ማቲዎሴ 13

ዜርፆ ዜርቃሢ ኮኦኪንሦ

(ማር. 4፥1-9፤ ሉቃ. 8፥4-8)

1ዬኖ ኬሎ'' ዬሱሴ ጋራፓ ኬስኪ ባዞ'' ዓጫ ዴዔኔ፤ 2ሚርጌ ዴሬያ ዒዛ ኮይላ'' ሙኪ ቡኬሢሮ ዋኣፆና ፒንቆ ጎንጎይዳ ኬስኪ ዴዔኔ፤ ዴራ'' ጋዓንቴ ቢያ ባዞ'' ዓጫ ዔቄኔ። #ሉቃ. 5፥1-3። 3ዬካ ዒ ሚርጌ ባኣዚ'' ኮኦኪንሢና ኬኤዛዖ፦ «ፔቴ'' ዓሲ ጎሺዳ ዜርሢ ዜርቃኒ ኬስኬኔ፤ 4ዒዚ ዜርቃንቴ ፔቴ'' ፔቴ'' ዜርፃ ጎይፆ ዓጫ ኬዳ''ዛ ካፓ ሙኪ ሙዔኔ። 5ዓቴ'' ዜርፃ ሚርጌ ዓጪባኣ፥ ሃኣሻ ቤሲዳ ኬዴ''ኔ፤ ዬኖ ቤዛ ሚርጌ ዓጪ ባኣሢሮ ዜርፃ ዑኬና ባቃሌኔ። 6ማዔቶዋ ሳዓ ዓባዛ ሹሌ''ኔ፤ ፃጲ ሚርጌ ዳኪባኣሢሮዋ ሜሌኔ። 7ዓቴ'' ዜርፃ ሃሣ ዓንጊሢ ቶሻ ባኣካ ኬዴ''ኔ፤ ዓንጊፆ ቶሻ'' ዑጋዖ ባቃሎ ባይዜኔ። 8ሃሣ ዓቴ'' ዜርፃ ኮሺ ቤስካ ኬዲ'' ባቃሌ ዎዶ''ና ሚርጌ ካፄኔ፤ ፔቴ''ዛ ፄኤታ ባጌላ ላሂ''ታሚ'' ዓቴ''ዛ ሃይሢታሚ'' ዓኣፒ ዓኣፔኔ። 9ዬያ ዋይዛ ዋይዚ ዓኣሢ ዋይዞንጎ!» ጌዔኔ።

ዬሱሴ ኮኦኪንሦና ኬኤዚሴ ባኮ

(ማር. 4፥10-12፤ ሉቃ. 8፥9-10)

10ዬካፓ ዒዛኮ ጊንፆ ሃንታዞንሢ ዬሱሴ ኮራ ሙካዖ፦ «ዓይጎሮ ዴሮ''ም ኔ ኮኦኪንሢና ኬኤዛይ?» ጌዔኔ።

11ዒዚ ዔያቶም፦ «ዒንሢም ጫሪንጮ ካኣቱሞ ዛሎ'' ዓኣሺንቴ ባኮ ዛላ ዔራኒ ዔራቶ ፆኦሲዳፓ ዒንጊንቴኔ፤ ዔያቶም ጋዓንቴ ዒንጊንቲባኣሴ። 12ዔኤቢ ዓኣሢም ቃሲ'' ዒንጊንቴም ሚርጋንዳኔ፤ ዻካ'' ዓኣሢዳፓ ጋዓንቴ ዒማ'' ዻኮ'' ዓኣማታዖ ዔኪንታንዳኔ። #ማቲ. 25፥29፤ ማር. 4፥25፤ ሉቃ. 8፥18፤ 19፥26። 13ዛጋዖ ዴንቁዋያ፥ ዋይዛዖ ዒና ዔኩዋያ ሃሣ ጶቂሱዋያ ማዔሢሮ ዔያቶም ታ ኮኦኪንሢና ኬኤዛኔ። 14ዬይያ ፆኦሲ ማሊፆ ኬኤዛ ዒሲያሴ ዛሎ''ና፦

‹ዋይዚ ዒንሢ ዋይዛኔ

ጋዓንቴ ዒንሢ ጶቂሡዋሴ፤

ዛጊያ ዒንሢ ዛጋኔ

ጋዓንቴ ዒንሢ ዒና ዔኩዋሴ።

15ዓይጎሮ ጌዔቶ ሃይ ዴራ''

ዒኖ ፔኤሲ'' ዶጪሴኔ፤

ዋዮዋ ዔያታ ዓርቄኔ፤

ዓኣፖዋ ዱኡሜኔ።

ያዺ ማዒባኣያታቴ

ዓኣፖና ዔያታ ዛጊ

ዋዮና ዋይዚ

ዒኖና ማሊ

ታ ባንሢ ዔያታ ማዔም

ሄኤዶ ታ ዔያቶ ዻቂሼያ ናንዳንቴኬ› »

ጌይንቲ ኬኤዚንቴሢ ዔያቶይዳ ኩማ''ንዳኔ። #ዒሲ. 6፥9-10።

16ዬሱሴ ሃሣ፦ «ዒንሢ ጋዓንቴ ዓኣፓ ዒንሢኮ ዛጋሢሮ፥ ዋያኣ ዒንሢኮ ዋይዛሢሮ ዒንሢ ባሊቲና ዓኣያኬ። 17ጎኔ ታ ዒንሢም ጋዓኔ፤ ሚርጌ ፆኦሲ ማሊፆ ኬኤዛዞንሢና ፂሎ''ንሢና ዒንሢ ሃሢ ዛጋሢ ዛጋኒ ኮዔያታዖ ዛጊባኣሴ። ዒንሢ ዋይዛሢ ዔያታ ዋይዛኒ ኮዔያታዖ ዋይዛኒ ዳንዳዒባኣሴ» ጌዔኔ። #ሉቃ. 10፥23-24።

ዜርፆ ኮኦኪንሦኮ ቡሊ''ፆ ዬሱሴ ኬኤዜሢ

(ማር. 4፥13-20፤ ሉቃ. 8፥11-15)

18ዬካፓ ዬሱሴ፦ «ዓካሪ፥ ዒንሢ ዜርፆኮ ኮኦኪንሦ ቡሊ''ፆ ዋይዙዋቴ፤ 19ጎይፆ ዓጫ ኬዴ'' ዜርፃ ዻዋሢ፦ ፆኦሲ ካኣቱሞ ቃኣሎ'' ዋይዚ ዒና ዔኩዋ ዓሶኬ፤ ቤዞና ፃላሄ ሙኪ ዒና'' ዜርቂንታ ቃኣሎ'' ዔካኔ። 20ሃኣቾ ሳዖይዳ ዜርቂንቴ ዜርፄላ ዻዋሢ፦ ቃኣሎ'' ዋይዛዖ ዎዛና ጉሙርቂ ዔካ ዓሶኬ። 21ማዔቶዋ ዻካ'' ዎዴሮ ማዓንዳፓዓቴም ፃጲ ዔያቶኮ ባኣሴ፤ ዬያሮ ቃኣሎ'' ዛሎ''ና ሜቶና ዒፂንቲ ዳኪንቲሢ ሄሌ'' ዎዶ''ና ዑኬና ዔያታ ዻቢንታኔ። 22ዓንጊፆ ቶሾ'' ባኣካ'' ዜርቂንቴዛ ዻዋሢ፦ ቃኣሎ'' ዻካ'' ዎዴሮ ዋይዛ ዓሶኬ፤ ያዺ ማዔቶዋ ሃያ ዓጮ'' ዛሎ'' ማሊ ሜታዺሢና ቆሎ'' ናሹሞና ዒና'' ጌሊ ቃኣሎ'' ዋሊ''ሳሢሮ ዓኣፑዋዖ ዓታኔ። 23ኮዦ ሳዖይዳ ዜርቂንቴዛ ዻዋሢ፦ ቃኣሎ'' ዋይዚ ዒና ዔካ ዓሶኬ፤ ዬያታ ዓኣፒ ዓኣፓኔ፤ ፔቴ''ዛ ፄኤታ፥ ባጌላ ላሂ''ታሚ'' ዓቴ''ዛ ሃይሢታሚ'' ዓኣፓኔ» ጌዔኔ።

ዓዣሢ ኮኦኪንሦ

24ዬያጉዲ ሃሣ ዬሱሴ ሜሌ'' ኮኦኪንሢ፦ «ጫሪንጮ ካኣቱማ ጎሺዳ ጌኤሺ ዜርሢ ዜርቄ ዓሲ ማላኔ፤ 25ዓሳ ቢያ ላሄ ዎዶ''ና ሞርኬ ሙካዖ ባርቾ ባኣካ'' ዓዦ ዜርቂ ዓኣዼኔ። 26ባርቻ ባቃሊ ፑርቃዛ ዓዣሢ ባኣካ'' ጴዼኔ። 27ዬያሮ ጎዦ ዓዶኮ ማዻ ዓሳ ዒዛ ኮይላ'' ሙካዖ ‹ጎዳሢዮ! ኔ ጎዦይዳ ጌኤሺ ዜርሢ ኔ ዜርቂባኣዓዳ? ሂዳዖ ዓዣሢ ዓንካፓ ኬስኬይ?› ጌዔኔ። 28ዒዚ ማሃዖ ‹ሃያ ማዼሢ ሞርካሢዋይ!› ዔያቶም ጋዓዛ፥ ማዻ ዓሳ ‹ሂዴቴ ዴንዲ ኑ ዓዣሢ ሃርማንዳጉዲ ኔ ኮዓ?› ጌዔኔ። 29ዒዚ ጋዓንቴ ‹ዔይዔ! ዓይጎሮ ጌዔቶ ዓዣሢ ዒንሢ ሃርማ ዎዶ''ና ባርቾ ዎላ'' ቱጋንዳኔ። 30ዬያሮ ሃሹ''ዋቴ፤ ባርቻ ማንፂንታ ዎዶ'' ሄላ''ንዳኣና ባርቾንታ ዓዣሢንታ ዎላ'' ዑጎንጎ፤ ማንፂንታ ዎዶ''ና ጋዓንቴ ማንፃ ዓሶም ዓዣሢ ቤርታዺ ቱጊ ታሚና ሚቺንታንዳጉዲ ናኣራ ናኣራ ቱኩ''ዋቴ፤ ባርቾ ጋዓንቴ ማንፂ ታኣኮ ኮኖይዳ ዋሁዋቴ› ሂዚ ታ ጋዓንዳኔ» ጌዒ ዔያቶም ኬኤዜኔ።

ሴናፒጬ ጌይንታ ዻኮ'' ዜርፄሎ ኮኦኪንሦ

(ማር. 4፥30-32፤ ሉቃ. 13፥18-19)

31ዬሱሴ ሃሣ ሜሌ'' ኮኦኪንሢ፦ «ጫሪንጮ ካኣቱማ ፔቴ'' ዓሲ ጎሺዳ ዜርቄ፥ ሴናፒጬ ጌይንታ ዻኮ'' ዜርፄሎ ማላኔ፤ 32ዒዛ ዜርሢዳፓ ቢያ ዻካ''ኬ፤ ባቃሊ ዑጌ ዎዶ''ና ጋዓንቴ ቱኮ''ና ሚፆይዳፓ ቢያ ባሼ፥ ዼኤፒ ሚሢ ማዓኔ፤ ሃሣ ካፓኣ ዒዞኮ ካኣፖይዳ ማኣሪ ማዢ ዴዓኔ» ጌይ ኬኤዜኔ።

ሙኑቆ ፃኣዞ ኮኦኪንሦ

(ሉቃ. 13፥20-21)

33ሃሣ ዔያቶም ዬሱሴ፦ «ጫሪንጮ ካኣቱማ ፔቴ'' ላኣሊ ሃይሦ ሻምባ ዲርኮና ዺኢሊዳ ዋሃ ሙኑቃ ፃኣዛ ማላኔ፤ ዬና ሙኑቆ ፃኣዛ ሙኑቆ ቢያሢ ዔቂሳኔ» ጌዒ ኬኤዜኔ።

ኮኦኪንሦና ዬሱሴ ኬኤዚሴ ባኮ

(ማር. 4፥33-34)

34ዬሱሴ ዬያ ባኮ ቢያ ኮኦኪንሢና ዴሮ''ም ኬኤዜኔ፤ ኮኦኪንሢ ባኣያ ዓይጎ ባኣዚ''ያ ዔያቶም ኬኤዚባኣሴ። 35ዬይ ያዺ ማዔሢ፦

«ሃይሶ ታኣኮ ታ ኮኦኪንሢና ኬኤዛንዳኔ፤

ዓጫ'' ማዢንቴሢዳፓ ዓርቃዖ

ዓኣሺንቴ ባኣዚ'' ታ ኬኤዛንዳኔ»

ጌይንቲ ፆኦሲ ማሊፆ ኬኤዛሢ ዛሎ''ና ፃኣፒንቴሢ ኩማ''ንዳጉዲኬ። #ዓይኑ. 78፥2።

ዬሱሴ ዓዣሢ ኮኦኪንሦ ቡሌ''ሢ

36ዬካፓ ዬሱሴ ዴሮ'' ሃሺ'' ኬኤፆ ጌሌኔ፤ ዒዛኮ ጊንፆ ሃንታዞንሢ ዒዛ ኮራ ሙኪ፦ «ጎዦኮ ዓዣሢ ኮኦኪንሦ ቡሊ''ፆ ኑም ኬኤዜ» ጌዔኔ።

37ዬሱሴ ማሃዖ፦ «ጌኤዦ ዜርፆ ዜርቄሢ ዓሲ ናዓሢኬ፤ 38ጎዣ ሃያ ዓጮ''ኬ፤ ጌኤዦ ዜርፃ ፆኦሲ ናኣቶ''ኬ፤ ዓዣሢ ጋዓንቴ ፃላሄ ናኣቶ''ኬ፤ 39ዓዣሢ ዜርቄሢ ሞርካሢ ፃላሄኬ፤ ባርቾ ማንፂፃ ዓጮ''ኮ ጋፒንፆኬ፤ ማንፃ ዓሳ ፆኦሲ ኪኢታንቾኬ። 40ዓዣሢ ቱጊ ቡኩሲ ታሞይዳ ሚቾሢጉዲ ዓጮ''ኮ ጋፒንፆና ያዺ ማዓንዳኔ። 41ዓጮ''ኮ ጋፒንፆ ዎዶ''ና ዓሲኮ ናዓሢ ፔ ኪኢታንቾ ዳካንዳኔ፤ ዔያታኣ ዓሶ ዻቢሻዞንሢና ፑርቶ ማዻዞንሢ ቢያ ዒዛ ካኣቱሞይዳፓ ቡኩሲ ኬሳ''ንዳኔ። 42ዬካፓ ዼኤፖ ታሞይዳ ዓጋንዳኔ፤ ዒኢካ ዬኤፒና ዓቺ ዻይሢና ዔያቶም ማዓንዳኔ። 43ፂሎ''ንሢ ጋዓንቴ ፔ ዓዳሢ ካኣቱሞይዳ ዓቢጉዲ ፖዓንዳኔ፤ ዋይዛ ዋይዚ ዓኣሢ ዋይዞንጎ!» ጌዔኔ።

ዓኣሺንቴ ቆሎ ኮኦኪንሢ

44ሄሊ''ሳዖ ዬሱሴ፦ «ጫሪንጮ ካኣቱማ ጎሺ ሳዛይዳ ዓኣቾና ባኣዚ'' ማላኔ፤ ፔቴ'' ዓሲ ዬኖ ባኬሎ ዴንቃዖ ማሂ ጊንሣ ዓኣቼኔ፤ ሚርጌ ዎዛዼሢሮ ዴንዲ ዓኣ ባኮ ቢያ ሻንቺ ዬኖ ጎዤሎ ሻንቄኔ» ጌዔኔ።

ሚዛጶ ሹጮኮ ኮኦኪንሦ

45ላሚ ሃሣ ዬሱሴ፦ «ጫሪንጮ ካኣቱማ ኮሺ'' ሚዛጶ፥ ሹጮ ሻንቃኒ ኮዓ ኮርሞ ዓሢ ማላኔ፤ 46ዬይ ኮርማ ዓሢ ሚርጌ ቦንቺንታ ኮሺ'' ሚዛጲ ሹቺ ዴንቄ ዎዶ''ና ዴንዲ ዓኣ ባኮ ቢያ ሻንቺ ዬኖ ሹጬሎ ሻንቄኔ» ጌዔኔ።

ሞላሢ ዓርቆ ሮኦጮ ማላ ሱዞ ኮኦኪንሦ

47ሃሣ ዬሱሴ፦ «ጫሪንጮ ካኣቱማ ባዞ''ይዳ ዓጊንቴ ሞላሢ ዓርቆ ሮኦጮ ማላ ሱዞ ማላኔ፤ ዬና ዱማ ዱማ ሞላሢ ቢያ ዓርቃያኬ። 48ሞላሢ ጌሊ ዓርቂንቲ ኩሜ'' ዎዶ''ና ሞላሢ ዓርቃ ዓሳ ዬኖ ሱዜሎ ባዛ''ፓ ጎቺ ዓጮ ኬሲ''ጋፓ ዴዒ ኮዦ ኮዦ ቁሪ ዔካዖ፥ ፑርቶ ጋዓንቴ ዒኢካ ኬኤሪ ሃሻ''ኔ። 49ዓጮ''ኮ ጋፒንፆ ዎጎ ኬሎ''ና ያዺ ማዓንዳኔ፤ ፆኦሲኮ ኪኢታንቻ ሙኪ ጎሞ ዓሶ ጌኤዦይዳፓ ቁሪ፥ 50ባይቁዋ ታሞይዳ ዓጋንዳኔ፤ ዒኢካ ዬኤፒና ዓቺ ዻይሢና ማዓንዳኔ» ጌዔኔ።

51ላሚ ሃሣ ዬሱሴ፦ «ዬይ ኮኦኪንሣ ቢያ ዒንሢም ዔርቲያ?» ጋዓዛ፥ ዔያታኣ «ሂዮ» ጌዔኔ። 52ዒዚያ፦ «ጫሪንጮ ካኣቱሞኮ ዓኣሺንቴ ባኮ ኮሺ'' ዔራ ዓሲ' ፃኣፒ ዓርቆና ዓኮና ጪሞ ባኮናፓ ዔሪ ዔሪ ኬሳ''፥ ሙሴ ዎጎ ዔርዛ ዓሲጉዲኬ» ጌዔኔ።

ዬሱሴ ናዚሬቴይዳ ዒፂንቴሢ

(ማር. 6፥1-6፤ ሉቃ. 4፥16-30)

53ዬሱሴ ዬንሢ ኮኦኪንሦንሢ ኬኤዚ ኩርሴስካፓ ዬኖ ቤዛፓ ዴንዴኔ። 54ፔ ዓጮ'' ናዚሬቴ ካታሞዋ ሙኪ፥ ዒኢካ ዓይሁዶ ዓሶኮ ቡኪንቶ ቤዛ ዔርዛንቴ ዒዛሲ ዋይዛ ዓሳ ቢያ ዲቃቲ ሄርሻዖ፦ «ሃይ ዓሢ ሃያጉዴ ዔራቶና ፆኦሲ ዎልቄና ማዺንታ ዓኮ ባኮና ዓንካፓ ዔሬይ? 55ሃይ ሚፆ ዓርሳ ሃኣማ''ሢ ናኣዚ''ቱዋዓዳ? ዒንዳ ዒዛኮ ማይራሞቱዋዓዳ? ሃሣ ጌርሲንሢያ ዒዛኮ ያይቆኦቤንታ ዮሴፔንታ ሓሣ ሲሞኦኔንታ ዪሁዳንታቱዋዓዳ? 56ጌሮንሢ ዒዛኮ ቢያ ኑኡና ዎላ''ቱዋዓዳ? ዓካሪ ሃይ ዓሢ ሃያ ቢያ ዓንካፓ ዔሬይ?» ጋዓዖ፥ 57ዒዛ ጎናሲ ጉሙርቁዋዖ ሃሼ''ኔ።

ዬሱሴ ጋዓንቴ፦ «ፆኦሲ ማሊሢ ኬኤዛሢ ፔ ዓጮ''ና ፔ ማኣሮ ዓሶና ባኣካ'' ቦሂንታኔ፤ ጋዓንቴ ሜሌ'' ቤሲዳ ቦቦንቺንታኔ» ጌዔኔ። #ዮሓ. 4፥44። 58ዔያታ ጉሙርቂ ጎናሲ ዔኪባኣሢሮ ዬሱሴ ዒኢካ ሚርጌ ፆኦሲ ዎልቄና ማዺንታ ዓኪ ባኣዚ'' ማዺባኣሴ።

Currently Selected:

ማቲዎሴ 13: MNT

Highlight

Copy