یوحنا 13

عیسی شَگیرتلِرینینگ آیاغینی یوویار

1پِسَح بایرامی یاقینلادی.‏ عیسی بو دونیَه‌دِن آیریلیپ، آتاسینینگ یانینا گیتمِلی ساغادینینگ گِلِندیگینی بیلیَردی.‏ عیسی بو دونیَه‌ده اُزونینگکیلِری هِمیشه سُیدی، اُلاری آخیرقی گونه چِنلی سُیدی.‏

2شام واقتیدی.‏ شِیطان اِییَم شمعونینگ اُغلی یهودا اِسخریوطینینگ یورِگینَه عیسی خایینلیق اِتمِک فیکرینی سالیپدی.‏ 3عیسی آتاسینینگ هِمّه زادی اُز ایختییارینا بِرِندیگینی، اُزونینگ خودایدان گِلیپ، خودایا گیتجِکدیگینی بیلیَردی.‏ 4شُنونگ اوچین اُل شامینگ باشیندان توروپ، دُنونی چیقاردی-دا، بیر چالقیش بیلِن بیلینی قوشادی.‏ 5اُنسُنگ بیر لِگِنه سو قویدی-دا، شَگیرتلِرینینگ آیاقلارینی یوووپ، قوشانان چالقیشی بیلِن سوپورمَگه دوردی.‏

6عیسی شمعون پِطرُسینگ یانینا گِلِنده، پِطرُس اُنگا:‏ ‏«‏اِی آقام، سِن مِنینگ آیاغیمی یووجاق بُلیارمینگ؟»‏ دییدی.‏ 7عیسی اُنگا:‏ ‏«‏مِنینگ اِدیَن ایشیمه هِنیز عاقیلینگ چاتمایار، مونگا سُنگرا دوشونِرسینگ»‏ دییدی.‏ 8پِطرُس اُنگا:‏ ‏«‏یُق، مِن سانگا آیاغیمی آصلا یوودورمارین!‏»‏ دییدی.‏ اِمّا عیسی اُنگا:‏ ‏«‏اِگِر یووماسام، اُندا مِنینگ بیلِن شِریکدِشلیگینگ بُلماز»‏ دییّپ جُغاپ بِردی.‏ 9شمعون پِطرُس اُنگا:‏ ‏«‏اِی آقام، اُندا دینگه آیاغیمی دَل، اِلیمی-ده، باشیمی-دا یوو»‏ دییدی.‏ 10عیسی اُنگا:‏ ‏«‏یوونان آدامینگ دینگه آیاغینی یووماقدان باشغا حاجاتی یُقدور، هِمّه بِدِنی تَمیزدیر.‏ سیز هِم پَکسینگیز، یُنه هِمَّه‌نگیز دَل»‏ دییدی.‏ 11عیسی اُزونه کیمینگ خایینلیق اِتجِکدیگینی بیلیَردی.‏ شُنونگ اوچین-ده ‏«‏هِمَّه‌نگیز پَک دَل»‏ دییّپدی.‏

12عیسی اُلارینگ آیاقلارینی یوووپ بُلانیندان سُنگ، دُنونی گِیدی-ده، یِنه ساچاق باشینا گِچیپ اُتوردی و اُلارا شِیله دییدی:‏ ‏«‏سیزه نَمه اِدِنیمه دوشونیَرسینگیزمی؟ 13سیز مانگا اُستاد و آقا دییّپ، دُغری آیدیارسینگیز، سِبَبی مِن شُلدورین.‏ 14اِگِر مِن سیزینگ آقانگیز و اُستادینگیز بُلوپ-دا، آیاغینگیزی یووان بُلسام، اُندا سیز-ده بیری-بیرینگیزینگ آیاغینی یوومالیسینگیز.‏ 15مِنینگ سیزه اِدِنیمی، سیز هِم بیری-بیرینگیزه اِدِرسینگیز دییّپ، مِن سیزه نِمونه گُرکِزدیم.‏ 16مِن سیزه دُغروسینی آیدیارین، قول آقاسیندان بِییک دَلدیر، ایبِریلِن-ده اُزونی ایبِرِندِن بِییک دَلدیر.‏ 17اِگِر بو زاتلارا دوشونیپ، اُلاری بِرجای اِتسِنگیز، خوشواقت بُلارسینگیز.‏»‏

عیسی خیانات اِدیلمِگی

18‏«‏مِن سیزینگ هِمَّه‌نگیز حاقدا آیتمایارین.‏ مِن اُز سایلانلاریمی بیلیَرین.‏ اِمّا، قُی، بو مُقادِّس یازغیلارداقی:‏ ‏”‏حتّیٰ دوزومی اییِن مانگا خیانات اِتدی“‏ دییِن سُزلِر بِرجای بُلسون.‏#زِبور ۴۱‏:۹ 19مِن سیزه نَمه بُلجاغینی اُووندِن آیدییارین.‏ بولار یِرینه یِتِن واقتی سیز مِنینگ کیمدیگیمه گُز یِتیرِرسینگیز، مانگا اینانارسینگیز.‏ 20سیزه دُغروسینی آیدیارین، مِنینگ ایبِرِن آدامیمی قابول اِدِن مِنی قابول اِدیَندیر، مِنی قابول اِدِن بُلسا، مِنی ایبِرِنی قابول اِدیَندیر.‏»‏

21بو زاتلاری آیداندان سُنگ، عیسانینگ یورِگینی غوصّا قاپلادی.‏ اُل:‏ ‏«‏سیزه دُغروسینی آیدیارین، سیزینگ بیرینگیز مانگا خایینلیق اِدِرسینگیز»‏ دییّپ، آچیق آیتدی.‏ 22شَگیرتلِری اُنونگ مونی کیمه قاقدیریپ آیدیانینی بیلمَن، باشاغایلیق بیلِن بیری-بیرلِرینه سِراِدیشدیلِر.‏ 23ساچاق باشیندا شَگیرتلِردِن بیری عیسانینگ قاپدالیندا یاپلانیپ اُتیردی.‏ اُل عیسانینگ سُیگولی شَگیردیدی.‏ 24شمعون پِطرُس اُنونگ کیمه قاقدیریپ آیدیانینی سُراماغی یانگقی شَگیرده ایشارا اِتدی.‏ 25اُل هِم عیسی یاپلانیپ اُتورشینا اُندان:‏ ‏«‏اِی آقام، اُل کیم؟»‏ دییّپ سُرادی.‏ 26عیسی:‏ ‏«‏شو چُرِگی اُقارا باتیریپ، کیمه بِرسِم، اُل شُلدور»‏ دییّپ جُغاپ بِردی.‏ اُنسُنگ اُل چُرِگی اُقارا باتیردی-دا، اُنی شمعونینگ اُغلی یهودا اِسخریوطییا بِردی.‏ 27چُرِگی آلان واقتینا، یهودانینگ ایچینه شِیطان گیردی.‏ عیسی اُنگا:‏ ‏«‏نَمه اِتجِک بُلسانگ، تیزرَک اِت»‏ دییدی.‏ 28مونی عیسانینگ اُنگا نَمه اوچین آیدانینا اُتورانلارینگ هیچ بیری دوشونمِدی.‏ 29پول تُربا یهودادا بُلانسُنگ، کَبیرلِری عیسی اُنگا:‏ ‏«‏بایرام اوچین بیزه گِرِک زاتلاری ساتین آل»‏ یا-دا ‏«‏قاریپلارا بیرآز پول پایلا»‏ دییَّندیر دییّپ دوشوندیلِر.‏ 30یهودا بُلسا چُرِگی آلان واقتینا داشاری چیقیپ گیتدی و قارانگقی دوشوپدی.‏

عیسی پِطرُسینگ اینکَر اِتجِکدیگینی آیدیار

مَتّیٰ ۲۶‏:۳۱‏-۳۵؛ مَرقُس ۱۴‏:۲۷‏-۳۱؛ لوقا ۲۲‏:۳۱‏-۳۴

31یهودا چیقیپ گیدِنسُنگ، عیسی شِیله دییدی:‏ ‏«‏ایندی اینسان اُغلی بِییکلِندیریلدی، خودای-دا اُنونگ اوستو بیلِن بِییکلِندیریلدی.‏ 32اِگِر خودای اینسان اُغلونونگ اوستو بیلِن بِییکلِنِن بُلسا، اُنی هِم اُز بِییکلیگینَه شِریک اِدِر.‏ هاووا، اُنی شُل واقتینگ اُزونده بِییکلِندیرِر.‏ 33بالالاریم!‏ مِن ایندی سیزینگ بیلِن اوزاق بُلمارین.‏ سیز مِنی آغتارارسینگیز، یُنه یَهودیلِره آیدانیمی سیزه-ده آیدیارین:‏ ‏”‏مِنینگ گیتجِک یِریمه سیز باریپ بیلمِرسینگیز.‏“‏ 34سیزه بیر تَزه حُکوم بِریَرین:‏ بیری-بیرینگیزی سُیونگ.‏ مِنینگ سیزی سُیشوم یالی، سیز-ده بیری-بیرینگیزی سُیونگ.‏ 35اِگِر بیری-بیرینگیزی سُیسِنگیز، هِمّه‌لِر سیزینگ مِنینگ شَگیردیمدیگینگیزی بیلِرلِر.‏»‏

36شمعون پِطرُس عیسادان:‏ ‏«‏آقام، سِن نیرَه باریارسینگ؟»‏ دییّپ سُرادی.‏ عیسی اُنگا:‏ ‏«‏سِن مِنینگ بیلِن حَضیر گیدیپ بیلمِرسینگ، یُنه سُنگرا باریپ بیلِرسینگ»‏ دییّپ جُغاپ بِردی.‏ 37پِطرُس اُنگا:‏ ‏«‏آقام، نَمه اوچین مِن سِنینگ بیلِن حَضیر گیدیپ بیلمِرین؟ مِن سِنینگ اوچین جانیمی فِدا اِتمَگه-ده تاییار»‏ دییدی.‏ 38عیسی اُنگا:‏ ‏«‏سِن مِنینگ اوچین جانینگی فِدا اِدِرسینگمی؟ مِن سانگا دُغروسینی آیدیارین، خُرُز قیغیرمازدان اُنگ، سِن مِنی اوچ گِزِک اینکَر اِدِرسینگ»‏ دییّپ جُغاپ بِردی.‏

Currently Selected:

یوحنا 13: TUKIR

Highlight

Copy