Mk. 16

Kumuka KwaJesu

(Mat. 28:1-8; Ruka 24:1-12; Joh. 20:1-10)

1Naapo Sabatha rapinda, Maria Magadhareni, Maria mai aJakobe naSarome, vakatenga mutombo unonuhwira, kuti vaende vamudzodze. 2Mangwanani maishi ngezuva rokutanga revhiki vakaguma kuiba zuva roobuda. 3Navo vaiti pakati pavo, “Ndiani unozotimburumbudzira buwe kubva pamusiwo weiba?” 4Navo vechiringira, vakaona kuti buwe raiya ramburumbudzwa, ngokuti raiya gurutu yaamho. 5Naapo vapotera muiba, vakaona murumbwana akagara ngokumudyo, akapfeka gauni rakachena; navo vakashamiswa. 6Naye wakati kwavari, “Musashamiswa; munotsvaka Jesu weNazaretha, uwo wakakohomerwa. Wamuka, amuna muno. Ringirai pevakamuradzika. 7Asi endai, muronzere vadzidzi vake naPetro kuti, ‘Unomutangira kuenda Garire; munozomuonayo kudai ngezvaakaronza kwomuri.’ ” 8Navo vakabuda, vakatiza kubva paiba, ngokuti vakagumirwa ngokuhuta nokushamiswa; navo avazi kuronza chiro kumunhu, ngokuti vaitya.

Jesu Unooneka ndiMaria Magadhareni

(Mat. 28:9-10; Joh. 20:11-18)

[ 9Naapo amuka mangwanani maishi ngezuva rokutanga revhiki, wakaoneka kutanga kunaMaria Magadhareni, uwo waiya akaduswa madhimoni manomwe. 10Wakaenda akaronzera avo vaiya vanaye, vaitsumba nokuchema. 11Asi apo vazwa kuti unopona nokuti waiya aoneka ndiye, avazi kutenda.

Jesu Unooneka ngeVadzidzi Vairi

(Ruka 24:13-35)

12Ngesure kweizvi wakaoneka kunevairi vavo, anechiemo chimweni, vaihamba munharaunda. 13Navo vakapetuka, vakaronzera vamweni veshe. Asi avazi kuvatenda.

Jesu Unooneka kuneVadzidzi Gumi naUmwe

(Mat. 28:16-20; Ruka 24:36-49; Joh. 20:19-23; Zvak. 1:6-8)

14Ngesure kweizvo wakaoneka kunevanegumi naumwe vakagara patafura; naye wakavaganyira ngokusikatenda kwavo nokukonza kwomwoyo yavo, ngokuti avazi kutenda avo vaiya vamuona ngesure kwokumuka kwake kubva kwevakafa. 15Naye wakati kwavari, “Endai munyika dzeshe, muchumaire vhangeri kunezvisikwa zveshe. 16Iye unotenda abhabhatidzwe unozoponeswa; asi uwo usikatendi unozorashwa. 17Neiyi mioniso inozoa naavo vanotenda; ngezina rangu vanozodzinga madhimoni; vanozoereketa ngendimi itsva; 18vanozobata nyoka, kunyazwi vakamwa chinouraya, achitongozovaremadzi; vanozoisa nyara dzavo padera pevanorwara navo vanozotambiswa.”

Jesu Unoashirwa Mudenga

(Ruka 24:50-53; Zvak. 1:9-11)

19Ndizvo zvino Mambo Jesu, apedza kuereketa navo, wakaashirwa mudenga, akagara ngokumudyo kwaMwari. 20Navo vakaenda, vakachumaira kundau dzeshe, Mambo echishanda pamwepo navo, echigwinyisa izwi ngemioniso yaiya navo.]#16:20Tsamba dzimweni dzekare adzina mavhesi aya.

Currently Selected:

Mk. 16: Ndau

Highlight

Copy