मत्ती 24
24
आखिरी दिनजे च्यूनूयू
मर्कूस १३:१-३७; लूका २१:५-२४
1होर्देङ्येदे येशू मन्दिरदे योङ्देबे प्र-मल्नूब ङूजे स्यूस्स्यायू मन्दिरजे कीम्यू तम्मेने ङूट्याने रदे। 2तर येशूदे थमयूने यदे, ‘‘नमयूदे अम्ब क्वाने तङ्न ख्यङ् यी? तम्दम्ने ङ नमयूने यीय, लूङ् त्या फ्याने सूजो लूङ् क्यूस्ये त्वो, टक्कने हूल्देबे छाबीय।”
3कन्छ्वाब येशू जैतून गङ्ने टून ख्य हम्ब बीलने स्यूस्स्यायू स्यूट्टे रदेबे ङूने लोत्दे, “गुरुज्यू, ङीने स्य्वे-च, अम्ब पो कलङ् क्यूक्क्य, मेस्ये न कलङ् रीय, होरदे अम्ब संसारजे आखिरी क्यूट्टमेब च्यूनू च क्यूक्क्य?”
4येशूदे जवाफ पीन्दे, “होस्स्यार क्यूर्, नमयूने सूदेये छाक्दे अन्खूस्य। 5चेनेयलो कूम मी ‘ङ ख्रीष्ट न’ यदेबे ङैजे मीन्ने रीय, मेस्ये कूम मीयूने छाक्तीय। 6नमयूदे लडाइँयू मेस्ये लडाइँयूजे हल्ला तैय। अम्फलाची, चेनेयलो येरे क्यूरने पर्दे ख्यङ्, तर आखिरी दिन हन्छ्वाबने अन्क्यूर्। 7चेनेयलो जातजे विरुद्धने जात, मेस्ये राज्यजे विरुद्धने राज्य लङ्क्य मेस्ये देश-देशने अनिकाल क्यूक्क्य, सूङ्गू रीय। 8तर अम्ब टक्कने सूत्केरी बेथजे सुरु क्यूर प्रत्या ख्यङ्।
9 #
मत्ती 10:22
“होर्दे थमयूदे नमयूने चूङ्देबे सजाइ पीनने कूबीय मेस्ये नमयू सेक्कीय, मेस्ये ङैजे मीन्जे कारणदे टक्क जातजे मीयूदे नमयूने अन्ज्य चीक्क्य। 10होर्दे कूम मीयूदे हम्ब बीलने रङ्सेजे विश्वासने क्यापीय, ठक्कर चीय, त्यादे सूजोने धोका पीन्देबे सूम्दीपीय मेस्ये ह्यल चीक्क्य। 11कूम लूच्च अगमवक्तायू योङ्रदेबे कूम मीयूने छाक्तीय। 12दुष्ट थेप्-थेप् क्यूत्देबे कूम मीयूजे सेम्ने प्रेम त्व क्यूप्पीय। 13#मत्ती 10:22तर आखिरीसेमे धेरेन् क्यूरब मीयूने बच्दीमीय। 14होर्दे राज्यजे अम्ब सूगब खबर संसारभरी टक्क जातयूजे लागि गवाही क्यूरने स्योक्क्य, होर्देमेस्ये संसार जेङ्गीय।
15 #
दानिएल 9:27; 11:31; 12:11 “येरेक्यूत्देबे कन्छ्वाब नमयूदे अगमवक्ता दानिएलदे येयेब पो नाश चेब ङ्येत्या से पवित्र नेने मेर्नब तङ्क्य (अम्बजे अर्थ छ्वेब मीदे कोस्य), 16होर्दे यहूदियाने ख्यब मीयू गङ्तेले छ्योङ्बस्य। 17#लूका 17:31कीम्फ्याने मीयू ख्यङ्लो रङ्से कीम्नङ्ने ख्यब सेयू योनने मो अन्तल्लस्य। 18रङ्ने ख्यब मीयू रङ्से टूकू थाने अन्ल्वारलाची। 19हम्ब दिनने पीच रब मदीयू मेस्ये च्यू-तूपब मदीयूजे लागि सोरो फत्या छरङ् क्यूक्क्य! 20तर सर्कदे या आराम चेब दिनने नमयू ग्येब अम्पर्तीस्य यदेबे प्रार्थना ची। 21#दानिएल 12:1; प्रकाश 7:14चेनेयलो हम्ब बीलने संसारजे सुरुमेस्ये दीनीसेमे अन्क्यूरब सोरो केन् सकस् क्यूक्क्य मेस्ये होरप्र फेरि कलङ्बेये क्यूस्से त्वो। 22हम्ब दिनयू अन्घट्तीक यलो सू मीये बच्दे अन्ख्व ख्यङ्दे, तर परमेश्वरदे सेलेब मीयूजे लागि हम्ब दिन घट्तीमे ख्यङ्। 23हन्छ्वाब कोइदे नमयूने ‘ले, ख्रीष्ट अने ख्यङ्, या होने ख्यङ्’ यदेयलो विश्वास अन्चील्लाची। 24चेनेयलो लूच्च चेब ख्रीष्टयू, मेस्ये लूच्च अगमवक्तायू योङ्रीय, मेस्ये खूदासेमे परमेश्वरदे सेलेब मीयूने छाक्देने केन्-केन् च्यूनूयू मेस्ये हार्मन्देब कामयू तन्क्य। 25ह्वे ची, ङैदे नमयूने मलाङ्मेस्येने येन ख्यङ्।
26 #
लूका 17:23,24 “कादेये थमयूदे नमयूने ‘ले, ङू फीने चनमन क्यून्नब नेने ख्यङ्’ यदेयलो फीने अन्-योङ्बलाची। होरदे ‘ले, ङू येने कोठा नङ्ने ख्यङ्’ यदेयलो विश्वास अन्चील्लाची। 27चेनेयलो केर्बे पूर्वदे क्यूलीङ् क्याब पश्चिमसेमे ओथ्याङ् तङ्क्य, होरप्रने मीजे च रीय। 28#लूका 17:37स्यूनू केने क्यूक्क्य, हैयानेने ख्यत्तयूये फूङ् क्यूक्क्य।
29 #
यशैया 13:10; योएल 2:10,31; 3:15; प्रकाश 6:12; यशैया 13:10; इजकिएल 32:7; योएल 2:10; 3:15;
यशैया 34:4; प्रकाश 6:13 “हम्ब सोरो छरङ्जे दिनङ्येदे छाट्टे, मीया मून्तूङ् क्यूप्पीय, मेस्ये लीनीदे ओथ्याङ् पीन अन्खू, मेस्ये कर्चेन्यू मूदे तल्लीय, होर्दे मूने ख्यङ्ब सेयूजे शक्तियू लीङ्क्य। 30#दानिएल 7:13; जकरिया 12:10-14; प्रकाश 1:7हन्छ्वाब मीजे च रीय यब च्यूनू मूने तङ्क्य। मूक्पने मीजे च केन् शक्ति मेस्ये महिमाप्रे रेनब तङ्देबे संसारने ख्यब टक्क जातजे मीयू शोक् चीत्देबे ङूय। 31ङूदे रङ्से स्वर्गदूतयूने धूङ्कूर्जे केन् के-प्रे कूल्बीय, मेस्ये थमयूदे मूजे नत्यादे सूजो नत्यासेमे का-मुलुकदेने परमेश्वरदे सेलेब मीयूने फूङ् पूक्य।
32“तर अञ्जीरजे तङ्बोदे पोत्या लोम्: कन्छ्वाब हम्बजे हाँगायू नूई पूरीय मेस्ये तङ्बोने पल्व रीय, हन्छ्वाब तोलोम् क्यूट्टदे यदेबे नमयूदे था प्रेक्क्य। 33होरप्रने कन्छ्वाब नमयूदे अम्ब पोयू क्वाने क्यून्नब तङ्क्य, हन्छ्वाब ङू रबील क्यूट्टदे यदेबे नमयूदे स्ये। 34तम्दम्ने, ङ नमयूने यीय, अम्ब पोयू क्वाने पूरा अन्क्यूत्दासेमे अम्ब पुस्ता अन्जेन्क। 35स्वर्ग प्रे पृथ्वी मल्बीय, तर ङैदे येयेब वचन कलङ्बेये मेल्बस्ये त्वो।
होस्स्यार क्यूर पर्तेब शिक्षा
मर्कूस १३:३२-३७; लूका १७:२६-३०,३४-३६
36“हम्ब दिन मेस्ये बीलजे बारेने परमेश्वर पदेत्या स्ये ख्यङ् सूजो सूदेये अन्स्ये, या स्वर्गदूतयूदेये अन्स्ये, चदेये अन्स्ये। 37#उत्पत्ति 6:5-8केर्बे नूहजे दिनने क्यूर ख्य, होरप्रने मीजे च रबये क्यूक्क्य, 38चेनेयलो केर्बे क्यूदे नाश चेयली खूम् नूह डुङ्गा नङ्ने क्योब बीलसेमे, मीयू च-थूङ चीन्न ख्य, मेस्ये ङ्येन् चीन्न ख्य 39#उत्पत्ति 7:6-24होर्दे हून्ड क्यू रदेबे थमयू क्वाने स्वात्तै अन्-प्ल्येगीतासेमे थमयूदे थाने अम्प्रे। मीजे च रलीनेये होर्प्रने क्यूक्क्य। 40हन्छ्वाब मी ङ्ही रङ्ने काम फर्नब क्यूक्क्य, त्या कूपीय, त्या पङ्गीय। 41मदी ङ्ही रान्ताने ता थानब क्यूक्क्य, त्या कूपीय, सूजो पोङ्गीय।
42“येरेक्यूत्देबे नमयूये चङ्ख क्यूर्, चेनेयलो नमयूजे प्रभु कम्ब दिनने रीय यदेबे नमयूदे अन्स्ये। 43#लूका 12:39,40तर अम्ब पो ह्वे ची: मून्दे कीम् नोबोदे कम्ब बीलने खूमान् रीय यदेबे था प्रेयलो, ङू चङ्ख क्यूर ख्यङ्दे, मेस्ये रङ्से कीम् पर्स्ये अम्पीन ख्यङ्दे। 44येरेक्यूत्देबे नमयू तयार क्यूर्, चेनेयलो मीजे-च नमयूजे सेम्दे अम्मनब बीलने रीय।
45“भर्पर्दे ख्वब मेस्ये बुद्धिमान त्वो सू ख्यङ्, ङूने ङूजे नोबोदे रङ्से कीम्-म्हीतीजे त्वोयूने बीलने चस्येपीन्स्य यदेबे खेर्तेब क्यूक्क्य? 46नोबो ल्वारब होरप्रने त्वोदे चीन्नब तूरदे यलो हम्ब त्वोदे धन्यवाद प्रेक्क्य। 47तम्दम्ने, ङ नमयूने यीय, कीम् नोबोदे ङूने चून्तीदेबे सम्पत्तियू साप्ताजे जीम्म पीन्क्य। 48तर कादेये हम्ब बैमानी त्वोदे ‘ङैजे नोबो गलाबे रीय’ यदेबे सेम्न्ने मन्दे, 49रङ्सेप्रने काम फरब ख्योन् त्वोयूने ठरे मेस्ये ची-नादू थूङयूप्रे च-थूङ् चेमेलो, 50सेम्दे अम्मनब दिन मेस्ये था-अम्प्रेब बीलने ङूजे नोबो फ्योरीय। 51नोबोदे ङूने सजाइ पीन्क्य मेस्ये कप्टीयूजे अन्द्रने छाबीय, हैयाने मीयू ङूय मेस्ये स-कीटीटी चीक्क्य।”
Currently Selected:
मत्ती 24: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
