کُوطٜ نٜلَابٜٔ 2

غَرْکِ رُوحُ شٜنِيطٛ

1ندٜ ࢩَنْدٜ جُولْدٜ ݠَنْتٜکٛسْتَ يٛتَّکٜ، نُطِّنْࢡٜ ڢُو کَوْتِ نٛکُّورٜ وٛورٜ#ڢَرِلَّاجِ لٜوِعٜنْ 23‏:15‏-21؛ تٛوکْتَاکِ تَوْرٜىٰتَ 16‏:9‏-11؞؞ 2لَوْ ࢡٜنَنِ عِيدٛورٜ عِوْندٜ حَا عَسَمَ بَنَ عِيدٛورٜ حٜنْدُ سٜمْبِطْندُ، حٜىٰوِ سُودُ حَا ࢡٜطٛنْ نجٛوطِ؞ 3ندٜنْ طٜمْطٜ نَنْدُطٜ طٜمْطٜ يِيتٜ مبَنغَنِ ࢡٜ، شَنغْکِتِ عٜ نجٛوطِ دٛوْ کٛو مٛيْ مَࢡّٜ؞ 4ࢡٜ ڢُو ࢡٜ کٜبِّنَاࢡٜ رُوحُ شٜنِيطٛ، ࢡٜݠُطِّ وٛلْوُغٛ بٜى بٛلّٜ جَنَنّٜ، بَنَ نٛ رُوحُ حٛکِّرِ ࢡٜ بَاوْطٜ وٛلْوُغٛ؞

5وٛودِنٛ يَحُودُعٜنْ جٛوطِيࢡٜ حَا عُرُسَلِيمَ، حُلْࢡٜ اَللَّه، عِوْࢡٜ حَا لٜسْطٜ دُنِيَارُ ڢُو؞ 6ندٜ ࢡٜنَنِ حٛولٛ نغٛعٛ، طُوطْࢡٜ مَࢡّٜ مٛوࢡِ تٛنْ؞ ࢡٜشَکْلِ نغَمْ کٛو مٛيْ مَࢡّٜ نَنِ نُطِّنْࢡٜ طٛنْ مبٛلْوَ وٛلْدٜ مُوطُمْ؞ 7ࢡٜکَيْطِنِ مَسِنْ، ࢡٜمبِعِ‏: «يِمْࢡٜ وٛلْوَنْࢡٜ بٛلّٜ طٜعٜ، نَا ࢡٜ ڢُو ࢡٜ يِمْࢡٜ لٜسْدِ غَلِيلِ‏! 8کَدِ نٛيْ عٜنْ نَنَتَ ࢡٜطٛنْ مبٛلْوَ بٛلّٜ مٜىٰطٜنْ؟ 9ࢡٜعِوِ حَا لٜسْطٜ ݠَرْتِيَ، مٜدِيَ، عٜلَمْ، مٜسٛݠٛتَمِيَ، يَحُدِيَ، کَݠَّدٛسِيَ، حَا ݠٛنْتُسْ عٜ عَسِيَ، 10حَا ڢِرِغِيَ عٜ ݠَمْڢِلِيَ، حَا مِصْرَ، حَا غٜࢡٜ لٜسْدِ لِبِيَ کٛمْبِ سِرٜنٜ، وٛطْࢡٜ مَࢡّٜ نغَرِ دِغَ رٛمَ، 11وٛطْࢡٜ بٛو نغَرِ دِغَ کٜرٜتَ عٜ عَرَبِيَ؞ وٛودِ بٛو يَحُودُعٜنْ عٜ جَنَنْࢡٜ تٛکِّيࢡٜ دِينَ يَحُودُعٜنْ؞ عَمَّا عٜنْ طٛنْ نَنَ ࢡٜطٛنْ مبٛلْوَ بٜى بٛلّٜ مٜىٰطٜنْ حَالَ کُوطٜ مَوْطٜ طٜ اَللَّه وَطِ؞» 12ࢡٜ ڢُو ࢡٜکَيْطِنِ، ࢡٜشَکْلِ، ࢡٜࢨَمْࢨَمْتِرِ‏: «طُمٜ طُمْ يِطِ وِعْغٛ؟» 13عَمَّا وٛطْࢡٜ نجَنْشِ نُطِّنْࢡٜ، مبِعِ‏: «ࢡٜنغُيْکِ‏!»

وَازُ ݠِيٜرْ

14نٜلَاࢡٜ سَݠّٛ عٜ طِطٛ ڢُو عُمِّ؞ ندٜنْ ݠِيٜرْ تٛوْنِ سَوْتُ، وِعِ ࢡٜ‏: «عٛنٛنْ يَحُودُعٜنْ عٜ يِمْࢡٜ جٛوطِيࢡٜ حَا عُرُسَلِيمَ ڢُو، ݠَامٜ کٛ طٛنْ سَالٛ عٜ نَنَنٜىٰطَمْ بٛوطُّمْ‏: 15يِمْࢡٜ ࢡٜعٜ، ࢡٜنغُيْکَايْ بَنَ نُمٛتٛنْ، نغَمْ نَانغٜ ࢩَلْوَايْ تَوٛنْ، 16عَمَّا طُمْ کٜبِّتِنْکِ کٛ اَلنَّبِي يٛعٜلْ وٛلْوُنٛ‏:

17اَللَّه وِعِ‏: ندٜرْ بَلْطٜ رَغَرٜىٰجٜ‏:

مِوَانْجَنْ رُوحُ عَمْ دٛوْ يِمْࢡٜ ڢُو‏:

ࢡِࢡّٜ مٛنْ وٛرْࢡٜ عٜ رٜوْࢡٜ مبَطَنْ عَنَّبَاکُ،

سُکَعٜنْ مٛوطٛنْ کٜࢡَنْ وَحَيُوجِ،

ندٛتِّعٜنْ مٛوطٛنْ کٛيْطَنْ کٛيْطِ؞

18کٛو دٛوْ مَشُّࢡٜ عَمْ عٜ حٛرْࢡٜ عَمْ ڢُو بٛو،

مِوَانْجَنْ رُوحُ عَمْ دٛوْ مَࢡّٜ ندٜرْ سَاعِ مَنْ،

ࢡٜمبَطَنْ عَنَّبَاکُ؞

19مِوَطَنْ کَايٜىٰڢِيجِ حَا عَسَمَ

عٜ دٛوْ لٜسْدِ بٛو عَلَامَاجِ،

ࢨِيࢨَمْ عٜ يِيتٜ عٜ شُورْطٜ ࢡَلٜىٰجٜ مبَنغَنْ؞

20نَانغٜ ࢩِࢡَّنْ، لٜوْرُ بٛو وٛوجَنْ بَنَ ࢨِيࢨَمْ؞ ندٜنْ ࢩَلَادٜ عَمْ مَوْندٜ حُلْنِيندٜ وَرَنْ‏!

21کٛو مٛيْ عٜوْنٛتٛوطٛ عِنْدٜ جَوْمِرَاوٛ، حِسَنْ#يٛوعٜلْ 3‏:1‏-5؞؞

22«عٛنٛنْ إِسْرَاءِيلَعٜنْ، نَنَنٜىٰطَمْ‏: عِيسَى مٛ نَسَرَتُ، عٛ غٜرْدَاطٛ اَللَّه يٜىٰسٛ مٛوطٛنْ؞ عٛنْ عَنْدِ طُمْ، نغَمْ بٜى مَاکٛ اَللَّه وَارِ کَايٜىٰڢِيجِ عٜ عَلَامَاجِ شَکَ مٛوطٛنْ؞ 23دِغَ ࢡٛويْمَ اَللَّه مُويِ، عَشِّ عِيسَى حَا جُوطٜ مٛوطٛنْ؞ عٛنٛنْ عٛنْ مبَرِمٛ، ندٜ عٛنْ ندُنغَنِ حَکّٜعٜنْ ࢡٜࢡِلَ مٛ دٛوْ لٜغَّلْ غَاڢَانغَلْ#مَتَّ 27‏:35؛ مَرْکُسْ 15‏:24؛ لُکَ 23‏:33؛ يُحَنَّ 19‏:18؞؞ 24عَمَّا اَللَّه عُمِّتِنِمٛ، وُرْتِنِمٛ تَاکُ مَايْدٜ، نغَمْ مَايْدٜ وَلَا بَاوْطٜ جٛغَاغٛ مٛ#مَتَّ 28‏:5‏-6؛ مَرْکُسْ 16‏:6؛ لُکَ 24‏:5؞؞ 25ندَا کٛ دَاوُدَ وِعْنٛ دٛوْ مَاکٛ‏:

مِطٛنْ يِعَ جَوْمِرَاوٛ يٜىٰسٛ عَمْ تُمْ، عٛطٛنْ حَا ࢩَامٛ عَمْ،

نغَمْ تَا مِدِمْبٛ؞

26نغَمْ مَاجُمْ ࢡٜرْندٜ عَمْ طٛنْ سٜيٛ، حُنْدُکٛ عَمْ طٛنْ وٜلْوِتَ،

کٛو ࢡَنْدُ عَمْ بٛو سِوْتٛتٛ جَمْ ندٜرْ حٛولَارٜ؞

27نغَمْ عَنْ، يَا اَللَّه، عَوُدِنْتَا يٛنغْکِ عَمْ حَا جٛوندٜ مَايْࢡٜ،

عَعَشَّتَا شٜنِيطٛ مَاطَ ࢩٛلَ؞

28عَحٛلِّ يَمْ لَاوٛلْ جَحْرَنْنغٛلْ حَا نغٜىٰندَمْ،

نغَمْ عَطٛنْ وٛنْدِ بٜى عَمْ،

مِوٛودِ سٜيٛ طُوطْنغٛ#جَبُورَ 16‏:8‏-11؞؞

29«دٜىٰرْطِرَاࢡٜ عَمْ، سٜيْ مِوٛلْوَنَ عٛنْ بٜى دَرْتَارٜ دٛوْ کَاکِرَاوٛ مٜىٰطٜنْ دَاوُدَ؞ عٛمَايِ، ࢡٜعُوِمٛ؞ حَا حَنْدٜ يٜنَاندٜ مَاکٛ طٛنْ طٛ؞ 30عٛ اَلنَّبِيجٛ، عٛعَنْدِ حُنَيٜىٰرٜ ندٜ اَللَّه وَطَنِمٛ‏: اَللَّه حُنِ عٛلَامِنَنْ غٛطّٛ دَࢩْغٛلْ مَاکٛ دٛوْ لٜىٰسٛ لَامُ مَاکٛ#جَبُورَ 132‏:11؛ 2 سَمُيِلَ 7‏:12‏-13؞؞ 31دَاوُدَ ڢَامِ عُمِّتِنٜىٰکِ اَلْمَسِيحُ دِغَ وَکَّتِ مَنْ سِوَا؞ نغَمْ مَاجُمْ عٛوِعِ‏:

اَللَّه عَشَّايْ مٛ ندٜرْ جٛوندٜ مَايْࢡٜ،

ࢡَنْدُ مَاکٛ بٛو ࢩٛلَايْ؞

32عِيسَى عٛو، اَللَّه عُمِّتِنِمٛ دِغَ مَايْدٜ، مِنْ ڢُو مِنْ سٜىٰدٛوࢡٜ حَالَ کَعَ؞ 33اَللَّه ࢡَنغْتِمٛ، جٛعِّنِمٛ حَا ࢩَامٛ مُوطُمْ؞ عٛحٜࢡِ رُوحُ شٜنِيطٛ دِغَ بَابِرَاوٛ مٛ عِينَنِنٛ مٛ طُمْ، وَانْجِ رُوحُ عٛو دٛوْ عَمِنْ بَنَ نٛ نغِعٛتٛنْ عٜ نَنٛتٛنْ؞ 34نغَمْ دَاوُدَ عٜىٰنغَايْ حَا عَسَمَ، عَمَّا کَنغْکٛ بٜى حٛورٜ مَاکٛ عٛوِعِ‏:

جَوْمِرَاوٛ وِعِ جَوْمِرَاوٛ عَمْ‏:

جٛوطَ حَا ࢩَامٛ عَمْ،

35حَا تٛ مِلَاتِنِ کٛنّٜعٜنْ مَ جَاࢡْرُطُمْ کٛسْطٜ مَ#جَبُورَ 110‏:1؞؞

36«نغَمْ مَاجُمْ سٜيْ إِسْرَاءِيلَعٜنْ ڢُو ݠَامَ ڢَکَتْ، عِيسَى عٛو، مٛ عٛنْ ࢡِلِ دٛوْ لٜغَّلْ غَاڢَانغَلْ، اَللَّه لَاتِنِمٛ جَوْمِرَاوٛ عٜ اَلْمَسِيحُ‏!»

37ندٜ يِمْࢡٜ نَنِ طُمْ، ࢡٜرْطٜ مَࢡّٜ تَعِ، ࢡٜمبِعِ ݠِيٜرْ عٜ نٜلَاࢡٜ وٛطْࢡٜ‏: «نٛيْ مِنْ مبَطَتَ، دٜىٰرْطِرَاࢡٜ؟» 38ݠِيٜرْ جَابِ‏: «تُوبٜ، کٛو مٛيْ مٛوطٛنْ جَࢡَ بَݠْتِسْمَ بٜى عِنْدٜ عِيسَى اَلْمَسِيحُ؞ ندٜنْ اَللَّه يَاڢَنْتٛ عٛنْ حَکّٜىٰجِ مٛوطٛنْ، عٛحٛکَّنْ عٛنْ رُوحُ شٜنِيطٛ بٛو؞ 39عِينَوٛلْ نغٛعٛلْ طٛنْ نغَمْ مٛوطٛنْ، نغَمْ ࢡِࢡّٜ مٛنْ عٜ يِمْࢡٜ دَايِيࢡٜ ڢُو، ࢡٜ اَللَّه تَمِّ عٜوْنَاغٛ حَا مَاکٛ؞»

40ݠِيٜرْ ࢡٜسْدِ وٛلْوَنْغٛ ࢡٜ بٛلّٜ طُوطّٜ نغَمْ وَسُغٛ ࢡٜ، عٛوِعِ ࢡٜ‏: «کِسْنٜ کٛعٜ مٛوطٛنْ عٜ يِمْࢡٜ زَمَنُورُ حَلُّندُ ندُعُ‏!» 41جَࢡّٜ بٛلّٜ طٜ ݠِيٜرْ وٛلْوِ نجَࢡِ بَݠْتِسْمَ؞ ࢩَنْدٜ مَنْ يِمْࢡٜ بَاکِنْ عُجِنٜ تَتٛ ࢡٜسْدَامَ دٛوْ نُطِّنْࢡٜ؞ 42ࢡٜ تِيطِ نَنُغٛ عٜکِّتِنٛلْ نٜلَاࢡٜ، جٛوطَاغٛ ندٜرْ کَوْتَلْ دٜىٰرْطِرَاغُ، سٜنْدُغٛ ࢩَامْدُ عٜ وَطُغٛ دٛعَ؞

جٛوندٜ نُطِّنْࢡٜ

43نٜلَاࢡٜ نغَطِ کَايٜىٰڢِيجِ عٜ عَلَامَاجِ طُوطِّ، حَا يِمْࢡٜ ڢُو کُلْتٛرِ؞ 44نُطِّنْࢡٜ ڢُو کَوْتِ، لَاتِ جَمَعَارٜ وٛورٜ، ࢡٜمٛوࢡْتِ کٛ ࢡٜمَرِ ڢُو#کُوطٜ نٜلَاࢡٜ 4‏:32‏-35؞؞ 45ࢡٜشٛورِّ کُوجٜ عٜ مَرْدِ مَࢡّٜ، ࢡٜشٜنْدِ شٜىٰدٜ مَنْ شَکَ مَࢡّٜ، ڢٛدّٜ حَاجٜ کٛو مٛيْ؞ 46ࢩَلَادٜ ڢُو ࢡٜطٛنْ کَوْتَ ندٜرْ حَيْکَلِيرُ بٜى ࢡٜرْندٜ وٛورٜ، ࢡٜطٛنْ کَوْتَ حَا شِعٜ#2‏:46 شِعٜ مَلَّ شَلَاجٜ؞ مَࢡّٜ بٛو، ࢡٜطٛنْ ࢩَامْدَ بٜى سٜيٛ عٜ بٜى ࢡٜرْندٜ وٛورٜ، 47ࢡٜطٛنْ نغٜتَّ اَللَّه؞ يِمْࢡٜ ڢُو نغٜرْدِ ࢡٜ؞ ࢩَلَادٜ ڢُو جَوْمِرَاوٛ طٛنْ ࢡٜسْدَنَ جَمَعَارٜ مَࢡّٜ حِسْنَاࢡٜ؞

Currently Selected:

کُوطٜ نٜلَابٜٔ 2: داَ

Highlight

Copy