Génesis 28

1Joko wi Isaac uenika taɨ Jacob. Jayawe Jacob ou uwäe yawe, Isaac jei chupe: “Tumpa jekuaeño tuyapo ikawi wae ndewe, cheraɨ,” jei. Jare jei wi chupe: “Awɨye etei emenda kuña kua ɨwɨ Canaán pewa ndiwe,” jei. 2“Iyeyapɨkatu woi, jare ekua ɨwɨ Padan-aram pe jare nderamɨ Betuel jëta pe. Pëti ndetutɨ Labán tayɨ ipɨte pewa reta ndiwe emenda kuri,” jei chupe.

3Jare Isaac jei wi Jacob pe: “Tumpa opaete mbaepuere onoi wae tumae nderé jare tumee ndewe jeta ndesambiaɨ retarä,” jei. “Joko wi niñemoñaa reta tuyeyapo jeta ambɨe ye ye ɨwɨ pewa retarä. 4Jare Tumpa tumee ndewe jare niñemoñaa reta pe wi jokua ikawi wae jae umee nderamɨkue Abraham pe wae rami. Jukuärái tanemborɨ ndiyembɨiya waerä kua ɨwɨ re. Kua ɨwɨ ikota nemaerä jare niñemoñaa reta pewarä wi. Añawe yaiko kua ɨwɨ pe ambɨe ɨwɨ pewa reta rami. Jayawe Tumpa tumee ndewe jare niñemoñaa reta pe wi kua ɨwɨ piko waerä kërái umee nderamɨkue Abraham pe wae rami,” jei Isaac Jacob pe.

5Jukuärái Isaac omondo Jacob ɨwɨ Padan-aram pe. Jayawe Jacob oo ɨwɨ Padan-aram kotɨ upɨta waerä itutɨ Labán jee wae ndiwe. Labán ko jae Jacob jare Esaú ichɨ Rebeca ikɨwɨ tenondewa, jare Betuel ɨwɨ Aram pewa taɨ.

Esaú umenda pɨau ye

6Joko wi Esaú uikuaa kërái Isaac uyerowia umae Jacob re wae, jare kërái omondo Jacob ɨwɨ Padan-aram pe umenda waerä joko pewa kuña ndiwe. Echa’ä tu uipota’ä Jacob umenda waerä pëti kuña Canaán pewa ndiwe. 7Jare Esaú uecha Jacob uyapo oï tu jare ichɨ jei chupe wae rupi. 8Jáeramo Esaú uikuaa tu uipota’ä taɨ reta umenda waerä kuña ɨwɨ Canaán pewa reta ndiwe.

9Jayawe Esaú oo opou itutɨ Ismael ipɨ. Ismael ko Abraham taɨ. Joko pe wɨreko pëti Ismael tayɨ, Mahalat jee wae, ïru jembirekorä. Mahalat ko jae Nebaiot jindɨ taɨkuewa.

Tumpa uyekuaa Jacob pe Betel pe

10Jacob oë oo ɨwɨ Beerseba wi yawe, jae oo tëta wasu Harán kotɨ. 11Jare uwata warasɨ uike rewa. Jare kiape pɨ̈tu chupe wae pe upɨta oke waerä pɨarewe pe rewa. Jayawe Jacob ueka jare uwäe ita ikawi wae iñäkandɨtarä, jare joko pe uyapakua oke.

12Jare Jacob oke iko rambuewe, upau. Jare aramoiño uecha ipau pe pëti yupika ɨwɨ wi oo ara re oya wae. Jare uecha wi Tumpa iaraɨwa reta uyupi ñonoï jare uweyɨ ñonoï jokua yupika rupi.

13Jare Jacob uecha wi Tumpa yupika iáramo oï wae. Jare Tumpa jei Jacob pe: “Che ko jae Tumpa aikoño mái wae, nderamɨkue Abraham iTumpa jare nderu Isaac iTumpa,” jei. “Opaete kua ɨwɨ Canaán, ndiyapakua neï jese wae etei, ameeta aï ndewe jare niñemoñaa reta pe,” jei. 14“Niñemoñaa reta jetaeteta ko ɨwɨkuïti ɨwɨ pewa jeta ye ye wae rami. Jae reta opata tɨnee kua ɨwɨ warasɨ uike wae kotɨ wi warasɨ oë wae kotɨ rewa, jare ɨaña kotɨ wi yembɨ kotɨ rewa. Jare opaete ɨwɨ pewa reta uyekouta nde rupi jare niñemoñaa rupi,” jei. 15“Awɨye neakañɨ. Che aïta nde ndiwe, jare ayandarekota nderé opaete kerupi ndeo wae rupi. Jare pëti ara che ndueru yeta kua ɨwɨ pe,” jei. “Ayapota ndewe opaete che jae ndewe wae, jare ndarau etei ndueya,” jei Tumpa Jacob pe.

16Jawoi Jacob usareko jare jei iyupe: “Añetete Tumpa etei yepe oï kua pe, jare che aikuaa’ä aiko,” jei iyupe. 17Jáeramo Jacob ukɨyete jare jei iyupe: “¡Kɨyete pewa ko kua ɨwɨ! Echa’ä uñeñono tee yepe oï Tumpa pewarä, jare ara jöke rami etei ko,” jei.

18Joko wi, pɨarewe pe ndimboweasɨ yawe, Jacob upüa jare uipɨsɨ jokua ita oñono iñäkandɨtarä wae. Jare umbɨyemboɨ oñono joko pe uikuaaka waerä joko pe ko Tumpa uyekuaa chupe wae. Jare upɨyere jese olivo iaceite.#28.18 Olivo iaceite ko ɨwɨra olivo jee wae ía pewa. Arakae rupi upɨyerese reta olivo iaceite mbae re oñono tee reta waerä Tumpa pewarä. 19Joko wi koiño ime iko pëti tëta wasu raɨ arakae jeese Luz, erëi Jacob umbɨjee yuapɨ ye Betel.#28.19 Tee Betel uipota jei “Tumpa jëta” hebreo ñee pe.

20-21Jayawe Jacob jei ipɨa rewe Tumpa pe: “Ndeo yawe che ndiwe, jare ndiyandareko kawi yawe cheré kerupi awata wae rupi, jare nemee chewe yawe cherembiurä jare cheremimonderä, jukuärái aramoi pëti ara rupi chepuere ayu yewɨ cheru jëta pe yawe chepɨawiwe rewe, jayawe nde ndikota cheTumparä,” jei. 22“Kua pe ambɨyemboɨ aï kua ita aikuaaka waerä kua ko jae kiape nderee ambutuicha wae. Jare opaete mbaembae nemeeta chewe wae wi ameeta ndewe diezmo,”#28.22 Diezmo uipota jei payandepo wae wi umee pëti wae Tumpa pewarä. jei Jacob.

Currently Selected:

Génesis 28: gnwPB

Highlight

Copy