Akts 1

Faŋ Yeso nə koꞌ gə̀ yizɔ

1Lùu vəŋwaꞌlə lwesə vəbɔɔ faŋ mə nyɔ̀ꞌ tɨ́ ghɔ, Teofilɔs. Taa mfɔŋ ŋwaꞌlə ŋwaa mə nə nyɔꞌ kɔ̀ŋ vənu vənshə faŋ Yeso nə yɨ̀sə, baa dèesə, shù fɨ maa vənzi, 2ziꞌ maa shi ŋkɨə faŋ Nwi nə ndi ŋwə, kòꞌsə ŋwə yizɔ, tɨ́ ŋwə yaa tɨ vɨɨ ntɔŋsə vi faŋ ŋwə nə shoꞌ nə, fɨ taa Zwitə Ley Nwi. 3Yighee njyə faŋ Yeso nə dùꞌtə ŋwə shɔɔ fɨ shɨ yiku, ŋwə fuu, fàynə ghɔ vɨɨ ntɔŋsə vi, də̀ vəshwenə vəyaŋ tɨ́ vəŋ, tɨ́ kaꞌ vəŋ kɔꞌ kɨɨ laa ŋwə ywèy, ndɔ bwèy. Maa vəshi muu-yinshwe, ŋwə nə də̀ ŋwaa wi tɨ́ vəŋ ghee yaŋ, gì tɨ́ vəŋ kɔ̀ŋ nu yifwàŋ Nwi.

4Maa yighee yɔ́ Yeso ghɔ vɨ vɨɨ məzwetə nu ki baytə shəŋ muꞌ, Yeso gi tɨ́ vəŋ laa, kɨ vəŋ fuu fɨ ntɨꞌ Jerusalem me, baa nə laa vəŋ duꞌ shɔ, kɨ kɨꞌ sheꞌ Zwitə Ley Nwi, faŋ tɨta Nwi nə kɔ̀ꞌnə tɨ́ vəŋ, faŋ yi nə nàysə tɨ́ vəŋ nə. 5Ŋwə nə baa gì laa lee, «Vɨɨ nəə fi muu mə Nwi fɨ ghɔ Jɔn taa muu. Gə fɨ maa viŋ, viŋ taa kɨ fi luu Zwitə Ley Nwi. Ŋkə kee baa luu ntaŋ me.» 6Vɨɨ mbɨə faŋ ghɔ vɨ Yeso nə fàynə shəŋ muꞌ nə, bitə tɨ́ ŋwə laa, «Tɨta, a taa yɨsə laa vɨ bəŋsə yifwàŋ nyaa-nsiŋ tɨ́ nsiŋ, vɨɨ Isirayl, maa yighee yɔ́ mu?» 7Ŋwə gi tɨ́ vəŋ laa, «Kee lùu nu kiŋ maa məkɨɨ nə yighee yɔ́, nə yighee vənu vəmɔ́ꞌ me, buꞌ laa nùŋ Tɨta Nwi nùŋ vənu vənshə maa wutə ki. 8Luu nə, viŋ ndɔ kii wutə Nwi faŋ Zwitə Ley Nwi jwì maa viŋ, viŋ kɨ nii lùu vɨɨ məfɨꞌtə nu kaŋ ntɨꞌ Jerusalem nə taa ntɨꞌsə Judia sənshə, nə fɨ shɨ Samaria nə maa vəshəŋ vənshə, gə ziꞌ tɨ́ vəndwə və shɨ nsi.»

9Yeso gi nɨniŋ, Nwi kɨ nii ndì ŋwə, ŋwə koꞌ taa yizɔ, vəŋ nə ye. Mbɔꞌ kɨ nii ndì ŋwə, vəŋ kee baa ye ŋwə me. 10Vəŋ taŋ sɨ vəŋ, kìi ndeynə faŋ ŋwə koꞌ gə yizɔ, vəndɔŋ vəbɔɔ gwəkə fuu yɨ vəŋ nə njwisə fusə maa vəŋ, gì tɨ́ vəŋ laa, «Aŋ viŋ, vɨɨ Galilii, viŋ sii tɨ̀ŋnə feenə, kɨ ndeynə kə fɨ yizɔ? 11Viŋ zɔ! Yeso ŋwə̀, faŋ Nwi nii ndì ŋwə fɨ ghɔ viŋ, ŋwə koꞌ gə̀ yizɔ nə, ŋwə ndɔ baa bəŋ siꞌ jwi sheꞌ faŋ viŋ nii yè ŋwə nə koꞌ yizɔ nə.» 12Vɨɨ ntɔŋ Yeso vɔ́ kɨ nii ndɔ̀ fɨ fuu baŋ vətɨ və məŋgwə faŋ vəŋ nə luu shɔ nə, bə̀ŋ gə̀ ntɨꞌ Jerusalem. Shəŋ kɔ́ nə luu nshənə fɨ ntɨꞌ Jerusalem. Nə luu sheꞌ yitoꞌ faŋ nyə kùꞌnə maa mətoꞌ maa shi zwisə Nwi. 13Vəŋ ziꞌ ntɨꞌ Jerusalem, koꞌ gə̀ taa njɨɨ ŋii njyə faŋ vəŋ yaa kɨ baytə shɔ nə. Vɨɨ vɔ́ nə luu Pita nə Jɔn nə Jeyms nə Andru nə Filip nə Tɔmas nə Bartolomi nə Matiu, nə Jeyms wee Alfeɔs, nə Saymon ŋgwə faŋ vɨ tii ŋwə nə wuu məsɨŋsə maa nu, baa nə Judas wee Jeyms. 14Vəŋ nə luu shɔ, fwi vəŋ luu yimuꞌ, vəŋ shɔꞌtə Nwi ghee nshə. Vəki vəmɔ́ꞌ nə Meri, nshu Yeso, nə vaŋ-nshwi Yeso nə luu taa ŋwaa vəŋ nɨzi.

Faŋ vɨ nə shòꞌ wə, nùŋ tɔ Judas Iskariot

15Maa vəshi vɔ́ Pita ndɔ fɨ nsi fɨ taa ŋwaa vɨɨ Yeso, tɨ́ vɨɨ baytə yifi yaa wə waaghɨꞌ nə wə muu-mbɔɔ. 16Ŋwə gi laa, «Vaŋ-nshwi vaŋ, nu ŋkɨə faŋ ŋkə lùu taa ŋwaꞌlə Nwi kɔ̀ŋ nu Judas, faŋ ŋwə nə də̀ jɨɨ tɨ́ vɨɨ mbɨə faŋ vəŋ nə jìa Yeso nə, fàynə, buꞌ laa Zwitə Nwi nə duꞌtə ŋkə kwaŋ nu kɔ́ taa yigisə fwàŋ Deyvid yighee vɨsɨ, ŋwə naysə tɨ́ vɨɨ. 17Judas nə luu fɨ taa ŋwaa yia, vɨɨ ntɔŋ Yeso. Vɨ nə shoꞌ ŋwə maa faꞌ ŋwə̀ yaa yia. 18Judas ghɔ́ gə ywàŋ shəŋ nsi kəmɔ́ꞌ nə ka ŋgwə faŋ nə luu vəkeynə və nu bwə ki. Luu nə, ŋwə fiŋ nsi, yibuŋ yi bwi, məntɔ mi fuu mənshə. 19Vɨɨ vənshə fɨ ntɨꞌ Jerusalem zɔ nu kɔ́. Vɨ kɨ nii tìi shəŋ nsi kɔ́ nə Akeldama maa ghaŋ shɨ vəŋ, ŋiꞌ ki luu laa, «yindɨɨ fənshi.» 20Ŋkə gay nɨniŋ sheꞌ faŋ vɨ nə nyɔ̀ꞌ taa ŋwaꞌlə Sam laa,

«Ŋii yi ndɔ goꞌ day,

wə kee ndɔ shi shɔ me.» #Sam 69.26. Vɨ baa ŋwàꞌlə laa,

«Wə dɨday ndɔ tɨŋ maa shuu faꞌ wi. #Sam 109.8.

21Nɨniŋ, bàw wə dɨday zɨ tɔ ki, ŋìi taa ŋwaa yia, yia vɨ vəŋ kɨ fɨꞌtə nu məywey Yeso fɨ shɨ yiku. Bàw vɨ shoꞌ wə faŋ yia vɨ vəŋ nəə toꞌ mɔ́ꞌ ghee nshə, faŋ tɨta Yeso nəə toꞌ nsiŋ vɨ vəŋ, 22shù fɨ faŋ Yeso nə fì muu fɨ ghɔ Jɔn, gə kɔ̀ tɨ́ yighee njyə faŋ ŋwə nə kòꞌ yizɔ nə. Bàw vɨ shoꞌ wə faŋ ŋwə nə yè vənu vɔ́ nə yisɨ. 23Nɨniŋ, vəŋ bɨꞌtə vɨɨ vəbɔɔ, wə muꞌ luu Josef faŋ vɨ nəə tii ŋwə nə Barsabas, bi-shuu wi lùu Justɔs. Wuu mɔ́ꞌ luu Matias. Vəŋ nùŋ vɨɨ vɔ́ vəbɔɔ, 24shɔꞌtə Nwi, gì laa, «Tɨta Nwi, faŋ a kɨ̀ɨ nə fwisə vɨɨ, də wə ntɨə faŋ a shoꞌ fɨ taa ŋwaa vɨɨ və̀ vəbɔɔ tɨ́ yia, 25tɨ́ kɨ kaꞌ ŋwə ndì shəŋ faꞌ ŋkɨə yaa wuu ntɔŋ Yeso, faŋ Judas nə mèꞌtə maa məgə maa ŋkii shəŋ faŋ ŋkə kùꞌnə tɨ́ ŋwə.» 26Nɨniŋ, vəŋ tuŋ beꞌ maa yizii vɨɨ vɔ́ vəbɔɔ maa məshoꞌ wə muꞌ. Yizii njyə faŋ vɨ nə shoꞌ luu Matias. Ŋwə kɨ nii kùꞌsə nwaa vɨɨ ntɔŋsə Yeso njɔ-yimuꞌ nə.

Currently Selected:

Akts 1: bav

Highlight

Copy