کُوطٜ نٜلَابٜٔ 16
16
تِمٛتٜ حَوْتَنِ ݠٛلْ عٜ سِلَسْ
1ݠٛلْ يٛتِّ دٜرْبٜ عٜ لِسْتِرَ؞ تٛنْ وٛودِ ݠُکَرَاجٛ بِعٜتٜىٰطٛ تِمٛتٜ؞ دَادَ مَاکٛ، عٛ يَحُودُوجٛ، نُطِّنْطٛ بٛو، عَمَّا بَابَ مَاکٛ عٛ يُنَنِنغْکٜىٰجٛ#16:1 يُنَنِنغْکٜعٜنْ مَلَّ غِرٜکْعٜنْ نجُولْنَتَا ࢡِکّٛيْ مُوطُمْعٜنْ؞؞ 2دٜىٰرْطِرَاࢡٜ حَا لِسْتِرَ بٜى عِکٛنِيَ ڢُو مَنِ تِمٛتٜ؞ 3ݠٛلْ يِطِ تِمٛتٜ يَحْدَ بٜى مَاکٛ؞ ندٜ عٛحٛوسِمٛ، عٛجُولْنِمٛ نغَمْ يَحُودُعٜنْ جٛوطِيࢡٜ لٜسْطٜ مَنْ ڢُو عَنْدِ بَابَ تِمٛتٜ، عٛ يُنَنِنغْکٜىٰجٛ؞ 4حَا وُرٛ ࢡٜنغَرِ ڢُو، ࢡٜنغٜشِّ نُطِّنْࢡٜ عُمْرٛوجٜ طٜ نٜلَاࢡٜ عٜ ندٛتِّعٜنْ حَا عُرُسَلِيمَ ندَوْرِ، حَا ࢡٜتٛکّٛ طٜ؞ 5جَمَعَاجٜ نُطِّنْࢡٜ شٜمْبِطِ ندٜرْ نُطِّنْکِ، کَلَ ࢩَلَادٜ ڢُو لِمْغَلْ نُطِّنْࢡٜ طٛنْ ࢡٜسْدٛ؞
ݠٛلْ يِعِ غٛطّٛ مَکٜدٛنِيَ ندٜرْ کٛيْطٛلْ
6ࢡٜشَالِ لٜسْدِ ڢِرِغِيَ عٜ غَلَاتِيَ نغَمْ رُوحُ شٜنِيطٛ حَطِ ࢡٜوَازَاغٛ حَا عَسِيَ؞ 7ندٜ ࢡٜنجٛتِّ کٜىٰرٛلْ لٜسْدِ مِسِيَ، ࢡٜطَࢡِّ نَسْتُغٛ لٜسْدِ بِتِنِيَ، عَمَّا رُوحُ عِيسَى دُنغَنَاکِ ࢡٜ؞ 8نغَمْ مَاجُمْ ࢡٜشَالِ ندٜرْ مِسِيَ، ࢡٜندِيرْتِ حَا تٛرٛوَسْ؞ 9بٜى جٜمَّ ݠٛلْ يِعِ وَحَيُ، عٛيِعِ غٛطّٛ مَکٜدٛنِيَ طٛنْ دَرِ، تٛرِمٛ: «وَرْ حَا مَکٜدٛنِيَ، يِيدَ مِنْ!» 10ࢡَاوٛ وَحَيُ مَنْ، مِنْ تَاسْکِ دِلُّغٛ مَکٜدٛنِيَ، نغَمْ مِنْ ݠَامِ اَللَّه عٜوْنِ مِنْ حَا مِنْ نغَازٛ يِمْࢡٜ تٛنْ لِنْجِيلَ؞
لِدِيَ نُطِّنِ جَوْمِرَاوٛ
11مِنْ نَسْتِ کٛومْبٛوَلْ#16:11 کٛومْبٛوَلْ مَلَّ لَانَوَلْ؞ حَا تٛرٛوَسْ، مِنْ نجٜحِ شِرْ حَا سَمٛتَرَسْ، جَنغٛ مَنْ بٛو مِنْ نجٜحِ نٜيَݠٛلِسْ؞ 12مِنْ عُمِّ تٛنْ، مِنْ نجٜحِ ڢِلِݠِّ، وُرٛ ندٜرْ يٜࢡْرٜ لٜسْدِ مَکٜدٛنِيَ عَرَنْدٜىٰرٜ،#16:12 وُرٛ ندٜرْ يٜࢡْرٜ لٜسْدِ مَکٜدٛنِيَ عَرَنْدٜىٰرٜمَلَّ بٛو وُرٛ عَرَنٛ ندٜرْ يٜࢡْرٜ لٜسْدِ مَکٜدٛنِيَ؞ لَاتِيندٜ مَرَلْ رٛمَعٜنْ؞ مِنْ نجٛوطِ تٛنْ، مِنْ ݠَࢡِّ بَلْطٜ سٜطَّ؞ 13ࢩَنْدٜ سِوْتٛرْدٜ مِنْ نغُرْتِ وُرٛ، مِنْ نجٜحِ ڢٛمٛوندٜ مَايٛ نغَمْ تٜڢُغٛ حَا ݠٜلّٜلْ دٛعَ وٛنِ؞ مِنْ نجٛوطِ، مِنْ نغٜىٰوْتِدِ بٜى رٜوْࢡٜ مٛوࢡْتِيࢡٜ تٛنْ؞ 14غٛوتٛ مَࢡّٜ، لِدِيَ، عِوْطٛ وُرٛ تِيَتِرَ، عٛ ݠِلٛووٛ لِمْشٜ بٛطٜىٰجٜ مَرْطٜ سَمَنْ، عٛ دٜوٛووٛ اَللَّه؞ جَوْمِرَاوٛ مَࢡِّتِ ࢡٜرْندٜ مَاکٛ، حَا عٛنَنِ کٛ ݠٛلْ وِعِ بٜى حَکِّيلٛ؞ 15کَنغْکٛ عٜ يِمْࢡٜ سَارٜ مَاکٛ ڢُو، ࢡٜنجَࢡِ بَݠْتِسْمَ؞ ندٜنْ عٛوِعِ: «تٛ عٛنْ ندَارِ يَمْ مِ نُطِّنْطٛ جَوْمِرَاوٛ، نغَرٜ، مبٜىٰرٜ حَا سَارٜ عَمْ؞» عٛدٛولِ مِنْ وٜىٰرْغٛ تٛنْ؞
ݠٛلْ عٜ سِلَسْ حَا ڢُرْسِنَ#16:15 ڢُرْسِنَ مَلَّ يَنغَدَ؞
16ࢩَنْدٜ ڢٜىٰرٜ ندٜ مِنْ طٛنْ ندِلَّ ݠٜلّٜلْ دٛعَ، ݠَاࢩٛ دٜبّٛ کٛرْطٛ مَرْطٛ غِنَّوٛلْ، وَرِ، ڢٛتِّ بٜى عَمِنْ؞ غِنَّوٛلْ مَنْ وَرْتِرِمٛ عٛ دَارٛووٛ؞ کُوغَلْ نغَعَلْ حٜࢡَنِ جَاغٛرْࢡٜ مَاکٛ شٜىٰدٜ طُوطّٜ؞ 17عٛطٛنْ تٛکّٛ مِنْ، عٛطٛنْ وٛوکَ، عٛوِعَ: «يِمْࢡٜ ࢡٜعٜ، ࢡٜ جَغَّنٛوࢡٜ اَللَّه ࢡَنغِيطٛ! ࢡٜطٛنْ نغَازَ عٛنْ لَاوٛلْ جَوْمِرَاوٛ!» 18عٛوَطِ طُمْ بَلْطٜ طُوطّٜ؞ طُمْ ࢡِلِّ ݠٛلْ، عٛوَيْلِتِ، عٛوِعِ غِنَّوٛلْ: «بٜى عِنْدٜ عِيسَى اَلْمَسِيحُ مِعُمْرِ مَ، وُرْتَ حَا مَاکٛ!» طٛنْ نِي غِنَّوٛلْ وُرْتِ؞ 19ندٜ جَاغٛرْࢡٜ کٛرْطٛ غٛ نغِعِ سٜىٰࢡٛورٜ کٜࢡَلْ مَࢡّٜ طٛنْ مَجَّ، ࢡٜنَنغِ ݠٛلْ عٜ سِلَسْ، ࢡٜندَسِ ࢡٜ حَا لُومٛ، يٜىٰسٛ مَوْࢡٜ؞ 20ࢡٜنجَحْرِ ࢡٜ حَا مَوْࢡٜ رٛمَعٜنْ، ࢡٜمبِعِ: «يِمْࢡٜ ࢡٜعٜ ࢡٜ يَحُودُعٜنْ، ࢡٜطٛنْ عُمِّنَ ڢِتِنَ حَا وُرٛ مٜىٰطٜنْ؞ 21ࢡٜطٛنْ عَنْدِنَ عَلْعَادَاجِ کَطَاطِ طِ عٜنْ مبَاوَتَا جَࢡُغٛ عٜ تٛکَّاغٛ، عٜنٜنْ رٛمَعٜنْ!» 22مٛوࢡْرٜ تُورْتِ دٛوْ مَࢡّٜ؞ مَوْࢡٜ رٛمَعٜنْ ࢡٛرْتِ ݠٛلْ عٜ سِلَسْ، عُمْرِ ࢡٜݠِيَ ࢡٜ؞ 23ندٜ ࢡٜݠِيِ ࢡٜ ݠِيْطٜ طُوطّٜ، ࢡٜنجَحْرِ ࢡٜ حَا ڢُرْسِنَ؞ ࢡٜمبِعِ عَيْنٛووٛ ڢُرْسِنَ عٛعَيْنَ ࢡٜ بٛوطُّمْ؞ 24ندٜ عٛنَنِ عُمْرٛورٜ ندٜعٜ، عٛيَحْرِ ࢡٜ حَا سُودُ شَکَارُ ندٜرْ سَارٜ ڢُرْسِنَ، عٛڢَلِ کٛسْطٜ مَࢡّٜ بٜى تِغِّرْغَلْ؞
25شَکَ جٜمَّ ݠٛلْ عٜ سِلَسْ طٛنْ مبَطَ دٛعَ، ࢡٜطٛنْ مَنغْتَ اَللَّه بٜى غِمٜ، حَࢡَّاࢡٜ وٛطْࢡٜ طٛنْ نَنَ؞ 26طٛنْ نِي دِمْبَنْدٜ لٜسْدِ مَوْندٜ وَطِ حَا شَࢡَّاجٜ سُودُ ڢُرْسِنَ ندِمْبِ؞ دَمُّطٜ ڢُو مَࢡِّتِ، شَلَّلُّوجِ حَࢡَّاࢡٜ ڢُو بٛو نجَنِ؞ 27عَيْنٛووٛ ڢُرْسِنَ ڢِنِ؞ ندٜ عٛيِعِ دَمُّطٜ طٛنْ مَࢡِّتِ، عٛلٛسِ کَاڢَحِ مَاکٛ حَا عٛمبَرْتٛ نغَمْ عٛتَمِّ حَࢡَّاࢡٜ ندٛغِّ؞ 28عَمَّا ݠٛلْ تٛوْنِ سَوْتُ، وِعِ: «تَا نَاوْنُ حٛورٜ مَ؞ مِنْ ڢُو مِنْ طٛنْ؞» 29عَيْنٛووٛ ڢُرْسِنَ تٜڢِ يِيتٜ، يَاوْطِ، نَسْتِ تٛنْ، عٛطٛنْ دِوْنَ، عٛدٛعِّ يٜىٰسٛ ݠٛلْ عٜ سِلَسْ؞ 30ندٜنْ عٛوُرْتِنِ ࢡٜ يَاسِ، عٛࢨَمِ: «مٛودِࢡّٜ، طُمٜ مبَطَنْمِ حَا مِحِسَ؟» 31ࢡٜمبِعِ: «نُطِّنْ جَوْمِرَاوٛ عِيسَى، ندٜنْ عَحِسَنْ، عَنْ بٜى يِمْࢡٜ سَارٜ مَ ڢُو؞» 32ندٜنْ ࢡٜنغَازِنِمٛ وٛلْدٜ جَوْمِرَاوٛ، کَنغْکٛ بٜى يِمْࢡٜ سَارٜ مَاکٛ ڢُو؞ 33ندٜرْ سَاعِيرٜ مَنْ عَيْنٛووٛ ڢُرْسِنَ حٛوعِ ࢡٜ، لٛوتِ کُودُوجٜ مَࢡّٜ؞ طٛنْ نِي کَنغْکٛ بٜى يِمْࢡٜ سَارٜ مَاکٛ ڢُو، ࢡٜنجَࢡِ بَݠْتِسْمَ؞ 34عٛيَحْرِ ݠٛلْ بٜى سِلَسْ حَا سَارٜ مَاکٛ، عٛࢩَامْنِ ࢡٜ؞ کَنغْکٛ بٜى سَارٜ مَاکٛ ڢُو ࢡٜشٜيِ مَسِنْ، نغَمْ ࢡٜنُطِّنِ اَللَّه؞
35ندٜ وٜىٰتِ، مَوْࢡٜ رٛمَعٜنْ نٜلِ دٛوغَرِعٜنْ حَا عَيْنٛووٛ ڢُرْسِنَ، ࢡٜمبِعَ مٛ عٛيٛوڢَ يِمْࢡٜ ࢡٜعٜ؞ 36ندٜنْ عَيْنٛووٛ ڢُرْسِنَ وِعِ ݠٛلْ: «مَوْࢡٜ نٜلِ، مبِعِ مِنْ نجٛوڢَ عٛنْ؞ جٛنْتَ نغُرْتٜ، اَللَّه يَحْرُ عٛنْ جَمْ؞» 37عَمَّا ݠٛلْ وِعِ دٛوغَرِعٜنْ غٛ: «ࢡٜݠِيِ مِنْ يٜىٰسٛ يِمْࢡٜ ڢُو بِلَا حِيتَاغٛ مِنْ؞ مِنِنْ بٛو مِنْ رٛمَعٜنْ! ندٜنْ ࢡٜمَࢡِّ مِنْ حَا ڢُرْسِنَ؞ جٛنْتَ نِي ࢡٜنغِطِ وُرْتِنْغٛ مِنْ بٜى سِرِّ؟ وَطَتَاکٛ! سٜيْ مَوْࢡٜ رٛمَعٜنْ بٜى کٛعٜ مَࢡّٜ نغَرَ، نجٛوڢْتَ مِنْ؞» 38دٛوغَرِعٜنْ لٛرْنَنِ مَوْࢡٜ رٛمَعٜنْ کٛ ݠٛلْ عٜ سِلَسْ مبِعِ؞ ندٜ ࢡٜنَنِ ݠٛلْ عٜ سِلَسْ ࢡٜ رٛمَعٜنْ، ࢡٜکُلْتٛرِ؞ 39مَوْࢡٜ رٛمَعٜنْ نغَرِ، ندٜعِّتِنِ ࢡٜ؞ ندٜنْ ࢡٜنغُرْتِنِ ࢡٜ ڢُرْسِنَ، ࢡٜتٛرِ ࢡٜ ࢡٜ شٛتَّ وُرٛ مَࢡّٜ؞ 40ندٜ ݠٛلْ عٜ سِلَسْ نغُرْتِ ڢُرْسِنَ، ࢡٜنجٜحِ حَا سَارٜ لِدِيَ؞ تٛنْ ࢡٜتَوِ دٜىٰرْطِرَاࢡٜ، ࢡٜشٜمْبِطِنِ ࢡٜ، ندٜنْ ࢡٜندِلِّ؞
Currently Selected:
کُوطٜ نٜلَابٜٔ 16: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
