'worn-', or 'ye :Yusu' plo
(Mk 14.10-11; Lu 22.3-6)
14:Yee' :Yusu'-a'a: bo :na-nyor:⧾ :on :korn-a :bhue: 'yor :ne-a 'sororn', an-a' nyor :due', an 'da-dih-a :Juda' :Ehkeh'lior, or-: mu 'de Nyorsoa-a' 'slaa: :za-nyor:⧾ :klaba'⧾ bo, 15'de or dhele-uh dih, or 'dae:, Deh dhie a mu 'on 'nyi-:, :mor 'on :plo-dih: a :Yusu' bo :eh? 'De on zlo 'sebla-wlii-a' :kwlaa taan, me-: on 'nyi-or. 16:Yee' :eh 'wluh-a 'o ti :dao' bo, :yee' or 'bhorn :ka or 'ye-a' no, 'de or 'ye-uh'-a' :Yusu' 'kwla :za-dih:.
'Meh-a' :bla-dih: 'dlu dih-gor-a' dii-deh:⧾
(Mk 14.12-21; Lu 22.7-13, 21-23; Jn 13.21-30)
17:Yee' 'do Se 'vu-bhlee-a' gor-a' :zai'-we-eh 'di, :yee' :Yusu'-a'a: bo :na-nyor⧾ yi 'o or bo, 'de on 'dae:, Dha :an 'bhorn :a 'ye 'Meh-a' :bla-dih: 'dlu dih-gor-a' dii-deh⧾ 'kpa :po-dih: 'do :on bo :eh?
18:Yeh on dhele-or dih, :yee' or :wlu-' 'de on bo, or 'dae:, A mu 'de :gwlor-', 'de nyor-kpalu :due' bo. :Yee' a zela-or :gwluhuh', a 'da, :A-a'a: nyor⧾ deh :torne-nyor 'dae:, or-a' ti nyni 'o 'weh. Or :ne or-a'a: bo :na-nyor⧾-: an mu 'Meh-a' :bla-dih: 'dlu dih-gor 'dhu-:, 'de :on 'bli 'gbu 'di.
19:Yeh :Yusu' 'da :ao', :yee' on no :ka or no-a an-a' wlu worn 'dhu-eh 'weh, 'de on po 'Meh-a' :bla-dih: 'dlu dih-gor-a' dii-deh⧾ 'kpa.
20:Yeh glu gor-a, :yee' :Yusu'-: 'dekorn: or-a'a: bo :na-nyor:⧾ :on :korn-a :bhue: 'yor :ne-a 'sororn'-: mo-: :an di-dih deh :dha :due'. 21:Yeh an di-a deh, :yee' or :wlu-' 'de on bo, or 'dae:, Dhih 'jeh, 'an zela a :gwluhuh', a-a' nyor :due', or-: mu 'on :plo.
22:Yeh or 'da :ao', :yee' an-a' :porluh⧾ 'kpa-: 'zorn 'gabaa, 'de an dhele-or dih, :due' :due', on 'dae:, 'Mor :oo' :e? :Gwlor :baa'.
23'De or 'da, A :mor :ne 'an 'gba-a, an-a' nyor :due', or-: mu 'on :plo. 24'Yu an 'da-dih-a Nyor-kpalu-a' 'yu-a mu 'meh-: :mloror' :kpeheh:, :ka eh no-a 'chle-eh, 'do or 'bhun, 'de Nyorsoa-a' 'chlee-deh 'di. Jorwor: 'chlo 'do nyor :or mu-or :plo bo. Eh mu 'yi dih :nmor 'do nyor :dao' bo :dee', :mor or se 'wluh.
25:Yee' :Juda' :or yi-a :Yusu' :plo 'da, or :wlu-', or 'dae:, 'Mor :oo' :e? Nyor⧾ deh :torne-nyor:.
'De :Yusu' 'dae:, Keen', :mor :on 'da, :mor 'o, :yee' :mor 'o.
:Gwlor :baa'-a' gban 'i :ne-dii-deh:
(Mk 14.22-26; Lu 22.14-20; 1 Kor 11.23-25)
26:Yeh an di-a deh, :yee' :Yusu' 'duo: 'bhlee: :kpuan'-' 'weh, or po Nyorsoa-a' 'zio 'do eh bo, 'de or :chehn-dih-eh dih, 'de or 'kwa, or 'nyi-eh or-a'a: bo :na-nyor⧾, or 'da, A 'duo-eh', 'de a 'ye-eh' di. 'Bhlee: :daa, eh-: 'dhu 'an yau-'.
27:Yee' or 'duo: 'korbuh :on 'yi-a 'glee-nomor 'di 'weh, 'de or po Nyorsoa-a' 'zio, 'do on bo, or 'nyi-uh', or 'da, A-a' klehkpeh, a 'na 'glee-nomor: :or :ne-a 'de on 'di. 28Deh no-eh, 'an nyomor :or mu-a dih 'wla-: 'do nyor⧾ :dhulu'-a' deh⧾-zon⧾-a' dhih bo 'ma-dih-eh bo, :or po-a kuo 'kpih ken, 'do a mor-: 'dekorn: Nyorsoa-: 'nyne bo, or-: 'o, :or :dhe dih. 29'An zela a :gwluhuh', 'on :se-' 'glee-nomor: :daa 'na-: i :neheh', eh 'ye 'we-eh: 'On-ba-a mu-a nyor⧾ wlu 'ken :korn 'ken :yeh-dih:, 'de a-: 'mor-: :a 'ye-or' 'na.
30:Yeh on :gweh-a 'i, :yee' on ble Nyorsoa-a' 'zio :po-duh:. 'De on mu 'de 'Orle-tluh ken.
:Yusu' sie ti de, 'de or :za :Piteh'-a' dhobo-dhih-'
(Mk 14.27-31; Lu 22.31-34; Jn 13.36-38)
31:Yeh an mu-a, :yee' :Yusu' :wlu-' 'de on bo, or 'dae:, 'Gwior :yor :daa, a-a' klehkpeh, a mu 'on 'de dih :gba, 'do 'an dhih bo. Deh no-eh, eh 'chle-eh:-' 'de Nyorsoa-a' 'chlee-deh 'di, or 'da, 'An mu 'blae'⧾-a' 'yli-eh bo 'dhu-nyor 'dba-:. :Mor 'on 'dba-or, :yee' 'blae'⧾-a mu dih :gba. 32'De :Yusu' 'dae: :neheh', Jorwor: :mor 'on 'meh, 'de Nyorsoa 'ye 'de 'on :za, :yee' 'an mu a ybei' :mu 'de :Galali'i-bluhba ken.
33'De :Piteh' 'da, :Mor an-a' klehkpeh, on :gba :on 'de dih, 'do :an-a' dhih bo, 'on :se-eh' :no i, :ka ti-a mu-a 'dlu-' :tehn.
34'De :Yusu' 'da, Dhih 'jeh, 'an zela :on :gwluhuh', :mor :soan'-beor 'ye zlo, 'gwior :yor :daa, :an mu 'an dhih-' dhobo:, :on 'ye kpor⧾ taan no.
35:Yee' :Piteh' 'da, Eh-a' :yeh 'dhu, mor-: 'mor-: :a :korn :a 'ye :dha :due' 'meh-dih: :sloror', 'on :se-' :an-a' dhih-' dhobo: i.
:Ka :Piteh' 'da-a, :yee' 'ka-: :Yusu'-a'a: bo :na-nyor⧾-a' klehkpeh 'da :ke.
:Yusu' :wlu 'de Nyorsoa bo, 'do :Gehseh'mani
(Mk 14.32-42; Lu 22.39-46)
36:Yee' :Yusu' :ne or-a'a: bo :na-nyor⧾, on mu 'de :dha an 'da-dih-a :Gehseh'mani, 'de or :wlu 'de on bo, or 'dae:, :Mor 'on :taa 'de Nyorsoa bo wlu 'de 'naa: 'o, :yee' a :dhe dih, dha :dha :daa o. 37:Yeh or :taa mu, :yee' or kpa :Piteh'-: 'dekorn: :Zehbehli'-a'a: nyor⧾-kpalu⧾-nynuu: :ne-a 'sororn'-: 'weh. :Yeh on 'ken-dih:-a 'o dih :weh-beh:, :yee' or-a' :porluh :ku kwa, 'de an 'beh-dih-or 'worn dih. 38:Yee' or zela-uh-: :gwluhuh', or 'dae:, 'An :porluh-a' 'worn dih 'beh-dih-eh: :daa, eh 'bhorn eh 'ye 'on 'dba. A :sie: :daa, 'de a mor-: 'dekorn: 'mor-: :a 'ye-eh' 'yli-eh bo 'dhu.
39:Yee' :yeh or 'beh-dih:-a 'de dih :weh-beh:, :yee' or 'jli-: dih 'do 'bluhbor. 'De or :wlu 'de Nyorsoa bo, or 'dae:, 'On-ba:, :mor eh gweh-eh, :yee' :za 'on 'kle 'ye-eh-a' 'korbuh :daa 'kwa. Eh :se 'an ken dih 'worn-dih-deh:, jorwor: :an-a' ken dih 'worn-dih-deh:, eh-: 'ye 'dlu bo mu.
40:Yee' or mu 'de or-a'a: bo :na-nyor:⧾ :on :ne-a taan bo-: de, 'de or :yeh-dih-uh 'mo 'da. 'De or za-uh 'nyinor-', or :wlu 'de :Piteh' bo, or 'dae:, A se 'beh-dih: a 'ye-eh' 'yli-eh bo 'dhu 'do 'yluh-buh :due' 'di :sloror' :e? 41A 'dhu-eh 'yli-eh bo. A :wlu 'de Nyorsoa bo, 'de dih 'dhen-eh :ne-' a gla :za. :Porluh 'worn-dih-eh ken dih 'weh, jorwor: yau se 'kpih ken :ne.
42:Yeh or :za-a deh :daa-' 'de on bo, :yee' or mu-: de :neheh', 'do kpor⧾-a' 'sororn' neh 'di, 'do :dha or 'wluh-a, 'de or :wlu 'de Nyorsoa bo, or 'dae:, 'On-ba:, :mor 'on :korn 'on 'ye 'kle 'ye-eh-a' 'korbuh :daa 'di 'na-dih:, :mor :on :se-uh' 'on 'kwa :za i, :yee' :ka :an 'bhorn-a, :yee' 'ka-: eh 'ye :ne. 43:Yeh or 'wluh-a 'de Nyorsoa bo :wlu 'da, 'de or yi-a de, :yee' or :yeh-dih-uh 'mo 'da :dele' ka, deh no-eh, an-a' 'yli :ku kwa.
44:Yee' :Yusu' sie-uh' :neheh', 'de or mu, or :wlu 'de Nyorsoa bo, 'do kpor⧾ taan neh 'di. :Ka or 'da-a bale-wlu :zai', 'ka-: or 'da :neheh'. 45:Yeh or yi-a 'de or-a'a: bo :na-nyor⧾ bo de, :yee' or :wlu-' 'de on bo :neheh', or 'dae:, A 'mo-' 'gboror: :e? A :gbee'e:. Ti nyni 'o 'weh, 'yu an 'da-dih-a Nyor-kpalu-a' 'yu-a yi :plo-eh: 'da, 'de deh⧾-zon:⧾ :no-nyor⧾ 'kwa. 46A :sorn-', :a 'ye mu. A :gbee'e:. 'Yu :or mu-a 'on nyor⧾ bo :plo-dih:, or-: :ne 'o :dha 'o, :or 'yle.
On kpon :Yusu' 'weh
(Mk 14.43-50; Lu 22.47-53; Jn 18.3-12)
47:Yee' :yeh :Yusu'-a wlu-a :chio'lo:, :yee' :Juda' :or no-a or-a'a: bo :na-nyor:⧾ :on :korn-a :bhue: 'yor :ne-a 'sororn', an-a' nyor :due', or 'si-: dih, or :ya 'de nyor⧾ :doru'. On 'ble :bhla 'jlehn⧾-: 'dekorn: tu⧾-: 'kwa. Nyor⧾ :daa or :ya-a: 'de, on 'wluh 'de Nyorsoa-a' 'slaa: :za-nyor:⧾ :klaba'⧾-: 'dekorn: :Jueh'-nyor⧾-a' 'bluhba: :korn-nyor⧾-: bo. 48:Yee' 'yu :or yi-a :Yusu' :plo 'da, or zela-uh-: :gwluhuh' see, or 'dae:, 'An mu deh 'i :po o. 'Yu 'an mu-a 'de :bhluun'⧾-' 'kpa-:, :yee' or-: 'o o. A kpon-or o.
49:Yee' :Juda' 'dhobo:, or 'koan'-dih: :Yusu'-: dih, 'de or 'da, 'On :yeh-dih: :on 'weh, Nyor⧾ deh :torne-nyor:. :Yeh or 'da :ao', :yee' or 'kpa 'de or :bhluun'⧾-'.
50'De :Yusu' :wlu 'de or bo, or 'dae:, 'On 'be, deh :on :ne ken :naa :eh?
:Yeh or 'da :ao', :yee' nyor⧾ :ne :Juda' yi-a 'de, mo-: yi 'o :Yusu' bo, 'de on kpon-or. 51:Yeh on kpon-or, :yee' 'do :dha :due' :dao', nyor⧾ :on :ne-a 'de :Yusu' bo, an-a' nyor :due', jli 'de or-a'a: :bhla 'jlehn kpla-'-: dih, 'de or po-eh, or chehn 'o Nyorsoa-a' 'slaa: :za-nyor⧾-a' nyor :klaba'-a'a: 'bhoi-yu-a' :dou'. 52Jorwor: :Yusu' :wlu-' 'de or bo, or 'dae:, Po :an-a'a: :bhla 'jlehn :dha :on za-eh de. Deh no-eh, nyor⧾-a' klehkpeh :an vorn-dih-a 'jlehn⧾-', an mu 'jlehn⧾ 'i 'meh-dih:. 53:Mor :on :taa 'ye, :yee' :on 'da 'on se 'de 'On-ba bo :wlu-eh 'beh-dih: :e? 'De or 'ye 'on 'enjor-nyor⧾ bo dbo, 'do :dha :due' :dao', :on no-a sorye', :on zi-a zlo :zloo: pa 'o :pebeh' dih :e? 54Jorwor: :mor 'on no deh :dao', :yee' :kaa Nyorsoa-a' 'chlee-deh-a' dhih-a mu dhih 'jeh-' 'kpa-eh: :no :dee' :eh? :Eh no-a, 'ka-: eh :korn eh 'ye-a' :ne.
55:Yee' 'yluh-buh :ne-a :due' 'di, :Yusu' dhele: nyor⧾ :doru' :dao'-: dih, or 'dae:, :Bhla 'jlehn⧾-: 'dekorn: tu⧾-: me-: a 'ble, 'de a yi 'on kpon 'da, :eh gweh-a :ka nyor :or yi-a 'ylii'-nyor: :kpon 'da :e? Zorn 'o zorn, 'on :dhe dih, 'do Nyorsoa-a' 'sla ybei', 'an torne-a nyor⧾ deh, a :se 'de 'on :kpon-dih:. 56Jorwor: deh⧾-a' klehkpeh :daa, en :no-eh:-', 'de deh Nyorsoa-a' wele-eh: :po-nyor⧾ 'chle-a, en 'ye dhih 'jeh-' 'kpa.
:Yeh or 'da :ao', :yee' or-a'a: bo :na-nyor⧾-a' klehkpeh ple-', on gba-or 'de dih.
:Yusu' :ne 'o zabe: :zi-nyor:⧾ :klaba'⧾ ybei'
(Mk 14.53-65; Lu 22.54-55, 63-71; Jn 18.13-14, 19-24)
57:Yee' nyor⧾ :on kpon-a :Yusu', an kpa-or 'de Nyorsoa-a' 'slaa: :za-nyor⧾-a' nyor :klaba' :Kai'fa bo, :dha nyor⧾ 'tele' :torne-nyor⧾-: 'dekorn: 'bluhba: :korn-nyor⧾-: on :gweh-dih:-a. 58:Yeh an mu-a, :yee' :Piteh' na-or-: 'de :peh :peh, jorwor: or :se-uh' dih 'koan'-dih:, or :tehn-dih-uh bo dih, 'de or mu 'o Nyorsoa-a' 'slaa: :za-nyor⧾-a' nyor :klaba'-a'a: 'gbu ybei'. 'De or :dhe dih 'do nyor⧾ :an 'dhu-a 'gbu 'yli-eh bo 'bhun, or 'ye :ka deh⧾-a mu-a 'de yi-a' :no 'ye. 59:Yee' Nyorsoa-a' 'slaa: :za-nyor:⧾ :klaba'⧾-: 'dekorn: zabe: :zi-nyor:⧾ :klaba'⧾-a' klehkpeh-: an 'bhorn sih-dhih: on 'ye-a' 'o :Yusu' 'dlu po, 'de on 'ye-or' 'dba. 60Keen' :mloror', sih 'tmo-nyor:⧾ :dhulu' yi 'o on ybei', jorwor: on :se-or' dhih 'bhun 'ye. :Yeh 'bor-dih:-a 'o, :yee' nyor⧾ 'sororn', mo-: yi 'o on ybei', 61on 'dae:, 'Yu :daa, or 'da or 'beh-dih: Nyorsoa-a' 'sla :daa, or-a' ya :gba-eh 'weh, 'de or 'ye-or' po :dele' ka, 'do 'we taan 'di.
62'De Nyorsoa-a' 'slaa: :za-nyor⧾-a' nyor :klaba' :sorn-', or :nyna-dih: yai', or 'chleh :Yusu', or 'dae:, :On se deh 'ble, :on 'ye-' :za, 'do dhih :daa on po-a 'o :on 'dlu, 'do en bo :e? 63Jorwor: :Yusu' no 'dhuan. :Yee' Nyorsoa-a' 'slaa: :za-nyor⧾-a' nyor :klaba' 'chleh-or :neheh', or 'dae:, 'An 'bhorn :on 'ye :zlehn-dih:, 'do 'kmo :ne-Nyorsoa ybei'. Zela: :a :gwluhuh', :mor 'o :or 'dhu Nyorsoa-a' 'yu, or 'tan-a :e?
64'De :Yusu' 'da, Keen'. :Ka :on 'da-a, 'ka-: eh :ne. Jorwor: 'an zela a :gwluhuh', 'de ybei'-a' ybei', a mu 'yu an 'da-dih-a Nyor-kpalu-a' 'yu 'ye-:, or mu 'de 'kpih :korn-Nyorsoa-a' :dila-son bo dih :dhe, 'de a 'ye-or' 'ye, or 'ye 'de yi, 'de 'ni-kpan:⧾ :en :ne-a 'de yai' 'nyne-'.
65:Yeh :Yusu' :za-a deh :daa-', :yee' Nyorsoa-a' 'slaa: :za-nyor⧾-a' nyor :klaba' 'fa-dih: or-a'a: :gba 'vuu-: dih, 'de or 'dae:, Or 'kor-dih: Nyorsoa-a' 'nyne 'weh. :Eh :korn dhih, 'de :a 'bhorn dhih ken dih zela-nyor:⧾ :noo' :neheh' :eh? A 'worn-ih' :ka or no-a Nyorsoa-a' 'nyne 'kor-dih-eh. 66:Kaa a 'da :naa :eh?
'De on 'da, Or :zlor 'meh-a' 'weh.
67:Yee' on gba :Yusu' :dhehmeh 'yli, 'de an tba-dih-or :kola'⧾ dih. 'De nyor⧾ :noo'-a tba-dih-or 'kpih dih, 68'de an no, Po gban-wlu⧾ 'noror :a bo, :mor Nyorsoa-a' 'taan'-yu: :daa. :Eh zi :eh zi :eh? :Or tba :on deh :eh?
:Piteh' dhobo: :Yusu'-a' dhih-' 'weh
(Mk 14.66-72; Lu 22.56-62; Jn 18.15-18, 25-27)
69:Yee' :Piteh' :dhe dih 'do 'gbu ybei', 'de 'bhoi-yu :due' :or no-a 'nynor-kpao'-yu, or yi 'o or bo, or 'dae:, :An-a' 'jeh :ke, mor-: :Yusu'-: :or 'wluh-a :Galali'i-bluhba ken, a na-dih :dha :due' :dee'.
70Jorwor: or dhobo-ih' 'weh, 'do an-a' klehkpeh ybei', or 'dae:, Deh :an za-a-', 'on se-eh 'i yubo:. 71:Yeh or 'da :ao', :yee' or mu 'o gba-dih-gba-a' :kpaa' worn 'i, 'do :wor 'bhoi-yu: :noror', :or no-a 'nynor-kpao'-yu, or 'ye-dih-or, 'de or :wlu 'de nyor⧾ :on :nyna-a 'o dih bo, or 'dae:, 'Yu :daa, or-: :Yusu' :or 'wluh-a 'Nazla-: an na-dih :dha :due' :dee'.
72:Yeh or 'da :ao', :yee' :Piteh' dhobo-ih' 'weh :neheh', or :zlehn-dih: deh, or 'dae:, 'On se 'yu :daa yubo: o.
73:Yeh on :forn-dih:-a 'o, :yee' nyor⧾ :on :nyna-a 'o dih, on yi 'o or bo, on 'dae:, Keen'. :Mor, an-a' nyor :due' :oo' :ke. Deh no-eh, :an-a' wlu :za :on gbor, :ka :on no-a :Galali'i-yu.
74:Yee' :Piteh' :zlehn-dih: deh, or 'dae:, Nyorsoa-a' dhih, dhih 'jeh :oo', 'an za-'. 'Nyi Nyorsoa 'ye 'on, :mor 'on 'tmo sih. 'On se 'yu :dao' yubo: 'jeh ka.
:Yee' 'do :dha :due' :dao', :soan'-beor zlo-'. 75:Yeh :soan'-beor zlo-a, 'de jorwor: :Piteh' :po-dih: dhih :Yusu' :za-a-' :gwluhuh' bo, or no-a, :Mor :soan'-beor 'ye zlo, :an mu 'an dhih-' dhobo:, 'do kpor⧾ taan 'di. :Yee' :Piteh' 'si-: 'zorn, 'de or 'vin 'gabaa.
Currently Selected:
Matio' 26: TCHKR
Highlight
Share
Copy
Want to have your highlights saved across all your devices? Sign up or sign in
The New Testament in Tchien Krahn published as KUO :DELE' © The Bible Society in Liberia, 1995.
