लूका 8
8
लू थरबजे उखान
मत्ती १३:१-२३; मर्कूस ४:१-२०
1होर्देङ्येदे येशू सहर-सहर मेस्ये त-त गीलीदेबे प्रचार चीदे-चीदे परमेश्वरजे राज्यजे सूगब खबर स्योदे-स्योदे गीलीदे। ङूप्रे बाह्र जना स्यूस्स्यायू ख्य। 2#मत्ती 27:55,56; मर्कूस 15:40,41; लूका 23:49कोइ मदीयूये येशूप्रे ख्य, थमयू अशुद्ध आत्मा मेस्ये कूम बीददे तम् क्यूरेब ख्य। हम्बयू अम्ब ख्य: मग्दलिनी यब मरियम, ङूजे ङ्वदे छेत् ङ्यी योङ्ये ख्य, 3हेरोदजे काम फर्मेब खूजासजे मज योअन्ना, मेस्ये सूसन्ना। थमयू मेस्ये सूजोयूदे रङ्से धन्दे येशूजे सेवा चेख्य।
4होर्दे मीहुल केन् रूप् क्यूत्दे मेस्ये सहर-सहरदे मीयू येशू ट्याने रदे, ङूदे थमयूने उखान त्या स्योत्दे। 5“लू थरब त्या लू थरने योङ्गी, थरेब कोइ लू लम्जे नने पर्दीइ, हम्ब लू मीजे तोप्दे च्योप्कदे मेस्ये मूजे ययूदे चेकदे। 6सूजो लू लूङ्सने पर्दीयी, मेस्ये हम्ब फीट्ट बितीकैने च्य्वे-खरी, चेनेयलो हम्ब स ओबोनो ख्य। 7कोइ लू चोपोङ्ने पर्दीइ, लूप्रे चोपोङ्ये ठोङ्रदे, मेस्ये हम्बने ठोङ्से अम्पीन्। 8कोइ स ज्यने पर्दीदे, मेस्ये फीत्देबे सैत्या गुणा थेप् फल लोदे।” अन्छ्वा य जेन ङ्येदे के केन् योन्देबे यदे, “पो ङ्यीनब मीदे चेलाबे ङ्यीनस्य।”
9येशूजे स्यूस्स्यायूदे अम्ब उखानजे अर्थ च ख्यङ् यदेबे ङूने लोत्दे। 10#यशैया 6:9येशूदे यदे, “नमयूने परमेश्वरजे राज्यजे भेद स्येब ज्ञान पीन ख्यङ्, तर सूजोयूप्रे ङ उखान पूत्देबे क्यम्क्य, यी
‘थमयूदे लेल्लीने अन्तङ्स्य,
मेस्ये तलीने अङ्कोस्य।’
11जेम्से उखान अम्ब ख्यङ्: लू ब परमेश्वरजे वचन ख्यङ्। 12लम्जे नने तेलेब लू ब हम्बयू ख्यङ्, सूदे परमेश्वरजे वचन ङ्यीन्क्य, तर वचन ङ्यीन्देबे विश्वास अन्चीस्स्य मेस्ये विश्वासदे बच्दे अम्प्रेस्स्य यदेबे शैतान रदेबे थमयूजे सेम्दे वचन लेन्कीय। 13लूङ्सने पर्दीयेब लूदे थमयू जन्दीय, सूदे वचन ङ्यीन्देबे सूगे-सूगे सेम्ने येक्क्य। तर ङूजे छ अन्क्यूर्, मेस्ये तेदिनजे लागि त्या थमयूदे विश्वास चीक्क्य, तर जाँचजे बील रब थमयूजे विश्वास क्यापीय। 14चो पोङ्यूजे अन्द्रने पर्दीयेब थमयू ख्यङ्, ङूदे ङ्यीन्क्य, तर ङ्येदे अम्ब जीयाजे चिन्ता, धन, सूख-टूङने पल्गीदीदेबे ठोङ अम्प्रे, मेस्ये ङूजे फल ता अम्प्रे। 15तर ज्य मलीलो सने पर्दीयेब येर मीयू ख्यङ्, सूदे वचन ङ्यीन्देबे हम्ब वचनदे य अनुसार इमान्दार सोर्तो क्यूत्देबे सेम्ने येन्नीय, मेस्ये धेरेन्बे फल लोसे पीङ्क्य।
बत्तीजे उखान
16 #
मत्ती 5:15; लूका 11:33 “सूदेये बत्ती नेन्देबे तीयाँदे अङ्-उप्, या खर् नङ्ने अन्-ये, तर कीम्नङ्ने रबयूने ओथ्याङ् क्यूस्स्य यदेबे बत्ती येनब नेने येन्क्य। 17#मत्ती 10:26; लूका 12:2होर चै सेये फीने अन्तङ्र यदेबे फूदेबे येन अन्खू, होर्दे चै सेये था अम्प्रे या अन्तङ्लाबे नङ्सू अन्क्यूर्। 18#मत्ती 25:29; लूका 19:26होरेक्यूत्देबे होस्स्यार क्यूर, नमयूदे केरे ङ्यीन्क्य, चेनेयलो सूप्रे ख्य, हम्बने अझ पीन्क्य, मेस्ये सूप्रे त्वो, हम्बदे रङ्सेप्रे च ख्यङ् यदेबे ङूदे मन्क्य, हम्बये ङूजे लेन्कीय।”
येशूजे म मेस्ये च्योन्यू
मत्ती १२:४६-५०; मर्कूस ३:३१-३५
19येशूजे म मेस्ये च्योन्यू ङू त्वने रदे, तर मी हुलदे चीत्देबे ङूजे ट्याने र-अन्खू। 20येशूने मी त्यादे यदे, “नैजे म प्रे च्योन्यू नने त्वब सेम्दे फीने मेर्न ख्यङ्।”
21तर येशूदे थमयूने यदे, “ङैजे म मेस्ये ङैजे च्योन्यू थमयू क्यूक्क्य, सूदे परमेश्वरजे वचन ङ्यीन्क्य, मेस्ये हम्ब मन्दीय।”
येशूदे हून्ड थम्दीबेब
22त्याफे येशू रङ्से स्यूस्स्यायूप्रे डुङ्गाने टदे मेस्ये ङूदे थमयूने यदे, “ङीन तालजे तीप्ल्या प्रे।” मेस्ये थमयू डुङ्गाने टदेबे गीलीदे। 23डुङ्गाने प्रेनूब येशू ङूम्म्या गीली। तालने हून्ड चील्लीदे। डुङ्गा क्यूदे फ्यारमेदे, मेस्ये थमयू सोरो कर्चेकर्चे क्यूत्दे।
24होर्दे थमयूदे येशू ट्याने रदेबे ङूने येरे यदेबे लङ्दे, “गुरुज्यू, गुरुज्यू, ङीन क्यूने नूम्ब मेल्गीदी।”
ङू लङ्देबे उन्दूप्रे क्यूजे छालने फ्राचीदे, मेस्ये हम्ब थम्दीइ होर्दे क्वाने याङ्यूङ् क्यूरी। 25येशूदे थमयूने यदे, “नमयूजे विश्वास खोइ?”
थमयू फैगदे, होर्दे हार्मन्दीकदेबे त्यादे सूजोने यदे, “ङू सू टोङ्? उन्दूप्रे क्यूजे छालनेये आज्ञा चेटोङ्, होर्दे थमयूदे ङूजे आज्ञा मन्दे टोङ्।”
छेत् लादीकब मी
मत्ती ८:२८-३४; मर्कूस ५:१-२०
26थमयू गेरासेनसजे मुलुकने फ्योरदे, अम्ब ने गालीलजे तीप्ल्याने ख्यङ्। 27कन्छ्वाब येशू पखने तल्दे हन्छ्वाब ङूदे सहरजे मीत्या तूदे, ङूने छेत् लादीक ख्य। ङूदे मालाङ् मेस्येने कोला अन्ह्वे ख्य, मेस्ये कीम्ने अन्टोङ्लाबे ङू तूर्सयू ख्य नेने टूङ ख्य। 28ङूदे येशूने तङ्दे, मेस्ये के योन्देबे ङूजे खूम्ने पून्छ्यल् क्यूत्देबे के केन् योन्देबे यदे, “ओ पात्ता फ्याजे परमेश्वरजे च येशू, नैजे ङैप्रे चे काम? बिन्ती चीक्क्य, ङैने सतनम् अन्चील्लाची।” 29चनेयलो येशूदे अशुद्ध आत्माने हम्ब मीदे योङ्देबे प्रब आज्ञा पीन्क ख्य। ङूने कूमफे छेत्दे चूङ्ग ख्य। ङूने लेब मी त्या हीते ख्य। सङ्लोदे ङूजे ला-तोप् ख्यादेबे हीतीलीने ङू छेत्जे बोङ्दे सङ्लो प्रदेबे मीयू अन्टोङब चनमन पख तेले कूब ख्य।
30येशूदे ङूने लोत्दे, “नैजे मीन् च?”
ङूदे यदे, “हुल।” चेनेयलो कूम छेत्यू ङू नङ्ने क्योये ख्य। 31थमयूदे येशूने बिन्ती चीत्दे यदे, ङीने अतल-कुण्डने अन्कूल्बीलाची।
32ट्याने ख्यब कङ्ने पाजे बथान केन्त्या चेन ख्य। होर्दे थमयूदे पा नङ्ने क्योबस्ये पीन् यदेबे येशूने बिन्ती चीत्दे, मेस्ये ङूदे क्यूक्क्य यदे। 33होर्दे छेत्यू हम्ब मीदे योङ्देबे हम्ब पायू नङ्ने क्योयीदे, मेस्ये हम्ब पा हुल पखजे पेतेले हूरीदेबे मो छोने छङ्यी, मेस्ये क्यूने नूम्देबे सीइ।
34हन्छ्वाब च क्यूरे ख्य हम्ब तङ्देबे पा छब मीयू ग्येइ, मेस्ये अम्ब पो थमयूदे त मेस्ये सहरतेले स्योत्दे। 35होर्दे च क्यूरे टूङ् यदेबे लेने मीयू येशूट्याने रदे, कम्ब मीजे ङ्वदे छेत्यू योङ्ये ख्य, ङूने कोला होत्देबे सेम् ज्य क्यूत्देबे येशूजे तोप् ट्याने टूनब तङ्दे, मेस्ये थमयू फैगदे। 36हम्ब मी तम् क्यूरेब तङयूदे पोयू क्वाने सूजोयूने स्योम्मीदे। 37गेरासेनसजे तीछो तजे मीयू क्वादेने येशूने थमयूदे अम्ब तदे लेप्र यदेबे बिन्ती चीत्दे, चेनेयलो थमयू सोरो फैगदे। होरेक्यूत्देबे ङू डुङ्गाने टदेबे ल्वारदे।
38तर कम्ब मी नङ्दे छेत्यू योङ्के ख्य, हम्ब मीदे ‘ङूप्रे प्रीय’ यदेबे येशूने बिन्ती चीत्दे। तर येशूदे ङूने येरे यदेबे बिदा चीत्दे, 39“न रङ्से कीम्ने ल्वब, मेस्ये नैजे लागि परमेश्वरदे कोला केन् काम चीम्मीदे, हम्ब पो मीयूने स्य्वे।” होर्दे हम्ब मी गीलीदेबे येशूदे ङूजे लागि कोला केन् काम चीम्मीदे, हम्ब पूरा सहरभरी क्वानेने स्योत्दे।
याइरसजे चीमी मेस्ये का-भैन्देबे छरङ् प्रेन्नब मदी
मत्ती ९:१८-२६; मर्कूस ५:२१-४३
40येशू ल्वारब मीजे हुलदे ङूने स्वागत चीत्दे, चेनेयलो थमयू क्वादेने ङूने रेन्न ख्य। 41याइरस यब सभा-कीम्जे हुकुम चील्लेब मीत्या रदेबे येशूने ला जोर्तीरदे, मेस्ये ङूजे कीम्ने ख यदेबे ङूने बिन्ती चीत्दे, 42चेनेयलो ङूजे बाह्र वर्ष फ्योयेब चीमी तीत्यात्या ख्य, ङू सीब मैल्न ख्य।
येशू प्रेनूब मीयूदे ङूने हूल्न ख्य। 43हम्ब हुलने बाह्र वर्ष मेस्येने का भैन्दे छर्ङ प्रेब मदी त्या ख्य, ङूने सूदेये तम् चीम्मे अन्ख्व ख्य, 44ङूदे येशूजे ङ्यलम्दे रदेबे ङूजे कोला नत्या छूत्दे, मेस्ये छ्वेबितीकने ङूजे का भनब रोक्तीयी।
45येशूदे यदे, “ङैने सूदे छूत्दे?”
क्वादेने अन्छूइ यदे, हन्छ्वाब पत्रुसदे यदे, “गुरुज्यू, मीजे हुलदे नने घेर्दीदे हूल्न ख्यङ्।”
46तर येशूदे यदे, “त्यादे ङैने छ्वे ख्यङ्, चेनेयलो ङैजे शक्ति योङ्देबे गीलेब ङैदे था प्रेत्दे।”
47जेम्से ङू छ्यूब अन्ख्वब पो था प्रेत्देबे हम्ब मदी फदे फ्रीके फ्रीके रदेबे ङूजे खूम्दे पून्छ्यल् क्यूत्देबे, चेने ङूदे येशूने छूत्दे, होर्दे केर्बे छ्वे वितीक्ने तम् क्यूत्दे, हम्ब पो मीयू क्वाजे खूम्ने स्योम्मीदे। 48येशूदे ङूने यदे, “चीमी, नैजे विश्वासदे नने तम् चीम्मे ख्यङ्, सूग्लाबे प्र।”
49येशू क्यम्न ख्य, सभा-कीम्जे हुकुम चील्लेब मीजे कीम्दे मी त्या फ्योरदे, मेस्ये यदे, “नैजे चीमीब सीइ। जेम्से गुरुने छरङ् अम्पीन्लाची।”
50तर येशूदे अम्ब पो तदेबे याइरसने यदे, “अम्फलाची, विश्वास त्या ची, मेस्ये ङू तम् क्यूक्क्य।”
51कन्छ्वाब येशू कीम्ने फ्योइदे हन्छ्वाब ङूदे पत्रुस, याकूब, यूहन्ना मेस्ये मदी-पीचजे प प्रे मनेत्या ङूप्रे नङ्ने रसे पीन्दे, सूजो सूनेये ङूप्रे नङ्ने रसे अम्पीन्। 52क्वाने ङून मेस्ये अन्सूग्देबे बीगन फान ख्य, तर येशूदे यदे, “अङ्-ङूलाची, ङू सीये दी, तर ङ्यूम्न ख्यङ्।”
53ङू सीये जङ्ग ख्यङ् यदेबे था प्रेत्देबे थमयूदे ङूजे पोने खिसी चीत्देबे रीग्दे। 54तर येशूदे हम्बजे ला चूङ्देबे येरे यदेबे कप्पीदे, “मो, लङ्।” 55होर्दे ङूजे प्राण ल्वारदे, मेस्ये ङू खात्याने क्वे लङ्दे, मेस्ये येशूदे ङूने च क्यूक्को चत्या चसे पीन् यदेबे आज्ञा पीन्दे। 56ङूजे प-म बेस्से हार्मन्दीकदे, तर च क्यूरे ख्य हम्ब सूनेये अन्स्योल्लाची यदेबे येशूदे थमयूने हुकुम पीन्दे।
Currently Selected:
लूका 8: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
