मर्कूस 6
6
नासरतजे मीयूदे येशूजे पो अन्ङ्यीन्
मत्ती १३:५३-५८
1हैयादे योङ्देबे येशू रङ्सेजे सहरने ल्वारदे। ङूजे स्यूस्स्यायू ङू ङ्ये-ङ्ये गीलीदे। 2आराम टूङब दिनने येशूदे यहूदी सभा-कीम्ने गीलीदेबे लोम्मीदे, मेस्ये सूदे तदे हम्ब तब मीयू क्वादेने हार्मन्दीदे यदे, “अम्ब मीदे अम्ब पो टक्कने केर्दे लोम्रीदे? ङूदे प्रेब अम्ब ज्ञान कर स्व? ङूजे लादे चेब कामयू कर शक्तिशाली? 3ङू हम्ब स्यङ्जे काम चेब कर्मी ते स्व? च ङू मरियमजे च, मेस्ये याकूब, योसेफ, यहूदा प्रे सिमोनजे अत ते स्व? च ङूजे स्यङ्यूये ङीन प्रेने ख्य ते स्व?” होर्दे थमयू ङूप्रे छी लङ्दे।
4 #
यूहन्ना 4:44
हन्छ्वाब येशूदे थमयूने यदे, “अगमवक्ताने रङ्से जन्मेदेब नेने, नलोपीलोजे अन्द्रने मेस्ये कीम् म्हीतीदे गेसेन् अन्ची, तर सूजो केनेने यलीने गेसेन् चीक्क्य।” 5मेस्ये येशूदे हैयाने कोइ कोइ नवयू फ्याने ङूजे ला हीत्देबे थमयूने तम् चेब काम त्या चीत्दे सूजो शक्तिशाली कामयू चे अङ्खू। 6थमयूदे ङूने विश्वास अन्चेब तङ्देबे येशू हार्मन्दीदे।
होर्दे ङू त-तने मीयूने शिक्षा पीने पीने गीलीदे।
येशूदे बाह्र जना स्यूस्स्यायूने कूल्बेब
मत्ती १०:१,५-१५; लूका ९:१-६
7येशूदे बाह्र जना स्यूस्स्यायूने ङू ट्याने कोदे, मेस्ये थमयूने ङ्ही-ङ्ही फूङ् पूत्देबे कूल्बीदे। थमयूने अशुद्ध आत्मायू योनब हक पीन्दे।
8थमयूने येशूदे अम्ब आज्ञा पीन्दे, “चीन्तङ् लम्ने प्रब क्यङ्, झ्योल, खूजने नोर् चेये अन्टेल्लाची, तर पीर्ग तीत्यात्या टेल्। 9पूङ्गी ह्वे, मेस्ये सूजो थेप् कोलायू अन्टेल्लाची।” 10येशूदे थमयूने यदे, “कन्छ्वाब नमयू कीम् त्याने क्योबीय, हम्ब तदे अन्-योङ्बदासेमे हम्ब कीम्नेने टूनू। 11#मूल स्यूस्स्यायूजे कामजे किताब 13:51#लूका 10:4-11कादेये कोइ नेने नमयूने स्वागत अन्क्यूत्देयलो, या नमयूजे पो अन्-ङ्यीन्लो, हम्ब नेदे नमयू योङ्रब थमयूजे विरुद्धने गवाही तनने रङ्सेजे तोप्जे धूलो फ्रूप्पी।”
12होर्दे थमयू योङ्देबे गीली मीयूदे पश्चात्ताप चीस्स्य यदेब वचन स्योत्दे। 13#याकूब 5:14थमयूदे कूम छेत्ने योम्बीदे, मेस्ये कूम नवयूने मूर्गूदे अभिषेक चीम्मीदेबे तम् चीत्दे।
बप्तिस्मा पीनब यूहन्ना सेक्कब
मत्ती १४:१-१२; लूका ९:७-९
14 #
मत्ती 16:14; मर्कूस 8:28; लूका 9:19 मूरुम् हेरोददे येशूजे न मीन् चील्लेब तदे, चेनेयलो ङूजे मीन् का-मुलुकने ड्वाङ्गे क्यूरे ख्य। कोइ मीयूदे य ख्य, “मीने बप्तिस्मा पीनब यूहन्ना सीइदेबे सोम्बो क्यूरे ख्यङ्, होरेक्यूत्देबे ङूदे येर शक्तिजे काम चीन्न टोङ्।”
15तर सूजो मीयूदे यदे, “ङूब एलिया टोङ्।”
मेस्ये कोइ सूजो मीयूदे यदे, “ङूब तोङ्बो जूग्जे अगमवक्तायूप्रने ङूये अगमवक्ता त्या ख्यङ्।”
16तर कन्छ्वाब हेरोददे अम्ब पो तदे हन्छ्वाब ङूदे यदे, “यूहन्ना, हम्बजे ट ङैदे चसे पीन्दे, ङू सोम्बो क्यूत्देबे लङ्यो।”
17 #
लूका 3:19,20 ङूजे च्योन् फिलिपजे मज हेरोदियासजे लागि यदेबे हेरोददे यूहन्नाने चूङ्से पीन्दे, मेस्ये ङूने ख्यादेबे झ्यालखानने स्योप्दे, चेनेयलो हेरोददे हेरोदियासने ङ्येन् चीक्क ख्य। 18चेनेयलो यूहन्नादे हेरोदने येरे य ख्य, “रङ्से च्योन्जे मज नेप्रे येनब, नने नियमदे अम्पीन्।” 19होरेक्यूत्देबे हेरोदियासदे यूहन्नाने सोरो अन्ज्य छी चीन्न ख्य, मेस्ये ङूने सेत्तीङ् र ख्य, तर ङूने से अङ्ख्व ख्य। 20चेनेयलो यूहन्ना धर्मी मी मेस्ये पवित्र मी यदेबे हेरोद यूहन्नाप्रे फ ख्य, होरेक्यूत्देबे ङूदे चेलाबे हीदे ख्य। यूहन्नाजे शिक्षा ङ्यीन्ब ङू सोरो केर्चे-केर्चे क्यूर ख्य, होरनेयली सूग्लाबे ङ्यीन ख्य।
21तर हन्छ्वाब मौका सोरो ज्य प्रेत्दे, कन्छ्वाब हेरोददे ङू प्रेब दिनने ङूजे मी केन्यू, अफसरयू मेस्ये गालीलजे केन् केन् मीयू क्वाने कोदेबे भत्यार् केन् लैदीदे। 22हन्छ्वाब हेरोदियासजे चीमी कोठा नङ्ने रदेबे ङूदे सोरो ज्य स्येमीदे, मेस्ये ङूदे सोरो ज्य स्येमीदेबे हेरोदप्रे ङूजे ङ्योवयूने सूग्ला चीम्मीदे। होरेक्यूत्देबे हेरोददे हम्ब मदी पीचने यदे, “नने च सेम् पर्दे ख्य ङैने स्य, मेस्ये ङैदे नने पीन्क्य।” 23हेरोददे कबुल चीत्देबे हम्ब ज्य स्यब मदी पीचने यदे, “नदे ङैने चने स्यली, ङ ङैजे राज्यजे फाच्या राज्य स्यलीने नने पीन्क्य।”
24होर्दे हम्ब मदी पीच फीने रदेबे ङूजे मप्रे लोत्दे, “ङ च स्य यी?”
मदे यदे, “बप्तिस्मा पीनब यूहन्नाजे ट।”
25हम्ब मदी पीच अतूर् अतूर् नङ्ने मूरुम् ट्याने ल्वारदेबे यदे, “नदे चूजोने बप्तिस्मा पीनब यूहन्नाजे ट चदेबे ङैने थल्ने पूमीस्य मन ख्यङ्।”
26अम्ब पो तदेबे मूरुम् सोरो अन्सूग क्यूत्दे, तर हन्छ्वाब ङ्योवयूजे खूम्ने कबुल चीदेब पो अम्पीन् य अन्खू। 27मूरुम्दे खात्याने गारद्जे सिपाई त्याने यूहन्नाजे ट चैसी यदेबे हुकुम पीन्दे। मेस्ये ङूदे झ्यालखानने गीलीदेबे यूहन्नाजे ट चेरीदे, 28मेस्ये ङूजे ट थल्ने पूत्देबे मदी पीचने पीन्दे, मदी पीचदे हम्ब ट ङूजे मने पीनने गीलीदे। 29यूहन्नाजे स्यूस्स्यायूदे कन्छ्वाब अम्ब पो तदे हन्छ्वाब थमयू रदेबे ङूजे लास प्लेत्देबे कूदीदे मेस्ये खङ्सने पोप्पीदे।
येशूदे हजार ङ मीयूने चसेपीनब
मत्ती १४:१३-२१; लूका ९:१०-१७; यूहन्ना ६:५-१३
30होर्दे येशू ट्याने मूल स्यूस्स्यायू रूप् क्यूट्टदे, मेस्ये थमयूदे च चे ख्य, च लोम्मे ख्य, हम्ब पोयू क्वाने ङूने स्योत्दे। 31येशूदे थमयूने यदे, “नमयू ङैप्रे चनमन नेने ख, मेस्ये गैन सङ्-ख।” चेनेयलो होने रेन-प्रेन मीयू कूम ख्य, थमयू चसे चब त्याये लोङ् अम्प्रे।
32होर्दे थमयू सूनेये सम् अम्पीन्लाबे डुङ्गाने टूङ्देबे चनमन नेत्याने गीलीदे। 33कूम मीयूदे थमयू डुङ्गाने प्रेनब तङ्दे, मेस्ये थेप्प्रदेने स्येदे, होर्दे सहर सहरदे तोप्देने ग्येरदेबे हन्दीयोर् गीलीदे, मेस्ये थमयू फ्योयेयली खूम्ने फ्योइदे। 34#गन्ती 27:17; १ राजा 22:17; 2 इतिहास 18:16; इजकिएल 34:5; मत्ती 9:36कन्छ्वाब येशू डुङ्गादे तल्दे हन्छ्वाब ङूदे मी हुल केन् तङ्दे, मेस्ये ङूदे थमयूने ङ्येम्दे। चेनेयलो थमयू प्रङ्ब त्वब स्वान्यूप्र ख्य। मेस्ये येशूदे थमयूने कूम पोयू लोम्मे मेदे।
35होर्दे कन्छ्वाब मीया नूम्र ख्य हन्छ्वाब येशूजे स्यूस्स्यायूदे ङू ट्याने रदेबे यदे, “अम्ब याङ्यूङ् ने ख्यङ् जेम्से स रीप्यी। 36मीयूने कूल्बी चेनेयलो थमयूदे हैयाबूरूजे तने प्रदेबे रङ्से चब चसेयू कीम्बस्य।”
37तर येशूदे थमयूने यदे, “नमयूदेने थमयूने चत्या चसे पीन्।”
तर स्यूस्स्यायूदे येशूने यदे, “च सै ङ्ही दीनारजे#६:३७ दीनार- हन्छ्वाब चील्लेब नोर्ने दीनार य ख्यङ् क्यङ् कीन्देबे थमयूने चसे पीना?”
38येशूदे थमयूने यदे, “नमयूप्रे क्यङ् कोला ख्यङ्? प्रदेबे ले।” होर्दे चील्देबे थमयूदे यदे, “क्यङ् ङ मेस्ये ङ ङ्ही।”
39होर्दे येशूदे मीयूने ङ्येछ्याङ् चूकूर् ङने फूङ् फूङ् क्यूत्देबे टूङ् यब हुकुम पीन्दे। 40थमयू सैत्या सैत्या मेस्ये ङ्यील्लङ्दे च्यू-ङ्यील्लङ्दे च्यू फूङ् क्यूत्देबे टूङ्दे। 41येशूदे हम्ब क्यङ्प्रे ङ ङ्ही लाने टेल्देबे स्वर्गतेले लेत्देबे असी पीन्देबे क्यङ् फाच्या फाच्या क्योत्दे, मेस्ये ङूदे मीयूने कोम्मी यदेबे स्यूस्स्यायूने पीन्दे, हम्ब ङ ङ्हीनेये क्यङ्प्रने फाच्या फाच्या पूत्देबे ङूदे थमयू क्वानेने कोम्मीदे 42मीयू क्वादेने कलाबे चदे। 43ङ्येदे स्यूस्स्यायूदे क्यङ् मेस्ये ङ लम रब फाच्यायू बाह्रा टोलो रूप् पूत्दे। 44क्यङ् चब पतीयू हजार ङ ख्य।
येशू क्यू ङने प्रेनब
मत्ती १४:२२-३६; यूहन्ना ६:१६-२१
45होर्दे खात्याने येशूदे स्यूस्स्यायूने डुङ्गाने टदेबे तीप्ल्या बेथसेदाने ङू यली खूम्ने प्रने च्योल्दे, मेस्ये हन्छ्वाब ङूदे मी हुलने कूल्बीदे। 46थमयूप्रे छूर्देङ्येदे येशू गङ्ने प्रार्थना चेने गीलीदे।
47नूस्यूङ् क्यूरीब समुद्रजे नदे डुङ्गा कूम चीन्तङ् फ्योये ख्य, मेस्ये येशूत्या पखने ख्य। 48स्यूस्स्यायू डुङ्गा चील्लेने गरो क्यून्नब येशूदे तङ्दे, चेनेयलो थमयू ती प्रेनूब उन्दू केन् छो थमयूतेलेयोर् रेन ख्य। नप्दे सोम् तप्रब येशू थमयू तेले समुद्र फ्याने तोप्दे रदे, मेस्ये ङू थमयूजे खूम्दे प्रमेब, 49थमयूदे येशू समुद्र फ्याने प्रेनब तङ्ब सीमी मन्देबे थमयू पारा पूत्दे। 50चेनेयलो ङू तङ्देबे क्वाने फैगदे।
तर हन्छ्वाबने ङूदे थमयूने यदे, “सेम् केन् ची, ङ न, अम्फलाची।” 51होर्दे येशू थमयू ट्याने डुङ्गाने टदे, मेस्ये उन्दू केन् रबये थम्दीइ, होर्दे थमयू सोरो हार्मन्दीकदे, 52येशूदे क्यङ् चस्ये पीनब तङ्देबेये थमयूदे ङूजे पूरा अर्थने क्व अन्ख्व ख्य, चेनेयलो थमयूजे सेम् चेये क्व अङ्ख्व बोदो क्यूरेख्य।
53समुद्र थेक्क ङ्येदे थमयू गनेसरेतजे मुलुकने फ्योरदे मेस्ये थमयूदे समुद्र नने डुङ्गा रेत्दे। 54कन्छ्वाब थमयू डुङ्गादे योङ्रदे हन्छ्वाबने मीयूदे येशूने स्येल्गदे, 55मेस्ये थमयू हैयाबूरू ती-छो त तेले ग्येइदे होर्दे केने येशू टोङ् य-त, हैयाने नवयू कपतीकने प्लेत्देबे रेत्दे। 56होर्दे तयूने या सहरयूने या मी टूङ नेयूने केने केने येशू गीलीदे मीयूदे नवयूने बजार बजारने रेत्दबे हीत्दे, मेस्ये येशूजे कोला नत्यानेयली छ्वे प्रेदे यदेबे थमयूदे येशूने बिन्ती चीत्दे, मेस्ये कन्छ्वा मीदे छूत्दे थमयू क्वाने तम् क्यूत्दे।
Currently Selected:
मर्कूस 6: सर् कबुल
Highlight
Share
Copy
Want to have your highlights saved across all your devices? Sign up or sign in
Ghale New Testament © Nepal Bible Society, 2011.
