Luuk 9

Yesu ka shuŋi bebɛsopo kuduanyɔ na be asheŋ

(Matiu 10:5-15; Maak 6:7-13)

1Nɛ Yesu tre mbe bebɛsopo kuduanyɔ na m ba shɛr n sa bumo eleŋ nɛ ekpa nɛ b baa tiŋ a ju mbuibi lubi be yiri kikɛ basa to nseŋ chɛ basa be alɔ. 2Kumo be kaman nɛ e shuŋi bumo fanɛ b ya bɔ Ebɔrɛ be kuwura na to be baru na n sa basa nsaa chɛ belɔpo. 3Le nɛ e daŋ kaŋɛ bumo: “Men sa maŋ ta shɛŋ n ti men be amu so n yɔ, fanɛ akpabi ŋko ekɔlgu ŋko ajibi ŋko amansherbi ŋko nle anyɔ n ti men be amu so n yɔ. 4Laŋ kama to nɛ men ya luri nɛ b sɔ menyi, men baa wɔ ndoŋ hale nɛ men ya lar kade na to. 5Ama kade kama to nɛ b kini kesɔ menyi, men lar kade na to nseŋ gbaŋgbaŋ men be aya to be shishɛr n lɛ bumo nɛ k baa la bumo be kekini menyi na be tɔɔnɛ.” 6Nɛ bebɛsopo na lar n yɔ ndewurbiana na kikɛ to n ya kaa bɔ baru lela be kubɔya na nsaa chɛ basa kaplɛkama.

Hɛrɔd be nfɛra ka wul mo to be asheŋ

(Matiu 14:1-12; Maak 6:14-29)

7Jemanɛ na so nɛ Galili be Ewura Hɛrɔd nu asheŋ nɛ a daa wora na kikɛ nɛ a wul mo to ŋkpal basa ko ka daa kaŋɛ fanɛ Jɔn kabɔrɛbɛrpo e naŋ tiŋi luwu to m ba na so. 8Nɛ beko malɛ kaŋɛ fanɛ anebi Elaija e naŋ bɛta m ba nɛ beko malɛ kraŋ naa kaŋɛ fanɛ dra na be anebiana na be eko e naŋ tiŋi luwu to m bɛta m ba. 9Nɛ Hɛrɔd kaŋɛ: “N shin nɛ b ku Jɔn be kumu nɛ esa mo malɛ e naa la emo nɛ mee nu mbe asheŋ ere?” Ndoŋ nna nɛ e fara a fin kewu Yesu.

Yesu ka sa basa ŋgboŋ anu ajibi be asheŋ

(Matiu 14:13-21; Maak 6:30-44; Jɔn 6:1-14)

10Bebɛsopo na ka bɛta m ba nɛ b ba kaŋɛ Yesu asheŋ nɛ b wora kikɛ nyam. Nɛ e shin nɛ mo nɛ bumo nawule yɔ kade ko nɛ baa tre Bɛtsaida. 11Jimaŋ na ka pin kumo be loŋ nɛ b bɛ mo so, ama e daa maŋ ju bumo. E daŋ malga Ebɔrɛ be kuwura na to be asheŋ nna n sa bumo nseŋ chɛ bumo nɛ b daa wɔ bumo to n daga kechɛ na.

12Epeŋi ka daa tɔr nɛ mbe bebɛsopo kuduanyɔ na ba kaŋɛ mo: “Kakpa ere maŋ la basa to, amoso, to basa ere aya nɛ b yɔ ndewurbi nɛ ndɔana nɛ a taga to nfe ere n ya fin ajibi nɛ mboŋ desesoana.” 13Nɛ Yesu kaŋɛ bumo: “Men gbagba e sa bumo kusɔ ko nɛ b ji.” Nɛ b kaŋɛ mo: “Ebodobodo anu nɛ ekɔrɔtɔ anyɔ nawule nɛ an baa kɔ nfe ama an baŋ yɔ nna n ya tɔ ajibi m ba sa jimaŋ ere kikɛ ai!” 14B daa sa fanɛ benyɛn ŋgboŋ anu. Nɛ Yesu kaŋɛ mbe bebɛsopo na: “Men shin nɛ basa na e barga to n chena ntuŋ so fanɛ adununu so.” 15Nɛ bebɛsopo na wora loŋ n shin nɛ b chena. 16Ndoŋ nna nɛ Yesu ta ebodobodo anu na nɛ ekɔrɔtɔ anyɔ na nseŋ keni esoso n nɛfa amo nseŋ fara a buri amo to a sa bebɛsopo na fanɛ b baa sa jimaŋ na nɛ ekama we m moɛ 17nɛ bebɛsopo na tise ejiŋka na m bɔlɔ nlantaŋɛ kuduanyɔ.

Pita ka kaŋɛ esa nɛ Yesu la be asheŋ

(Matiu 16:13-19; Maak 8:27-29)

18Kachako Yesu nawule ka bee kule Ebɔrɛ nɛ mbe bebɛsopo wɔ mo kutɔ nɛ e kilgi m bishi bumo le: “Esa mo nɛ basa bee tre ma?” 19Nɛ b kaŋɛ mo: “Beko bee tre fo Jɔn kabɔrɛbɛrpo nna, beko malɛ bee kaŋɛ fanɛ anebi Elaija e la fo nɛ beko bee kaŋɛ fanɛ dra na be anebiana na be eko e naŋ tiŋi luwu to m ba.” 20Nɛ Yesu bishi bumo: “Nɛ menyi alɛ ai? Esa mo nɛ menyee tre ma?” Nɛ Pita kaŋɛ: “Fo e la Ebɔrɛ be Kristo na.”

Yesu malga mbe awurfoŋ nɛ mbe luwu be asheŋ

(Matiu 16:21-28; Maak 8:31—9:1)

21Nɛ Yesu fiɛ bumo so kpakpa fanɛ b sa maŋ kaŋɛ esa kikɛ kesheŋ na nseŋ kaŋɛ: 22“A daga fanɛ ma, Nyiŋgbasa Pibinyɛn e ji awurfoŋ ga nɛ benimuana nɛ bɔrɛmatapowuraana nɛ mbraŋinipoana e kini ma nseŋ mɔ ma nɛ n tiŋi luwu na to kumo be kachɛ sasopo to.”

23Nɛ e naŋ kaŋɛ bumo kikɛ: “Ekama nɛ e bee sha kebɛ ma so, a daga e ka teŋ mbe kumu so nseŋ sulɔ mbe kedibi largato kachɛ kama m bɛ ma so. 24Ŋkpal manɛ so, esa kama nɛ e bee sha mbe ŋkpa ga beeŋ paŋ kumo, ama ekama nɛ e paŋ mbe ŋkpa ŋkpal ma so, beeŋ nya kumo. 25Nɛ fanɛ durnya ere kikɛ ki esa peya nɛ e foe ekpa m mur, manɛ be tɔnɔ nɛ e nya? E maŋ nya tɔnɔ kikɛ. 26Esa kama nɛ e bee kpal anishinyɔr so a maaŋ tiŋ ŋ kaŋɛ basa ma nɛ ma mmalga na be asheŋ, e baa nyi fanɛ saŋɛ nɛ ma, Nyiŋgbasa Pibinyɛn beeŋ keta ma kemaŋkura nɛ Etuto na nɛ emalaika cheembi na be kemaŋkura m ba na, anishinyɔr beeŋ pɛ ma alɛ gba ŋkpal amodoŋwura so. 27Ma e kaŋɛ menyi kashenteŋto na fanɛ basa ko wɔ nfe a maaŋ wu she b wu Ebɔrɛ be kuwura na ka ba nna pɔɛŋ.”

Kemaŋkura nɛ Yesu nya be asheŋ

(Matiu 17:1-8; Maak 9:2-8)

28Asheŋ nɛ Yesu malga na be bɔkwe be kaman nɛ e keta Pita nɛ Jɔn nɛ Jeems n ya dii kebee ko so nɛ e ya kule Ebɔrɛ. 29E ka bee kule Ebɔrɛ na nɛ mbe anishiakpa kilgi kanaŋ ko nɛ mbe asɔbuuso fuli to parr a kpa edɛ. 30Epul na to nɛ benyɛn anyɔ ko ba kaa yil a malga mo kutɔ, anebi Mosis nɛ anebi Elaija e daa la. 31Kemaŋkura e daŋ baa wɔ bumo kikɛ so nɛ mo nɛ bumo daa malga kananɛ e beeŋ wu Jerusalɛm to n shin nɛ k bɔla Ebɔrɛ be ekpa so be asheŋ. 32Jemanɛ na so nɛ Pita nɛ mo braana na daa di, ama b tiŋi n wu Yesu be kemaŋkura na nɛ basa nɛ b daa yil mo kutɔ na. 33Basa na ka bee yɔ a ka Yesu, nɛ Pita kaŋɛ Yesu: “Enyɛnpe, anyi be kebaawɔ nfe ere nyalɛ ga, anyeeŋ yuu abuu asa nɛ kukoŋwule e baa la feya nɛ kukoŋwule e baa la Mosis peya nɛ kukoŋwule malɛ e baa la Elaija peya.” Kashenteŋto, e daa maŋ nyi kusɔ nɛ e daa malga. 34E daŋ kraa malga nna nɛ kuwɔlpa ko lar nɛ kumo be kiyoyul ba buu bumo so nɛ kufu pɛ bumo ŋkpal kuwɔlpa na so. 35Ndoŋ nna nɛ ebɔl shi kuwɔlpa na to ŋ kaŋɛ: “M Pibinyɛn nɛ n lara na nde, men baa nu mbe kɔnɔ!” 36Ebɔl na ka lo to nɛ b wu fanɛ Yesu nawule e yil. Amo be jemanɛ na so bebɛsopo na daa maŋ kaŋɛ esa kikɛ kusɔ nɛ b wu na be kusɔ kama.

Yesu ka chɛ kebinyɛnbi nɛ mbuibi lubi tɔr so na be asheŋ

(Matiu 17:14-18; Maak 9:14-27)

37Kumo be ŋklade b ka shi kebee na so a ba nɛ jimaŋ damta ko ba tu Yesu. 38Nɛ jimaŋ na to be esa ko kaŋɛ Yesu awɔrso: “Eŋinipo, mee kule fo, keni m pibinyɛn koŋwule ere. 39Kiyoyu lubi ko e naa kaa koso mo to a shin nɛ e bee koso epul to a wora awɔr nsaa sela aya to a kpa enɔana nɛ apɔpɔ bee lar mbe kɔnɔ to. E maa sha keyige mo nseŋ baa wɔtɔ a doro mo. 40Ŋ kule fo bebɛsopo fanɛ b ju kiyoyu lubi na mo to, ama b maŋ tiŋ.” 41Nɛ Yesu bishi bebɛsopo na: “O menyi mbreebi, nuso be basa lubi e la menyi nɛ men maŋ kɔ yirda ere bre? Nuso be kechɛr nɛ menyee sha fanɛ n chɛr menyi kutɔ? Nɛ nuso be kanyiti nɛ menyee sha fanɛ n naŋ ta ŋ keta menyi?” Ndoŋ nna nɛ e kaŋɛ kanyɛn na: “Bar fo pibi na nfe.” 42Kebia na ka bee ba nɛ kiyoyu lubi na da mo n lɛ kasawule n shin nɛ e bee sela aya to a kpa enɔana fanɛ kegbuŋgbuŋwura. Ndoŋ nna nɛ Yesu fiɛ kiyoyu lubi na so n chɛ kebia na nseŋ ta mo m bɔɔ mo tuto enɔ. 43Eleŋ nɛ Ebɔrɛ daŋ ŋini na daŋ chinchiŋ basa kikɛ ga.

Yesu ka naŋ malga mbe luwu be asheŋ

(Matiu 17:22-23; Maak 9:30-32)

44Asheŋ nɛ Yesu daŋ wora na kikɛ daŋ kraa chinchiŋ basa na nna nɛ Yesu kaŋɛ mbe bebɛsopo: “Men sa maŋ kaŋ teŋ kusɔ nɛ mee shin nɛ ŋ kaŋɛ menyi ere so. Baaŋ ta ma, Nyiŋgbasa Pibinyɛn m bɔɔ basa enɔ.” 45Ama bebɛsopo na daa maŋ pin mbe kamalga na to, ŋkpal manɛ so, Ebɔrɛ daa maŋ bugi kumo to n sa bumo, ŋkeshin nɛ bumo alɛ daa maŋ bishi mo kumo be kifito ŋkpal kufu so.

Emo nɛ e chɔ ekama be asheŋ

(Matiu 18:1-5; Maak 9:33-37)

46Jemanɛ ko bebɛsopo na ka bee ji emɔrɔ a fin bumo to be emo nɛ e chɔ ekama. 47Nɛ Yesu pin kusɔ nɛ b daa fɛ na nseŋ ta kebi ko n yili mbe kekel to nseŋ kaŋɛ bumo: 48“Esa kama nɛ e sɔ le be kebia ere ŋkpal ma so, sɔ ma nna na, ekama malɛ nɛ e sɔ ma, sɔ emo nɛ e shuŋi ma na gba nna na. Amoso, ekama nɛ e la men kikɛ to be emantopo e la esa nɛ e chɔ ekama.”

Ekama nɛ e maŋ la men doŋ la men teri nna be asheŋ

(Maak 9:38-40)

49Kachako Jɔn kaŋɛ Yesu: “Enyɛnpe, an wu kanyɛn ko ka kɔ fo ketre a ju mbuibi lubi nɛ an kaŋɛ mo fanɛ e yige, ŋkpal manɛ so, e maŋ la anyi to be eko.” 50Nɛ Yesu kaŋɛ Jɔn: “Men sa maa fin keju mo, ŋkpal manɛ so, ekama nɛ e maŋ la men doŋ la men teri nna.”

Kananɛ Samɛriaebi kini Yesu be asheŋ

51Yesu be keyɔ ebɔrɛso be jemanɛ ka bee taga to nɛ e koso kachako m pɛ Jerusalɛm be ekpa. 52E daŋ shuŋi mbɔ nna fanɛ b juŋkpar mo n yɔ Samɛriaebi be kade ko to n ya bela asɔ ase n yili mo. 53Ama kade na to ebi kini kesɔ mo, ŋkpal manɛ so, k daŋ baŋ fuli nna fanɛ Jerusalɛm nɛ e daa yɔ. 54Mbe bebɛsopo Jeems nɛ Jɔn ka wu loŋ nɛ b bishi mo: “Enyɛnpe, fee sha fanɛ an kaŋɛ fanɛ edɛ e shi ebɔrɛso m ba mur bumo a?” 55Nɛ Yesu kilgi n fiɛ bumo so 56nseŋ shin nɛ b lar n yɔ kade ko to.

Basa nɛ baaŋ ba kaa bɛ Yesu so be asheŋ

(Matiu 8:19-22)

57B ka bee yɔ nɛ kanyɛn ko ba kaŋɛ Yesu: “Kaplɛkama nɛ fee yɔ, meeŋ bɛ fo so n yɔ.” 58Nɛ Yesu kaŋɛ mo: “Ejiŋkaamu kɔ abeelaŋ a di to nɛ mbuibi malɛ kɔ asha, ama ma, Nyiŋgbasa Pibinyɛn maŋ kɔ kakpa nɛ meeŋ dese n wushi.”

59Kumo be kaman nɛ Yesu kaŋɛ esa ko malɛ: “Bɛ ma so.” Nɛ amodoŋwura kaŋɛ mo: “Enyɛnpe, shin nɛ n ya puli n tuto pɔɛŋ nseŋ ba.” 60Nɛ Yesu kaŋɛ mo: “Shin nɛ basa nɛ b du fanɛ bubuni na e baa puli bumo braana bubuni. Ama fo ere baa yɔ n ya kaa bɔ Ebɔrɛ be kuwura na to be kubɔya na.”

61Nɛ kanyɛn ko malɛ naŋ kaŋɛ mo: “Enyɛnpe, meeŋ bɛ fo so, ama shin nɛ n ya kela ma laŋ to ebi pɔɛŋ nseŋ ba.” 62Nɛ Yesu kaŋɛ mo: “Esa kama nɛ e pɛ katekpa to a dɔ nsaa wɔtɔ a gbɛ a keni kaman, maaŋ tiŋ n wora shɛŋ. Loŋ koŋwule nɛ Ebɔrɛ be kuwura na to be kushuŋ na du.”

Currently Selected:

Luuk 9: GJNb

Highlight

Copy