يُحَنَّ 16

1«مِوٛلْوَنِ عٛنْ طُمْ بَنَ نِي نغَمْ تَا عٛنْ عَشَّ نُطِّنْغٛ يَمْ؞ 2ࢡٜنغُرْتِنَنْ عٛنْ شُوطِ دٜوَلْ يَحُودُعٜنْ؞ سَاعِيرٜ وَرَنْ، ندٜ کٛو مٛيْ مبَرِ غٛطّٛ مٛوطٛنْ تَمِّ عٛوَطِ کٛ اَللَّه يِطِ؞ 3ࢡٜمبَطَنْ طُمْ نغَمْ ࢡٜعَنْدَا بَابِرَاوٛ، ࢡٜعَنْدَا يَمْ مِنْ بٛو؞ 4عَمَّا مِوٛلْوَنِ عٛنْ بَنَ نِي نغَمْ تٛ سَاعِ مَنْ وَطِ، عٛنْ شِڢْتٛرَ مِ بِيطٛ عٛنْ طُمْ؞» مِوِعَايْنٛ عٛنْ طُمْ دِغَ ڢُطَّمْ، نغَمْ مِ طٛنّٛ وٛنْدِ بٜى مٛوطٛنْ؞

کُوغَلْ رُوحُ شٜنِيطٛ

5جٛنْتَ، مِطٛنْ دِلَّ حَا نٜلْطٛ يَمْ، وَلَا کٛو غٛوتٛ مٛوطٛنْ ࢨَمِ يَمْ‏: تٛيْ نجَحَتَا؟ 6عَمَّا جٛنْتَ ࢡٜرْطٜ مٛنْ شُنَکٜ نغَمْ مِوِعِ عٛنْ طُمْ؞ 7عَمَّا غٛونغَ مِوِعَتَ عٛنْ‏: طُمْ ࢡُرَنْ نَڢُغٛ عٛنْ تٛ مِدِلِّ، نغَمْ تٛ مِدِلَّايْ، بَلّٛووٛ غٛ وَرَتَا حَا مٛوطٛنْ؞ تٛ مِدِلِّ، مِنٜلَنْ مٛ حَا مٛوطٛنْ؞ 8کَنغْکٛ، تٛ عٛوَرِ، عٛوَنغِنَنْ بٛوڢِ يِمْࢡٜ دُنِيَارُ دٛوْ حَالَ حَکّٜ عٜ عَدِلَاکُ عٜ کِيتَ؞ 9ࢡٜطٛنْ مبٛوڢَ دٛوْ حَالَ حَکّٜ، نغَمْ ࢡٜنُطِّنَايْ يَمْ؞ 10ࢡٜطٛنْ مبٛوڢَ دٛوْ حَالَ عَدِلَاکُ، نغَمْ مِطٛنْ دِلَّ حَا بَابِرَاوٛ، عٛنْ مٜىٰتَتَا يِعُغٛ يَمْ؞ 11ࢡٜطٛنْ مبٛوڢَ دٛوْ حَالَ کِيتَ بٛو، نغَمْ لَامِيطٛ دُنِيَارُ ندُ حِيتَامَ؞

12«کُوجٜ غٛطّٜ طُوطّٜ لُتَّنِ يَمْ وِعُغٛ عٛنْ، عَمَّا طُمْ ࢡُرَنْ ڢَامُ مٛوطٛنْ تَوٛنْ؞ 13تٛ رُوحُ مٛ غٛونغَ وَرِ، عٛطٛوَنْ عٛنْ ندٜرْ غٛونغَ ڢُو؞ نغَمْ عٛوٛلْوَتَا نغِطَ مَاکٛ، عَمَّا عٛوِعَنْ عٛنْ کٛ عٛنَنِ، کٛ تَمِّ وَرْغٛ ڢُو؞ 14کَنغْکٛ عٛتٜدِّنْتَمْ، نغَمْ عٛيٜشَّنْ عٛنْ کٛ عٛحٜࢡِ حَا عَمْ؞ 15کٛ بَابِرَاوٛ مَرِ ڢُو، مِنْ مَرِ طُمْ؞ نغَمْ مَاجُمْ مبِعْمِ‏: رُوحُ يٜشَّنْ عٛنْ کٛ عٛنَنِ حَا عَمْ؞»

سُنٛ لَاتٛتٛ سٜيٛ

16عِيسَى وِعِ‏: «يٜىٰسٛ سٜطَّ عٛنْ نغِعَتَا يَمْ، ࢡَاوٛطٛنْ سٜطَّ عٛنْ نغِعَتَمْ ڢَحِنْ؞» 17وٛطْࢡٜ شَکَ ݠُکَرَعٜنْ مَاکٛ ࢨَمْࢨَمْتِرِ‏: «طُمٜ عٛيِطِ وِعْغٛ عٜنْ‏: يٜىٰسٛ سٜطَّ عٛنْ نغِعَتَا يَمْ، ࢡَاوٛطٛنْ سٜطَّ عٛنْ نغِعَتَمْ ڢَحِنْ؞ کَدِبٛو‏: نغَمْ مِطٛنْ دِلَّ حَا بَابِرَاوٛ؟ 18طُمٜ طُمْ يِطِ وِعْغٛ‏: يٜىٰسٛ سٜطَّ؟ عٜنْ ݠَامَتَا کٛ عٛيِطِ وِعُغٛ؞» 19عِيسَى عَنْدِ ࢡٜنغِطِ ࢨَمُغٛ مٛ، عٛوِعِ ࢡٜ‏: «مِوِعِ عٛنْ‏: يٜىٰسٛ سٜطَّ عٛنْ نغِعَتَا يَمْ، ࢡَاوٛطٛنْ سٜطَّ عٛنْ نغِعَتَمْ ڢَحِنْ؞ دٛوْ مَاجُمْ عٛنْ طٛنْ ࢨَمْࢨَمْتِرَ نَ؟ 20غٛونغَ مِوِعَتَ عٛنْ‏: عٛنْ مبٛيَنْ، عٛنْ شُنٛتٛ، عَمَّا دُنِيَارُ سٜيٛتٛ؞ عٛنْ شُنٛتٛ، عَمَّا سُنٛ مٛوطٛنْ لَاتٛتٛ سٜيٛ؞ 21تٛ دٜبّٛ رٜىٰدُوجٛ ࢡَدَکٜ ࢡٜسْنُغٛ، عٛسُنٛتٛ نغَمْ سَاعِ تٛرَّ وَرَنِمٛ؞ عَمَّا تٛ عٛࢡٜسْنِ، عٛيٜجِّتَنْ بٛنٜ مَنْ نغَمْ دَلِيلَ سٜيٛ، نغَمْ عٛدَࢩِ نٜطّٛ حَا دُنِيَارُ؞ 22بَنَ نٛنْ عٛنٛنْ بٛو، عٛنْ شُنَکٜ جٛنْتَ، عَمَّا مِيِعَنْ عٛنْ ڢَحِنْ؞ ندٜنْ کَمْ ࢡٜرْطٜ مٛوطٛنْ شٜيٛتٛ، وَلَا مٛ عِتَّتَ سٜيٛ مٛوطٛنْ سَمْ؞

23«تٛ ࢩَلَادٜ مَنْ يٛتَّکٜ، عٛنْ ࢨَمَتَا يَمْ کٛو طُمٜ؞ غٛونغَ مِوِعَتَ عٛنْ‏: کٛو طُمٜ عٛنْ تٛرِ بَابِرَاوٛ بٜى عِنْدٜ عَمْ ڢُو، عٛحٛکَّنْ عٛنْ طُمْ؞ 24حَا وَرْغٛ حَنْدٜ عٛنْ تٛرَاکِ کٛو طُمٜ بٜى عِنْدٜ عَمْ؞ تٛرٜ، عٛنْ کٜࢡَنْ کٛ عٛنْ تٛرِ، نغَمْ حَا سٜيٛ مٛوطٛنْ حٜىٰوَ؞»

عِيسَى وٛنِ جَالِيطٛ دُنِيَارُ

25عِيسَى تٛکِّ وِعُغٛ‏: «مِوٛلْوَنِ عٛنْ کُوجٜ طٜعٜ ڢُو بٜى بَلْندِ؞ سَاعِيرٜ وَرَنْ ندٜ مِوٛلْوَنْتَا عٛنْ بٜى بَلْندِ ڢَحِنْ، عَمَّا مِوٛلْوَنَنْ عٛنْ حَالَ بَابِرَاوٛ بٜى لَاࢡْطُمْ؞ 26تٛ ࢩَلَادٜ مَنْ يٛتَّکٜ، عٛنْ تٛرٛتٛ بَابِرَاوٛ بٜى عِنْدٜ عَمْ؞ مِوِعَايْ عٛنْ، مِتٛرٛتٛ بَابِرَاوٛ نغَمْ مٛوطٛنْ؞ 27بَابِرَاوٛ بٜى حٛورٜ مُمْ يِطِ عٛنْ، نغَمْ عٛنْ نغِطِ يَمْ، عٛنْ نُطِّنِ مِعِوِ حَا اَللَّه؞ 28مِعِوِ حَا بَابِرَاوٛ، مِوَرِ ندٜرْ دُنِيَارُ؞ جٛنْتَ مِعَشَّنْ دُنِيَارُ، مِحٛوتَنْ حَا بَابِرَاوٛ؞»

29ݠُکَرَعٜنْ مَاکٛ مبِعِمٛ‏: «ندَا، جٛنْتَ عَطٛنْ وٛلْوَ لَاࢡْطُمْ، بِلَا بَلْندِ؞ 30جٛنْتَ مِنْ ݠَامِ عَعَنْدِ کٛو طُمٜ ڢُو؞ عَوَلَا حَاجٜ غٛطّٛ ࢨَمٜ، عَعَنْدِ کٛ عٛيِطِ ࢨَمُغٛ؞ نغَمْ مَاجُمْ مِنْ نُطِّنِ عَعِوِ حَا اَللَّه؞» 31عِيسَى جَابِ ࢡٜ‏: «جٛنْتَ عٛنْ نُطِّنِ نَ؟ 32سَاعِ وَرَنْ، کٛو جٛنْتَ مَا طُمْ وَطِ، عٛنْ ڢُو عٛنْ شَنغْکِتِتّٛ، کٛو مٛيْ ڢُو حَا سَارٜ مُوطُمْ، عٛنْ عَشَّتَمْ مِنْ ڢٜىٰرٜ عَمْ؞ عَمَّا مِلَاتَاکِ ڢٜىٰرٜ عَمْ، نغَمْ بَابِرَاوٛ طٛنْ وٛنْدِ بٜى عَمْ؞ 33مِوٛلْوَنِ عٛنْ طُمْ نغَمْ حَا عٛنْ کٜࢡَ سَلَامَنْ ندٜرْ عَمْ؞ عٛنْ نجَرَنْ بٛنٜ ندٜرْ دُنِيَارُ، عَمَّا تِطِّنٜ ࢡٜرْطٜ مٛوطٛنْ، مِنْ مِجَالَکٜ دُنِيَارُ؞»

Currently Selected:

يُحَنَّ 16: داَ

Highlight

Copy