मत्ती 25
25
कन्या च्यूजे उखान
1 #
लूका 12:35
“होर्दे स्वर्गजे राज्य कन्या च्यूप्रे तुलना चे खूइय। थमयूदे रङ्से-रङ्से बत्ती टेल्देबे दूल त्वने योङ्गीदे।
2थमयू नङ्ने कन्या ङब बुद्धि त्वब, मेस्ये कन्या ङब बुद्धि ख्यब ख्य। 3हम्ब बुद्धि त्वब कन्यायूदे बत्तीब कूदीदे तर थमयूप्रे मूर्गूब अङ्कूदी।
4तर हम्ब बुद्धि ख्यब कन्यायूदे रङ्से बत्तीयूप्रे-प्रेने तीयाँने मूर्गूये टेल्गीदे। 5दूल रने गदेबे थमयू क्वाने ङ्यूम्-म्यादे स्योदेबे ङ्यूम्-म्याप्राता गीली।
6“तर मून् गूङ्ब, ‘ले दूलने त्वने ख,’ यब के त्या तदे।
7“होर्दे कन्यायू ङ्यूम्-म्यादे थेल्रदे, मेस्ये रङ्से-रङ्से बत्तीयू ठीकठ्याक् चीत्दे। 8हम्ब बुद्धि त्वब कन्यायूदे बुद्धि ख्यब कन्यायूने यदे, ‘ङीने नमयूजे मूर्गू छीत्या स्ये, चेनेयलो ङीजे बत्तीयू सीब मेल्गीदे।’
9“तर बुद्धि ख्यब कन्यायूदे जवाफ पीन्दे, अन्क्यूर्, ङीप्रे नमयूजे लागि मेस्ये ङीजे लागि पूग्देब मूर्गू त्वो, बरू दोकान्ने प्रदेबे नमयूदे कीन्ब।’
10“थमयू मूर्गू कीनने प्रेनूब दूल फ्योरदे, मेस्ये तयार क्यून्नब कन्यायू दूलप्रे ङ्येन्जे भत्यार् चने नङ्ने गीलीदे, मेस्ये ख्यो थाबीदे।
11 #
लूका 13:25
“ङ्येदे हम्ब सूजो कन्यायूये फ्योरदे मेस्ये येरे यदे, ‘प्रभु, प्रभु, ङीने ख्यो पूक्मी!’
12“तर ङूदे जवाफ पीन्दे, ‘तम्दम्ने, ङ नमयूने यीय, ङ नमयूने अन्स्ये।’
13“येरेक्यूत्देबे नमयू चङ्ख क्यूर्, चेनेयलो हम्ब दिन मेस्ये बील नमयूने था त्वो।
मर्जे मन्द्रमूलीजे उखान
लूका १९:११-२७
14 #
लूका 19:11-27
“चेनेयलो अम्ब मी प्र ख्यङ्, ङू फी देश प्रने रङ्से त्वोयूने कोदेबे रङ्सेजे मन्द्रमूली थमयूने जिम्मा पीन्दे। 15ङूदे टक्कनेने थमयूजे गज्ज्य अनुसार त्याने मर्जे मन्द्रमूली ङ, सूजोबने ङ्ही मेस्ये सूजोबने मन्द्रमूली त्या पीन्देबे ङू गीलीदे। 16होर्दे मर्जे मन्द्रमूली ङ प्रेब मीदे तूरून्तै गीलीदेबे हम्बदे छोङ् चीत्देबे सूजो थेप् मन्द्रमूली ङ कम्दीदे। 17होरप्रने मन्द्रमूली ङ्ही प्रेब मीदेये सूजो थेप् मन्द्रमूली ङ्ही कम्दीदे। 18तर मन्द्रमूली त्या प्रेब मीदेब गीलीदेबे स खोदेबे रङ्से मालिकजे मन्द्रमूली फूयीदे।
19“कूम दिनङ्येदे हम्ब त्वोयूजे मालिक रदे, मेस्ये ङूदे थमयूप्रे हर्-हिसाब स्यदे। 20होर्दे मन्द्रमूली ङ प्रेब त्वोदे सूजो थेप् मन्द्रमूली ङ खूम्दे रेत्देबे येरे यदे, ‘मालिक, नदे ङैने मन्द्रमूली ङ जिम्मा पीन ख्य। ले, ङैदे सूजो थेप् मन्द्रमूली ङ कम्दीदे।’
21“मालिकदे ङूने यदे, ‘स्याबास, ज्य भर्पर्देब त्वो! न छीत्या सेने भर्पर्दे ख्वब क्यूत्दे, जेम्से ङ नने कूम सेजे जिम्मा पीन्क्य। जेम्से-ख न रङ्से नोबोप्रे सूग प्रेक्क्य।’
22“मन्द्रमूली ङ्ही प्रेब त्वो-त्वोम रदेबे यरे यरदे, ‘मालिक, नदे ङैने मन्द्रमूली ङ्ही पीनख्य। ले, ङैदे सूजो थेप् मन्द्रमूली ङ्ही कम्दीदे।’
23“ङूजे नोबोदे ङूने यदे, ‘स्याबास, चेलाबे भर्पर्देब त्वो, न छीत्या पोनेये भर्पर्दीदे, जेम्से ङ नने कूम सेजे जिम्मा पीन्क्य। न रङ्से मालिकप्रे सूग प्रेक्क्य।’
24“मन्द्रमूली त्या प्रेब मी रदेबे यदे, ‘नोबो, न सेम् कोङ मी ख्य, न रङ्सेदे लू अम्प्वेब रङ्दे बली तोल्क्य मेस्ये अन्छङब नेदे बली फूङ् पूक्क्य, यब पो ङैने था ख्य। 25होरेक्यूत्देबे ङ फदेबे नैजे मून्द्रमूली ङैदे स नङ्ने फूये ख्य। जेम्से ना नैजे मून्द्रमूली।’
26“ङूजे मालिकदे ङूने जवाफ पीन्दे, ‘ओ अन्ज्य म्यासी त्वो, ङैदे लू अन्सूकब रङदे बली तोल्क्य, मेस्ये अन्छङब नेदे बली फूङ् पूक्क्य यदेबे नदे था ख्य यलो, 27नदे ङैजे मन्द्रमूली ब्याजने लैदेपर्दे ख्य, मेस्ये ङ ल्वारब ङैजे मन्द्रमूली ब्याजसजने ल्वार ख्यङ्दे। 28येरेक्यूत्देबे ङूजे मन्द्रमूली लेन्, मेस्ये मन्द्रमूली च्यू ख्यबने पीन्। 29#मत्ती 13:12; मर्कूस 4:25; लूका 8:18चेनेयलो सूप्रे ख्यङ् ङूने सूजो थेप् पीन्क्य, मेस्ये ङूप्रे बेस्से क्यूक्क्य। तर सूप्रे त्वो ङूप्रे छीत्या ख्यबये लेन्कीय। 30#मत्ती 8:12; 22:13; लूका 13:28हम्ब काम अन्लादेब त्वो फीने मून्दूङ्ने छाबी, हैयाने मीयू ङूदेबे स कीटीटी चीक्क्य।’
न्यायजे दिन
31 #
मत्ती 16:27; मत्ती 19:28 “कन्छ्वाब केन् महिमाने मीजे च रङ्से स्वर्गदूतयूप्रे रीय, हन्छ्वाब ङू मूरुम् टूङब सिंहासनने टूङ्क्य। 32ङूजे खूम्दे जात-जातजे मीयू टक्कने रूप् क्यूक्क्य, मेस्ये केर्बे प्रङ्बदे रयूप्रे स्वाल् छूर्तीय, होरप्रने ङूदे मीयूनेये छूर्तीय। 33ङूदे स्वान्यूने रङ्सेजे स्येत्तेयोर्, मेस्ये रयूने ङूजे योन्देयोर् येक्क्य।
34“होर्दे मूरुम्दे रङ्सेजे स्येत्तेयोर् टूङब मीयूने यीय, ‘ख, ङैजे पजे असी प्रेब मीयू! संसारजे सुरुमेस्येने नमयूजे लागि तयार चीत्दे हीतेब राज्यने रदेबे टूङ्ख, 35चेनेयलो ङ ठे ख्य, नमयूदे ङैने चस्ये पीन्दे। ङ क्यू फै ख्य, नमयूदे ङैने क्यू थूङ्स्ये पीन्दे। ङ अन्स्येलीने, नमयूदे ङैने रस्ये पीन्दे। 36ङ च्यङ्ली ख्य, नमयूदे ङैने कोला होम्मीदे, ङ नब नमयूदे ङैने तूरदे, ङ झ्यालखानने ख्यङ्ब नमयूदे ङैने तूरदे।’
37“होर्दे हम्ब धर्मीयूदे ङूने जवाफ पीन्क्य, ‘ओ प्रभु, कलङ् ङीदे न ठील्नब तङ्देबे चस्ये पीन्दे? या ङीदे न कलङ् क्यू फैब तङ्देबे क्यू थूङ्स्ये पीन्दे? 38कलङ् न फीदेशजे मी तङ्दे मेस्ये ङीदे टूङ्से पीन्दे? या कलङ् न च्यङ्ली तङ्देबे ङीदे कोला होम्मीदे? 39कलङ् न नब तङ्देबे ङीदे स्याहार चीत्दे? या न झ्यालखानने पर्दीब, ङीदे तूरदे?’
40“मूरुम्दे हन्छ्वाब थमयूने जवाफ पीन्देबे यीय, ‘तम्दम्ने, ङ नमयूने यीय, नमयूदे अम्ब ङैजे अत-अची च्योन्यू नङ्ने पात्ता चीदबने च-च चीत्दे, हम्ब नमयूदे ङैनेने चीत्दे।’
41“होर्देङ्येदे ङूदे योन्देयोर् टूङब मीयूने यीय, ‘श्राप प्रेब मीयू! ङैट्यादे चीन्तङ् प्र, मेस्ये शैतान मेस्ये ङूजे दूतयूजे लागि तयर चीतेब कलङ्बेये अन्सीबब मीने प्र। 42चेनेयलो ङ ठे ख्य, नमयूदे ङैने चसे अम्पीन्। क्यू फै ख्य, नमयूदे ङैने क्यू थूङ्स्ये अम्पीन्। 43ङ फीदेशजे मी ख्यङ्ब, नमयूदे ङैने टूङब ने-अम्पीन्। च्यङ्ली ख्यङ्ब नमयूदे ङैने कोला अन्होम्मी, नब मेस्ये झ्यालखानाने ख्यङ्ब नमयूदे ङैने अन्तूर।’
44“थमयूदेये येर्बे जवाफ पीन्क्य, ‘प्रभु, कलङ् ङीदे न ठेब या क्यू फैब तङ्दे, फीदेशजे मी या च्यङ्ली क्यून्नब या नब तङ्दे, या झ्यालखानने तङ्देबेये नैजे ख्याल अन्चे चीत्दे?’
45“होर्दे ङूदे थमयूने जवाफ पीन्क्य, ‘तम्दम्ने, नमयूने ङ यीय, अम्ब पात्ता चीदयू नङ्ने त्याने च अन्चीत्दे, हम्ब नमयूदे ङैजे लागि अन्ची।’
46 #
दानिएल 12:2
“होर्दे थमयूदे कलङ्बेये अन्जेनब सजाइ प्रेक्क्य, तर धर्मीयूब कलङ्बेये अन्सीबब जीयाने क्योबीय।”
Currently Selected:
मत्ती 25: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
