Génesis 27

Jacob umbɨtawɨ tu

1Jeta año ma uasa yawe, Isaac indechiete ma jare jesa’ä uyeyapo. Pëti ara Isaac uenika taɨ tenondewa Esaú jare jei chupe: “Cheraɨ,” jei.

Jare Esaú jei chupe: “¿Mbae pa, cheru?” jei.

2Jare Isaac jei chupe: “Mase, che chendechiete ma aï jare ipotawe ara rupi aramoiño ko amanota aï,” jei. 3“Jáeramo ekua eraa ndewɨrapa jare ndeuɨ reta ndeo ndewata waerä ñana rupi. Eka iyuka jewae. 4Joko wi iyapo tembiu jëe ngatu wae nderembia pewa ayuete wae, jare eru mii chewe jau waerä. Opa ma akaru yawe, jaeta aï ndewe kërái Tumpa uyapota oï ndewe jeta mbaembae ikawi wae re. Echa’ä aipota nde ndikuaa waerä ndei amano mbowe,” jei Isaac Esaú pe.

5-6Erëi Isaac uyemɨngeta Esaú ndiwe rambuewe, Rebeca uyapɨsaka wɨari iko jese reta. Jáeramo Esaú oë ma oo ñana rupi yawe uyuka waerä jewae, Rebeca jei imembɨ Jacob pe: “Che ayandu nderu jei nderɨkeɨ pe wae,” jei. 7“Jae jei chupe kuärái: ‘Ekua iyuka jewae, jare iyapo tembiu jëe ngatu wae, jare eru chewe jau waerä. Jare jayawe jaeta aï ndewe kërái Tumpa uyapota oï ndewe ikawi wae re. Echa’ä aipota nde ndikuaa waerä ndei amano mbowe.’ Jukuärái jei nderu nderɨkeɨ pe,” jei. 8“Jáeramo, chemembɨ mii, iyapɨsaka kawi chiñee re jare iyapo che jae ndewe wae rupi,” jei. 9“Ekua mbaemɨmba reta ñonoï wae pe, jare iparawo mokui kapura kuimbae taurusu wae ikɨra kawi wae, jare eru chewe. Che ayapota tembiu jëe ngatu wae nderu uyuete wae. 10Jare jokua tembiu nderaata nderu pe jou waerä. Jukuärái nderu ndei umano mbowe tumbɨasa ndewe jokua mbaembae ikawi wae Tumpa umeeta tëi nderɨkeɨ pe wae,” jei Rebeca Jacob pe.

11Erëi Jacob jei ichɨ Rebeca pe: “Mase, cherɨkeɨ ko jae kuimbae jawukuete wae, jare che chepire jawuku’ä ko,” jei. 12“Cheru uyawɨkɨ yawe cheré, chekuaata jare uikuaata ko che ambɨtawɨ aï wae. Jáeramo ndarau umbɨasa chewe jokua ikawi wae Tumpa wi ou wae. Jaeño uyepɨpeyuta cheré,” jei chupe.

13Erëi Jacob ichɨ jei chupe: “Chemembɨ mii, ipotawe nderu uyepɨpeyu nderé wae toa jaeño cheré. Iyapoño kua che jae wae rupi. Ekuaño ipɨsɨ eru chewe jokua mokui kapura taurusu wae reta,” jei Rebeca Jacob pe. 14Jayawe Jacob ueru ichɨ pe mokui kapura taurusu wae reta, jare ichɨ uyapo tembiu jëe ngatu wae Isaac uyuete wae.

15Joko wi Rebeca wɨraa Esaú jemimonde ikawiete wae – jokua jae ueyañoise ichɨ jëta wakapi pewa pe wae – jare omondeka imembɨ taɨkuewa Jacob pe. 16Jare uiporu kapura ipirekue jawuku wae oñowa waerä Jacob ipapɨ jare iyayu. 17Jare umee chupe jokua tembiu uyapo wae jare mbɨyape omboyɨkue wɨraa waerä tu pe.

18Jayawe Jacob wɨraa jokua tembiu tu oï wae pe, jare jei chupe: “Cheru,” jei.

Jayawe Isaac jei chupe: “Ko aï. ¿Kía nunga cheraɨ pa nde?” jei chupe.

19Jayawe Jacob jei tu pe: “Esaú, nderaɨrɨpɨ ko che. Ayapo ma nde ndere chewe wae rupi. Epüa mii jeu kua tembiu cherembia pewa. Joko wi ndepuere ndere chewe kërái Tumpa uyapota oï chewe mbaembae ikawi wae re,” jei Jacob tu pe.

20Jayawe Isaac upɨrandu taɨ pe: “¿Kërái pa ɨmambaete newäe chupe jewae, cheraɨ?” jei chupe.

Jayawe Jacob jei tu pe: “NdeTumpa ikoño mái wae chemborɨ awäe waerä chupe ɨmambaete,” jei chupe.

21Jare Isaac jei Jacob pe: “Eya katu mii cheré, cheraɨ, chepuere ayawɨkɨ waerä nderé che aikuaa waerä nde ra ko jae cheraɨ Esaú wae,” jei chupe.

22Jayawe Jacob oya katu Isaac re. Jare Isaac uyawɨkɨ ipapɨ re yawe, jei iyupe: “Esaú ipapɨ ko, erëi Jacob iñee echa ko,” jei Isaac iyupe. 23-24Jare Isaac uikuaa’ä Jacob ko wae, echa’ä ipapɨ jawukuete Esaú ipapɨ rami. Jáeramo Isaac, ndei jei mbowe chupe kërái Tumpa uyapota oï chupe ikawi wae rewa, upɨrandu ye Jacob pe: “¿Añetete pa nde ko jae cheraɨ Esaú?” jei chupe.

Jayawe Jacob jei chupe: “Añetete jae ko che,” jei.

25Jayawe Isaac jei chupe: “Eru chewe tembiu nderembia pewa jau waerä,” jei. “Akaru ma yawe, jaeta ndewe kërái Tumpa uyapota oï ndewe mbae ikawi wae re,” jei chupe. Jayawe Jacob umee tu pe tembiu jare vino, jare Isaac jou.

26Joko wi, opa ma ukaru yawe, Isaac jei taɨ pe: “Eya katu cheré, cheraɨ mii, jare cherowapɨte,” jei. 27Jayawe Jacob oya katu tu re jare uyurupɨte tu jowa pe.#27.27 Arakae yawe ɨwɨ Canaán pewa reta jeko pe, kuimbae reta uyeyurupɨte jowa pe uechaka waerä uyerau wae jare uipɨu iyuwi wae. Jare Isaac uëtu yawe Esaú jemimonde, jayawe ramo jae wɨrowia taɨ Esaú wae. Jayawe jei chupe:

“Mase, cheraɨ, utimbo nenoi ñana Tumpa umɨjeñɨka wae utimbo kawiete wae rami.

28Tumpa tumeeñoi ndewe jekuaeño ɨsapi umbɨu kawi waerä nderemitɨ reta, jare tiawɨye kawi ndewe ndeko rupi, jare tumeeñoi ndewe jeta trigo jare jeta uva wi.

29Tuiko jeta ambɨe ɨwɨ pewa reta uyeyokui ndewe waerä, jare tuñeñono reta ɨwɨ re uipɨu rewe nderowai.

Tumpa tumee wi ndewe nenoi waerä mbaepuere nerëtara reta re, jare ndesɨ imembɨ reta wi tuñeñono ɨwɨ re uipɨu rewe nderowai.

Jare ipotawe kía uyepɨpeyu nderé wae, toa jese yepɨpeyu.

Jare ipotawe kía jei ndewe, ‘Tumpa tuyapo ikawi wae ndewe,’ jei wae, Tumpa tuyapo chupe wi ikawi wae.”

Jukuärái jei Isaac Jacob pe.

Esaú ueka tu pe jei waerä chupe Tumpa umeeta tëi oï chupe wae re

30Jukuärái Isaac opa jei Jacob pe kërái Tumpa uyapota oï chupe ikawi wae rewa. Erëi Jacob oë ramo mii oo ye yawe tu oï wae wi, Esaú ou uwäe joko pe umbaereka wae wi. 31Jare uyapo wi tembiu jëe ngatu wae jembia pewa Isaac uyuete wae, jare ueru tu pe. Jare jei chupe: “Epüa mii, cheru, jare jeu kua tembiu cherembia pewa. Joko wi ndepuere ndere chewe kërái Tumpa uyapota oï chewe ikawi wae rewa,” jei chupe.

32Jayawe Isaac upɨrandu chupe: “¿Kía pa nde?” jei.

Jayawe Esaú jei tu pe: “Esaú, nderaɨrɨpɨ ko che,” jei.

33Jáeramo Isaac uikuaa’ä mbae uyapo waerä, jare jei chupe: “Erëi ¿kía yerá jayawe ueru umee chewe iyei tembiu tembia pewa? Che jau ma, jare jae ma chupe nemaerä ikota tëi wae. Jáeramo iko kawita jae,” jei Isaac Esaú pe.

34Esaú uyandu yawe tu jei wae, tuicha ipɨatɨtɨ, jare usapɨkai rewe jei tu pe: “¡Cheru mii, emee mii chewe wi!” jei chupe.

35Erëi Isaac jei chupe: “Chepuere’ä ma ayapo jokua. Nderɨwɨ ou jare chembɨtawɨ ma, jare upɨ̈ro ma ndewi ameeta tëi aiko ndewe wae,” jei chupe.

36Esaú jei: “Jayawe, ¡jaekawi pembɨjee Jacob!#27.36 Tee Jacob uipota jei, “upɨ̈ro kía wi imbaepuere,” hebreo ñee pe. Echa’ä mokui wese ma upɨ̈ro chewi mbae: tenonde yawe upɨ̈ro chewi taɨrɨpɨyekou, jare añawe upɨ̈ro chewi mbae ikawi wae Tumpa umeeta tëi iko chewe wae,” jei. Jare Esaú uyerure ye tu pe: “¿Mbaetɨ ye ma pa chemaerä mbae ikawi wae Tumpa umeeta tëi iko chewe wae?” jei chupe.

37Jayawe Isaac jei chupe: “Mase, che jae ma Jacob pe jae onoita oï mbaepuere nderé, jare opaete ñanerëtara reta uyeyokuita oï chupe. Che jae ma chupe wi Tumpa umeeta oï chupe jeta trigo jare uva. Jáeramo mbaetɨ ye ma mbae ikawi wae nemaerä, cheraɨ,” jei Isaac chupe.

38Erëi Esaú jeiete jei chupe: “Tumpa umeeta oï cherɨwɨ pe wae, ¿mbaetɨ ye ma ra pëti awe chemaerä? ¡Mbae ikawi wae Tumpa tumee wi chewe, cheru mii!” jei Esaú uyao rewe tu pe.

39Jayawe tu Isaac jei chupe:

“Mbɨrɨ ndikota ɨsapi umbɨu kawi temitɨ reta wae wi jare ɨwɨ umee kawi mbaewɨye reta wae wi.

40Ndikota neï pëti iñerärose wae.

Jare nepɨ̈rota ïru wae reta wi imbaembae, jare jokua re ndikota neï.

Ndiyeyokuita neï nderɨwɨ pe mbowɨ año pewaño.

Erëi pëti ara nembowaichota neï, jare joko wiwe ndiyeyokuita’ä ma chupe.”

Jukuärái Isaac jei Esaú pe.

Jacob osi Esaú wi

41Joko wiwe Esaú uñamɨtäa tɨwɨ Jacob, echa’ä tu umeeka ikawi wae chupe ramo. Jayawe Esaú jei iyupe: “Ɨmambaeño cheru umanota. Jare uasa ma mbɨatɨtɨ yawe, tayuka cherɨwɨ Jacob,” jei iyupe.

42Erëi ime kía umbeu Rebeca pe Esaú ipɨayemɨngeta rewa. Jáeramo Rebeca uenika Jacob jare jei chupe: “Mase, nderɨkeɨ Esaú ndaye ipɨayemɨngeta ko uyepɨta oï nderé jare ndeyukata oï,” jei. 43“Jáeramo, chemembɨ mii, iyapo che jae ndewe wae rupi. Iyeyapɨkatu woi jare ekua tëta wasu Harán pe, chekɨwɨ Labán jëta pe,” jei. 44“Epɨta joko pe jae ndiwe mbowɨ ara pewa, nderɨkeɨ iarasɨ uasa chuwi rewa,” jei. 45“Jae iñakañɨ ma yawe ikawi wae nepɨ̈ro chuwi wae wi, jare mbaetɨ ma iarasɨ ndekotɨ yawe, che amondota kía ndereru ye waerä joko wi neï ye waerä che ndiwe. Echa’ä aipota’ä etei nderɨkeɨ ndeyuka waerä,” jei. “Jae ndeyuka yawe, jae umanota ko upuruyuka jeko pewa. Jukuärái mokui rewe chemembɨ ukañɨta chewi pëti ara peño.” Jukuärái Rebeca jei Jacob pe.

46Esaú umenda ma mokui kuña hetea reta ndiwe. Erëi Rebeca umae kawi’ä hetea reta re. Jáeramo jei ime Isaac pe: “Chekueri ma kua kuña hetea reta wi,” jei chupe. “Jacob wɨreko yawe pëti kuña hetea wi, ¿maera ye pa aikoweta aiko?” jei chupe.

Currently Selected:

Génesis 27: gnwPB

Highlight

Copy