Chivkeeb 30
30
1Thaus Laxees pum tas nwg tsi muaj ib tug mivnyuas rua Yakhauj le, nwg txawm khib nwg tug taislaug heev, nwg txhaj has rua Yakhauj has tas, “Koj yuav muab mivnyuas rua kuv lossis koj yuav ca kuas kuv tuag.”
2Yakhauj chim heev rua Laxees, nwg txhaj teb Laxees has tas, “Kuv yog Vaajtswv lov? Vaajtswv yog tug kws tsi pub koj muaj taug mivnyuas los sav!”
3Laxees has tas, “Kuv tug ntxhais qhev Npilehas nyob ntawm nuav, koj cale moog nrug nwg pw kuas nwg muaj mivnyuas rua kuv. Ua le nuav kuv txhaj yuav tau ua ib leejnam lug ntawm kuv tug ntxhais qhev ntawd.” 4Yogle ntawd, Laxees txhaj muab Npilehas rua nwg tug quasyawg yuav ua namyau, tes Yakhauj txhaj moog nrug nwg pw. 5Npilehas txawm xeebtub hab yug tau ib tug tub rua Yakhauj.
6Laxees has tas, “Vaajtswv tau txavtxim pumzoo tuaj kuv tog. Nwg nov kuv tej lug thov hab pub rua kuv muaj ib tug tub lawm”; yogle ntawd, nwg txhaj tis tug tub ntawd lub npe hu ua Daas.#30:6: Daas: Lub npe nuav has muaj ntsiv thooj le lulug Henplais kws has tas “txavtxim lawvle lub sab nyam.” 7Npilehas rov xeebtub hab yug tau tug tub thib ob rua Yakhauj. 8Laxees has tas, “Kuv tau tawmtsaam kuv tug taislaug nyaav heev, kuv txhaj yog tug muajyeej”; yogle ntawd, nwg txhaj tis tug tub ntawd npe hu ua Nathalis.#30:8: Nathalis: Lub npe nuav has muaj ntsiv thooj le lulug Henplais kws has tas “sis tawmtsaam”.
9Thaus Le-as paub tas nwg tsi muaj mivnyuas ntxiv lawm, nwg txawm muab nwg tug ntxhais qhev Xilepas rua Yakhauj ua namyau. 10Tes Xilepas txawm yug tau ib tug tub rua Yakhauj. 11Le-as has tas, “Kuv moov zoo kawg”; yogle ntawd, nwg txhaj tis tug tub ntawd lub npe hu ua Nkaj.#30:11: Nkaj: Lub npe nuav lug Henplais txhais has tas, “moov zoo kawg.” 12Xilepas rov yug tau ib tug tub rua Yakhauj, 13hab Le-as has tas, “Kuv zoosab kawg nkaus le lau! Zagnua tej quaspuj yuav hu kuv has tas, tug zoosab”; yogle ntawd, nwg txhaj tis tug tub ntawd lub npe hu ua Asaws.#30:13: Asaws: Lub npe nuav lug Henplais txhais has tas, “zoosab.”
14Thaus txug caij hlais nplej Lunpees moog yos uasi tom teb hab nwg pum ib cov zaub ntug hauvpaug,#30:14: Cov zaub ntug hauvpaug: Txheej laug thaus u ntseeg tas noj mas ua rua tug quaspuj muaj taug mivnyuas. nwg txawm rhu tau ib cov nqaa lug rua nwg nam Le-as. Laxees has rua Le-as has tas, “Thov muab koj tug tub cov zaub ntug hauvpaug ob-peb lub pub rua kuv hab.”
15Le-as teb tas, “Koj tub txeeb kuv tug quasyawg moog lawm, tseem tsi tau txaus koj sab hab lov? Zagnua koj tseem yuav tuaj txeeb kuv tug tub cov zaub ntug hauvpaug hab lov?”
Laxees teb tas, “Yog koj muab koj tug tub cov zaub ntug hauvpaug ob-peb lub rua kuv, mo nuav kuv yuav kuas Yakhauj lug nrug koj pw.”
16Thaus yuav tsausntuj Yakhauj rov tom teb lug, Le-as txawm moog tog Yakhauj hab has tas, “Mo nuav koj yuavtsum moog nrug kuv pw, ruaqhov kuv tub muab kuv tug tub cov zaub ntug hauvpaug ndlav koj lawm.” Yogle ntawd, mo ntawd Yakhauj txhaj moog nrug Le-as pw.
17Vaajtswv teb Le-as tej lug thov, nwg txhaj rov xeebtub hab yug tau ib tug tub rua Yakhauj yog tug thib tsib. 18Le-as has tas, “Vaajtswv muab nqezug rua kuv, ruaqhov kuv muab kuv tug ntxhais qhev rua kuv tug quasyawg yuav”; yogle ntawd, nwg txhaj tis tug tub ntawd lub npe hu ua Ixakhas.#30:18: Ixakhas: Lub npe nuav has muaj ntsiv thooj le lulug Henplais kws has tas “tug tuabneeg raug ndlav” hab “nqezug.”
19Le-as rov xeebtub hab yug tau ib tug tub rua Yakhauj yog tug thib rau. 20Le-as has tas, “Vaajtswv muab tau ib qhov khoomplig rua kuv zoo kawg nkaus le. Zagnua kuv tug quasyawg yuav saib taug kuv, ruaqhov kuv tub yug tau rau tug tub rua nwg lawm”; yogle ntawd, nwg txhaj tis tug tub ntawd lub npe hu ua Xenpuloos.#30:20: Xenpuloos: Lub npe nuav has muaj ntsiv thooj le lulug Henplais kws has tas “saib taug” hab “khoomplig.” 21Tomqaab ntawd nwg yug tau ib tug ntxhais, hab nwg tis npe rua tug ntxhais ntawd hu ua Dinas.
22Vaajtswv kuj tseem ncuntsoov txug Laxees; Nwg txhaj teb Laxees tej lug thov hab ua rua Laxees muaj taug mivnyuas. 23Laxees txhaj xeebtub hab yug tau ib tug tub. Nwg has tas “Vaajtswv muab kuv txuj kev txaajmuag rhu tawm moog lawm. 24Thov kuas tug TSWV pub rua kuv rov muaj dlua ib tug tub ntxiv hab”; yogle ntawd, nwg txhaj tis tug tub ntawd lub npe hu ua Yauxej.#30:24: Yauxej: Lub npe nuav has muaj ntsiv thooj le lulug Henplais kws has tas “thov kuas nwg pub ib tug ntxiv” hab “nwg muab rhu tawm moog lawm.”
Yakhauj Thov Ncaim Lanpaas
25Tomqaab kws Laxees yug tau Yauxej lawm, Yakhauj txawm has rua Lanpaas has tas, “Thov koj tso kuv rovqaab moog rua kuv lub vaaj lub tsev hab lub tebchaws. 26Thov muab kuv ob tug quaspuj hab kuv cov mivnyuas kws kuv ua zug tau ntawm koj rua kuv, es kuv yuav moog. Koj yeej paub tas kuv ua dlejnum zoo npaum lecaag rua koj lawm.”
27Lanpaas teb rua Yakhauj has tas, “Ca kuv has le nuav: Kuv paub lug ntawm kev tshawb saib mas pum tas qhov kws kuv npluanuj tub yog vim muaj koj, es tug TSWV txhaj foom koobmoov rua kuv. 28Xaam taagnrho koj tej nqezug seb raug pistsawg es kuv yuav them rua koj.”
29Yakhauj teb tas, “Kuv tau ua num zoo npaum lecaag rua koj hab koj tej tsaj kws kuv tu fuamvaam npaum lecaag los koj yeej paub zoo lawm. 30Uantej thaus kuv tsi tau lug koj muaj tsaj tsawg heev, nwgnuav koj tej tsaj kuj fuamvaam coob kawg le lawm. Kuv moog txug twg,#30:30: Kuv moog txug twg; lossis Vim muaj kuv. tug TSWV yeej foom koobmoov rua koj huv tuabsi. Zagnua txug caij lawm kws kuv yuavtsum tig lug yug kuv lub cuab lub yig.”
31Lanpaas txhaj nug has tas, “Kuv yuav them koj lecaag?”
Yakhauj teb tas, “Kuv tsi yuav ib yaam dlaabtsi le. Kuv yuav nyob tu koj cov tsaj moog ntxiv, yog tas koj kaam ua le nuav: 32Nubnua ca kuv moog ncig saib thoobplawg koj cov tsaj hab muab txhua tug mivnyuas yaaj dlub#30:32: Ib phoo ntawv qub-qub thaus u sau has tas txhua tug mivnyuas yaaj dlub; phoo lug Henplais has tas txhua tug yaaj txaij hab ua tej teev, hab txhua tug yaaj dlub. hab tej mivnyuas tshis kws txaij lossis txaij tej teev xaiv ca rua ib qho. Cov nuav lau, yog cov kws ua nqezug rua kuv. 33Lwmnub koj txhaj paub tas kuv ncaajnceeg los tsi ncaaj. Thaus kws koj tuaj tshuaj saib kuv tej nqezug, yog kuv tseem muaj tej tug mivnyuas tshis kws tsi txaij lossis tsi txaij tej teev lossis muaj ib tug mivnyuas yaaj tsi dlub le, tes koj yuav paub tas cov ntawd yog kuv nyag lug xwb.”
34Lanpaas teb tas, “Kuv pumzoo yuav le kws koj has.” 35Tabsis nub ntawd Lanpaas muab cov laug tshis kws txaij lossis txaij tej teev hab cov maum tshis kws txaij lossis txaij ua tej teev lossis dlawb tej teev cais, hab nwg muab taagnrho cov yaaj dlub cais tawm rua ib qho. Nwg tso nwg cov tub ua cov saib tej tsaj ntawd, 36hab muab cais moog nyob nrug dleb peb nub ke ntawm Lanpaas cov tsaj kws tseg ca rua Yakhauj tu.
37Yakhauj txawm muab tej ceg ntoo nyoog kws yog ceg cev, ceg txiv ovmees, hab ceg seb laws tawv txaij ua tej kaab kuas pum tug txhaa ceg ntoo dlawbpaug. 38Nwg txhaj muab cov ceg ntoo ntawd coj moog tso rua ntawm lub dlaab dlej kws cov tsaj lug haus dlej. Nwg coj cov ceg ntoo moog tso rua ntawd, ruaqhov cov tsaj txeev sisphuv thaus puab lug haus dlej uake. 39Yogle ntawd, thaus cov tshis lug sisphuv rua ntawm cov ceg ntoo ntawd, cov tshis txawm yug tau cov mivnyuas txaij ua tej kaab hab txaij ua tej teev.
40Yakhauj txawm muab cov mivnyuas yaaj cais tawm ntawm cov tshis hab muab puab tso tig taubhau rua tom Lanpaas cov tsaj kws txaij hab dlub. Qhov kws nwg ua le nuav, tub yog nwg faib kuas nwg muaj nwg ib paab tsaj ua nwg tug hab muab cais tawm ntawm Lanpaas cov moog rua ib qho.
41Thaus cov tsaj kws zoo hab khovkho yuav sisphuv, Yakhauj txawm muab cov ceg ntoo ntawd coj moog tso uantej rua ntawm cov tsaj nyob ntawm cov dlaab haus dlej, kuas cov tsaj lug sisphuv nyob ntawm cov ceg ntoo ntawd. 42Tabsis nwg tsi muab cov ceg ntoo ntawd tso uantej rua ntawm cov dlaab dlej thaus cov tsaj kws tsi khov lug haus dlej. Txij ntawd lug Lanpaas txhaj tau cov tsaj kws tsi khov, tabsis Yakhauj tau tuab cov tsaj kws khovkho xwb. 43Tub yog vim ua le nuav Yakhauj txhaj npluanuj. Nwg muaj tsajtxhu, tubqhe, ntxhuav hab neegluav coob heev.
Currently Selected:
Chivkeeb 30: HNJ2022
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.
Chivkeeb 30
30
1Thaus Laxees pum tas nwg tsi muaj ib tug mivnyuas rua Yakhauj le, nwg txawm khib nwg tug taislaug heev, nwg txhaj has rua Yakhauj has tas, “Koj yuav muab mivnyuas rua kuv lossis koj yuav ca kuas kuv tuag.”
2Yakhauj chim heev rua Laxees, nwg txhaj teb Laxees has tas, “Kuv yog Vaajtswv lov? Vaajtswv yog tug kws tsi pub koj muaj taug mivnyuas los sav!”
3Laxees has tas, “Kuv tug ntxhais qhev Npilehas nyob ntawm nuav, koj cale moog nrug nwg pw kuas nwg muaj mivnyuas rua kuv. Ua le nuav kuv txhaj yuav tau ua ib leejnam lug ntawm kuv tug ntxhais qhev ntawd.” 4Yogle ntawd, Laxees txhaj muab Npilehas rua nwg tug quasyawg yuav ua namyau, tes Yakhauj txhaj moog nrug nwg pw. 5Npilehas txawm xeebtub hab yug tau ib tug tub rua Yakhauj.
6Laxees has tas, “Vaajtswv tau txavtxim pumzoo tuaj kuv tog. Nwg nov kuv tej lug thov hab pub rua kuv muaj ib tug tub lawm”; yogle ntawd, nwg txhaj tis tug tub ntawd lub npe hu ua Daas.#30:6: Daas: Lub npe nuav has muaj ntsiv thooj le lulug Henplais kws has tas “txavtxim lawvle lub sab nyam.” 7Npilehas rov xeebtub hab yug tau tug tub thib ob rua Yakhauj. 8Laxees has tas, “Kuv tau tawmtsaam kuv tug taislaug nyaav heev, kuv txhaj yog tug muajyeej”; yogle ntawd, nwg txhaj tis tug tub ntawd npe hu ua Nathalis.#30:8: Nathalis: Lub npe nuav has muaj ntsiv thooj le lulug Henplais kws has tas “sis tawmtsaam”.
9Thaus Le-as paub tas nwg tsi muaj mivnyuas ntxiv lawm, nwg txawm muab nwg tug ntxhais qhev Xilepas rua Yakhauj ua namyau. 10Tes Xilepas txawm yug tau ib tug tub rua Yakhauj. 11Le-as has tas, “Kuv moov zoo kawg”; yogle ntawd, nwg txhaj tis tug tub ntawd lub npe hu ua Nkaj.#30:11: Nkaj: Lub npe nuav lug Henplais txhais has tas, “moov zoo kawg.” 12Xilepas rov yug tau ib tug tub rua Yakhauj, 13hab Le-as has tas, “Kuv zoosab kawg nkaus le lau! Zagnua tej quaspuj yuav hu kuv has tas, tug zoosab”; yogle ntawd, nwg txhaj tis tug tub ntawd lub npe hu ua Asaws.#30:13: Asaws: Lub npe nuav lug Henplais txhais has tas, “zoosab.”
14Thaus txug caij hlais nplej Lunpees moog yos uasi tom teb hab nwg pum ib cov zaub ntug hauvpaug,#30:14: Cov zaub ntug hauvpaug: Txheej laug thaus u ntseeg tas noj mas ua rua tug quaspuj muaj taug mivnyuas. nwg txawm rhu tau ib cov nqaa lug rua nwg nam Le-as. Laxees has rua Le-as has tas, “Thov muab koj tug tub cov zaub ntug hauvpaug ob-peb lub pub rua kuv hab.”
15Le-as teb tas, “Koj tub txeeb kuv tug quasyawg moog lawm, tseem tsi tau txaus koj sab hab lov? Zagnua koj tseem yuav tuaj txeeb kuv tug tub cov zaub ntug hauvpaug hab lov?”
Laxees teb tas, “Yog koj muab koj tug tub cov zaub ntug hauvpaug ob-peb lub rua kuv, mo nuav kuv yuav kuas Yakhauj lug nrug koj pw.”
16Thaus yuav tsausntuj Yakhauj rov tom teb lug, Le-as txawm moog tog Yakhauj hab has tas, “Mo nuav koj yuavtsum moog nrug kuv pw, ruaqhov kuv tub muab kuv tug tub cov zaub ntug hauvpaug ndlav koj lawm.” Yogle ntawd, mo ntawd Yakhauj txhaj moog nrug Le-as pw.
17Vaajtswv teb Le-as tej lug thov, nwg txhaj rov xeebtub hab yug tau ib tug tub rua Yakhauj yog tug thib tsib. 18Le-as has tas, “Vaajtswv muab nqezug rua kuv, ruaqhov kuv muab kuv tug ntxhais qhev rua kuv tug quasyawg yuav”; yogle ntawd, nwg txhaj tis tug tub ntawd lub npe hu ua Ixakhas.#30:18: Ixakhas: Lub npe nuav has muaj ntsiv thooj le lulug Henplais kws has tas “tug tuabneeg raug ndlav” hab “nqezug.”
19Le-as rov xeebtub hab yug tau ib tug tub rua Yakhauj yog tug thib rau. 20Le-as has tas, “Vaajtswv muab tau ib qhov khoomplig rua kuv zoo kawg nkaus le. Zagnua kuv tug quasyawg yuav saib taug kuv, ruaqhov kuv tub yug tau rau tug tub rua nwg lawm”; yogle ntawd, nwg txhaj tis tug tub ntawd lub npe hu ua Xenpuloos.#30:20: Xenpuloos: Lub npe nuav has muaj ntsiv thooj le lulug Henplais kws has tas “saib taug” hab “khoomplig.” 21Tomqaab ntawd nwg yug tau ib tug ntxhais, hab nwg tis npe rua tug ntxhais ntawd hu ua Dinas.
22Vaajtswv kuj tseem ncuntsoov txug Laxees; Nwg txhaj teb Laxees tej lug thov hab ua rua Laxees muaj taug mivnyuas. 23Laxees txhaj xeebtub hab yug tau ib tug tub. Nwg has tas “Vaajtswv muab kuv txuj kev txaajmuag rhu tawm moog lawm. 24Thov kuas tug TSWV pub rua kuv rov muaj dlua ib tug tub ntxiv hab”; yogle ntawd, nwg txhaj tis tug tub ntawd lub npe hu ua Yauxej.#30:24: Yauxej: Lub npe nuav has muaj ntsiv thooj le lulug Henplais kws has tas “thov kuas nwg pub ib tug ntxiv” hab “nwg muab rhu tawm moog lawm.”
Yakhauj Thov Ncaim Lanpaas
25Tomqaab kws Laxees yug tau Yauxej lawm, Yakhauj txawm has rua Lanpaas has tas, “Thov koj tso kuv rovqaab moog rua kuv lub vaaj lub tsev hab lub tebchaws. 26Thov muab kuv ob tug quaspuj hab kuv cov mivnyuas kws kuv ua zug tau ntawm koj rua kuv, es kuv yuav moog. Koj yeej paub tas kuv ua dlejnum zoo npaum lecaag rua koj lawm.”
27Lanpaas teb rua Yakhauj has tas, “Ca kuv has le nuav: Kuv paub lug ntawm kev tshawb saib mas pum tas qhov kws kuv npluanuj tub yog vim muaj koj, es tug TSWV txhaj foom koobmoov rua kuv. 28Xaam taagnrho koj tej nqezug seb raug pistsawg es kuv yuav them rua koj.”
29Yakhauj teb tas, “Kuv tau ua num zoo npaum lecaag rua koj hab koj tej tsaj kws kuv tu fuamvaam npaum lecaag los koj yeej paub zoo lawm. 30Uantej thaus kuv tsi tau lug koj muaj tsaj tsawg heev, nwgnuav koj tej tsaj kuj fuamvaam coob kawg le lawm. Kuv moog txug twg,#30:30: Kuv moog txug twg; lossis Vim muaj kuv. tug TSWV yeej foom koobmoov rua koj huv tuabsi. Zagnua txug caij lawm kws kuv yuavtsum tig lug yug kuv lub cuab lub yig.”
31Lanpaas txhaj nug has tas, “Kuv yuav them koj lecaag?”
Yakhauj teb tas, “Kuv tsi yuav ib yaam dlaabtsi le. Kuv yuav nyob tu koj cov tsaj moog ntxiv, yog tas koj kaam ua le nuav: 32Nubnua ca kuv moog ncig saib thoobplawg koj cov tsaj hab muab txhua tug mivnyuas yaaj dlub#30:32: Ib phoo ntawv qub-qub thaus u sau has tas txhua tug mivnyuas yaaj dlub; phoo lug Henplais has tas txhua tug yaaj txaij hab ua tej teev, hab txhua tug yaaj dlub. hab tej mivnyuas tshis kws txaij lossis txaij tej teev xaiv ca rua ib qho. Cov nuav lau, yog cov kws ua nqezug rua kuv. 33Lwmnub koj txhaj paub tas kuv ncaajnceeg los tsi ncaaj. Thaus kws koj tuaj tshuaj saib kuv tej nqezug, yog kuv tseem muaj tej tug mivnyuas tshis kws tsi txaij lossis tsi txaij tej teev lossis muaj ib tug mivnyuas yaaj tsi dlub le, tes koj yuav paub tas cov ntawd yog kuv nyag lug xwb.”
34Lanpaas teb tas, “Kuv pumzoo yuav le kws koj has.” 35Tabsis nub ntawd Lanpaas muab cov laug tshis kws txaij lossis txaij tej teev hab cov maum tshis kws txaij lossis txaij ua tej teev lossis dlawb tej teev cais, hab nwg muab taagnrho cov yaaj dlub cais tawm rua ib qho. Nwg tso nwg cov tub ua cov saib tej tsaj ntawd, 36hab muab cais moog nyob nrug dleb peb nub ke ntawm Lanpaas cov tsaj kws tseg ca rua Yakhauj tu.
37Yakhauj txawm muab tej ceg ntoo nyoog kws yog ceg cev, ceg txiv ovmees, hab ceg seb laws tawv txaij ua tej kaab kuas pum tug txhaa ceg ntoo dlawbpaug. 38Nwg txhaj muab cov ceg ntoo ntawd coj moog tso rua ntawm lub dlaab dlej kws cov tsaj lug haus dlej. Nwg coj cov ceg ntoo moog tso rua ntawd, ruaqhov cov tsaj txeev sisphuv thaus puab lug haus dlej uake. 39Yogle ntawd, thaus cov tshis lug sisphuv rua ntawm cov ceg ntoo ntawd, cov tshis txawm yug tau cov mivnyuas txaij ua tej kaab hab txaij ua tej teev.
40Yakhauj txawm muab cov mivnyuas yaaj cais tawm ntawm cov tshis hab muab puab tso tig taubhau rua tom Lanpaas cov tsaj kws txaij hab dlub. Qhov kws nwg ua le nuav, tub yog nwg faib kuas nwg muaj nwg ib paab tsaj ua nwg tug hab muab cais tawm ntawm Lanpaas cov moog rua ib qho.
41Thaus cov tsaj kws zoo hab khovkho yuav sisphuv, Yakhauj txawm muab cov ceg ntoo ntawd coj moog tso uantej rua ntawm cov tsaj nyob ntawm cov dlaab haus dlej, kuas cov tsaj lug sisphuv nyob ntawm cov ceg ntoo ntawd. 42Tabsis nwg tsi muab cov ceg ntoo ntawd tso uantej rua ntawm cov dlaab dlej thaus cov tsaj kws tsi khov lug haus dlej. Txij ntawd lug Lanpaas txhaj tau cov tsaj kws tsi khov, tabsis Yakhauj tau tuab cov tsaj kws khovkho xwb. 43Tub yog vim ua le nuav Yakhauj txhaj npluanuj. Nwg muaj tsajtxhu, tubqhe, ntxhuav hab neegluav coob heev.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2022 United Bible Societies. All rights reserved.