Luuk 10

Yesu ka shuŋi bebɛsopo adushunu nɛ anyɔ na be asheŋ

1Ade be kaman nɛ Enyɛnpe lara basa adushunu nɛ anyɔ ko malɛ n shuŋi bumo benyɔnyɔ fanɛ b juŋkpar mo n yɔ kade kama nɛ kaplɛkama nɛ e daa shin nɛ e yɔ to. 2Le nɛ e daŋ kaŋɛ bumo: “Kasɔteŋi na shi ga, ama beteŋipo nɛ baaŋ chala loŋ be asɔ na maŋ shi. Amoso, men kule Kasɔteŋiwura na nɛ e shuŋi beshumpo ko n ti so nɛ b chala mbe asɔ na. 3To, men baa yɔ. Kashenteŋto, mee shuŋi menyi nna nɛ menyi nɛ durnya ere to ebi e ya kaa wɔtɔ fanɛ mbolpɔbi ka wɔ ekuntuŋ to na. 4Men sa maŋ ta amansherbi ŋko ekɔlgu ŋko asɛbta nyɔsopoana n ti menyi be amu so n yɔ. Men sa maŋ ya yili ekpa to a wɔtɔ a chɔrɔ esa kikɛ. 5Laŋ kama to nɛ men ya kaa luri, men kaŋɛ le pɔɛŋ: ‘Kagbenewushi e baa wɔ laŋ ere to ebi so.’ Nɛ kagbenewushi shapowura kama wɔ ndoŋ, men be kagbenewushi be kechɔrɔ na beeŋ baa wɔ mo so. 6Nɛ loŋ be esa maŋ wɔtɔ, men naŋ leŋi menyi be loŋ be kechɔrɔ na be kɔnɔ. 7Men baa wɔ laŋ na to a ji a nuu kusɔ kama nɛ b sa menyi, ŋkpal manɛ so, a daga eshumpo ka nya mbe kakɔka. Men sa maŋ ya kaa chɛrga elaŋ. 8Kade kama to nɛ men yɔ nɛ b sɔ menyi, men ji kusɔ kama nɛ b sa menyi 9nseŋ chɛ kade na to be belɔpo nseŋ kaŋɛ ndoŋebi le: ‘Ebɔrɛ be kuwura na taga menyi to.’ 10Ama kade kama to nɛ men yɔ nɛ ndoŋebi maŋ sɔ menyi, men lar n yɔ bumo be abɔrbiana so ŋ kaŋɛ: 11‘Men be kade ere to be shishɛr nɛ a gbiti anyi be aya gba nɛ anyee kpata a lɛ menyi a wora menyi kusha na. Ama men baa nyiŋi fanɛ Ebɔrɛ be kuwura na taga to.’ 12Mee kaŋɛ menyi nna fanɛ demujiachɛ na, asheŋ beeŋ ba bɔ Sodɔmebi so a chɔ kananɛ a beeŋ ba du n sa loŋ be kade na to ebi.”

Nde nɛ amo be basa maŋ yirda Yesu be asheŋ

(Matiu 11:20-24)

13Kumo be kaman nɛ Yesu naŋ kaŋɛ: “Kɔrazinebi, asheŋ maaŋ nyalɛ n sa menyi kikɛ. Bɛtsaidaebi, menyi alɛ gba, asheŋ maaŋ nyalɛ n sa menyi, ŋkpal manɛ so, emamachisheŋ nɛ n wora menyi to, nɛ n daŋ wora amo Tayɛ nɛ Saidɔn to nna, ndoŋebiana daŋ ta nsunɔ n chaŋ bumo be eyurana so nseŋ buu asɔ a tase fanɛ keeli to ebi a ŋini fanɛ b lar bumo be alubiana to n chɛr. 14Amoso, demujiachɛ na, asheŋ beeŋ ba bɔ Tayɛ nɛ Saidɔn ebi so a chɔ kananɛ a beeŋ ba du n sa menyi. 15Nɛ menyi alɛ Kapɛɛniamebi, menyi daa sha kemaŋ men be amu so nna n yɔ ebɔrɛso ŋko? To, baaŋ ta menyi n lɛ n wɔtɔ Setani be edɛ to.”

16Kumo be kaman nɛ e kaŋɛ mbe bebɛsopo: “Esa kama nɛ e bee nu a sa menyi, bee nu a sa ma nna na. Ekama malɛ nɛ e bee kini menyi, bee kini ma nna na. Nɛ ekama malɛ nɛ e kini ma, kini emo nɛ e shuŋi ma na nna na.”

Bebɛsopo adushunu nɛ anyɔ na ka bɛta m ba be asheŋ

17Ndoŋ nna nɛ bebɛsopo adushunu nɛ anyɔ na ya bɛta m ba nɛ kagbenefuli m ba kaŋɛ Yesu: “Enyɛnpe, an ka ya ti fo ketre, mbuibi lubiana gba nu n sa anyi n lar basa to.” 18Nɛ Yesu kaŋɛ bumo: “N wu Setani ka shi ebɔrɛso n tɔr a ba fanɛ bɔrɛ ka nyɛkpɛ na. 19Men nu nfe, n sa menyi eleŋ nɛ k tiŋ n shin nɛ men chichi awɔ nɛ nna so nseŋ pɔɔ edompo na be eleŋana kikɛ so nɛ shɛŋ maaŋ wora menyi. 20Ama men sa maŋ shin nɛ menyi be ŋgbene e baa fuli menyi ŋkpal mbuibi lubiana ka bee nu a sa menyi so. Kusɔ nɛ k daga men ka beeŋ kpal kumo so a shin nɛ menyi be ŋgbene e baa fuli menyi e la b ka sibɛ menyi be atre n nase ebɔrɛso na.”

Yesu be kagbene ka fuli mo be asheŋ

(Matiu 11:25-27; 13:16-17)

21Epul na malɛ to nɛ Kiyoyu Cheeŋ na shin nɛ kagbenefuli luri m bɔlɔ Yesu to nɛ e kaŋɛ: “Etuto nɛ fo la ebɔrɛso nɛ kasawule so be Enyɛnpe, mee chɔrɔ fo ga ŋkpal fo ka ta asɔ nɛ fo ta ŋ ŋana benyiashempo nɛ bekoyapo so nseŋ bugi amo be wulo n sa bebɔlpo so. N Tuto, kashenteŋ, fo gbagba e yili kumo loŋ n shin nɛ k wora m bɛ fo keparso.” 22Kede be kaman nɛ Yesu naŋ kaŋɛ le: “N Tuto ta kusɔ kama nna m bɔɔ ma enɔ. Esa kama maŋ nyi esa nɛ e la Ebinyɛn na she Etuto na, esa kikɛ malɛ maŋ naa nyi Etuto na she Ebinyɛn na nɛ bumo nɛ Ebinyɛn na bee sha keta Etuto na ŋ ŋini na nawule.”

23Kumo be kaman nɛ Yesu kilgi ŋ kaŋɛ mbe bebɛsopo na wuloso: “Kagbenefuli la menyeya nna ŋkpal asɔ nɛ menyee wu ere so. 24Ŋkpal manɛ so, anebi damtaana nɛ bewuraana kikɛ daŋ yɛlga kewu asɔ nɛ menyee wu ere a maŋ nya amo n wu. B daŋ yɛlga kenu asheŋ nɛ menyee nu ere a maŋ nya amo n nu.”

Yesu ka bɔ Samɛrianyɛn lela be keŋasa be asheŋ

25Kachako mbraŋinipo ko ba m ba kaa fin kewora Yesu ŋ keni nseŋ bishi mo: “Eŋinipo, manɛ nɛ meeŋ wora n tiŋ n nya ŋkpa nɛ k maŋ kɔ ekar na?” 26Nɛ Yesu bishi mo: “Manɛ nɛ abɔrɛsibɛ na bee ŋini? Nuso nɛ feeŋ kute asɔ nɛ a bee ŋini na be afito?” 27Nɛ kanyɛn na kaŋɛ: “A bee kaŋɛ fanɛ fo baa ta fo kagbene kikɛ nɛ fo kiyoyu kikɛ nɛ fo eleŋ kikɛ nɛ fo nfɛra kikɛ a sha Enyɛnpe fo Ebɔrɛ na, nsaa sha fo barkasa fanɛ fo kumu.” 28Nɛ Yesu kaŋɛ mo: “Kashenteŋ nɛ fo ji, amoso, baa wora asheŋ nɛ fo malga ere nseŋ nya ŋkpa.” 29Ama mbraŋinipo na daa sha na fanɛ e malga n lar nseŋ kpal loŋ so m bishi Yesu: “Esa mo e la m barkasa?” 30Nɛ Yesu naŋ kaŋɛ mo: “Kanyɛn ko e daŋ lar Jerusalɛm a yɔ Jɛriko nɛ beyu ya nyaŋ mo n suge mbe asɔbuuso nseŋ bri mo m bɛlɛ to. Kumo be kaman nɛ b yige mo loŋ n nase nseŋ shile n choŋ. 31Ndoŋ nna nɛ bɔrɛmatapo ko ba bɔla ekpa na so a choŋ nseŋ wu mo ŋ gelge boeŋ n choŋ ŋ ka mo. 32Kanyɛn na dese loŋ nɛ Livainyɛn ko malɛ ba bɔla ndoŋ a choŋ n wu mo nseŋ gelge mo m pɛ mbe ekpa n choŋ ŋ ka mo ndoŋ. 33Ndoŋ nna nɛ Samɛria be kanyɛn ko malɛ wɔ mbe enite to m ba tu kanyɛn na m ba wu mo nɛ kuwɔr pɛ mo ga. 34Nɛ e yɔ n ya pɛ mo to n wora ŋku nɛ nsa ko n wɔtɔ mbe achuu to nseŋ kre mbe achuuana na. Kumo be kaman nɛ e ta mo n chena mo gbagba be kediiso so n ta mo n yɔ befɔ be ebu ko to n ya keni mo so. 35Kumo be ŋklade nɛ e lara gbiti be ndarbi anyɔ n sa befɔ be ebukenipo na nseŋ kaŋɛ mo: ‘Baa keni mo so nɛ ŋ ka naŋ ya bɛta m ba nɛ fo jija amansherbi ko n ti so, meeŋ ka fo.’ ” 36Keŋasa ere be kaman nɛ Yesu bishi kanyɛn na: “Basa asa nɛ b tu kanyɛn nɛ beyu na daŋ bri na be emo e la kanyɛn na mo barkasa?” 37Nɛ mbraŋinipo na kaŋɛ le: “Emo nɛ e wu mo kuwɔr n chɛ mo to na.” Nɛ Yesu kaŋɛ mo: “To, fo alɛ gba e baa yɔ n ya kaa wora loŋ.”

Mɛɛri nɛ Maata be asheŋ

38Yesu nɛ mbe bebɛsopo wɔ bumo be enite na to loŋ m ba fo kadebi ko nɛ kache ko nɛ baa tre Maata shin nɛ b ba luri mo pe. 39Ndoŋ nna nɛ Maata mo sipocheso mo nɛ baa tre Mɛɛri na ya kaa tase Enyɛnpe na be anishito a nu mbe kamalga. 40Maata be kafɔketa be ashuŋ daŋ wora mo keshi ga nɛ e kpal loŋ so m ba kaŋɛ Enyɛnpe na le: “Kananɛ n sipo Mɛɛri yige ma nɛ ashuŋ ere maŋ tir fo a? Kaŋɛ mo nɛ e ba chɛ ma to.” 41Ndoŋ nna nɛ Enyɛnpe na kaŋɛ Maata: “Maata Maata, sa maŋ shin nɛ asheŋ damta e tir fo a jija fo kagbene. 42Kusɔ koŋwule e baŋ daga, kumo alɛ nɛ Mɛɛri lara na. Esa kikɛ maaŋ tiŋ n sɔ kumo ŋ ka mo.”

Currently Selected:

Luuk 10: GJNb

Highlight

Copy