کُوطٜ نٜلَابٜٔ 11
11
ݠِيٜرْ يٜشِّ جَمَعَارٜ نُطِّنْࢡٜ عُرُسَلِيمَ حَالَ کٛرْنٜلِيُسْ
1نٜلَاࢡٜ عٜ نُطِّنْࢡٜ حَا لٜسْدِ يَحُدِيَ نَنِ يِمْࢡٜ عُمَّاتٛوجٜ غٛطّٜ بٛو نجَࢡِ وٛلْدٜ اَللَّه؞ 2ندٜ ݠِيٜرْ لٛرِ عُرُسَلِيمَ، يَحُودُعٜنْ نُطِّنْࢡٜ ݠٜلِمٛ، 3مبِعِ: «عَنَسْتِ شِعٜ يِمْࢡٜ ࢡٜنجُولْنَاکِ عٜ عَࢩَامْدِ بٛو بٜى مَࢡّٜ!» 4عَمَّا ݠِيٜرْ يٜشِّ ࢡٜ بٜى تٛکِّنْدِرْکِ کٛ لَاتِ ڢُو، عٛوِعِ:
5«مِ طٛنّٛ حَا جٛݠّٜ، مِ طٛنّٛ وَطَ دٛعَ؞ ندٜنْ اَللَّه يِعْنِ يَمْ کَايٜىٰڢِ، مِيِعِ حُوندٜ بَنَ غٛدٛورٜ مَوْندٜ، جٛغَاندٜ حَا تٛلْطِ#11:5 تٛلْطِ مَلَّ تَلْکُمٛوجٜ؞ مَارٜ نَيِ ڢُو، ندٜ جِݠِّ دِغَ عَسَمَ، ندٜ وَرِ کٛمْبِ عَمْ؞ 6مِسُتِ ندٜ بٛوطُّمْ، مِيِعِ دَبَّاجِ طِ کٛسْطٜ نَيِ عٜ کُوجٜ لَدّٜ عٜ لَدٛوجِ عٜ شٛلِّ؞ 7ندٜنْ نَنْمِ سَوْتُ وِعِ يَمْ: ݠِيٜرْ! عُمَّ، حِرْسُ، ࢩَامْ! 8عَمَّا مبِعْمِ: عَاعَ، يَا جَوْمِرَاوٛ! کَرَمْطُمْ مَلَّ شٛࢡْطُمْ مٜىٰطَايْ نَسْتُغٛ حُنْدُکٛ عَمْ؞ 9ڢَحِنْ سَوْتُ مَنْ وِعِ: کٛ اَللَّه لَࢡِّنِ، تَا حَرْمِنْ طُمْ؞ 10طُمْ وَطِ ندٜ تَتِ، ندٜنْ کُوجٜ مَنْ ڢُو لٛرِ حَا عَسَمَ؞ 11وَکَّتِ مَنْ ندٜنْ، يِمْࢡٜ تَتٛ نجٛتِّ سَارٜ ندٜ مِنْ نغٛنّٛ؞ غٛطّٛ نٜلِ ࢡٜ حَا عَمْ دِغَ کَيْسَرِيَ؞ 12رُوحُ وِعِ يَمْ مِيَحْدَ بٜى مَࢡّٜ لَوْ، تَا مِمِيجٛ؞ نُطِّنْࢡٜ نجٛوٜىٰغٛ ࢡٜعٜ بٛو نجَحْدِ بٜى عَمْ حَا کَيْسَرِيَ، مِنْ ڢُو مِنْ نَسْتِ حَا سَارٜ کٛرْنٜلِيُسْ؞ 13کٛرْنٜلِيُسْ يٜشِّ مِنْ نٛ عٛيِعْرِ مَلَاعِکَاجٛ طٛنْ دَرِ ندٜرْ سَارٜ مَاکٛ، وِعِمٛ: نٜلْ غٛطّٛ حَا جٛݠّٜ نغَمْ عٜوْنٛيَاغٛ سِمٛنْ شٛومٜتٜىٰطٛ ݠِيٜرْ؞ 14عٛوِعٜتٜ بٛلّٜ طٜ کِسْنٜتٜ، عَنْ عٜ سَارٜ مَ ڢُو؞ 15ندٜ مِڢُطِّ وٛلْوُغٛ، رُوحُ شٜنِيطٛ جِݠِّ دٛوْ مَࢡّٜ بَنَ جِݠّٛرِ دٛوْ مٜىٰطٜنْ حَا ڢُطَّمْ؞ 16ندٜنْ شِڢْتٛرْمِ کٛ جَوْمِرَاوٛ وِعْنٛ يَمْ: يُحَنَّ وَطِ بَݠْتِسْمَ بٜى ندِيَمْ، عَمَّا عٛنٛنْ عٛنْ نجَࢡَنْ بَݠْتِسْمَ ندٜرْ رُوحُ شٜنِيطٛ#کُوطٜ نٜلَاࢡٜ 1:5؞؞ 17ندٜ نِي اَللَّه حٛکِّ ࢡٜ رُوحُ شٜنِيطٛ بَنَ عٛحٛکِّرْنٛ عٜنْ طُمْ، يَاکٜ عٜنْ نُطِّنِ جَوْمِرَاوٛ مٜنْ عِيسَى اَلْمَسِيحُ، کَدِ مِنْ مِ مٛيْ حَا مِدَرْتَنٛ اَللَّه؟» 18ندٜ ࢡٜنَنِ بٛلّٜ طٜعٜ، ࢡٜندٜعِّتِ، ࢡٜمَنغْتِ اَللَّه، ࢡٜمبِعِ: «عَسٜى، اَللَّه حٛلِّ يِمْࢡٜ عُمَّاتٛوجٜ غٛطّٜ بٛو لَاوٛلْ تُوبُغٛ حَا ࢡٜکٜࢡَ نغٜىٰندَمْ!»
جَمَعَارٜ نُطِّنْࢡٜ حَا وُرٛ عَنْتَکِيَ
19نُطِّنْࢡٜ شَنغْکِتِيࢡٜ دَلِيلَ ڢِتِنَ کَ وَطِ يَاکٜ مبَرٜىٰکِ عٜتِيٜنْ، نجٜحِ حَا ڢِنِکِيَ عٜ کِݠْرُسْ عٜ عَنْتَکِيَ؞ وَلَا مٛ ࢡٜنغَازِنِ، سٜيْ يَحُودُعٜنْ تَنْ#کُوطٜ نٜلَاࢡٜ 8:1-4؞؞ 20عَمَّا نُطِّنْࢡٜ وٛطْࢡٜ عِوْࢡٜ حَا کِݠْرُسْ عٜ سِرٜنٜ ندِلِّ عَنْتَکِيَ، ࢡٜنغَازِ يِمْࢡٜ وٛلْوَنْࢡٜ يُنَنِنغْکٜىٰرٜ، ࢡٜنغٜشِّ ࢡٜلِنْجِيلَ جَوْمِرَاوٛ عِيسَى؞ 21جَوْمِرَاوٛ وٛنْدِ بٜى مَࢡّٜ، يِمْࢡٜ طُوطْࢡٜ تُوبِ، نُطِّنِ جَوْمِرَاوٛ؞
22ندٜ حَبَرُ مَنْ يٛتِّ جَمَعَارٜ نُطِّنْࢡٜ حَا عُرُسَلِيمَ، ࢡٜنٜلِ بَرْنَبَسْ حَا عَنْتَکِيَ؞ 23ندٜ عٛيٛتِّ، عٛيِعِ نٛ اَللَّه بَرْکِطِنِرِ يِمْࢡٜ مَنْ، عٛسٜيِ، عٛسُوسْطِنِ ࢡٜ ڢُو حَا ࢡٜتٛکّٛ حٛولَاغٛ جَوْمِرَاوٛ بٜى ࢡٜرْندٜ وٛورٜ، 24نغَمْ بَرْنَبَسْ عٛ غٛطّٛ بٛوطّٛ، کٜبِّنَاطٛ رُوحُ عٜ نُطِّنْکِ؞ يِمْࢡٜ طُوطْࢡٜ نُطِّنِ جَوْمِرَاوٛ؞
25ندٜنْ بَرْنَبَسْ يٜحِ وُرٛ تَرْسُسْ تٜڢٛيْغٛ سٛلْ؞ 26ندٜ عٛتَوِمٛ، عٛيَحْرِمٛ حَا عَنْتَکِيَ؞ ࢡٜنجٛوطِ تٛنْ حِتَاندٜ وٛورٜ، ࢡٜنجٜحِ حَا کَوْتٜ جَمَعَارٜ نُطِّنْࢡٜ، ࢡٜعٜکِّتِنِ عُمَّاتٛورٜ طُوطْندٜ؞ حَا عَنْتَکِيَ، نُطِّنْࢡٜ عَارْتِ وِعٜىٰغٛ مَسِيحِنغْکٜعٜنْ؞
27يَاکٜ مَنْ اَلنَّبِعٜنْ وٛطْࢡٜ عُمِّ عُرُسَلِيمَ، نجٜحِ عَنْتَکِيَ؞ 28غٛوتٛ مَࢡّٜ، بِعٜتٜىٰطٛ عَغَبُسْ، دَرِ شَکَ يِمْࢡٜ؞ بٜى بَاوْطٜ رُوحُ شٜنِيطٛ عٛوِعِ وٜىٰلٛ سَاتُنغٛ تَمِّ وَطُغٛ حَا دُنِيَارُ ڢُو؞ طُمْ وَطِ بٛو ندٜرْ زَمَنُ لَامِيطٛ کَلَوْدِيُسْ#کُوطٜ نٜلَاࢡٜ 21:10؞؞ 29ݠُکَرَعٜنْ مبَطِ عَنِّيَ، کٛو مٛيْ مَࢡّٜ نٜلْدَ کٛ عٛوَاوِ نغَمْ وَلُّغٛ نُطِّنْࢡٜ وٛنْࢡٜ لٜسْدِ يَحُدِيَ؞ 30ࢡٜمبَطِ نٛنْ؞ ࢡٜنٜلْدِ بَرْنَبَسْ عٜ سٛلْ بٜى دٛکّٜ مَنْ، ࢡٜنجَحْرَنِ طٜ ندٛتِّعٜنْ جَمَعَارٜ نُطِّنْࢡٜ؞
Currently Selected:
کُوطٜ نٜلَابٜٔ 11: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
