मत्ती 9
9
ला-तोप् स्येब बीद लादेब मीने येशूदे तम् चीम्मेब
मर्कूस २:१-१२; लूका ५:१७-२६
1होर्देङ्येदे येशू डुङ्गाने टदेबे तीप्ल्या गीलीदे, मेस्ये ङूजे रङ्से सहरने फ्योरदे। 2मीयूदे ला-तोप् स्येब बीद ख्यब मीत्या खर्ने ङ्येल्देबे येशूट्याने रेत्दे। येशूदे थमयूजे विश्वास तङ्देबे हम्ब ला-तोप् सेब बीदजे नवने यदे, “बोङ् ची च, नैजे पाप क्षमा क्यूत्दे।”
3पन्डेयूनङ्ने कोइदे रङ्सेजे सेम्ने येरे ह्वे चीत्दे, “ङूदे परमेश्वरजे न-पून्न ख्यङ्।”
4थमयूजे सेम्जे पो कोदेबे येशूदे यदे, “नमयू रङ्से सेम्ने चेने अन्ज्य मन? 5नैजे पाप क्षमा क्यूत्दे’ यब मेस्ये ‘लङ्देबे प्र यब’ कम्ब सूस्योलो ख्यङ्? 6तर पृथ्वीने पाप क्षमा चेब हक मीजे चने ख्यङ् यब पो नमयूदे था प्रेस्स्य।” होर्दे येशूदे हम्ब ला-तोप् स्येब बीदजे नबने यदे, “लङ्, नैजे खर् प्लेत्देबे कीम्ने प्र।” 7होर्दे ङू लङ्देबे रङ्से कीम्तेले गीलीदे। 8मीहुलदे कन्छ्वाब हम्ब मी तम्क्यूरेब तङ्दे हन्छ्वाब थमयू फैगदे, मेस्ये मीयूने येर शक्ति पीनब परमेश्वरजे थमयूदे सार्या चीत्दे।
मत्तीने क्वब
मर्कूस २:१३-१७; लूका ५:२७-३२
9येशू हैयादे प्रेनूब मत्ती यब मीत्या स्यर्म लङब अड्डने टूनब तङ्दे मेस्ये ङूने यदे, “ङैजे ङ्ये-ङ्ये ख।” होर्दे ङू लङ्देबे ङूजे ङ्ये-ङ्ये गीलीदे।
10 #
लूका 15:1,2 येशू कङ् चने मत्तीजे कीम्ने टूनूब, स्यर्म लङब कूम मीयू मेस्ये पापीयू रदेबे येशू मेस्ये ङूजे स्यूस्स्यायू ट्याने कङ् चने प्रे-टूङ्रदे। 11फरिसीयूदे कन्छ्वाब हम्ब तङ्दे, हन्छ्वाब येशूजे स्यूस्स्यायूने यदे, “नमयूजे गुरु स्यर्म लङब मीयू मेस्ये पापीयूप्रे टूङ्देबे चेने च?”
12अम्ब तदेबे येशूदे यदे, “बीद त्वब मीयूने डाक्टरजे हर्जो अम्पर्ती, तर नवने त्या डाक्टरजे हर्जो पर्दीय। 13#मत्ती 12:7; होशे 6:6तर प्र, नमयूदे अम्बजे अर्थ च टोङ् यदेबे लोम्: ‘बलि पीनब दी, दया चेब सेम् ङैने चैतीय।’ चेनेयलो ङ धर्मी मीयूजे लागि दी, तर पापीयूने क्वने र-ख्यङ्।”
बर्तजे बारेने ल्वेब
मर्कूस २:१८-२२; लूका ५:३३-३९
14होर्दे यूहन्नाजे स्यूस्स्यायू येशूट्याने रदेबे लोत्दे, “ङीयू मेस्ये फरिसीयू बर्त टूङ्क्य, तर नैजे स्यूस्स्यायूदे बर्त चेने अन्टूङ?”
15येशूदे थमयूने यदे, “कन्छ्वासेमे दूल जन्तीयूप्रे क्यूक्क्य, च थमयू शोक् चीक्क्या? तर हम्ब दिनरीय कन्छ्वाब दूल थमयू ख्यनेदे कूबीय, हन्छ्वाब थमयू बर्त टूङ्क्य।
16“ङीङ् कोलाने सर् टलो सूदेये अन्ख्य। चेनेयलो सर् टलोदे ङीङ् कोला प्र्याङ्पीय, मेस्ये कोला बेस्से प्र्याङ्बीय। 17ङीङ् खूस्यजे पीचीने ची सर् सूदेये अन्चङ्, नत्र पीजी प्र्याङ्बीय, मेस्ये अङ्गुरजे ची पीप्पीय, मेस्ये पीजी चैकमये अन्लादी। तर सर् खूस्यजे पीजीने सर् ची चङ्क्य, मेस्ये ची प्रे खूस्यजे पीजीये जूक्तीय।”
याइरसजे चीमी
मर्कूस ५:२१-४३; लूका ८:४०-५६
18कन्छ्वाब येशूदे थमयूने अम्ब पो येन ख्य, हन्छ्वाब सभा-कीम्जे हुकुम चेब मीत्या रदेबे, येशूने स्यूव पीन्देबे यदे, “ङैजे चीमी चूजोके सीइ तर न रदेबे ङू फ्याने नैजे ला येम्मी, मेस्ये ङू सोम्बो क्यूक्क्य।” 19येशू लङ्दे मेस्ये रङ्से स्यूस्स्यायू मेस्ये हम्ब मी ङ्ये-ङ्ये गीलीदे।
20हम्ब बीलाने बाह्र वर्षमेस्येने का भनब बीद ख्यब मदीत्या ङ्यलम्दे रदेबे येशूजे कोला नने छूत्दे। 21चेनेयलो, “ङैदे येशूजे कोला ननेत्या छूल्लीने ङ तम् क्यूक्क्य यदेबे” ङूदे सेम्ने मन्न ख्य।
22ङ्यलम् प्लीङ् ल्वादेबे लेप्प येशूदे हम्ब मदीने तङ्दे, मेस्ये यदे, “बोङ् ची चीमी, नैजे विश्वासदे न तम् चीम्मे ख्यङ्।” हम्ब मदी हन्छ्वाबने तम् क्यूरी।
23होर्देङ्येदे सभा-कीम्जे हुकुम चेब मीजे कीम्ने येशू फ्योरदे, ङूदे हैयाने शोक्जे बीलने मूराली तप्नबयू मेस्ये मीहुल बेस्से ङूनब तङ्दे। 24येशूदे थमयूने यदे, “फीने प्र, चेनेयलो मदीपीच सीये दी, तर ङ्यूम्न ख्यङ्।” येशूजे पोने खिसी चीत्देबे थमयू रीग्दे।” 25मीहुल फीने योन्बेङ्येदे येशू नङ्ने क्योइदे मेस्ये हम्ब मदीपीचजे ला चूङ्दे, होर्दे हम्ब मदीपीच ग्वे-लङ्दे। 26होर्दे अम्ब पोजे बयान हम्ब नेजे का-मुलुकने ड्वाङ्गे क्यूरी।
म्या अन्तङब मी ङ्ही
27येशू हैयादे प्रेनूब म्या अन्तङब मी ङ्हीदे यदे, “ओ दाऊदजे च, ङीफ्याने दया चीम्मी” यदेबे पारा पूदे-पूदे येशूजे ङ्ये-ङ्ये गीली।
28येशू कीम्ने क्योये ङ्येदे हम्ब म्या अन्तङब मी ङ्ही ङू ट्याने रदे। येशूदे थमयूने यदे, “ङैदे तम् चीम्मे खूइय यब पोने नमयू विश्वास चीक्क्या?”
थमयूदे येशूने यदे, “प्रभु, विश्वास चीक्क्य।”
29होर्दे येशूदे थमयूजे म्याने छूत्देबे यदे, “नमयूने नमयूजे विश्वास अनुसारने क्यूस्स्य।” 30होर्दे थमयूजे म्या तङब क्यूत्दे। थमयूने येर्बे यदेबे येशूदे बोङ्बे आर्तीदे, “अम्ब पो सूदेये था अम्प्रेस्स्य।” 31तर थमयू गीलीदेबे हम्ब नेजे का-मुलुकने येशूदे चेब काम मीयूने स्योत्दे।
32कन्छ्वाब थमयू योङ्देबे प्रेन ख्य, हन्छ्वाब छेत् लादीकब लर मीत्या येशूट्याने रेत्दे। 33छेत् योम्बेमेस्ये हम्ब लर क्यम्दे। होर्दे “इस्राएलने यर कलङ्बेये अन्तङ्” यदेबे मीहुल क्वाने हार्मन्दीकदे।
34 #
मत्ती 10:25; 12:24; मर्कूस 3:22; लूका 11:15 तर फरिसीयूदे यदे, “छेत्यूजे मालिकजे बोङ्दे ङूदे छेत्यू योन टोङ्।”
रङ्ने काम चेब छीत्या मीयू
35 #
मत्ती 4:23; मर्कूस 1:39; लूका 4:44 येशू कूम सहरयू, तयूतेले मेस्ये थमयूजे सभा-कीम्यूने शिक्षा पीने पीने, परमेश्वरजे राज्यजे सूगब खबर स्योल्लीम् पीरीपीरीजे बीदयू होर्दे नवयूने तम् चीते चीते गीलीदे। 36#गन्ती 27:17; १ राजा 22:17; 2 इतिहास 18:16; इजकिएल 34:5; मर्कूस 6:34तर येशूदे मीहुल तङ्दे मेस्ये हम्बयूने सोरो ङ्येम्दे चेनेयलो थमयू प्रङ्ब त्वब स्वान्यूप्र छरङ् प्रेत्देबे अप्सन् अम्प्रेब ख्य। 37#लूका 10:2होर्दे येशूदे रङ्से स्यूस्स्यायूने यदे, “तोल पर्देब बली कोलानेयली ख्यङ्, तर काम फरब मीयू छीत्या ख्यङ्। 38येरेक्यूत्देबे तोल पर्देब बलीजे प्रभुने प्रार्थना ची, मेस्ये प्रभुदे रङ्सेजे रङ्ने बली तोलब मीयू कूल्पीस्य।”
Currently Selected:
मत्ती 9: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
