Joh. MAZWI EKUTANGA
MAZWI EKUTANGA
Vhangeri raJohani rinoronza kuti Jesu, Izwi raMwari remhera nariini, uwo, “Wakaita munhu akagara pakati pedu.” Kudai ngezvinoronza bhuku pacharo, Vhangeri iri rakanyorwa kuitira kuti vanhu vanorierenga vangagonda kuti Jesu ndiye Muponesi wakagondiswa, mwana waMwari, kuti kubudikidza ngokugonda kwavo kwaari vangaona kupona (20:31).
Ngesure kwemazwi okutanga awo anoonisa kuti Izwi remhera nariini raMwari ndiKristu, rupande rwokutanga rweVhangeri runoronza ngemishamiso yakaparadzana iyo inoonisa kuti Jesu ndiye Muponesi wakagondiswa, mwana waMwari. Izvi zvinoteerwa ngemazwi akasiyana awo anodudzira izvo zvinooniswa ngemishando. Rupande urwu rwebhuku runoereketa ngenjira yevakagonda ndiyo vanhu vamweni Jesu vakaita vateeri vake, asi vanhu vamweni vakaphikisana naJesu vechiramba kumugonda. Ndima 13-17 dzinoereketa kwakaperera ngenguva yaakagara mukuzwanana nevadzidzi vake ngousiku hwaakasungwa ndihwo, nemazwi ake okunasirira nokugwinyisa vadzidzi vake ngendaa yokukohomerwa kwake. Ndima dzokupedzisira dzinotironzera ngokusungwa nokutongwa kwaJesu, kukohomerwa kwake, kumuka kwake kubva kwevakafa, kuoneka kwake ngevadzidzi vake ngesure kwokumuka kwake kwevakafa.
Ndaa yedzimai rakabatwa rechiomba (8:1-11) yakakonyerwa zvakanyorwa ngokuti zvinyorwa zvizhinji nezvinyorwa zvokutanga zvinosiya mazwi aya, asi zvinyorwa zvimweni zvinotutsira mazwi aya mundima dzimweni.
Johani unogwinyisa chipo chokupona kusikaperi kubudikidza ndiKristu, chipo chinotanga zvinopano chechiuya kwavari vanogonda kuti Jesu ndiye njira, gwinyiso nokupona. Chiro chinoshamisa chetinoona kunaJohani chiri chokushandisa kwaanoita zviro zvokupona kwezuva ngezuva kuonisa zviro zvomweya zviripo zvakadai ngemvura, chingwa, kujeka, muushi nemakwai ake, muvhini nemichero yawo.
URONGWA HWEZVIRI MUBHUKU RAJOHANI
Mazwi okutanga ebhuku 1:1-18
Johani Mubhabhatidzi nevadzidzi vokutanga vaJesu 1:19-51
Mushando waJesu wepamhene 2:1—12:50
Mazuva okupedzisira muJerusarema nepasinde 13:1—19:42
Kumuka kwevakafa nokuoneka kwaMambo 20:1-31
Mazwi okugumisira: kuoneka kumweni muGarire 21:1-25
Currently Selected:
Joh. MAZWI EKUTANGA: Ndau
Highlight
Share
Copy
Want to have your highlights saved across all your devices? Sign up or sign in