کُوطٜ نٜلَابٜٔ 14

نٜلَاࢡٜ نغَازِ ندٜرْ وُرٛ عِکٛنِيَ

1ࢡَاوٛ مَاجُمْ ݠٛلْ عٜ بَرْنَبَسْ نجٜحِ عِکٛنِيَ، ࢡٜنَسْتِ سُودُ دٜوَلْ يَحُودُعٜنْ، ࢡٜنغَازِ؞ يَحُودُعٜنْ عٜ يِمْࢡٜ عُمَّاتٛوجٜ غٛطّٜ طُوطْࢡٜ نُطِّنِ؞ 2عَمَّا يَحُودُعٜنْ سَلِيࢡٜ نُطِّنْغٛ، عُمِّنِ ࢡٜرْطٜ يِمْࢡٜ عُمَّاتٛوجٜ غٛطّٜ، حَا ࢡٜنغَࢩَ نُطِّنْࢡٜ؞ 3نٜلَاࢡٜ ࢡٜعٜ ݠَࢡِّ تٛنْ؞ ࢡٜمبٛلْوِ حَالَ جَوْمِرَاوٛ بٜى دَرْتَارٜ؞ جَوْمِرَاوٛ بٛو غٛونغْطِنِ وَازُ مٛعّٜرٜ مُوطُمْ بٜى حٛکُّغٛ ࢡٜ بَاوْطٜ وَطُغٛ عَلَامَاجِ عٜ کَايٜىٰڢِيجِ؞ 4يِمْࢡٜ وُرٛ شٜنْدِ غٜࢡٜ طِطِ دٛوْ حَالَ کَعَ، وٛطْࢡٜ تٛکِّ يَحُودُعٜنْ، وٛطْࢡٜ بٛو تٛکِّ نٜلَاࢡٜ؞

5يِمْࢡٜ عُمَّاتٛوجٜ غٛطّٜ بٜى يَحُودُعٜنْ عٜ مَوْࢡٜ مُوطُمْعٜنْ ڢُو مبَطِ عَنِّيَ تٛرُّغٛ نٜلَاࢡٜ بٜى ڢِطُغٛ ࢡٜ بٜى کَاعٜ؞ 6ندٜ نٜلَاࢡٜ نَنِ طُمْ، ࢡٜندٛغِّ ࢡٜندِلِّ حَا لِسْتِرَ عٜ دٜرْبٜ، غُرٜ حَا لٜسْدِ لِکٛنِيَ عٜ حَا غُرٜ تَارِيطٜ عِکٛنِيَ؞ 7تٛنْ بٛو ࢡٜنغَازِ لِنْجِيلَ؞

نٜلَاࢡٜ نغَازِ ندٜرْ لِسْتِرَ عٜ دٜرْبٜ

8حَا لِسْتِرَ وٛودِ غٛطّٛ مٛ کٛسْطٜ مُمْ جِيجِيطٜ؞ عٛ بٛوسْطٛ دِغَ دَࢩٜىٰکِ مَاکٛ، عٛمٜىٰطَايْ يَحُغٛ؞ 9عٛنَنِ وَازُ ݠٛلْ؞ ندٜ ݠٛلْ سُتِمٛ، عٛڢَامِ غٛطّٛ مَنْ وٛودِ نُطِّنْکِ نغَمْ حَا عٛيَمْطِتِنٜ، 10عٛتٛوْنِ سَوْتُ، عٛوِعِ‏: «عُمَّ، دَرَ دٛوْ کٛسْطٜ مَ‏!» غٛطّٛ مَنْ حَڢْتِ، عٛڢُطِّ يَحُغٛ؞ 11ندٜ مٛوࢡٜ نغِعِ کٛ ݠٛلْ وَطِ، ࢡٜݠُطِّ حٛولُغٛ بٜى وٛلْدٜ لِکٛنِيرٜ، ࢡٜمبِعِ‏: «طٛوَنْتٜىٰࢡٜ نَنْدُࢡٜ بٜى يِمْࢡٜ نجِݠَّکٜ حَا مٜىٰطٜنْ‏!» 12بَرْنَبَسْ، ࢡٜعٜوْنِ طُمْ زٜسْ، ݠٛلْ بٛو، ࢡٜعٜوْنِ طُمْ حٜرْمٜسْ#14‏:12 زٜسْ عٜ حٜرْمٜسْ نغٛنِ عِنْطٜ طٛوَنْتٜىٰࢡٜ يُنَنِنغْکٜعٜنْ مَلَّ غِرٜکْعٜنْ؞ نغَمْ کَنغْکٛ وٛنِ حُنْدُکٛوجٛ مَࢡّٜ؞ 13لِمَنْجٛ زٜسْ مٛ سُودُ دِينَ مُمْ طٛنّٛ يَاسِ وُرٛ، وَدِّ غَعِ جَاغْنَاطِ بٜى ݠِنْدِ بَمَاطِ حَا دَمُّطٜ وُرٛ؞ کَنغْکٛ بٜى مٛوࢡٜ ڢُو نغِطِ لِيعَنَاغٛ نٜلَاࢡٜ کِرْسٜتٜىٰنغَ؞ 14ندٜ بَرْنَبَسْ عٜ ݠٛلْ نَنِ طُمْ، ࢡٜشٜىٰکِ لِمْشٜ مَࢡّٜ، ࢡٜنجَوْطِ، ࢡٜنجٜحِ شَکَ مٛوࢡْرٜ، ࢡٜتٛوْنِ سَوْتُ، ࢡٜمبِعِ‏: 15«عٛنٛنْ وٛرْࢡٜ، کٛنِ مبَطٛتٛنْ طُمْ؟ مِنِنْ بٛو مِنْ يِمْࢡٜ بَنَ مٛنْ‏! مِنْ نغَرِ حَا طٛ نغَمْ مِنْ نغَازِنَ عٛنْ لِنْجِيلَ، حَا عٛنْ عَشَّ کُوجٜ مٜىٰرٜىٰجٜ طٜعٜ، عٛنْ نُطِّنَ اَللَّه غٜىٰتٛ، تَغْطٛ عَسَمَ عٜ لٜسْدِ عٜ مبٜىٰلَ عٜ کٛ وٛنِ ندٜرْ مَاجُمْ ڢُو؞ 16نَانٜ عٛعَشِّنٛ عُمَّاتٛوجٜ ڢُو تٛکّٛ لَابِ مُوطُمْعٜنْ؞ 17کٛو نٛنْ ڢُو عٛطٛنْ وَنغِنِرَ حٛورٜ مَاکٛ بٜى کُوطٜ بٛوطّٜ؞ عٛطٛنْ تٛࢡْنَنَ عٛنْ عِيٜىٰندٜ دِغَ عَسَمَ، عٛطٛنْ وَطَنَ عٛنْ ࢨَامْندٜ، عٛطٛنْ طُوطِّنَ ࢩَامْدُ مٛنْ عٜ حَيْرُ مٛنْ؞» 18عَمَّا کٛو ندٜ ࢡٜمبٛلْوِ بٛلّٜ طٜعٜ بٛو، بٜى دَکٜرْ ࢡٜکَطِرِ مٛوࢡْرٜ لِيعَنَنغٛ ࢡٜکِرْسٜتٜىٰنغَ؞

19يَحُودُعٜنْ وٛطْࢡٜ نغَرِ دِغَ وُرٛ عَنْتَکِيَ ندٜرْ لٜسْدِ ݠِسِدِيَ عٜ وُرٛ عِکٛنِيَ؞ ࢡٜعُمِّنِ مٛوࢡٜ، حَا ࢡٜݠِطِ ݠٛلْ بٜى کَاعٜ، ࢡٜندَسِمٛ يَاسِ وُرٛ، ࢡٜتَمِّ عٛمَايِ؞ 20عَمَّا ندٜ ݠُکَرَعٜنْ نجٜحِ، تَارِمٛ، عٛعُمِّ، عٛلٛرِ وُرٛ؞ جَنغٛ مَنْ عٛدِلِّدِ بٜى بَرْنَبَسْ حَا دٜرْبٜ؞

ݠٛلْ عٜ بَرْنَبَسْ لٛرِ عَنْتَکِيَ ندٜرْ سِرِيَ

21ݠٛلْ عٜ بَرْنَبَسْ نغَازِ لِنْجِيلَ حَا دٜرْبٜ حَا طُوطْࢡٜ نجَࢡِ تٛکَّاغٛ عِيسَى؞ ندٜنْ ࢡٜلٛرْتِ حَا لِسْتِرَ عٜ عِکٛنِيَ عٜ عَنْتَکِيَ ندٜرْ ݠِسِدِيَ؞ 22ࢡٜتِطِّنِ نُطِّنْࢡٜ، ࢡٜشٜمْبِطِنِ ࢡٜ حَا ࢡٜتَبِتَ ندٜرْ نُطِّنْکِ؞ ندٜنْ ࢡٜمبِعِ‏: «سٜيْ بٜى بٛنٜىٰجِ طُوطِّ عٜنْ نَسْتِرْتَ لَامُ اَللَّه؞» 23حَا جَمَعَاجٜ نُطِّنْࢡٜ ڢُو ࢡٜشُࢡَنِ ࢡٜ ندٛتِّعٜنْ؞ ࢡٜمبَطِ دٛعَ، ࢡٜشُومِ، ࢡٜکَلْڢِنِ ࢡٜ حَا جَوْمِرَاوٛ مٛ ࢡٜنُطِّنِ؞

24ندٜ ࢡٜشَالِ ݠِسِدِيَ، ࢡٜنجٛتِّ ݠَمْڢِلِيَ؞ 25ࢡٜنغَازِنِ وٛلْدٜ اَللَّه حَا ݠٜرْغٜ، ندٜنْ ࢡٜنجٜحِ عَتَّلِيَ؞ 26دِغَ تٛنْ ࢡٜنَسْتِ کٛومْبٛوَلْ#14‏:26 کٛومْبٛوَلْ مَلَّ لَانَوَلْ؞، ࢡٜلٛرْتِ حَا عَنْتَکِيَ؞ حَا وُرٛ نغٛ ࢡٜکَلْڢِنَنٛ مٛعّٜرٜ اَللَّه نغَمْ حُووُغٛ کُوغَلْ نغَلْ ࢡٜکُووِ؞

27ندٜ ࢡٜنجٛتِّ عَنْتَکِيَ، ࢡٜمٛوࢡْتِ جَمَعَارٜ نُطِّنْࢡٜ، ࢡٜنغٜشِّ ࢡٜ کٛ اَللَّه وَطِ بٜى جُوطٜ مَࢡّٜ، نٛ اَللَّه مَࢡِّتِرِ لَاوٛلْ نغَمْ حَا عُمَّاتٛوجٜ غٛطّٜ نُطِّنَ عِيسَى؞ 28ࢡٜݠَࢡِّ حَا تٛنْ بٜى نُطِّنْࢡٜ بَلْطٜ طُوطّٜ؞

Currently Selected:

کُوطٜ نٜلَابٜٔ 14: داَ

Highlight

Copy