KINAWANSAYAN 49

I Pinoboros di Yakub dit id Tohuri No

1Om lohowo' ngai' no di Yakub i tangaanak dau'd kusai, om boro-boros no iyau do poingkaa, “Timung kou nod hiti'd doros ku, om sunudan ku i' iyokoyu ondung nunu ot osiliu dot id dokoyu do koimbagu:

2Timung kou no, oi tangaanak di Yakub; om mokinongou kou no.

Pokinongou kou no do poboroson di Israil, i tapa' dokoyu.

3Oi Rubin, i tanak ku do kotuahan,

iya' no i kokorisan ku,

it abantug kopio om okoris kopio

dot id pogialatan do koinsanai di tangaanak.

4Iyo ko po do luyud di magampad,

nga' okon indo ko' iya' it agayo kopio,

tu' nampahu' nu i' i tondu' do panakasawo ku

om sinosomu' nu i toodopon do tapa' nu.

5Iyo' Simion nopo di Liwi om miobpinai.

Om pomonsoi no diyolo'd karaaton i rapo-rapo diyolo'.

6A' oku i' humompit di piburungan diyolo',

a' oku i' monongkuro di pipakatan diyolo',

tu' mamatai iyolo'd tulun do tontok dit otogod iyolo',

om monipu' iyolo'd gakod do sapi' di tontoluhan do maan do karamayan.

7Ousung no i kototogod diyolo',

tu' adalaan no kopio o korongito',

ousung no i koburonguso' diyolo',

tu' pokoruol kopio.

Pogitotongkiadon ku nondo iyolo'

do pointongkop do pomogunan dot Israil.

Potompiason ku nondo iyolo' dot id pogialatan di tulun do hilo'.

8Oi Yohuda, iya' no o royohon di piro-piro o tobpinai nu.

Om kotolon nu i pisangod nu.

Om tobpinai nu nga' tumuku' ngai' nondo dot id toguang nu.

9I#Png. 24.9, Pin. 5.5 Yohuda nopo om miagal do singa,

kapanabpo po iyau do nintorusan om gumuli' no iyau dot id luang dau,

om lumatan nondo om lumii.

Aiso' no o tulun do kasaap do mongoi pomigangau dau.

10I Yohuda no o koigit di sukud do pomorinta',

om sinakagon no dau o momorinta' do gisom dot alaid.

Om oinsanan nopondo o bansa' do rumikot do paatod do sukai#49.10 oinsanan o bansa' sukai: a' i' oilaan no komoyon di pinotulis dot id solinan dot Ibrani.

om tumuku' do minsiriba' dot id toguang dau.

11Pokogoson dau i tanak do kaladai dot id guas dot anggur

do hiri'd guas dot anggur dit osonong kopio.

Pupuan dau i pakayan dau do hiri'd waig dot anggur

di miagal pod raha' karagang.

12Aragang po o mato dau tu' nokoinum iyau do waig dot anggur,

om nipon dau nga' opurak po tu' nokoinum iyau do susu.#49.12 aragang po o mato…susu; ko': oitom po ko' waig dot anggur o mato dau, om opurak ko' susu o nipon dau.

13I Sibulon nopo om momogun-mogun nondo do hilo'd tisan do rahat.

Pododompiran nondo do kapal do rahat i koiyonon dau.

Kogisomon nopondo di dau'd watas om korikot do hilo'd Sidon.

14I Isakar nopo om iyo nod kaladai kokoris,

i poinglii dot id piolitan do kantung do pakol.

15Nga' noilaan i' dau dot osonong kopio i kinoiyonon diri

om olumis kopio i pomogunan diri.

Om tumongkud nondo iyau do mamabo di binabo dau

om asansagan iyau do kumaraja' do miagal po di turipon.

16I Dan nopo om sumiliu do pomorinta' do tulun dau.

Om osiliu nondo iyolo' do miagal di payat dot Israil do suwai.

17I Dan nopo om miagal dot iso' o tulanut do hiri'd tisan do talun-alun,

i tulanut do hiri'd tisan do ralan, i tulanut dit opodos kopio o tindukon

i moninduk do tatad do kuda',

om gowoi pondo om kataam i poinsakai di kuda'.

18Poingandad oku no di koposion do mantad id diya', oi Tuhan.

19I Gad nopondo om saapon do mananakau,

nga' gumuli' ko indo do mongoi pomogusa' diyolo'.

20Tana' nopondo di Asor om poposuni do taakanon dit ongosonong.

Iyau no o milo do manahak do taakanon di milo do posurungon do raja'.

21I Naptali no om miagal do tambang dit osimbayan do mintangkus,

om ongolumis kopio o tangaanak dau.#49.21 I Naptali…tambang; ko': I Naptali no om miagal do kayu dit ongolumis o raan.

22I Yusup nopo om miagal do guas dot anggur dit orombung,

i poinsuni dot id toning do tudan do waig,

om agayo o koroloyon do raan.#49.22 I Yusup…guas dot anggur…raan; ko': I Yusup nopo om miagal do kaladai di lalang dot id tisan do tudan do waig, om miagal do tanak do kaladai do hiri'd nulu-nulu.

23Ongorongit tomod i pisangod dau do sumaap dau,

om haro o pawakasan diyolo'd pana' om haro o pana' diyolo' do momogusa' dau.

24Nga' poirrindog kasai' i' i pana' di Yusup,

om okoris kasai' o longon dau#49.24 Nga'…longon dau; ko': Nga' otipu' indo om opilapak i pawakasan diyolo'd pana', om obinat o tuhat do longon diyolo'.

tu' pokorison i' di sinundu do Kinorohingan dit Okoris Kopio,

i Kinorohingan di Yakub,

i Gompomogompi', om i Mongintirung do tulun dot Israil.

25Iri i Kinorohingan di tapa' nu o monguhup diya'

i Kinorohingan dit Agayo Kuasa' o mamarakat diya'

do rasam do mantad hilo'd tawan,

om waig do mantad id saalom do tana',

om tangaanak om tayam-tayam.

26Om barakatan ko do Kinorohingan do gandum om bunga,#49.26 gandum om bunga; Solinan dot Ibrani: iri nopo komolohingan nu om okoris i' ko'.

om koinsanai dit ongosonong do mantad hilo'd konulu-nuluan dit id gulu po kopio.#49.26 Haro o tiso' o solinan di gulu po do tinulisan do: konuluhanan dit id gulu po kopio; Solinan dot Ibrani: i taki-aki ku.

Maha' daa om potuntugon o koinsanai do barakat diti dot id tulu di Yusup,

om hiri'd turos dau, iyau it agayo kopio dot id pogialatan do tobpinai dau.

27I Binyamin nopo om miagal do toni dit orongit.

Monikid kosuabon nopo om monikid sosodopon do mamatai om mangakan iyau dit aanu dau,” ka di Yakub.

28Iti no i hopod om duwo o payat dot Israil, om iti no i pinoboros di tapa' diyolo' do tontok di minoro-boros iyau do minongintod do pointikid-tikid di tangaanak dau.

Napatai om Linobong i Yakub

29Om bilinai noddi di Yakub i tangaanak dau do poingkaa, “A' no alaid om mongoi oku no sugku' di komolohingan ku di nangapatai. Om lobongon oku no di hilo'd pinamalabangan di taki-aki ku dot id suang di luang do nuluhon do hilo'd tana' di Ipron, i tulun do Hit, 30i#Kwn. 23.3-20 hilo'd Makpila, i ponong id koulayon do mantad id Mamri, i hilo'd tana' do Kanaan. Iri nopo luang do nuluhon diri om i tana'ddi om binoli di Abraham do mantad id di Ipron, i tulun do Hit, do maan do kalabangan. 31Hilo'#Kwn. 25.9-10, 35.29 no o pinamalabangan diyolo' di Abraham om i Sara, i sawo dau; om hilo' nogi' o pinamalabangan di Isak om i Robika, i sawo dau; om hilo' nogi' o pinamalabangan ku di Lia. 32Iri nopo tana'ddi om i luang do nuluhon do hiri, nga' binoli do mantad id tulun do Hit. Om lobongon oku no iyoho' do hilo',” ka dau. 33Om#Win. 7.15 kongoboros poddi di Yakub i bilin dau dot id tangaanak dau, om lii no kawagu i Yakub, om kapatai noddi iyau.

Currently Selected:

KINAWANSAYAN 49: BDK

Highlight

Copy

Compare