Luˇkaꞈ 17

Iˬ baˇ

(Maꞈtehˬ 18.6,7,21,22; Maˬkuˆ 9.42)

1Yeˬsuˇ aˬyawꞈ-euˬ zaˬ lahˇ deuˬ-ahˇ heu loꞈ-ehˇ ehˇ nehˬ-euˬ meh. “Aˬ cawˬ iˬ baˇ mˇ ni muˇ juˇ juˇ-eu jeˬ keuˆ le-eu yaw duˬ baw meh. Ehˇ kʼawꞈ, aˬ cawˬ iˬ baˇ mˇ ni jahˇ-eu gʼaˬ ya noeˬ shaˬ dui dui tehꞈ-a. 2Tsawˇ haˬ kʼoeˇ gʼaˬ neh zaˬ yaw nyiˇ heu deuˬ laꞈ kʼoeˇ tiˬ gʼaˬ na-ahˇ iˬ baˇ mˇ ni bi jahˇ-eu naˆ maˬ tseˇ, tsawˇ haˬ kʼoeˇ gʼaˬ-euˬ kawˬ lahˇ-ahˇ lo lehˬ paꞈ tawꞈ-awˇ, iˬ ma laˆ shaˆ-ahˇ biˬ puꞈ nehˬ naˇ, aˬ yawꞈ gʼaˇ duˬ muiˬ dzehˬ tehꞈ-a. 3Naw maꞈ yahˇ-awˇ dehꞈ-awˬ.

“Nawˬ-euˬ mehˇ nmˇ nawˬ-ahˇ mˇ lehˬ naˇ, yaw kʼaˆ kʼaˆ-ehˇ mehˬ nehˬ-awˬ. Aˬ yawꞈ iˬ baˇ noeˬ poˆ naˇ, aˬ yawꞈ-ahˇ iˬ baˇ pyehˬ nehˬ-awˬ. 4Tiˬ nah laꞈ kʼoeˇ tehꞈ-ehˇ shiꞈ poˆ keuˆ ni aˬ yawꞈ nawˬ-ahˇ mˇ lehˬ-awˇ, shiꞈ poˆ luꞈ nawˇ jawˇ gaˇ laˇ-awˇ, ‘Ngaˇ iˬ baˇ noeˬ poˆ-euˬ ma’ lehˇ ehˇ laˇ naˇ, shiꞈ poˆ luꞈ nawˇ iˬ baˇ ya pyehˬ nehˬ meh.”

Jah-eu jeˬ

5“Nga maꞈ jah-eu jeˬ bi myaˬ laˇ nehˬ laꞈ” lehˇ, gʼaˬ kʼehˇ deuˬ Sahˬpaˬ Yeˬsuˇ-ahˇ shaˇ-eu meh.

6Sahˬpaˬ Yeˬsuˇ ehˇ-eu, “Naw maꞈ jah-eu jeˬ gʼawˬ paꞈ aˇ nuiˆ hui ni ahˇ naˇ, boeˬ dzaˇ aˇ bawˇ heu bawˇ-ahˇ, ‘Nawˬ-euˬ duˬ ciˇ dawˬ tawˆ luꞈ gʼawˇ doˆ gʼeh-awˇ, iˬ ma laˆ shaˆ-ahˇ dehꞈ-iˇ-awˬ’ lehˇ ehˇ nehˬ ngeh, boeˬ dzaˇ heu bawˇ naw maꞈ-euˬ dawˬ naˇ haˬ tehꞈ-a.

Zaˬ kʼaˆ-euˬ gaˇ

7“Naw maꞈ laꞈ kʼoeˇ, yawˬ ha-euˬ zaˬ kʼaˆ deh ma tsehˬ-iˇ-euˬ, maˬ ngeuˇ naˇ yawˇ bo-iˇ-euˬ gʼoꞈ uˇ laˇ ngeh, ‘Tiˬ poˆ tehꞈ-ehˇ hawˬ jawˬ ga jawˬ laˇ-awˬ’ lehˇ ehˇ nehˬ-eu tsawˇ haˬ jawˇ meh loˇ. 8‘Ngaˇ ciꞈ hawˬ dzaˬ-eu gʼaˇ duˬ hawˬ mˇ dzaˇ saꞈ gʼeh-awˇ, hawˬ jeh shaˇ dahˇ-awˇ ngaˇ dzaˬ gʼawˬ dawˇ gʼaˬ ngeh keuˆ ni joꞈ paꞈ paꞈ-awˇ#17.8 Yawˬ ha-euˬ baw leˬ hawˬ dzaˬ gaˇ loꞈ-eu zaˬ kʼaˆ deuˬ-aˬ, joꞈ paꞈ paꞈ-awˇ ya loꞈ-eu zahˇ sahˇ kʼoꞈ jaˆ-eu meh. Yaw zeu baw-eu tiˬ jeˬ pyeuꞈ-eu meh. hawˬ jeh-ahˇ loꞈ gʼaˬ miˇ tsa, nawˇ dzaˬ lawˬ dawˇ lawˬ’ lehˇ maˬ ehˇ nehˬ-aˇ loˇ. 9Kʼaˇ kʼehˇ-euˬ jeˬ mˇ nehˬ laꞈ-eu baˬ da neh, yawˬ ha-euˬ zaˬ kʼaˆ-ahˇ guiˬ lahˬ huiˬ miˇ-a lehˇ noeˬ-eu tsawˇ haˬ jawˇ meh loˇ. 10Kʼoeˇ loꞈ-ehˇ duˇ ni, naw maꞈ kʼawꞈ, naw maꞈ-ahˇ kʼaˇ kʼehˇ-euˬ jeˬ mˇ gʼaˬ jiˇ ngeh, ‘Nga maꞈ-aˬ, maˬ poeˬ maˬ lawˬ-eu zaˬ kʼaˆ tehꞈ ma. Nga maꞈ-ahˇ daˇ-eu gaˇ-ahˇ nga maꞈ mˇ jiˇ-euˬ tehꞈ ma’ lehˇ ehˇ-awˬ.”

Coiˬ doi tseˇ gʼaˬ-ahˇ Yeˬsuˇ laˆ taˬ nehˬ-euˬ

11Yeˬsuˇ Yeˬluˇsaˬlehˬ meuˬ-ahˇ le ngeh, Saˬmaˬliˆ miˇ kʼahˬ hawˇ-eu Gaˬliˬlehˇ miˇ kʼahˬ-euˬ miˇ kaˬ caw caw-ehˇ le-euˬ meh. 12Aˬ yawꞈ pu tiˬ pu-ahˇ uˇ leˇ luꞈ ngeh, ui cuiˆ gaˇ mahˇ kaˬ gaˇ yawꞈ luꞈ-eu coiˬ doi tseˇ gʼaˬ-ahˇ tahˬ puˬ-euˬ meh. 13Aˬ yawꞈ maꞈ yaw kʼaˆ-ehˇ guˇ-awˇ ehˇ-eu, “Yeˬsuˇ-oˇ, Sahˬpaˬ-oˇ, nga maꞈ-ahˇ gʼawˬ shaˬ gaˬ nehˬ laꞈ-awˬ.”

14Yeˬsuˇ aˬ yawꞈ maꞈ-ahˇ haw mawˇ-awˇ ehˇ nehˬ-eu, “Piˇ ma deuˬ jawˇ gaˇ iˇ-awˇ, naw maꞈ-euˬ gʼawˇ mawˇ bi pyehˆ tseˇ haw-iˇ-awˬ.”

Aˬ yawꞈ maꞈ gaˇ pehˇ iˇ luꞈ ngeh, muiˬ laˇ shawˇ laˇ-euˬ#17.14 ‘Muiˬ laˇ shawˇ laˇ-eu’ lehˇ ehˇ-eu dawˬ tsuiꞈ, Maꞈtehˬ 8.2-ahˇ haw-awˬ. meh. 15Aˬ yawꞈ maꞈ laꞈ kʼoeˇ tiˬ gʼaˬ-aˬ, yawˬ ha-euˬ naˇ gawˇ taˬ leˇ-euˬ gaˇ ya mawˇ ngeh, yaw kʼaˆ-ehˇ guˇ guˇ-ehˇ Miˬyehˇ-ahˇ ja ceuˬ-eu laꞈ kʼoeˇ, naˇ kʼah paw paˇ gʼoꞈ kʼoꞈ laˇ-euˬ meh. 16Yeˬsuˇ-euˬ aˬ kuiˇ dawˬ peh miˇ tsa awˆ byaˆ-awˇ, Yeˬsuˇ-ahˇ guiˬ lahˬ huiˬ-eu dawˬ ngehˬ-euˬ meh. Aˬ yawꞈ-aˬ, Saˬmaˬliˆ tsawˇ haˬ meh. 17Yeˬsuˇ ehˇ-eu, “Muiˬ laˇ shawˇ laˇ-euˬ dawˬ tawˆ luꞈ tseˇ gʼaˬ maˬ ngeuˇ-a loˇ. Gʼoeˬ gʼaˬ aˬ gaˇ iˇ taˬ. 18Aˬ cawˬ tsawˇ jeuˬ heu gʼaˬ maˬ ngeuˇ naˇ, gʼoꞈ dmˇ dzeh laˇ-awˇ, Miˬyehˇ-euˬ guiˬ lahˬ-ahˇ ja ceuˬ-eu maˬ siˬ nya ta loˇ.” 19Kʼoeˇ naˇ, tsawˇ haˬ kʼoeˇ gʼaˬ-ahˇ Yeˬsuˇ ehˇ nehˬ-eu, “Tuˇ-awˇ gʼoꞈ-iˇ-awˬ. Nawˇ jah-eu jeˬ nawˬ-ahˇ bi taˬ leˇ-euˬ meh.”

Miˬyehˇ Miˇkʼahˬ keuˆ le-eu

(Maꞈtehˬ 24.23-28,37-41)

20Miˬyehˇ Miˇkʼahˬ aˬ myah keuˆ le-eu gaˇ kawˆ Paˬliˬsehˇ deuˬ Yeˬsuˇ-ahˇ naˇ haˬ ngeh, Yeˬsuˇ heu loꞈ-ehˇ ehˇ kʼoꞈ nehˬ-euˬ meh. “Miˬyehˇ Miˇkʼahˬ-aˬ, tsawˇ haˬ zaˬ-ahˇ mawˇ laˇ mawˇ laˇ-ehˇ keuˆ le-eu jeˬ maˬ ngeuˇ-a. 21‘Haw-awˬ. Heu gaˇ keuˆ le-euˬ ngaˇ. Kʼoeˇ gaˇ keuˆ le-euˬ ngaˇ’ lehˇ, tiˬ gʼaˬ-iˬ maˬ ehˇ-aˇ. Aˬ jeˬ miˇ neh ehˇ naˇ, Miˬyehˇ Miˇkʼahˬ-aˬ, naw maꞈ-euˬ laꞈ kʼoeˇ jaˆ-eu meh.”

22Kʼoeˇ naˇ, zaˬ lahˇ deuˬ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Naw maꞈ Tsawˇhaˬ-euˬ Zaˬmaˇ-euˬ aˇ nah-ahˇ mawˇ mawꞈ-eu aˇ yamˬ keuˆ le tehꞈ-a. Ehˇ kʼawꞈ, maˬ ya mawˇ-aˇ. 23‘Kʼoeˇ gaˇ haw leˇ-awˬ, heu gaˇ haw le-awˬ’ lehˇ, aˬ cawˬ ehˇ gaˇ naw maꞈ taˬ caw teh. 24Aˬ jeˬ miˇ neh ehˇ naˇ, mˬ myawꞈ myawꞈ laˇ ngeh, mˬ-euˬ kʼoeˇ dzeˇ heu dzeˇ doˆ ni bya-iˇ-eu loꞈ-ehˇ, Tsawˇhaˬ-euˬ Zaˬmaˇ-aˬ, aˬ yawꞈ-euˬ aˇ nah keuˆ le ngeh, kʼoeˇ loꞈ-ehˇ gʼeh tehꞈ-a. 25Ehˇ kʼawꞈ, yaw beh maˇ diˇ-aˬ, kʼehˬ-eu kʼaˆ-eu gʼawˬ mya jeˬ-ahˇ aˬ yawꞈ ya daˬ-awˇ, heu ziˇ-euˬ tsawˇ haˬ deuˬ aˬ yawꞈ-ahˇ byehˇ dzeh tehꞈ-a. 26Noˇaˬ-euˬ ziˇ-ahˇ keuˆ le-euˬ jeˬ, Tsawˇhaˬ-euˬ Zaˬmaˇ-euˬ aˇ nah-ahˇ paˇ keuˆ le tehꞈ-a. 27Noˇaˬ saˇ baoˬ laꞈ kʼoeˇ uˇ leˇ-awˇ, aˬ yawꞈ maꞈ-ahˇ iˇ cuꞈ dahˬ pymˬ sehꞈ jiˇ-euˬ aˇ nah kʼoeˇ nah-ahˇ keuˆ ni, aˬ yawꞈ maꞈ dzaˬ-awˇ dawˇ-awˇ, miˬ zaˬ laˬ smˇ miˇ iˇ-eu maˬ tsehˆ leˇ-a. 28Kʼoeˇ loꞈ-ehˇ duˇ ni, Lawˇtaˬ-euˬ ziˇ-ahˇ keuˆ le-euˬ jeˬ kʼawꞈ, aˇ nah kʼoeˇ nah-ahˇ tiˬ poˆ paˇ keuˆ le tehꞈ-a. Aˬ yawꞈ maꞈ dzaˬ-eu dawˇ-eu, ahˬ laꞈ zeuˇ laꞈ mˇ-eu, ka dzaˬ ka dawˇ-eu, nymˇ tsoˆ jiˇ shaˇ-eu, heu deuˬ-ahˇ maˬ naˬ leˇ ni mˇ luꞈ-eu meh. 29Ehˇ kʼawꞈ, Sawˇdoˬ meuˬ-ahˇ neh Lawˇtaˬ jiˆ doˆ-iˇ ngeh nah, mˬ-ahˇ neh miˬ dzaˬ hawˇ-eu miˬ dzaˇ dzaˇ shuiˇ uˬ yehˇ yehˇ-eu loꞈ-ehˇ ga le-awˇ, aˬ yawꞈ maꞈ dawˬ tawˆ luꞈ shiˇ jiˇ-euˬ meh. 30Tsawˇhaˬ-euˬ Zaˬmaˇ doˆ le ngeh nah, kʼoeˇ loꞈ-ehˇ pyeuꞈ laˇ tehꞈ-a.

31Aˇ nah kʼoeˇ nah keuˆ le ngeh, nymˇ mˬ-ahˇ daˆ luꞈ-eu tsawˇ haˬ-ahˇ, aˬ yawꞈ-euˬ myawˬ laˬ doˆ laˬ-iˇ-eu lehˇ iˇ kahˇ laꞈ kʼoeˇ taˬ bi zaꞈ uˇ-iˇ. Kʼoeˇ loꞈ-ehˇ duˇ ni, yaˇ ngeh jawˇ-eu tsawˇ haˬ deuˬ-ahˇ kʼawꞈ, iˇ kahˇ-ahˇ taˬ bi gʼoꞈ laˇ. 32Lawˇtaˬ-euˬ miˬ zaˬ-euˬ gaˇ kawˆ noeˬ mawˇ-awˬ. 33Yawˬ ha-euˬ saꞈ laˇ dehꞈ-eu jeˬ za nya ni kʼaˇ leh jeh-eu tsawˇ haˬ aˬ geu gʼaˬ maˬ kaˬ, saꞈ laˇ dehꞈ-eu jeˬ smˬ-iˇ tehꞈ-a. Ehˇ kʼawꞈ, yawˬ ha-euˬ saꞈ laˇ dehꞈ-eu jeˬ smˬ-euˬ tsawˇ haˬ-aˬ, saꞈ laˇ dehꞈ-eu jeˬ za tehꞈ-a. 34Ngaˇ naw maꞈ-ahˇ ehˇ nehˬ nyaˇ. Kʼoeˇ ngeh miˇ keuˆ le ngeh, yuꞈ zaˇ tiˬ gaˇ taꞈ-awˇ yuꞈ luꞈ-eu tsawˇ haˬ nyiˬ gʼaˬ-ahˇ, tiˬ gʼaˬ-ahˇ sheuˬ gʼeh-awˇ, tiˬ gʼaˬ-ahˇ bi jawˇ yaꞈ tehꞈ-a. 35-36Zaˬ miˬ zaˬ nyiˬ gʼaˬ tiˬ kawˆ loꞈ-ehˇ cehˇ tahˬ tahˬ luꞈ gaˇ, tiˬ gʼaˬ-ahˇ sheuˬ gʼeh-awˇ, tiˬ gʼaˬ-ahˇ bi jawˇ yaꞈ tehꞈ-a.”#17.35 Jaˇliꞈ tiˬ paˆ na deuˬ laꞈ kʼoeˇ, gaˬ naˇ yaw zaˬ heu hmˬ ahˇ-eu meh. 17.36: Tsawˇ haˬ nyiˬ gʼaˬ yaˇ ngeh jawˇ luꞈ gaˇ, tiˬ gʼaˬ-ahˇ sheuˬ gʼeh-awˇ, tiˬ gʼaˬ-ahˇ bi jawˇ yaꞈ tehꞈ-a.

37Zaˬ lahˇ deuˬ Yeˬsuˇ-ahˇ naˇ haˬ-eu, “Sahˬpaˬ-oˇ, kʼoeˇ loꞈ-ehˇ aˬ geu gaˇ pyeuꞈ laˇ ta.”

Yeˬsuˇ ehˇ-eu, “Shiˇ taˬ-euˬ gʼawˇ mawˇ kʼaˇ ga gaˇ, jeˬ shiˇ kʼaˬ dzeˇ uiˬ tehꞈ-a.”

Currently Selected:

Luˇkaꞈ 17: AHK

Highlight

Copy