Kereja Rasul 7

Stepen Bejaku Ngagai Raban Kunsil

1Imam besai lalu nanya Stepen, “Kati nya amat?”

2 # Mas 29.3; P-kal 11.31; 15.7. Stepen lalu nyaut,

“Bala menyadi, apai, pendingka aku! Allah Taala ti bemulia pegari di mua aki kitai Abraham, lebuh iya di menua Mesopotamia, sebedau iya diau di Haran, 3#P-kal 12.1. lalu bejaku ngagai iya, ‘Tinggalka menua enggau kaban belayan nuan, lalu mupuk ngagai menua ti deka ditunjukka Aku ngagai nuan.’ 4#P-kal 11.31; 12.4. Nya alai iya ninggalka menua Kaldea, lalu diau di Haran. Udah bekau pemati apai iya, Allah Taala ngasuh iya mindah ari menua nya ngagai menua tu, ti alai kita diau diatu. 5#U-dat 2.5; P-kal 12.7; 13.15; 15.18; 17.8. Allah Taala enda meri iya pesaka di menua nya, sekaki pen nadai, tang besemaya deka meri menua nya nyadika pesaka iya, enggau ngagai bala peturun iya, taja pen iya nadai anak. 6#P-kal 15.13-14. Allah Taala bejaku madahka peturun iya deka nyadi orang kampar di menua orang, ke deka ngaga sida nyadi ulun lalu merinsaka sida empat ratus taun. 7#P-sut 3.12. Ku Allah Taala bejaku, ‘Tang Aku deka ngukum bansa ti beulunka sida, lalu udah bekau nya sida deka pansut ari menua nya lalu nyembah Aku ba endur tu.’ 8#P-kal 17.10-14; P-kal 21.2-4; P-kal 25.26; P-kal 29.31—35.18. Allah Taala lalu meri iya sempekat betutus. Nya alai Abraham nutus Isak ba hari ti kelapan udah bekau Isak ada. Isak beranakka Jakop, lalu Jakop beranakka dua belas iku aki ini kitai ke nurunka bansa kitai.

9 # P-kal 37.11; P-kal 37.28; P-kal 39.2, 21. Bala anak lelaki Jakop kepapaska menyadi sida Josep, nya alai sida nyual iya ngagai menua Ejip. Tang Allah Taala bisi enggau iya 10#P-kal 41.39-41. lalu ngelepaska iya ari semua penusah iya. Iya meri Josep penemu-dalam lalu ngasuh iya dikerinduka Raja Pharaoh menua Ejip. Nya alai raja nya ngasuh Josep merintah menua Ejip sereta ngemataka semua ruang bilik raja. 11#P-kal 41.1-2. Udah nya lapar pungkang nyadi di serata menua Ejip enggau menua Kanaan. Mensia balat amat merinsa lalu bala aki kitai nadai pemakai. 12#P-kal 42.2. Tang lebuh Jakop ninga menua Ejip bisi gandum, iya lalu ngasuh sida aki kitai mansang kin keterubah iya. 13#P-kal 45.1; 45.16. Lebuh sida mansang kin kedua kali, Josep madahka diri ngagai bala menyadi iya, lalu raja nemu pasal sida Josep sebilik. 14#P-kal 45.9-10, 17-18; 46.27 (Septuagint). Josep lalu ngirumka pesan ngagai apai iya Jakop, minta Jakop enggau semua tujuh puluh lima iku sida sebilik pindah ngagai menua Ejip. 15#P-kal 46.1-7; 49.33. Nya alai Jakop pindah ngagai menua Ejip. Iya enggau bala anak iya mati di menua nya, 16#P-kal 23.3-16; 33.19; 50.7-13; Jos 24.32. lalu bangkai sida dibai pulai ngagai Sekem, lalu dikuburka dalam kubur ti udah dibeli Abraham ari raban peturun Hamor di Sekem.

17 # P-sut 1.7-8. Tang lebuh timpuh nyau semak alai Allah Taala deka ngamatka semaya ti udah digaga Iya ngagai Abraham, pemayuh tubuh bansa kitai nyau nambah-menambah di menua Ejip, 18nyentuk ngagai maya siku agi raja, ke enda nemu Josep, merintah menua Ejip. 19#P-sut 1.10-11, 22. Iya nipu bansa kitai lalu mejalka sida aki ini kitai muai anak sida ke baru ada, ngambika sida mati. 20#P-sut 2.2. Nya meh maya Moses ada. Gamal iya sigat di mua Allah Taala, lalu iya diibun dalam rumah apai iya empu tiga bulan, 21#P-sut 2.5-6, 10. lalu lebuh iya dibuai, anak indu raja ngiru iya, lalu ngibun iya nyadika anak iya empu. 22Nya alai Moses diajar semua penemu-dalam orang Ejip, lalu iya nyadi orang ke bekuasa dalam jaku enggau pengawa.

23 # P-sut 2.11-15. “Lebuh iya umur empat puluh taun, iya berunding deka nemuai ngagai bansa iya empu, iya nya orang Israel. 24Lebuh iya tepedaka siku orang Ejip merinsaka siku orang Israel, iya lalu nulung orang Israel nya, bebalas ngagai orang Ejip nya, lalu munuh iya. ( 25Moses ngumbai bansa iya empu nemu Allah Taala deka ngena iya ngelepaska sida, tang sida enda nemu nya.) 26Hari siti iya tepedaka dua iku orang Israel belaya. Iya lalu nguji ngasuh seduai iya bebaik enggau pangan diri. Ku iya, ‘Seduai sama sebansa. Nama kebuah seduai belaya baka tu?’ 27Tang orang ke ngelaya pangan iya, ngejuka Moses ke tisi, lalu bejaku, ‘Sapa ngasuh nuan merintah lalu nyadi hakim kami? 28Kati nuan deka munuh aku, baka nuan ke munuh orang Ejip nya kemari?’ 29#P-sut 18.3-4. Lebuh Moses ninga nya, iya lalu rari ari menua Ejip, lalu diau ngampar di menua Midian. Dia iya bisi dua iku anak lelaki.

30 # P-sut 3.1-10. “Empat puluh taun udah bekau nya, siku melikat pegari di mua iya di menua puang ba Bukit Sinai, dalam api ti mau ba babas. 31Lebuh Moses meda nya, iya balat alit ati, lalu lebuh iya mansang deka meda semak agi, iya lalu ninga nyawa Tuhan bejaku, 32‘Aku tu Allah Taala aki ini nuan, Allah Taala ke disembah Abraham, Isak, enggau Jakop.’ Moses lalu getar-getar takut, lalu enda berani merening agi. 33Tuhan lalu bejaku ngagai iya, ‘Buka selipar nuan, laban nuan bediri ba tanah ti kudus. 34Aku udah meda bala nembiak Aku balat kena perinsa di menua Ejip, lalu udah ninga demuh sida, lalu Aku udah nurun deka ngelepaska sida. Datai kitu diatu. Aku deka ngirumka nuan ngagai menua Ejip.’

35 # P-sut 2.14. “Moses nya meh orang ke ditulak orang Israel, lebuh sida bejaku, ‘Sapa ngasuh nuan merintah lalu ngakim kami?’ Iya nya meh orang ke udah diasuh Allah Taala nyadi tuai orang Israel, lalu ngelepaska sida, disaup melikat ke udah pegari di mua iya ba babas nya. 36#P-sut 7.3; 14.21; P-pau 14.33. Iya nguluka sida pansut ari menua Ejip, lebuh iya udah ngereja kereja ajih, enggau kereja ti nyelai di menua Ejip, ba Tasik Mirah, enggau di menua puang dalam kandang empat puluh taun. 37#U-dat 18.15, 18. Moses nya meh orang ke udah bejaku ngagai orang Israel, ‘Allah Taala deka ngirumka siku nabi ngagai kita ari bansa kita empu, baka Iya ke udah ngirumka aku.’ #7.37 baka Iya ke udah ngirumka aku; Tauka: baka aku. 38#P-sut 19.1—20.17; U-dat 5.1-33. Moses nya meh orang ke begempuru enggau bala mayuh di menua puang, enggau melikat ke bejaku ngagai iya ba Bukit Sinai, sereta enggau bala aki ini kitai. Lalu iya nerima pesan ti idup ngambika diberi ngagai kitai.

39 # P-pau 14.3-4. “Sida aki ini kitai enggai ngasika iya, tang nulak iya ke tisi lalu keran deka pulai baru ngagai menua Ejip. 40#P-sut 32.1. Ku sida bejaku ngagai Aron, ‘Gaga petara ke kitai ngambika bisi nguluka kitai. Nyadi pasal Moses ke udah nguluka kitai pansut ari menua Ejip, kitai nadai nemu namaka penyadi iya.’ 41#P-sut 32.2-6. Lebuh maya nya sida ngaga siku engkeramba anak sapi, ngenjuk piring ngagai engkeramba nya, lalu begawai ngemesaika utai ti udah digaga jari sida empu. 42#Amo 5.25-27 (Septuagint). Tang Allah Taala ninggalka sida, lalu nejuka sida besembahka bintang ti di langit, munyi ti ditulis dalam bup sida nabi:

‘Kita orang Israel!

Kati kita bisi nyayat jelu ke Aku

lalu ngenjuk piring ngagai Aku

lebuh kita empat puluh taun di menua puang?

43Nadai! Kita mai langkau kain petara Molek,

enggau bintang petara Repan ti disembah kita,

engkeramba ti udah digaga ke disembah kita.

Nya alai, Aku deka muai kita ngilah Babilon.’

44 # P-sut 25.9, 40. “Aki ini kitai bisi Langkau Kain Allah Taala di menua puang, ti udah diasuh Allah Taala gaga Moses, nitihka tukuh ti udah dipeda Moses. 45#Jos 3.14-17. Udah nya, aki ini kitai ke udah nerima Langkau Kain nya ari aki ini sida, mai Langkau Kain nya lebuh sida bejalai enggau Josua, lalu ngerampas menua tu ari bansa orang ke diburu Allah Taala, lebuh aki ini kitai nyerang. Lalu Langkau Kain nya agi meruan nyentuk ngagai maya David, 46#2 Sam 7.1-16; 1 Ban 17.1-14. ke dikerinduka Allah Taala, ke minta Allah Taala ngemendarka iya ngaga sebuah rumah ke Allah Taala Jakop.#7.46 ke Allah Taala Jakop; sekeda salin nyebut: ke orang Israel 47#1 Raj 6.1-38; 2 Ban 3.1-17. Tang orang ke ngaga rumah nya ke Tuhan nya Solomon.

48“Tang taja pia, Allah Taala ti Pemadu Tinggi enda diau dalam rumah ti digaga jari mensia. Munyi ti disebut siku nabi,

49 # Isa 66.1-2. ‘Serega nya kerusi diraja Aku,

lalu dunya nya pelasar ke kaki Aku.

Rumah nama ti deka digaga kita ke Aku

tauka dini endur alai Aku deka diau? Ku Tuhan bejaku.

50Ukai enda jari Aku Empu ti ngaga semua utai nya?’

51 # Isa 63.10. “Kita tu orang ke kieh. Kita enda ditutus dalam ati enggau dalam pending kita. Kita seruran ngelaban Roh Kudus, baka aki ini kita. 52Ni nabi ke enda diperinsaka aki ini kita? Sida udah munuh sida nabi ke madahka dulu kelia pasal penatai Iya ke Lurus, lalu diatu kita udah nyual lalu munuh Iya. 53Kita tu orang ke udah nerima Adat ti diberi bala melikat, tang kita enda ngasika Adat nya!”

Stepen Dituku Ngena Batu

54Lebuh raban Kunsil ninga nya, sida pedis ati lalu kerik-kerik ngeli deka ngelaban iya. 55Tang Stepen, penuh laban Roh Kudus, engkadah ke langit, lalu meda mulia Allah Taala, enggau Jesus bediri muak ari kanan Allah Taala. 56Lalu ku Stepen bejaku, “Peda nyin! Aku meda serega tebuka, enggau Anak Mensia bediri muak ari kanan Allah Taala!”

57Tang sida mampul pending sida, manjung lalu semua sida belanda ngagai Stepen lalu nerekam iya. 58Sida lalu ngirit iya pansut ari nengeri, lalu belabuh nuku iya ngena batu. Orang ke besalah iya lalu ngengkahka serayung sida ba kaki orang bujang siku ke benama Saul. 59Lebuh sida benung nuku Stepen ngena batu, iya besampi, “Tuhan Jesus, sambut semengat aku!” 60Iya lalu besugang, lalu ngangau enggau nyawa ti inggar, “Tuhan! Anang besalahka sida ketegal dosa tu!” Lebuh iya udah nyebut nya, iya lalu mati.#7.60 mati; Gerika: tinduk

Currently Selected:

Kereja Rasul 7: BK

Highlight

Copy