Genesis 33
33
CAB. XXXIII
1As hrog Jacob seose e hooillyn, as yeeagh eh, as cur-my-ner, haink Esau, as mârish kiare cheead dooinney: as rheynn eh yn chloan er Leah as Rachel, as y daa harvaant. 2As hug eh ny sharvaantyn, as y chloan ocsyn ’sy toshiaght, as Leah as yn chloan eck’s nyn yeï, as Rachel as Joseph er-jerrey. 3As hie eh harrish rhymboo, as chroym eh eh-hene gys y thalloo shiaght keayrtyn, derrey haink eh er-gerrey da e vraar. 4As roie Esau ny whail, as ghow eh ayns e roihaghyn eh, as huitt eh er e wannal, as phaag eh eh; as cheayn ad. 5As hrog eh seose e hooillyn, as honnick eh ny mraane as y chloan; as dooyrt eh, Quoi ad shen mayrt? As dooyrt eh, Yn chloan ta Jee dy graysoil er choyrt da dty harvaant. 6Eisht haink ny sharvaantyn er-gerrey, ad-hene as nyn gloan, as chroym ad ad-hene. 7As haink Leah myrgeddin marish e chloan er-gerrey, as chroym ad ad-hene: as ny lurg shen haink Joseph er-gerrey as Rachel, as chroym adsyn ad-hene. 8As dooyrt eh, Cre t’ou kiarail, liorish ooilley yn imman shoh, haink my whail? As dooyrt eh, T’ad shoh dy voddym foayr y gheddyn ayns shilley my hiarn. 9As dooyrt Esau, Ta dy liooar aym pene, my vraar; freill shen ny t’ayd dhyt hene. 10As dooyrt Jacob, Guee-ym ort, my ta mee nish er gheddyn foayr ayns dty hilley, gow eisht my yioot veih my laue: son er-y-fa shen ta mee er vakin dty eddin, myr dy beign er vakin eddin Yee; as t’ou er hoiaghey jee’m. 11Gow, ta mee guee ort, my vannaght, ta mee er choyrt lhiam hood; er-yn-oyr dy vel Jee er ghellal dy graysoil rhym: as er-y-fa dy vel dy liooar aym pene; as hionn eh er, as ren eh goaill eh. 12As dooyrt eh, Lhig dooin goaill nyn yurnah, as lhig dooin goll, as ver-yms er y raad oo. 13As dooyrt eh rish, Ta fys ec my hiarn, dy vel y chloan faase, as ta ny shioltaneyn as ny immanyn trome ta mârym: as my vees ad eiyrit ro hiyragh agh un laa, bee yn slane shioltane dy choayl. 14Lhig da my hiarn, ta mee guee ort, goll harrish roish e harvaant: as hem’s er my hoshiaght ass my aash, cordail myr vees y maase ta goll roym, as y chloan er y hon; derrey hig-ym gys my hiarn, gys Seir. 15As dooyrt Esau, Lhig dou nish faagail mayrt ayrn jeh’n cheshaght ta mârym: As dooyrt eh, Cha vel feme rish, lhig dou foayr y gheddyn ayns shilley my hiarn.
16Myr shen hyndaa Esau yn laa shen, er y raad gys Seir. 17As hie Jacob er e yurnah gys Succoth, as hrog eh thie da hene, as ren eh bwaneyn son e vaase: shen-y-fa ta’n ynnyd enmyssit Succoth.
18As haink Jacob gys Shalem, ard-valley jeh Shechem, t’ayns cheer Chanaan, tra haink eh veih Padan-aram; as hoie eh e chabbane er-gerrey da’n ard-valley. 19As chionnee eh peesh dy halloo, raad skeayl eh e chabbane, veih laue chloan Hamor, ayr Shechem, son keead peesh dy argid. 20As hrog eh altar ayns shen, as denmys eh eh El-elohe-israel.
Currently Selected:
Genesis 33: BIB1819
Highlight
Share
Copy
Want to have your highlights saved across all your devices? Sign up or sign in
First published in 1775, revised and published by the British and Foreign Bible Society in 1819.
