يُحَنَّ 8
8
1عِيسَى يٜحِ حٛوسٜىٰرٜ جَيْتُنْجٜ؞ 2عَمَّا ڢَجِرِ شُبْ عٛلٛرْتِ حَا حَيْکَلِيرُ، عُمَّاتٛورٜ ڢُو وَرِ حَا مَاکٛ؞ عٛجٛوطِ، عٛڢُطِّ عٜکِّتِنْغٛ ࢡٜ؞ 3ندٜنْ مٛودِࢡّٜ تَوْرٜىٰتَ عٜ ڢَرِسَعٜنْ نغَدَّنِمٛ دٜبّٛ مٛ ࢡٜنَنغِ ندٜرْ نجٜىٰنُ؞ ࢡٜندَرْنِمٛ يٜىٰسٛ يِمْࢡٜ ڢُو، 4ࢡٜمبِعِ عِيسَى: «مٛودِبّٛ، مِنْ نَنغِ دٜبّٛ عٛو ندٜرْ نجٜىٰنُ؞ 5مُوسَى عُمْرِ مِنْ ندٜرْ تَوْرٜىٰتَ مِنْ ݠِطَ عِرِنْ دٜبّٛ عٛو بٜى کَاعٜ حَا عٛمَايَ؞ عٜ عَنْ، طُمٜ عَوِعَتَ#ڢَرِلَّاجِ لٜوِعٜنْ 20:10؛ تٛوکْتَاکِ تَوْرٜىٰتَ 22:22-24؞؟» 6ࢡٜمبِعِ نٛنْ نغَمْ ڢٛونْدُغٛ مٛ، حَا ࢡٜکٜࢡَ دَلِيلَ وُلَّاغٛ مٛ؞ عَمَّا عِيسَى تُرِ، ڢُطِّ وِنْدُغٛ حَا لٜسْدِ بٜى حٛوندُ مُوطُمْ؞ 7ندٜ ࢡٜتٛکِّ ࢨَمُغٛ مٛ، عٛدَرِ، عٛوِعِ ࢡٜ: «غٛطّٛ مٛوطٛنْ مٛ وَلَا حَکّٜ سَمْ، عَارْتَ ڢِطُغٛ مٛ بٜى حَيْرٜ؞» 8ندٜنْ عٛتُرِ ڢَحِنْ، عٛڢُطِّتِ وِنْدُغٛ حَا لٜسْدِ؞ 9ندٜ ࢡٜنَنِ بٛلّٜ طٜعٜ، ࢡٜندِلِّ غٛوتٛ غٛوتٛ، ندٛتِّعٜنْ عَارْتِ دِلُّغٛ؞ عِيسَى ڢٜىٰرٜ مُمْ لُتِّ، دٜبّٛ غٛ طٛنْ دَرِ يٜىٰسٛ مَاکٛ؞ 10ندٜنْ عِيسَى دَرِ، وِعِمٛ: «دٜبّٛ، تٛيْ ࢡٜ؟ وَلَا دٛعُّطٛ مَ کِيتَ نَ؟» 11دٜبّٛ جَابِ: «وَلَا کٛو غٛوتٛ، جَوْمِرَاوٛ؞» عِيسَى وِعِمٛ: «مِنْ بٛو، مِحِيتَتَاکٛ مَ؞ دِلُّ، عَمَّا تَا مٜىٰتُ وَطُغٛ حَکّٜ!»
عِيسَى وٛنِ أَلنّٛورَ دُنِيَارُ
12عِيسَى وٛلْوَنِ يِمْࢡٜ ڢَحِنْ، عٛوِعِ: «مِنْ، مِ أَلنّٛورَ دُنِيَارُ؞ کٛو مٛيْ تٛکِّ يَمْ، يَحَتَا ندٜرْ ࢩِࢡْرٜ ڢَحِنْ، عَمَّا عٛحٜࢡَنْ أَلنّٛورَ ندٛکَّنْکَ نغٜىٰندَمْ#مَتَّ 5:14؛ يُحَنَّ 9:5؞؞» 13ڢَرِسَعٜنْ مبِعِمٛ: «عَطٛنْ سٜىٰدَنٛ حٛورٜ مَاطَ، سٜىٰدَمْکُ مَ لَاتَاکِ غٛونغَ#يُحَنَّ 5:31؞؞» 14عِيسَى جَابِ ࢡٜ: «کٛو تٛ مِطٛنْ سٜىٰدَنٛ حٛورٜ عَمْ، سٜىٰدَمْکُ عَمْ طُمْ غٛونغَ، نغَمْ مِعَنْدِ حَا مِعِوِ، مِعَنْدِ حَا مِيَحَتَ بٛو؞ عَمَّا عٛنٛنْ، عٛنْ عَنْدَا حَا مِعِوِ، عٛنْ عَنْدَا حَا مِيَحَتَ بٛو؞ 15عٛنٛنْ عٛنْ طٛنْ مبَطَ کِيتَ ڢٛدّٜ نُمٛوجِ نٜطّٛ، مِنْ، مِحِيتَتَاکٛ کٛو مٛيْ؞ 16کٛو تٛ مِحِيتَکٜ غٛطّٛ بٛو، کِيتَ عَمْ غٛونغْطَنْ، نغَمْ مِحِيتَتَاکٛ ڢٜىٰرٜ عَمْ، عَمَّا بَابِرَاوٛ نٜلْطٛ يَمْ طٛنْ وٛنْدِ بٜى عَمْ؞ 17طُمْ بِنْدَاطُمْ ندٜرْ تَوْرٜىٰتَ مٛوطٛنْ: تٛ طِطٛ شٜىٰدَکٜ، سٜىٰدَمْکُ مَنْ طُمْ غٛونغَ؞ 18مِنْ، مِطٛنْ سٜىٰدَنٛ حٛورٜ عَمْ، بَابِرَاوٛ نٜلْطٛ يَمْ بٛو طٛنْ سٜىٰدَنٛ يَمْ؞» 19ࢡٜمبِعِمٛ: «تٛيْ بَابِرَاوٛ مَ وٛنِ؟» عِيسَى جَابِ ࢡٜ: «عٛنْ عَنْدَا يَمْ، عٛنْ عَنْدَا بَابِرَاوٛ عَمْ بٛو؞ تٛ عٛنْ عَنْدِنٛ يَمْ، عٛنْ عَنْدَنّٛ بَابِرَاوٛ عَمْ بٛو؞»
20عِيسَى وٛلْوِ بٛلّٜ طٜعٜ سَاعِ عٛطٛنّٛ عٜکِّتِنَ يِمْࢡٜ ندٜرْ حَيْکَلِيرُ، حَا نٛکُّورٜ سُنْدُکْرُ دٛکّٜ شٜىٰدٜ وٛنِ؞ وَلَا مٛ مٜىٰمِمٛ، نغَمْ وَکَّتِ مَاکٛ وَرَايْ تَوٛنْ؞
عٛنْ مبَاوَتَا يَحُغٛ حَا نجَحَنْمِ
21ڢَحِنْ عِيسَى وِعِ ࢡٜ: «مِدِلَّنْ؞ عٛنْ تٜڢَتَمْ، عَمَّا عٛنْ مَايَنْ ندٜرْ حَکّٜىٰجِ مٛوطٛنْ؞ عٛنْ مبَاوَتَا يَحُغٛ حَا نجَحَنْمِ؞» 22يَحُودُعٜنْ مبِعْمبِعْتِرِ حَکُّندٜ مُوطُمْعٜنْ: «عٛمبَرْتٛيَنْ نَ؟ نغَمْ عٛوِعِ: عٛنْ مبَاوَتَا يَحُغٛ حَا نجَحَنْمِ؞» 23عِيسَى وِعِ ࢡٜ: «عٛنٛنْ عٛنْ عِوِ حَا لٜسْ، مِنْ مِعِوِ حَا دٛوْ؞ عٛنٛنْ عٛنْ يِمْࢡٜ دُنِيَارُ ندُ، عَمَّا مِنْ مِلَاتَاکِمٛ دُنِيَارُ ندُ؞ 24نغَمْ مَاجُمْ مِوِعِ عٛنْ: عٛنْ مَايَنْ ندٜرْ حَکّٜىٰجِ مٛوطٛنْ؞ نغَمْ تٛ عٛنْ نُطِّنَايْ مِنْ وٛنِ مٛ نغٛنْمِ#8:24 لَارْ غُرْتَاکِ 3:14؞، عٛنْ مَايَنْ ندٜرْ حَکّٜىٰجِ مٛوطٛنْ؞» 25ࢡٜمبِعِمٛ: «عَنْ، عَ مٛيْ؟» عِيسَى وِعِ ࢡٜ: «مِتٛکِّ وِعُغٛ عٛنْ طُمْ دِغَ ڢُطَّمْ؞ 26وٛودِ کُوجٜ طُوطّٜ طٜ مِيِطِ وِعْغٛ دٛوْ مٛوطٛنْ عٜ حِيتٛرَاغٛ عٛنْ بٜى مَاجُمْ، عَمَّا نٜلْطٛ يَمْ عٛ غٛونغَاجٛ، مِطٛنْ وٛلْوَنَ دُنِيَارُ کٛ مِنَنِ حَا مَاکٛ تَنْ؞»
27ࢡٜݠَامَايْ عٛطٛنْ وٛلْوَنَ ࢡٜ دٛوْ بَابِرَاوٛ؞ 28ندٜنْ عِيسَى وِعِ ࢡٜ: «تٛ عٛنْ ࢡَنغْتِ ࢡِي-نٜطّٛ، عٛنْ عَنْدَنْ مِنْ وٛنِ مٛ نغٛنْمِ، عٛنْ عَنْدَنْ مِوَطَتَا کٛو طُمٜ بٜى مُويٛ عَمْ، عَمَّا مِطٛنْ وٛلْوَ کٛ بَابِرَاوٛ عٜکِّتِنِ يَمْ تَنْ؞ 29نٜلْطٛ يَمْ طٛنْ وٛنْدِ بٜى عَمْ، عٛعَشَّايْ يَمْ ڢٜىٰرٜ عَمْ، نغَمْ ڢٛرٛيْ مِطٛنْ وَطَ کٛ ڢٛتَّنْتَ مٛ؞» 30ندٜ عِيسَى وٛلْوِ بَنَ نِي، طُوطْࢡٜ نُطِّنِمٛ؞
رِمْࢡٜ عٜ جٜيَاࢡٜ
31ندٜنْ عِيسَى وِعِ يَحُودُعٜنْ نُطِّنْࢡٜ مٛ: «تٛ عٛنْ طٛنْ تَبِتِ ندٜرْ وٛلْدٜ عَمْ، ندٜنْ کَمْ عٛنْ لَاتٛتٛ ݠُکَرَعٜنْ عَمْ ڢَکَتْ؞ 32عٛنْ عَنْدَنْ غٛونغَ، غٛونغَ بٛو رِمْطِنَنْ عٛنْ؞» 33ࢡٜنجَابِمٛ: «مِنِنْ مِنْ ࢡِࢡّٜ إِبْرَاهِيمَ، مِنْ مٜىٰطَايْ لَاتَاغٛ جٜيَاࢡٜ غٛطّٛ؞ نٛيْ عَوِعْرَتَ مِنْ: عٛنْ لَاتٛتٛ رِمْࢡٜ#مَتَّ 3:9؛ لُکَ 3:8؞؟» 34عِيسَى وِعِ: «غٛونغَ مِطٛنْ وِعَ عٛنْ: بَطّٛ حَکّٜ ڢُو عٛ جٜيَاطٛ حَکّٜ؞ 35جٜيَاطٛ وٛنْدَتَا بٜى يِمْࢡٜ سَارٜ ڢٛرٛيْ، عَمَّا ࢡِطّٛ وٛنْدَنْ بٜى يِمْࢡٜ سَارٜ ڢٛرٛيْ؞ 36تٛ ࢡِطّٛ رِمْطِنِ عٛنْ، ندٜنْ کَمْ عٛنْ لَاتٛتٛ رِمْࢡٜ ڢَکَتْ؞ 37مِعَنْدِ عٛنْ ࢡِࢡّٜ إِبْرَاهِيمَ؞ عَمَّا عٛنْ طٛنْ طَࢡَّ مبَرُغٛ يَمْ، نغَمْ عٛنْ نجَࢡَايْ بٛلّٜ عَمْ؞ 38مِنْ مِطٛنْ وٛلْوَ دٛوْ کٛ مِيِعِ حَا بَابِرَاوٛ عَمْ، عَمَّا عٛنٛنْ عٛنْ طٛنْ مبَطَ کٛ نَنْطٛنْ حَا بَابَ مٛوطٛنْ؞»
39ࢡٜمبِعِمٛ: «إِبْرَاهِيمَ وٛنِ بَابِرَاوٛ عَمِنْ؞» عِيسَى وِعِ ࢡٜ: «تٛ عٛنْ ࢡِࢡّٜ إِبْرَاهِيمَ، عٛنْ کُووَنّٛ کُوغَلْ نغَلْ عٛحُووِ؞ 40عَمَّا جٛنْتَ، عٛنْ طٛنْ طَࢡَّ مبَرُغٛ يَمْ، مِنْ مٛ وٛلْوَنِ عٛنْ غٛونغَ کَ نَنْمِ حَا اَللَّه؞ إِبْرَاهِيمَ مٜىٰطَايْ وَطُغٛ عِرِنْ مَاجُمْ؞ 41عٛنْ طٛنْ کُووَ کُوطٜ بَابَ مٛوطٛنْ؞» ࢡٜمبِعِمٛ: «مِنِنْ مِنْ لَاتَاکِ نجَالُعٜنْ، مِنْ نغٛودِ بَابِرَاوٛ غٛوتٛ، طُمْ اَللَّه؞» 42عِيسَى وِعِ ࢡٜ: «تٛ اَللَّه وٛنّٛ بَابِرَاوٛ مٛوطٛنْ، عٛنْ نغِطَنّٛ يَمْ، نغَمْ دِغَ اَللَّه عِوْمِ، دَلِيلَ مَاکٛ نغَرْمِ؞ مِوَرَايْ بٜى نغِطَ عَمْ، عَمَّا کَنغْکٛ نٜلِ يَمْ؞ 43نغَمْ طُمٜ عٛنْ ݠَامَتَا کٛ مِوِعَتَ عٛنْ؟ نغَمْ عٛنْ مبَاوَتَا حٜطِتَاغٛ کٛ مِوٛلْوَنْتَ عٛنْ؞ 44عِبْلِسَ وٛنِ بَابَ مٛوطٛنْ، عٛنْ نغِطِ وَطُغٛ کٛ بَابَ مٛوطٛنْ يِطِ؞ عٛ مبَرٛووٛ کٛعٜ دِغَ ڢُطَّمْ، عٛمٜىٰطَايْ وٛلْوُغٛ غٛونغَ، نغَمْ غٛونغَ وَلَا ندٜرْ مَاکٛ؞ تٛ عٛطٛنْ وٛلْوَ ڢٜوْرٜ، طُمْ طَبِيَ مَاکٛ، نغَمْ عٛ ݠٜوٛووٛ، عٛ بَابَ ڢٜوْرٜ؞ 45عَمَّا مِنْ، غٛونغَ مِوِعَتَ، کَنْجُمْ وَطِ عٛنْ نُطِّنْتَا يَمْ؞ 46مٛيْ ندٜرْ مٛوطٛنْ وَاوَتَ سٜىٰدَاغٛ مِوَطِ حَکّٜ؟ عَمَّا تٛ غٛونغَ مِوٛلْوَتَ، کٛنِ عٛنْ نُطِّنْتَا يَمْ؟ 47غٛطّٛ اَللَّه حٜطِتِتّٛ بٛلّٜ اَللَّه؞ عَمَّا عٛنٛنْ عٛنْ لَاتَاکِ يِمْࢡٜ اَللَّه، نغَمْ مَنْ، عٛنْ کٜطِتَتَاکٛ طٜ؞»
عِيسَى عٜ إِبْرَاهِيمَ
48يَحُودُعٜنْ مبِعِ عِيسَى: «نَا غٛونغَ مِنْ مبِعِ: عَ سَمَرِيَاجٛ، عَ غِنَّاطٛ؟» 49عِيسَى جَابِ ࢡٜ: «نَا مِ غِنَّاطٛ؞ عَمَّا مِطٛنْ تٜدِّنَ بَابِرَاوٛ عَمْ، عٛنٛنْ بٛو عٛنْ طٛنْ نجَوٛ يَمْ؞ 50مِنْ، مِطَࢡَّنْتَا حٛورٜ عَمْ تٜدُّنغَلْ؞ وٛودِ مٛ طَࢡَّنْتَمِّ تٜدُّنغَلْ، کَنغْکٛ وٛنِ کِيتٛووٛ بٛو؞ 51غٛونغَ مِوِعَتَ عٛنْ: کٛو مٛيْ طٛوْتَنِ وٛلْدٜ عَمْ، مَايَتَا سَمْ؞» 52يَحُودُعٜنْ مبِعِمٛ: «جٛنْتَ مِنْ عَنْدِ عَ غِنَّاطٛ؞ إِبْرَاهِيمَ مَايِ، اَلنَّبِعٜنْ بٛو مَايِ، ندٜنْ عَنْ عَوِعَ: کٛو مٛيْ طٛوْتَنِ بٛلّٜ عَمْ، مَايَتَا سَمْ؞ 53عَࢡُرِ إِبْرَاهِيمَ کَاکَ عَمِنْ مٛ مَايِ مَنغُ کَدِ نَ؟ کَنغْکٛ عٛمَايِ؞ اَلنَّبِعٜنْ بٛو مَايِ؞ کَدِ عَنْ عَطٛنْ لَارَ حٛورٜ مَ عَ مٛيْ؟» 54عِيسَى جَابِ: «تٛ مِطٛنْ تٜدِّنَ حٛورٜ عَمْ، تٜدُّنغَلْ عَمْ وَلَا سَمَنْ؞ مٛ تٜدِّنْتَمِّ وٛنِ بَابِرَاوٛ عَمْ، مٛ مبِعْطٛنْ عٛ اَللَّه مٛوطٛنْ؞ 55عَمَّا عٛنْ عَنْدَا مٛ، مِنْ مِعَنْدِمٛ؞ تٛ مِوِعْنٛ مِعَنْدَا مٛ، مِلَاتٛتٛنٛ ݠٜوٛووٛ بَنَ مٛوطٛنْ؞ عَمَّا مِعَنْدِمٛ، مِطٛنْ طٛوْتَنٛ بٛلّٜ مَاکٛ؞ 56إِبْرَاهِيمَ کَاکَ مٛوطٛنْ سٜيٛرِ يِعُغٛ ࢩَلَادٜ عَمْ، عٛيِعِ ندٜ، عٛسٜيِ؞» 57يَحُودُعٜنْ مبِعِمٛ: «عَوَطَايْ دُوࢡِ شَݠَّنْطٜ جٛوِ تَوٛنْ، ندٜنْ عَوِعِ عَيِعِ إِبْرَاهِيمَ؟» 58عِيسَى وِعِ ࢡٜ: «غٛونغَ مِوِعَتَ عٛنْ: دِغَ إِبْرَاهِيمَ دَࢩَاکَ، مِنْ مِطٛنْ؞» 59ندٜنْ ࢡٜکٛوعِ کَاعٜ نغَمْ ࢡٜݠِطَ مٛ، عَمَّا عِيسَى سُوطِ، وُرْتِ حَيْکَلِيرُ؞
Currently Selected:
يُحَنَّ 8: داَ
Highlight
Share
Copy
Want to have your highlights saved across all your devices? Sign up or sign in
Fulfulde Bible Ajamiya © Bible Society of Cameroon, 2016.
