Lukas 23

Philaj Taug Yexus Zaaj

(Mathais 27:1-2, 11-14; Malakaus 15:1-5; Yauhaas 18:28-38)

1Taagnrho cov tuabneeg kws tuaj saablaaj ntawd txawm sawv hab coj Yexus moog cuag Philaj. 2Puab komtxim rua Yexus has tas, “Peb nteg tau tug txivneej nuav thaus nwg taabtom ntxag kuas peb tsaav tuabneeg yuamkev. Nwg txwv tsi pub puab them se rua Xixas hab Nwg khaav has tas Nwg yog tug Mexiyas kws yog vaajntxwv.”

3Philaj nug Yexus has tas, “Koj puas yog cov Yudais tug vaajntxwv?”

Yexus teb tas, “Yog le koj has.”

4Tes Philaj has rua cov thawj povthawj hlub hab cov tuabneeg coob-coob ntawd has tas, “Kuv tsi pum tug Txivneej nuav muaj ib yaam dlaabtsi kws yuav txaus muab Nwg teemtxim le.”

5Tabsis puab yimfuab has tawv-tawv tas, “Nwg tej lug qha ua rua suavdlawg muaj kev kubntxhuv thoob lub xeev Yudas. Nwg pib qha peg Kalilais hab zagnua tub tuaj txug rua huv nuav lawm.”

Helauj Taug Yexus Zaaj

6Thaus Philaj nov puab has le ntawd, nwg nug puab seb tug txivneej ntawd puas yog tuabneeg Kalilais. 7Thaus Philaj paub tas Yexus tuaj peg cheebtsaam kws Helauj kaav tuaj, tes nwg txawm xaa Yexus moog cuag Helauj, ruaqhov lub sijhawm ntawd Helauj kuj taabtom nyob rua huv lub nroog Yeluxalees hab.

8Thaus Helauj pum Yexus, nwg zoosab kawg le, ruaqhov nwg yeej xaav pum Yexus lug ntev lawm. Lug ntawm qhov kws nwg tau nov txug Yexus lub moo, nwg xaav pum Yexus ua qeeyaam txujci tseemceeb. 9Helauj nug Yexus ntau yaam, tabsis Yexus tsi teb le. 10Cov thawj povthawj hlub hab cov xwbfwb kws qha Kevcai txawm txaav zog moog rua peg hauvntej kom Yexus nyaav kawg le. 11Helauj hab nwg cov tubrog thuam Yexus hab ua saib tsi taug Nwg; puab txawm muab ib lub tsho ntev kws zoonkauj heev rua Nwg naav hab xaa Nwg rovqaab moog rua Philaj. 12Txij nub ntawd lug tes Helauj hab Philaj txawm rov ua phoojywg lawm; yaav taag lug obtug yog yeebncuab.

Txavtxim Muab Yexus Tua

(Mathais 27:15-26; Malakaus 15:6-15; Yauhaas 18:39—19:16)

13Philaj hu cov thawj povthawj hlub, cov thawjcoj hab cov pejxeem tuaj, 14hab has rua puab tas, “Mej coj tug txivneej nuav tuaj rua kuv hab has tas Nwg ntxag kuas cov pejxeem yuamkev. Zagnua kuv tub taug Nwg zaaj taabmeeg mej suavdlawg lawm, hab kuv tsi pum tas Nwg tau ua ib qhov txhum lawvle tej kws mej kom Nwg ntawd. 15Helauj los kuj tsi pum Nwg muaj ib qhov txhum le hab, Helauj txhaj xaa Nwg rov lug rua peb. Tug txivneej nuav yeej tsi tau ua ib qhov txhum kws tsimnyog tuag le. 16Yogle ntawd, kuv yuav kuas luas muab Nwg nplawm hab tso Nwg moog.” 17#23:17: Tej phoo qub muaj nqai 17 nuav ntxiv rua: Lawvle ibtxwm, txhua zag kws ua kevcai Hlaa Dlhau, Philaj yuavtsum tso ib tug tuabneeg raug txim lawvle cov pejxeem thov (saib Malak 15:6).

18Cov tuabneeg coob-coob ntawd qw ibtsaug nrov-nrov has tas, “Muab Nwg tua povtseg! Tso Npalanpas lug rua peb!” ( 19Tug Npalanpas nuav raug kaw rua huv tsev lojcuj vim kev ntxeev numtswv huv nroog hab kev tua tuabneeg.)

20Philaj xaav tso Yexus, nwg txhaj rov has rua cov tuabneeg coob-coob ntawd ib zag ntxiv. 21Tabsis puab yimfuab qw nrov has tas, “Muab Nwg ntsa rua sau ntoo khaublig! Muab Nwg ntsa rua sau ntoo khaublig!”

22Philaj rov has rua puab ua zag thib peb has tas, “Vim lecaag? Nwg tau ua txhum dlaabtsi? Kuv tsi pum Nwg tau ua ib qhov txhum kws tsimnyog tuag le! Yogle ntawd, kuv yuav kuas luas muab Nwg nplawm hab tso Nwg moog.”

23Tabsis cov tuabneeg coob-coob ntawd taag zug qw nrov-nrov kuas Philaj muab Yexus ntsa rua sau ntoo khaublig. Thaus kawg puab lub suab qw ntawd tau kovyeej Philaj. 24Yogle ntawd, Philaj txhaj txavtxim rua Yexus lawvle puab thov. 25Hab Philaj tau tso tug tuabneeg kws puab thov rua puab, tug kws raug kaw rua huv tsev lojcuj vim kev ntxeev numtswv hab kev tua tuabneeg. Tes Philaj txawm muab Yexus cob rua puab lawvle puab sab nyam.

Yexus Raug Ntsa Rua Sau Ntoo Khaublig

(Mathais 27:32-44; Malakaus 15:21-32; Yauhaas 19:17-27)

26Thaus cov tubrog taabtom coj Yexus tawm moog, puab txawm ntsib ib tug txivneej hu ua Ximoos kws yog tuabneeg Kulenes kws taabtom tuaj peg yaajsaab tuaj. Puab cale muab nwg nteg hab kuas nwg kwv tug ntoo khaublig lawv Yexus qaab moog.

27Muaj tuabneeg coob-coob lawv Yexus qaab; nyob rua huv cov tuabneeg ntawd muaj ib cov quaspuj tau tsaa suab hlo quaj nrov-nrov rua Yexus. 28Yexus tig moog saib puab hab has tas, “Cov quaspuj kws nyob huv Yeluxalees 'e, mej tsi xob quaj taabncuab Kuv, tabsis cale quaj taabncuab mej hab mej tej mivnyuas. 29Ruaqhov yuav muaj ib nub kws tuabneeg yuav has tas, ‘Cov quaspuj kws ibtxwm xeeb tsi taug mivnyuas, cov quaspuj kws tsi tau xeeb dlua mivnyuas hab tsi tau pub dlua mig rua mivnyuas noj le, yog cov kws muaj kev kaajsab tshaaj!’ 30Lub sijhawm ntawd, yuav muaj tuabneeg has rua tej roob sab has tas, ‘Cale nphau lug tsuam peb!’ Hab yuav has rua tej povroob has tas, ‘Cale pob lug txhub peb!’ #Hauxe 10:8; Tshwm 6:16 31Yog puab tub ua le nuav rua tsob ntoo kws tseem nyoog, thaus tsob ntoo qhuav lawm puab ho yuav ua lecaag rua?”

32Puab kuj coj ob tug txivneej kws yog tuabneeg muaj txim, moog tua uake nrug Yexus hab. 33Thaus puab moog txug ntawm qhov chaw kws hu ua “Pobtxhaa Taubhau,” puab txawm muab Yexus ntsa rua sau ntoo khaublig nrug rua obtug tubsaab, ib tug nyob ntawm Nwg saab xis hab ib tug nyob ntawm Nwg saab txhumphem. 34Yexus has tas, “Txiv, thov Koj zaamtxim rua puab, ruaqhov puab tsi paub tas puab ua dlaabtsi.”#23:34: Tej phoo ntawv qub kws xuas teg sau, tsi muaj Yexus has tas, “Txiv, thov Koj zaamtxim rua puab, ruaqhov puab tsi paub tas puab ua dlaabtsi.” #Nnkauj 22:18

Puab muab Yexus cev rigtsho lug twv seb leejtwg yuav tau yaam twg. 35Tej tuabneeg suavdlawg sawv ibcaag saib, tabsis cov Yudais cov thawjcoj thuam Yexus has tas, “Nwg tub cawm tau lwmtug; yog tas Nwg yog tug Mexiyas kws Vaajtswv xaiv tag, Nwg kuj cawm Nwg tugkheej!” #Nnkauj 22:7

36Cov tubrog los kuj thuam Yexus hab, puab muab cawv txivmaab qaub lug cev rua Yexus haus, #Nnkauj 69:21 37hab has tas, “Yog Koj yog cov Yudais tug vaajntxwv tag, cale cawm Koj tugkheej los mas!”

38Puab sau ib cov lug kws muab ntsa ncaaj ntawm Nwg taubhau rua sau has tas, “Tug nuav yog cov Yudais tug Vaajntxwv.”

39Ib tug tubsaab kws raug ntsa rua sau ntoo khaublig txawm txobthuam Yexus has tas, “Koj tsi yog tug Mexiyas lov? Cale cawm Koj tugkheej hab cawm wb kuas dlim los mas!”

40Tabsis tug tuabneeg muaj txim kws nyob saab tod txawm tshev has tas, “Koj tsi ntshai Vaajtswv lov? Koj raug txim tuabyaam nkaus le Nwg hab. 41Wb raug txim le nuav yeej tsimnyog lawm, vim tej kev txhum kws wb tau ua lug; tabsis tug txivneej nuav tsi tau ua dlaabtsi txhum le.” 42Nwg txawm has rua Yexus has tas, “Yexus 'e, thaus Koj rov lug rua huv Koj lub tebchaws, thov Koj ncu txug kuv hab.”

43Yexus has rua nwg has tas, “Kuv qha tseeb rua koj has tas nubnua koj yuav tau nrug Kuv nyob huv qhov chaw kws tau zoo kaajsab lug.”

Yexus Txuj Kev Tuag

(Mathais 27:45-56; Malakaus 15:33-41; Yauhaas 19:28-30)

44-45Thaus taavsu, lub nub cale tsi ci lawm, ua rua thoobplawg lub tebchaws txawm cale tsausntuj nti moog txug rua thaus peb teev nubqaij. Dlaim ntaub kws dlai huv lub Tuamtsev txawm ndluag rhe ua ob dlaig. #Tsiv 26:31-33 46Yexus hu nrov-nrov has tas, “Txiv 'e, Kuv muab Kuv tug ntsujplig tso rua huv Koj txhais teg!” Nwg has le ntawd taagnrho xwb tes Nwg txawm tusav nrho lawm. #Nnkauj 31:5

47Thaus tug thawj tubrog pum le ntawd, nwg qhuas Vaajtswv has tas, “Tseeb tag lau, tug nuav yeej yog ib tug tuabneeg zoo!”

48Thaus cov tuabneeg kws tuaj nyob uake saib tej xwmtxheej ntawd tau pum tej ntawd lawm, puab txawm rovqaab moog tsev hab ntaus hauvsab pigpoog. 49Tabsis taagnrho cov tuabneeg kws yeej ibtxwm paub Yexus, nrug rua cov quaspuj kws nrug Yexus tuaj peg lub xeev Kalilais tuaj, puab sawv dleb-dleb saibntsoov tej nuav. #Lukas 8:2-3

Log Yexus

(Mathais 27:57-61; Malakaus 15:42-47; Yauhaas 19:38-42)

50-51Muaj ib tug txivneej hu ua Yauxej tuaj peg lub zog Alimathias huv lub xeev Yudas tuaj. Nwg yog ib tug tuabneeg zoo kws suavdlawg fwm, hab yog ib tug kws togntsoov Vaajtswv lub Tebchaws yuav lug. Txawm nwg yog ib tug thawjcoj huv lub Koomhum qebsab, los thaus puab saablaaj yuav txavtxim rua Yexus, nwg yeej tsi pumzoo tej kws puab ua ntawd. 52Nwg moog cuag Philaj hab thov Philaj muab Yexus lub cev rua nwg. 53Tes nwg txhaj muab Yexus lub cev txu, muab ib chaws ntaub maag qhwv hab muab tso rua huv ib lub qhovntxaa kws tub yeej txaug tau rua huv ib phaab pobzeb, kws yeej tsi tau muaj leejtwg coj tej tuag moog tso rua huv le. 54Nub ntawd yog Nub Npaaj, vim tub yuav txug nub Xanpataus.

55Cov quaspuj kws nrug Yexus tuaj peg Kalilais tuaj, kuj nrug Yauxej moog hab puab pum lub qhovntxaa hab pum tas luas muab Yexus lub cev tso lecaag huv tuabsi. 56Puab rov moog tsev hab moog npaaj tej tshuaj tswqaab hab tej roj tswqaab kws yuav nqaa moog pleev Yexus lub cev. #Tsiv 20:10; 2Kev 5:14

Nub Xanpataus puab su lawvle Kevcai tau xaaj tseg lawm.

Currently Selected:

Lukas 23: HNJ2022

Highlight

Copy