लूका 4
4
येशूजे जाँच
मत्ती ४:१-११; मर्कूस १:१२-१३
1येशू पवित्र आत्मादे पूरा फ्यादेबे यर्दन होङ्दे ल्वारदे, मेस्ये आत्मादे ङूने मी अन्टोङब चनमन नेने स्योल्गीदे। 2मेस्ये ङ्यील्लङ् दिनसेमे मी अन्टोङब चनमन नेने शैतानदे ङूने जाँच चीत्दे। हम्ब दिनने ङूदे चैत्याये अन्च, ङ्यील्लङ् दिन जेङ्क ङ्येदे ङू ठीदे।
3होर्दे शैतानदे ङूने यदे, “न परमेश्वरजे च यलो अम्ब लूङ्ने आज्ञा पीन्, मेस्ये हम्ब लूङ् क्यङ् क्यूप्पस्य।”
4 #
व्यवस्था 8:3
येशूदे ङूने जवाफ पीन्दे, “धर्मशास्त्रने येर्बे लिख्दीये ख्यङ्, ‘क्यङ्देत्यामे मी सोम्बो क्यूरदी।”
5ङूदे येशूने फेर नेत्याने कूदीदेबे खात्याने संसारजे राज्ययू क्वाने तन्दे। 6शैतानदे ङूने यदे, “ङ अम्ब साप्ता हकप्रे अम्बजे मान नने पीन्क्य, चेनेयलो अम्ब क्वाने ङैने सूम्दीये ख्यङ्, ङैदे सूने पीन्दीङ् रीको, ङूनेने पीन्क्य। 7नदे ङैने स्यूव पीन्लो अम्ब राज्ययू क्वाने नैजे क्यूक्क्य।”
8 #
व्यवस्था 6:13
येशूदे ङूने जवाफ पीन्दे, “धर्मशास्त्रने येर्बे लिख्दीये ख्यङ्, ‘नदे परमप्रभु, रङ्सेजे परमेश्वरने स्यूब पीन्, मेस्ये ङूजे त्यामे सेवा ची’।”
9होर्दे ङूदे येशूने यरूशलेमने कूदीदेबे मन्दिरजे पात्ता फ्या-टने येत्दे, मेस्ये ङूदे यदे, “न परमेश्वरजे च यलो यैयादे मो छङ्। 10#भजनसंग्रह 91:11,12चेनेयलो धर्मशास्त्रने लिख्दीये ख्यङ्,
‘ङूदे नैजे रक्षा चेने रङ्से स्वर्गदूतयूने आज्ञा पीङ्क्य,’
11मेस्ये ‘थमयूदे नैजे तोप् लूङ्ने ज्या अन्थूङ्बस्य यदेबे ला-लाने थम्दीय’ नत्रलो नैजे तोप् लूङ्ने थूङ्बीय।”
12 #
व्यवस्था 6:16
येशूदे ङूने जवाफ पीन्दे, ‘धर्मशास्त्रने येरे येये ख्यङ्, “नदे परमप्रभु रङ्से परमेश्वरजे जाँच अन्चील्लाची’।’’
13शैतानदे येशूने क्वाने जाँच चे जङ्क ङ्येदे ज्य मौका अम्प्रेत्दासेमे ङूने पोङ्यीदेबे गीली।
14येशू पवित्र आत्माजे शक्तिने गालीलने ल्वारदे, मेस्ये ङूजे बारेने ती-छो का-मुलुकनेने ड्वङ्गे क्यूत्दे। 15येशूदे सभा-कीम्यूने शिक्षा पीनने सुरु चीत्दे, मेस्ये क्वादेने ङूजे सार्या चेख्य।
16येशू नासरतने रदे, ङू हैयाने छर ख्य। ङूजे बनी अनुसार आराम टूङब दिनने सभा-कीम्ने गीलीदे, मेस्ये छ्य्वेने मेर्दे। 17येशूने अगमवक्ता यशैयाजे किताब पीन्दे। ङूदे हम्ब किताब ल्वादेबे अम्ब पो लिख्दीयेब खण्ड योन्दे:
18 #
यशैया 61:1,2 “परमप्रभुजे आत्मा ङै फ्याने ख्यङ्, चेनेयलो दूख्प्रेबयूने सूगब खबर स्य्वेजे लागि ङूदे ङैने अभिषेक चे ख्यङ्। झ्यालखानजे मीयू योम्बेजे लागि, कनयूने म्या तङ्ला चेजे लागि, अन्-न्यायने पर्दीनब मीयूने छूर्देमेजे लागि,
19मेस्ये परमप्रभुजे सूगब वर्षजे बारेने स्य्वेजे लागि ङूदे ङैने कूल्बे ख्यङ्।”
20येशूदे किताब बन्द चीत्दे, मेस्ये सेवा चेब मीत्याने पीन्देबे ङू टूङ्दे। सभा-कीम्ने ख्यब मीयू क्वाजे म्या ङू फ्याने पर्दीदे। 21होर्दे ङूदे थमयूने यदे, “दीनी धर्मशास्त्रजे अम्ब वचन नमयूदे ङ्यीन-ङ्यीनने पूरा क्यूरे ख्यङ्।”
22मीयू क्वादेने येशूजे सार्या चीत्दे, मेस्ये ङूजे ङूर्दे योङ्रब ङ्येमब वचनने छाक्कै परदीकदे, मेस्ये थमयूदे यदे, “ङू योसेफजे च ते स्व?”
23येशूदे थमयूने यदे, “तम्दम्ने, नमयूदे ङैने अम्ब उखान यीय, ‘ओ डक्टर, रङ्सेदेने रङ्से तम् ची। कफर्नहुमने नदे च च चीत्दे यब पो ङीदे तदे, हम्ब अयाने रङ्से सहरनेये ची’।” 24#यूहन्ना 4:44होर्दे ङूदे यदे, “तम्दम्ने ङ नमयूने यीय, अगमवक्ता सूनेये ङूजे रङ्से देशने स्वागत अन्ची। 25#१ राजा 17:1तर ङ तम्दम्ने नमयूने यीय, एलियाजे पलोने इस्राएलने कूम प्ल्यङ् सीयेब मदीयू ख्य, हम्ब बीलने वर्ष सोम् ल-र्वा झीरी अन्रदे खडेरी क्यूरी होरेक्यूत्देबे का-मुलुक देशने सोरो केन् अनिकाल पर्दीक ख्य। 26#१ राजा 17:8-16तर एलिया सीदोन देशजे सारपतने ख्यब प्ल्यङ् सीयेब मदी त्या ट्याने कूल्बीदे, सूजो सूट्यानेये अन्कूल्बी। 27#२ राजा 5:1-14अगमवक्ता एलीशाजे पलोने इस्राएलने कूम कुष्ठ बीद लादीकबयू ख्यङ्लीने सिरियाजे नामान त्या तम् चीत्दे, सूजो सूत्यानेये तम् अन्ची।”
28अम्ब पो तदेबे सभा-कीम्ने ख्यब मीयू क्वाने छीदे मूत्दे क्यूत्दे। 29थमयू लङ्दे मेस्ये येशूने सहरदे फीने योम्बीदेबे कम्ब कङ्ने थमयूजे लागि सहर बन्दीये ख्य, हम्बजे टने कूदीदेबे ङूने मो हूल्बे मेदे। 30तर ङू थमयूजे अन्द्रदे क्योइदेबे योङ्गीदे।
छेत्-आत्मा लादीकब मी
मर्कूस १:२१-२८
31येशू गालीलजे सहर त्या कफर्नहुमने तल्रदे। आराम टूङब दिनने ङूदे थमयूने शिक्षा पीनने सुरु चीत्दे। 32#मत्ती 7:28,29थमयू येशूजे शिक्षाने हार्मन्दीकदे, चेनेयलो ङूजे वचन हक प्रेब मीजेप्र ख्य।
33सभा-कीम्ने अशुद्ध छेत् आत्मादे चूङ्गब मी त्या ख्य, मेस्ये हम्ब के केन् योन्देबे पारा पूत्दे, 34“येशू नासरी, नैजे ङीप्रे चे काम? न ङीयूने नाश चेने रऔ?, न परमेश्वरजे पवित्र मी यदेबे ङैने था ख्यङ्।”
35होर्दे येशूदे ङूने फ्राचीदे, “पारा अम्पूल्लाची, मेस्ये ङूजे ङ्वदे योङ्ब।” हम्ब मीने अन्द्रने छ्यर् तप्पीदेबे ङूने चैत्याये नोक्सान अन्चील्लाबे हम्ब छेत् आत्मा ङूजे ङ्वदे योङ्देबे गीली।
36होर्दे थमयू क्वाने छाक्के पर्दीकदे, मेस्ये त्यादे सूजोने येरे यदे, “अम्ब कर खल्जे वचन? येशूदे अशुद्ध आत्मायूने हुकुम चीत्देबे शक्तिने क्यम टूङ्, मेस्ये हम्बयू योङ्देबे प्रटोङ्।” 37ङूजे न-मीन् ती-छो का-मुलुकने ड्वाङ्गे क्यूरी।
38सभा-कीम्दे योङ्देबे येशू सिमोनजे कीम्ने क्योइदे। सिमोनजे य्वामी छोव-तप्दे बेस्से अमीन् क्यून्न ख्य, मेस्ये थमयूदे ङूजे लागि येशूने बिन्ती चीत्दे। 39ङू ट्याने मेर्देबे येशूदे छोव-तप्ने फ्राचीदे, मेस्ये छोव-तप्दे ङूने क्यापीदे, मेस्ये खत्याने लङ्देबे ङूदे थमयूजे सेवा चीत्दे।
40होर्दे मीया नूम्रब कूम थरीजे बीद ख्यब नवयू क्वाने थमयूदे येशू ट्याने रेत्दे। ङूदे थमयू त्यात्या फ्याने रङ्से ला येत्देबे थमयूने तम् चीम्मीदे। 41कूम मीयूजे ङ्वदे छेत्यूये बोङ्बे पारा पूदे-पूदे “न परमेश्वरजे च ख्यङ्” येये-येये योङ्गीदे, तर येशूदे थमयूने क्यम्से अम्पीन्लाबे फ्राचीदे, चेनेयलो थमयूदे ङू ख्रीष्ट यदेबे स्येख्य।
42नप्दे म्या तङ ङ्येदे येशू योङ्देबे याङ्यूङ् नेने गीलीदे। मी हुलदे ङूने मेले-मेले ङू ट्याने फ्योरदे, मेस्ये “ङीयूने पङ्देबे अम्प्रलाची” यदेबे ङूने रोक्तेने बोङ् चीत्दे। 43तर येशूदे थमयूने यदे, “ङैदे परमेश्वरजे राज्यजे सूगब खबर सूजो सहरजे मीयूने स्य्वेने पर्देख्यङ्, चेनेयलो ङ अम्ब कामजे लागिने कूल्बे ख्यङ्।” 44होर्दे येशूदे यहूदियाजे सभा-कीम्यूने प्रचार चेने सुरु चीत्दे।
Currently Selected:
लूका 4: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
