Mk. 13

Jesu Unoereketa ngoKuputswa kweTemperi

(Mat. 24:1-2; Ruka 21:5-6)

1Achabuda kubva muTemperi, umwe wevadzidzi vake wakati kwaari, “Mudzidzisi, ringirai, kunaka kwemapuwe aya nokunaka kwemhatso dzakadai!” 2Jesu wakati kwaari, “Unoona here idzi mhatso dzakakura? Akuzosari buwe narimwe padera pebuwe rimweni, risikazorigwi pashi.”

Madambudziko noKutambudzwa

(Mat. 24:3-14; Ruka 21:7-19)

3Achakagara paMutunhu wemaOrivhi akaringirana neTemperi, Petro, Jakobe, Johani naAndreu vakamubvunza vari vega, vakati, 4“Tironzerei, kuti izvi zvinozoitika riini nokuti chionisonyi chinozoonisa kuti izvi zviro zvoda kuitika?”

5Jesu wakatanga kuvaronzera echiti, “Ngwarai kuti musazopaukiswa ngomunhu kunyazwi ngouri. 6Vazhinji vanozouya ngezina rangu vechiti, ‘Ndini Kristu,’ navo vanozopaukisa vazhinji. 7Naapo mwoozwa ngokurwa nemawirira okurwa, musazotambudzika; izvi zvinosisira kuti zviitike, asi magumo aasati aguma. 8Ngokuti dzinza rinozomukirana nedzinza, noumambo unozomukirana noumambo; kunozoapo kuzungunyika kwenyika kundau dzakaparadzana, kunozoapo nzara. Izvi zviri kutanga kwemadambudziko.

9“Asi dzingwarirenyi imwimwi pachenyu; ngekuti vanozomupira kumakota; nemwi munozorohwa mumhatso dzavo dzokudira; munozoema pamberi pevatongi nemadzimambo ngepamusoro pangu, kuita chapupu pamberi pavo. 10Nevhangeri rinosisira kutanga kuchumairwa kumadzinza eshe. 11Naapo vanozomukweya vechimupira mukutongwa, musazodembatemba ngepamberi kuti munozoereketenyi; asi ereketai kunyazwi ngechiri chemwapuwa ngeawa iro, ngokuti andimwipi munozoereketa, asi ndiMweya Wakachena. 12Mukoma unozopira munun'una kuti aurawe, nababa unozopira mwana wavo, nevana vanozomukira vabari nokuvauraisa. 13Nemwi munozonyenywa ndivo veshe ngendaa yezina rangu. Asi iye unozoshingirira metsa kumagumo unozoponeswa.

Chinyangadzo Chakashatisisa

(Mat. 24:15-28; Ruka 21:20-24)

14“Naapo mwoona chinyangadzo chinoparadza chechiema apo pechisikasisiri (uwo unodzidza ngaazwisise,) zvino avo vari muJudhia ngavatizire kumitunhu; 15nouwo uri padera pemhatso asazodzaka nokuti kupotera kutora chiro kunyazwi ngechiri mumhatso mwake; 16nouwo uri mumunda asazopetuka sure kootora jira rake. 17Asi ihehe kwavari vane mimba naavo vanoamwisa ngaawo mazuva! 18Nemwi kumbirai kuti zvisazoitika ngomukuwo wechando. 19Ngokuti ngaawo mazuva kunozoapo kutambudzika kukuru, ukwo kusikazi kumboapo kwakadaro kubvira pakutanga kwokusikwa kwaakasika Mwari metsa zvinopano, akuchatongozoitikizve kwakadaro. 20Kudai Mambo asikazi kufupisa mazuva, akuna naumwe waizoponeswa; asi ngepamusoro paavo vakatsanangurwa, avo vakatsanangura, mazuva akafupiswa. 21Naapo kudai aripo munhu unozoti kwomuri, ‘Ringira, Kristu uri panapa!’ Nokuti, ‘Ringira, uri apo!’ Musazozvitenda. 22Ngokuti vanozoapo vaKristu vokunyepa nevaprofeti vokunyepa, navo vanozoita zvioniso nezvishamiso, kupaukisa vakatsanangurwa, kudai zvechibvira. 23Asi ngwarai; ndamuronzera zviro zveshe nguva isati yaguma.

Kuuya kwoMukororo woMunhu

(Mat. 24:29-31; Ruka 21:25-28)

24“Asi ngaawo mazuva, ngesure kwokutambudzika ukwo, zuva rinozoita chidima nomwedzi auzojeki; 25nenyeredzi dzinozowa kubva mudenga nemasimba omudenga anozozungunyiswa. 26Naapo vanozoona Mukororo woMunhu echiuya mumakore anesimba guru nouthende. 27Naapo unozotuma ngirosi nokuunganidza vakatsanangurwa vake kubva kumhepo marongomuna, kubvira kumagumo enyika metsa kuguma kumagumo edenga.

Chidzidzo choMuonde

(Mat. 24:32-35; Ruka 21:29-33)

28“Dzidzai muedzaniso kubva pamuonde; apo dai rawo rakanyorova rooburikira mashakani aro, munozia kuti zienza raa pasinde. 29Nemwiwo ngokudaro, apo mwoona izvi zvechiitika, munozozia kuti iye uri pasinde, eya pamisiwo. 30Ngegwinyiso ndinoti kwomuri, uyu mubarirwana auzopindi izvi zveshe zvisati zvaitika. 31Denga nenyika zvinozopinda, asi mazwi angu aatongozopindi.

Akuna Unozia Zuva nokuti Awa

(Mat. 24:36-44)

32“Asi ngendaa yezuva iro neawa iro, apana naumwe unozvizia, kunyazwi ngirosi dzomudenga nokuti Mukororo, asi ndiBaba ega. 33Ngwarai, murinde;#13:33 Murinde:Zvinyorwa zvimweni zvekare zvine, “Murinde nokukumbira.” ngokuti imwimwi amuzii nguva iyo kuti inoguma riini. 34Kwakadai ngomunhu echihamba rwendo kuenda kunyika imweni, iye wakasiya mhatso yake, wakapa varanda vake simba, umwe ngaumwe mushando wake, akapangazve murindi wepamusiwo kuti arinde. 35Ndizvo rindai, ngokuti amuzii imwimwi kuti munewemhatso unoguma riini, dangani zuva rabira, nokuti pakati pousiku, nokuti ngokurira kwejongwe, nokuti mangwanani. 36Kuti pamweni echiguma ngokukasira iye asamuona mwakaata; 37neicho chendinoronza kwomuri, ndinoronza kwavari veshe: Rindai.”

Currently Selected:

Mk. 13: Ndau

Highlight

Copy