Yauhaas 11

Laxalus Tuag

1Muaj ib tug txivneej hu ua Laxalus nyob huv lub zog Npethanis, nwg mob heev. Npethanis yog lub zog kws Malis hab nwg tug nam laug Mathas nyob.#Luk 10.38-39 2(Tug Malis nuav yog tug kws muab tshuaj tsw qaab laub rua Yexus kutaw hab nwg muab nwg cov plaubhau so; tug Laxalus kws mob heev ntawd yog Malis tug nug.) #Yhs 12.3 3Laxalus ob tug muam khaiv tuabneeg moog has rua Yexus has tas, “Tug Tswv, koj tug phoojywg kws koj hlub mob heev.”

4Thaus Yexus nov le ntawd, nwg has tas, “Laxalus tug mob nuav yuav tsi ua rua Laxalus tuag; tabsis Laxalus tug mob yuav ua rua Vaajtswv tau koob meej, hab yuav ua rua Vaajtswv tug Tub tau koob meej.”

5Yexus hlub Mathas hab Mathas tug nam hluas hab Laxalus heev. 6Thaus kws Yexus nov has tas Laxalus mob heev ntawd, nwg tseem nyob ntawm qhov chaw ntawd tau ob nub ntxiv. 7Ces Yexus has rua nwg cov thwjtim has tas, “Peb ca le rov qaab moog rua nraag lub xeev Yudas.”

8Cov thwjtim teb has tas, “Xwbfwb, nyavnyuas tsi ntev nuav cov tuabneeg kws nyob nraag tub yuav muab pobzeb ntaus koj; koj tseem yuav rov qaab moog nraag dlua hab los?”

9Yexus has tas, “Ib nub muaj kaum ob txoog teev puas yog? Yog le ntawd, tug kws taug kev nruab nub yuav tsi dlawm, rua qhov nwg pum qhov kaaj kws ci rua lub nplajteb. 10Tabsis yog nwg taug kev mo ntuj, nwg yuav dlawm, rua qhov nwg tsi muaj qhov kaaj.” 11Tom qaab kws Yexus has le nuav taag lawm, nwg rov has tas, “Peb tug phoojywg Laxalus tub tsaug zug lawm, tabsis kuv yuav moog tsaa nwg sawv.”

12Cov thwjtim teb has tas, “Tug Tswv, yog nwg tsaug taug zug lawm, nwg tug mob yeej yuav zoo.”

13Yexus has le ntawd, yog has tas Laxalus tub tuag lawm, tabsis cov thwjtim xaav has tas, Yexus has txug qhov kws Laxalus tsaug zug xwb. 14Yog le ntawd, Yexus txawm qha tseeb rua puab has tas, “Laxalus tub tuag lawm, 15tabsis kuv zoo sab kws muaj mej, kuv txhaj tsi nrug nwg nyob ntawd, kuv ua le nuav kuas mej ntseeg kuv. Peb ca le moog saib nwg.”

16Thaumas (kws hu ua Ntxaib) txhaj has rua cov phoojywg thwjtim has tas, “Peb ca le nrug Xwbfwb moog, peb txhaj yuav tau nrug nwg tuag ua ke.”

Yexus Yog tug Saw huv Qhov Tuag Rov Lug hab Yog Txujsa

17Thaus Yexus moog txug huv Npethanis, Yexus nov has tas puab tub muab Laxalus log tau plaub nub lawm. 18Lub zog Npethanis nyob nrug dleb ntawm lub nroog Yeluxalees moog kwvlaam le peb kilumev kev. 19Cov Yudais muaj coob leej tuaj nplig Mathas hab Malis obtug sab, rua qhov obtug tug nug tuag lawm.

20Thaus Mathas nov has tas Yexus taabtom taug kev tuaj, Mathas txawm moog tog Yexus, tabsis Malis nyob huv tsev. 21Mathas has rua Yexus has tas, “Tug Tswv, yog koj nrug peb nyob ntawm nuav, kuv tug nug yuav tsi tuag! 22Tabsis kuv paub has tas, txawm yog nwgnuav koj thov Vaajtswv ib yaam dlaabtsi, Vaajtswv yeej yuav muab yaam ntawd rua koj.”

23Yexus has rua Mathas has tas, “Koj tug nug yeej yuav sawv rov qaab lug.”

24Mathas teb has tas, “Kuv paub has tas, thaus txug nub kawg nwg yeej yuav sawv rov qaab lug tag.”

25Yexus has rua Mathas has tas, “Kuv yog tug sawv huv qhov tuag rov qaab lug hab yog txujsa. Tug kws ntseeg kuv, txawm yog nwg tuag lawm los nwg yeej yuav muaj txujsa; 26tug kws muaj sa nyob hab ntseeg kuv, tug ntawd yuav tsi tuag ib zag le. Koj puas ntseeg kuv tej lug nuav?”

27Mathas teb has tas, “Yog tag, tug Tswv! Kuv ntseeg has tas koj yog tug Mexiyas kws yog Vaajtswv tug Tub kws lug rua huv nplajteb nuav.”

Yexus Quaj

28Tom qaab kws Mathas has le nuav taag, Mathas txawm rov lug hab has tuabywv rua nwg tug nam hluas Malis has tas, “Xwbfwb tuaj lawm, nwg nug nug koj.” 29Thaus Malis nov dlheev le ntawd, Malis txawm sawv tseeg hab tawm ceev nrooj moog cuag Yexus. 30(Yexus tsi tau tuaj txug huv zog, nwg tseem nyob ntawm qhov chaw kws Mathas moog tog nwg.) 31Cov Yudais kws tuaj nplig Malis huv Malis tsev pum Malis sawv tseeg tawm ceev nrooj moog lawm, puab txawm lawv nwg qaab moog. Puab xaav has tas nwg yuav moog quaj tom lub ntxaa.

32Thaus Malis moog txug ntawm qhov chaw kws Yexus nyob, nwg pum dlheev Yexus, nwg txawm txhus caug ndlua rua ntawm Yexus kutaw. Nwg has tas, “Tug Tswv, yog koj nrug peb nyob ntawm nuav, kuv tug nug yuav tsi tuag.”

33Thaus Yexus pum Malis, hab cov Yudais kws nrug Malis tuaj ntawd quaj quaj; Yexus hlub puab hab nyuaj sab kawg le. 34Yexus txhaj nug puab has tas, “Mej coj Laxalus moog log rua qhov twg lawm?”

Puab teb has tas, “Tug Tswv, koj ca le moog saib.”

35Yexus txawm quaj. 36Yog le ntawd, cov Yudais has tas, “Mej saib, Yexus hlub Laxalus kawg le.”

37Tabsis puab cov ntawd muaj qee leej has tas, “Nwg tub khu tau tug txivneej kws dligmuag kuas pum kev, nwg ua tsi tau kuas Laxalus tsi xob tuag los?”

Yexus Tsaa Laxalus Sawv Rov Muaj Sa

38Yexus rov nyuaj sab kawg le, Yexus moog rua tom lub qhov ntxaa kws luas txaug rua ntawm ib phaab pobzeb hab muaj ib dlaim txag zeb npug lub rooj ntxaas. 39Yexus has tas, “Mej ca le muab dlaim txag zeb tshem tawm.”

Mathas kws yog tug tuag ntawd tug muam teb has tas, “Tug Tswv, peb tub muab nwg log tau plaub nub lawm, ntshai nwg tub tsw tsw lwj lawm.”

40Yexus has rua Mathas has tas, “Kuv puas tau has rua koj tas, yog koj ntseeg koj yeej yuav pum Vaajtswv lub fwjchim xwb nua?” 41Yog le ntawd, puab txhaj muab dlaim txag zeb tshem tawm. Yexus txawm tsaa qhovmuag saib sau ntuj hab has tas, “Txiv, kuv ua koj tsaug kws koj noog kuv tej lug thov. 42Kuv paub has tas koj yeej ibtxwm noog kuv tej lug thov, kuv has le nuav, kuas cov tuabneeg kws nyob ntawm nuav, ntseeg has tas koj yog tug kws khaiv kuv lug.” 43Thaus Yexus has le ntawd taag, nwg txawm hu nrov nrov has tas, “Laxalus, koj ca le tawm lug!” 44Laxalus txawm tawm lug, tej ntaub tseem qhwv nwg teg taw, hab muaj ib dlaim ntaub npug nwg lub ntsejmuag. Yexus has rua puab tas, “Mej ca le dlaws tej ntaub kws qhwv nwg ntawd hab ca nwg moog.”

Cov Yudais Tuavhuv Muab Yexus Tua Povtseg

(Mathais 26.1-5; Malakaus 14.1-2; Lukas 22.1-2)

45Thaus cov Yudais kws tuaj saib Malis pum tej kws Yexus ua ntawd, muaj ntau leej ntseeg Yexus. 46Tabsis muaj qee leej rov moog cuag cov Falixais hab qha tej kws Yexus ua ntawd rua puab. 47Cov Falixais hab cov thawj ntawm cov povthawj moog saablaaj rua cov numtswv has tas, “Peb yuav ua le caag rua tug txivneej kws ua ntau yaam txujci tseemceeb nuav? 48Yog peb ca nwg ua le nuav, nyob tsaam cov pejxeem yuav ntseeg nwg taag, hab cov numtswv Loos yuav tuaj muab lub Tuamtsev lauj povtseg hab muab peb tsaav tuabneeg ua kuas puamtsuaj taag.”

49Puab cov ntawd muaj ib tug hu ua Kaiyafas, xyoo ntawd nwg ua tug Povthawj Hlub, nwg has tas, “Ua le caag mej yuav ruag ua luaj le! 50Mej tsi paub has tas ca ib tug tuag theej suavdlawg, zoo dlua le kws ca taagnrho peb tsaav tuabneeg raug kev puamtsuaj huv tuabsi nua los?” 51Qhov tseeb, tej lug kws nwg has ntawd tsi yog nwg laam has; nwg has le ntawd, rua qhov xyoo ntawd nwg ua tug Povthawj Hlub, yog nwg qha ua ntej has tas Yexus yuav tuag theej cov Yudais lub txhoj, 52hab tsi yog rua puab xwb, tabsis nwg yuav coj taagnrho Vaajtswv cov mivnyuas kws tsiv moog nyob txhua qhov lawm, rov lug nyob ua ke dlua.

53Txij nub ntawd lug cov Yudais tej numtswv txawm tuavhuv yuav muab Yexus tua povtseg. 54Yog le ntawd, Yexus txhaj tsi taabmeeg moog moog lug lug huv lub xeev Yudas lawm, tabsis nwg moog rua tom ib lub nroog hu ua Efalayees kws nyob ze taj suabpuam, nwg nrug nwg cov thwjtim nyob ntawd.

55Thaus ntawd tub yuav txug lub caij kws cov Yudais ua Kevcai Hlaa Dlhau, muaj tuabneeg coob coob tuaj peg tej yaajsaab tuaj rua huv lub nroog Yeluxalees, puab yuav xub tuaj ua kevcai ntxuav ua ntej tsaiv maam le ua Kevcai Hlaa Dlhau. 56Thaus puab tuaj ua ke rua huv lub Tuamtsev, puab xaam saib puas pum Yexus, puab sis nug has tas, “Mej xaav le caag? Nwg puas tuaj ua kevcai ntawm nuav los tsi tuaj?” 57Cov thawj ntawm cov povthawj hab cov Falixais tub has rua suavdlawg lawm has tas, yog leejtwg paub has tas Yexus nyob qhov twg, ca le moog qha rua puab, puab yuav moog nteg Yexus.

Currently Selected:

Yauhaas 11: HNJ2000

Highlight

Copy