کُوطٜ نٜلَابٜٔ 10
10
ݠِيٜرْ وَازِ کٛرْنٜلِيُسْ
1وٛودِ غٛطّٛ حَا کَيْسَرِيَ، عِنْدٜ مُوطُمْ کٛرْنٜلِيُسْ: عٛ عَرْدِيطٛ دٛوْ يٜࢡْرٜ سٛوجٜعٜنْ رٛمَ تٜىٰمٜرّٜ وِعٜتٜىٰندٜ يٜࢡْرٜ عِتَلِيَ؞ 2عٛ کُلْطٛ اَللَّه، کَنغْکٛ بٜى سَارٜ مَاکٛ ڢُو، ࢡٜطٛنْ ندٜوَ اَللَّه؞ تُمْ عٛطٛنْ وَلَّ عُمَّاتٛورٜ، عٛوَطَ سَدَکَ، عٛطٛنْ تٛرٛ اَللَّه تُمْ؞ 3ࢩَنْدٜ ڢٜىٰرٜ دٜيْدٜيْ نجَمْندِ تَتِ، عٛيِعِ بٜى بَنغُطُمْ ندٜرْ وَحَيُ، مَلَاعِکَاجٛ اَللَّه نَسْتِ سَارٜ مَاکٛ، عٜوْنِمٛ: «کٛرْنٜلِيُسْ!» 4عٛسُتِ مَلَاعِکَاجٛ مَنْ، عٛحُلْتٛرِ، عٛوِعِ: «کٛ وَطِ، جَوْمَمْ؟» مَلَاعِکَاجٛ جَابِ: «اَللَّه نَنِ تٛرْندٜ مَ، عٛيٜرْدِ سَدَکَ مَ؞ 5جٛنْتَ نٜلْ نٜلَاࢡٜ حَا جٛݠّٜ حَا ࢡٜعٜوْنٛيَ سِمٛنْ شٛومٜتٜىٰطٛ ݠِيٜرْ؞ 6عٛطٛنْ وٜىٰرِ حَا سِمٛنْ، کٛݠّٛووٛ لَرٜ، سَارٜ مَاکٛ طٛنْ کٛمْبِ مبٜىٰلَ؞» 7ندٜ مَلَاعِکَاجٛ غٛ دِلِّ، کٛرْنٜلِيُسْ عٜوْنِ طِطٛ حَا سُکَعٜنْ مُمْ، بٜى سٛوجٜىٰجٛ غٛوتٛ ࢡَدِيطٛ مٛ، کُلْطٛ اَللَّه؞ 8کٛرْنٜلِيُسْ لِمْتَنِ ࢡٜ حَالَ کَعَ ڢُو، ندٜنْ عٛنٜلِ ࢡٜ حَا جٛݠّٜ؞
9جَنغٛ مَنْ، دٜيْدٜيْ شَکَ ࢩَلَوْمَ، يَاکٜ نٜلَاࢡٜ غٛ طٛنّٛ حَا لَاوٛلْ، ࢡٜࢡَدِنٛ يٛتَّاغٛ جٛݠّٜ، ݠِيٜرْ وَعِّ دٛوْ سٛورٛوٛلْ نغَمْ وَطُغٛ دٛعَ؞ 10عٛمَاتِ دٛلٛ، عٛيِطِ ࢩَامُغٛ؞ عَمَّا ندٜ ࢡٜطٛنْ ندٜڢَنَ مٛ ࢩَامْدُ، اَللَّه يِعْنِمٛ کَايٜىٰڢِ، 11عٛيِعِ عَسَمَ مَࢡِّتِ، حُوندٜ بَنَ غٛدٛورٜ مَوْندٜ، جٛغَاندٜ حَا تٛلْطِ#10:11 تٛلْطِ مَلَّ تَلْکُمٛوجٜ؞ مَارٜ نَيِ ڢُو طٛنْ جِݠّٛ حَا لٜسْدِ؞ 12ندٜرْ مَارٜ وٛودِ دَبَّاجِ مَرْطِ کٛسْطٜ نَيِ عٜ لَدٛوجِ عٜ شٛلِّ؞ 13عٛنَنِ سَوْتُ، وِعِمٛ: «ݠِيٜرْ! عُمَّ، حِرْسُ، ࢩَامْ!» 14عَمَّا ݠِيٜرْ وِعِ: «عَاعَ، يَا جَوْمِرَاوٛ، مِمٜىٰطَايْ ࢩَامُغٛ کَرَمْطُمْ مَلَّ شٛࢡْطُمْ؞» 15عٛنَنِ سَوْتُ غٛ ڢَحِنْ، وِعِمٛ: «کٛ اَللَّه لَࢡِّنِ، تَا حَرْمِنْ طُمْ؞» 16طُمْ وَطِ ندٜ تَتِ، ࢡَاوٛطٛنْ حُوندٜ مَنْ وِڢْتَامَ حَا عَسَمَ؞
17ݠِيٜرْ سَکْلِ، ڢَامَايْ کٛ وَحَيُ مَنْ يِطِ وِعْغٛ؞ وَکَّتِ مَنْ نٜلَاࢡٜ کٛرْنٜلِيُسْ کٜࢡْتِ سَارٜ سِمٛنْ، ࢡٜطٛنْ ندَرِ حَا يٛلْندٜ؞ 18ࢡٜتٛوْنِ سَوْتُ، ࢡٜࢨَمِ: «سِمٛنْ شٛومٜتٜىٰطٛ ݠِيٜرْ طٛنْ وٜىٰرِ حَا طٛ نَ؟» 19ݠِيٜرْ طٛنّٛ نُمَ دٛوْ وَحَيُ غٛ؞ طٛنْ نِي رُوحُ اَللَّه وِعِمٛ: «ندَا، يِمْࢡٜ تَتٛ طٛنْ طَࢡِّتٜ؞ 20عُمَّ، جِݠَّ، دِلِّدُ بٜى مَࢡّٜ بِلَا مِيجَاغٛ سَمْ، نغَمْ مِنْ نٜلِ ࢡٜ؞» 21ندٜنْ ݠِيٜرْ جِݠِّ، يٜحِ حَا يِمْࢡٜ مَنْ، وِعِ ࢡٜ: «ندَا يَمْ؞ مِنْ وٛنِ مٛ طَࢡِّتِتّٛنْ؞ کٛ وَدِّ عٛنْ؟» 22ࢡٜنجَابِ: «کٛرْنٜلِيُسْ، عَرْدِيطٛ دٛوْ سٛوجٜعٜنْ تٜىٰمٜرّٜ نٜلِ مِنْ؞ عٛ عَدِلِيجٛ، کُلْطٛ اَللَّه؞ يَحُودُعٜنْ ڢُو شٜىٰدَنِمٛ طُمْ؞ مَلَاعِکَاجٛ اَللَّه وِعِمٛ عٛعٜوْنٛ مَ حَا سَارٜ مَاکٛ، نغَمْ حَا عٛنَنَ کٛ مبِعَتَ مٛ؞» 23ݠِيٜرْ جَࢡِّ ࢡٜ، وٜىٰرْنِ ࢡٜ؞
جَنغٛ مَنْ عٛعُمِّ، عٛدِلِّدِ بٜى مَࢡّٜ؞ نُطِّنْࢡٜ وٛطْࢡٜ ندٜرْ وُرٛ جٛݠّٜ نجَحْدِ بٜى مَࢡّٜ؞ 24ࢡٜنجٛتِّ کَيْسَرِيَ ڢَࢡِّجَنغٛ؞ کٛرْنٜلِيُسْ طٛنّٛ رٜىٰنَ ࢡٜ، عٛعٜوْنِ بَنْدِرَاࢡٜ مَاکٛ عٜ سٛوبِرَاࢡٜ مَاکٛ حٛولَاࢡٜ؞ 25ندٜ ݠِيٜرْ يِطِ نَسْتُغٛ سَارٜ، کٛرْنٜلِيُسْ ڢٛتِّ بٜى مَاکٛ، تُغِّ کٛݠِّ، سُجِدَنِمٛ؞ 26عَمَّا ݠِيٜرْ عُمِّنِمٛ، وِعِمٛ: «دَرَ، مِنْ بٛو مِ نٜطّٛ؞» 27ݠِيٜرْ يٜىٰوْتِدِ بٜى کٛرْنٜلِيُسْ، ندٜنْ نَسْتِ سَارٜ؞ عٛتَوِ يِمْࢡٜ طُوطْࢡٜ طٛنْ مٛوࢡْتِ تٛنْ؞ 28عٛوِعِ ࢡٜ: «عٛنٛنْ بٛو عٛنْ عَنْدِ ڢَکَتْ، دِينَ يَحُودُعٜنْ حَطِ يَحُودُوجٛ طَکّٛتِرْغٛ بٜى جَنَنّٛ مَلَّ نَسْتُغٛ سَارٜ مَاکٛ؞ عَمَّا اَللَّه حٛلِّ يَمْ تَا مِلَارَ کٛو مٛيْ کَرَمْطٛ مَلَّ عٛ شٛࢡْطٛ؞ 29نغَمْ مَاجُمْ، مِجَࢡِ عٜوْنَاندُ مَاطَ بِلَا وَابَاغٛ؞ عَمَّا جٛنْتَ مِيِطِ عَنْدُغٛ دَلِيلَ عٜوْنَاندُ مٛنْ؞»
30کٛرْنٜلِيُسْ جَابِ: «وَطِ بَلْطٜ تَتِ، بَنَ وَکَّتِيرٜ ندٜعٜ، مِ طٛنّٛ وَطَ دٛعَ سَاعَ تَتِ حَا سُودُ عَمْ؞ سَاعِ مَنْ غٛطّٛ ࢡٛرْنِيطٛ لِمْشٜ طٜلْکَنْطٜ دَرِ يٜىٰسٛ عَمْ؞ 31عٛوِعِ: کٛرْنٜلِيُسْ، اَللَّه نَنِ دٛعَ مَ، عٛيٜرْدَکٜ سَدَکَ مَ؞ 32نٜلْ غٛطّٛ حَا جٛݠّٜ نغَمْ عٜوْنٛيْغٛ سِمٛنْ شٛومٜتٜىٰطٛ ݠِيٜرْ؞ عٛطٛنْ وٜىٰرِ حَا سَارٜ سِمٛنْ، کٛݠّٛووٛ لَرٜ، غٛنْطٛ کٛمْبِ مبٜىٰلَ؞ 33نغَمْ مَاجُمْ مِنٜلِ غٛطّٛ حَا مَ لَوْ، عَنْ بٛو عَيٜرْدَکٜ، عَوَرِ؞ جٛنْتَ مِنْ ڢُو مِنْ کَوْتِ يٜىٰسٛ اَللَّه، حَا مِنْ نَنَ کٛ جَوْمِرَاوٛ عُمْرِ مَ وٛلْوُغٛ ڢُو؞»
وَازُ ݠِيٜرْ
34ݠِيٜرْ ڢُطِّ وٛلْوُغٛ، وِعِ: «جٛنْتَ مِڢَامِ ڢَکَتْ، اَللَّه سٜنْدِندِرْتَا يِمْࢡٜ#تٛوکْتَاکِ تَوْرٜىٰتَ 10:17؞؞ 35کُلْطٛ مٛ، کُووَنْطٛ کُوطٜ عَدِلِيجٜ ڢُو، ڢٛتَّنَنْ مٛ، کٛو عٛ غٛطّٛ عَسْنغٛلْ نغٛلٜ ڢُو؞ 36اَللَّه نٜلْدِ إِسْرَاءِيلَعٜنْ وٛلْدٜ مُمْ، وَازِنِ ࢡٜلِنْجِيلَ نغَدَّنْکَ سَلَامَنْ بٜى عِيسَى اَلْمَسِيحُ، جَوْمِرَاوٛ يِمْࢡٜ ڢُو؞ 37عٛنٛنْ عٛنْ عَنْدِ کٛ سَالِ حَا يَحُدِيَ ڢُو، طُمْ ڢُطِّ حَا غَلِيلِ ࢡَاوٛ بَݠْتِسْمَ کَ يُحَنَّ وَازِ؞ 38عٛنْ عَنْدِ حَبَرُ عِيسَى مٛ نَسَرَتُ، نٛ اَللَّه مٛيْتِرِمٛ رُوحُ شٜنِيطٛ، نٛ عٛحٛکِّرِمٛ بَاوْطٜ؞ عٛيٜحِ کٛو تٛيْ، عٛحُووِ کُوطٜ بٛوطّٜ، عٛيَمْطِتِنِ تٛرَّاࢡٜ عِبْلِسَ ڢُو، نغَمْ اَللَّه طٛنْ وٛنْدِ بٜى مَاکٛ؞ 39مِنِنْ مِنْ سٜىٰدٛوࢡٜ کٛ عٛوَطِ ندٜرْ لٜسْدِ يَحُودُعٜنْ عٜ ندٜرْ عُرُسَلِيمَ؞ ࢡٜمبَرِمٛ بٜى ࢡِلُغٛ مٛ دٛوْ لٜغَّلْ؞ 40عَمَّا اَللَّه عُمِّتِنِمٛ دِغَ مَايْدٜ ࢩَلَادٜ تَتَࢡْرٜ، وَنغِنِمٛ حَا عَمِنْ؞ 41عٛوَنغَنَايْ يِمْࢡٜ ڢُو، سٜيْ مِنِنْ لَاتِيࢡٜ سٜىٰدٛوࢡٜ ࢡٜ اَللَّه عَارْتِ سُࢡُغٛ؞ ࢡَاوٛ اَللَّه عُمِّتِنِمٛ دِغَ مَايْدٜ، مِنْ ࢩَامْدِ، مِنْ نجَرْدِ بٜى مَاکٛ؞ 42عٛعُمْرِ مِنْ مِنْ نغَازِنَ عُمَّاتٛورٜ، مِنْ شٜىٰدٛ کَنغْکٛ وٛنِ مٛ اَللَّه دَرْنِ نغَمْ حِيتَاغٛ يٜىٰطْࢡٜ عٜ مَايْࢡٜ؞ 43اَلنَّبِعٜنْ ڢُو شٜىٰدِ حَالَ کَعَ، ࢡٜمبِعِ: کٛو مٛيْ نُطِّنِمٛ، حٜࢡَنْ يَاڢُيٜ حَکّٜىٰجِ مُوطُمْ بَرْکَ عِنْدٜ مَاکٛ؞»
عُمَّاتٛوجٜ کٜࢡِ رُوحُ شٜنِيطٛ
44يَاکٜ ݠِيٜرْ طٛنْ وٛلْوَ بٛلّٜ طٜعٜ تَوٛنْ، رُوحُ شٜنِيطٛ جِݠِّ دٛوْ نَنٛوࢡٜ وَازُ ڢُو؞ 45يَحُودُعٜنْ نُطِّنْࢡٜ وَرْدُࢡٜ بٜى ݠِيٜرْ کَيْطِنِ نغَمْ کٛو يِمْࢡٜ عُمَّاتٛوجٜ بٛو، اَللَّه وَانْجِ ࢡٜ رُوحُ شٜنِيطٛ! 46نغَمْ ࢡٜنَنِ ࢡٜطٛنْ مبٛلْوَ بٜى طٜمْطٜ غٛطّٜ، ࢡٜطٛنْ مَنغْتَ مَنغُ اَللَّه؞ ݠِيٜرْ وِعِ: 47«يِمْࢡٜ ࢡٜعٜ بٛو کٜࢡِ رُوحُ شٜنِيطٛ بَنَ نٛ عٜنْ کٜࢡْرِ طُمْ؞ مٛيْ حَطَتَ ࢡٜجَࢡُغٛ بَݠْتِسْمَ بٜى ندِيَمْ؟» 48ندٜنْ عٛعُمْرِ ࢡٜمبَطَنَ ࢡٜ بَݠْتِسْمَ بٜى عِنْدٜ عِيسَى اَلْمَسِيحُ؞ ࢡٜتٛرِمٛ عٛڢَࢡَّ بٜى مَࢡّٜ بَلْطٜ سٜطَّ؞
Currently Selected:
کُوطٜ نٜلَابٜٔ 10: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
