Jɔn 21

Faŋ Yeso nə fùu yikəꞌ vɨɨ məzwetə nu ki mbɨɨ maghia

1Kɨ luu fɨ yiba, Yeso baa fùu yikəꞌ vɨɨ məzwetə nu ki, maa yighee njyə faŋ vəŋ nə luu mbɨɨ maghia Tiberiɔs. Nu kɔ́ nə gày tɨ́ nee: 2Saymon Pita nə Tɔmas faŋ vɨ nəə tii ŋwə nə Siꞌye nə, baa nə Nataniel faŋ ŋwə nə ndɔ̀ fɨ ntɨꞌ Kana fɨ shɨ Galilii, nə vaŋ Zebedii vəbɔɔ, nə vɨɨ məzwetə nu Yeso vəmɔ́ꞌ vəbɔɔ, vəŋ nə bàytə shəŋ muꞌ. 3Saymon Pita gi tɨ́ vəŋ laa yi kəə gə koo susə. Bətə vɨɨ gi tɨ́ ŋwə laa ghɔ vɨ vəŋ gə mɔ́ꞌ. Nɨniŋ, vəŋ vənshə fuu gə̀ ŋìi taa bay, gə koo susə. Vəŋ nə faꞌ fu vətuꞌ ŋkwəŋ, kee kòo tuu mbuu su me. 4Kɨ luu ŋkee taa nshia-ndoo-mbisɨ, faŋ fu nə tey kɨ lee, Yeso fuu yikəꞌ vəŋ, tɨ̀ŋ mbɔꞌ bia. Luu nə, vɨɨ məzwetə nu ki kee ta kɨɨ laa lùu Yeso me. 5Yeso gi tɨ́ vəŋ laa, «Vaŋ vaŋ, viŋ kee ta kòo susə yimu?» Vəŋ gi laa «bey». 6Ŋwə gi tɨ́ vəŋ laa, «Viŋ ndi ghuu ghiŋ, mɔ̀ꞌ maa kwiŋ bay maꞌnə, buu viŋ taa koo susə.» Vəŋ mɔꞌ ghuu maa kwiŋ bay maꞌnə, susə ŋii tey yi ŋkee səyaŋ, vəŋ kee baa kɨɨ suŋ, kwàŋ taa bay me, buꞌ laa susə nə luu səyaŋ taa tey yi. 7Wuu məzwetə nu Yeso ŋgwə faŋ Yeso nə kàw ŋwə shɔ̀ɔ nə, gi tɨ́ Pita laa, «Luu tɨta ŋwaa-nsiŋ.» Faŋ Pita nə zɔ̀ yigi yɔ́, laa luu tɨta Yeso nə, ŋwə mɔꞌ njwi yi faŋ ŋwə nii shoꞌ maa faꞌ, sàwnə shə̀ŋ taa muu, gə shəŋ ŋkɨə faŋ Yeso nə luu shɔ nə. 8Vəliŋ vi vɔ́ goꞌ taa bay, dɔ̀ŋsə bay kɔ́, jwì nə ŋkə yifi, sùŋ ghuu susə fɨ yiba bay kɔ́, faŋ susə nə lwàŋ taa tey yi nə. Vəŋ nə kee lùu ntaŋ fɨ mbɔꞌ bia me; ŋkə nə luu sheꞌ yaa kwiŋ muu-ntee maa məziꞌ mbɔꞌ bia. 9Vəŋ ziꞌ mbɔꞌ bia, fùu fɨ taa bay, yè vəkɨꞌlə və wi shɔ nə susə fuu yi, nə bee. 10Yeso gi tɨ́ vəŋ laa vəŋ jwi nə susə səmɔ́ꞌ fɨ maa susə nsɨə faŋ vəŋ nii bɨ kɨkoo nə. 11Saymon Pita baa bə̀ŋ gə̀ taa bay, jìa ghuu sùŋ, mɔ̀ꞌ mbɔꞌ bia. Ŋkee susə kwalə nə luu taa ghuu ghɔ́ waaghɨꞌ nə njɔsə-tia muu-ntee. Faŋ nsə nə kɔlə lùu səyaŋ nə, ghuu ghɔ́ nə kee yisanə me. 12Yeso gi tɨ́ vəŋ laa vəŋ jwi shùꞌ shuu vəŋ. Vəŋ jwi, tuu wə nə kee lùu shɔ taa ŋwaa vəŋ, maa məbitə tɨ́ ŋwə laa, ŋwə lùu ndə me. Vəŋ nəə kɔꞌ kɨɨ laa luu tɨta Yeso. 13Yeso gə ndì bee kɔ́ nə susə sɔ́, gàasə tɨ́ vəŋ. 14Nɨniŋ, Yeso nə fùu sɨ vɨɨ məzwetə nu ki lwesə ghee tia, shù fɨ maa yighee njyə faŋ ŋwə nə ywèy fɨ shɨ yiku nə.

Faŋ Yeso nə gì tɨ́ Pita

15Faŋ vəŋ nə zɨ mètə, Yeso gi tɨ́ Saymon Pita laa, «Saymon, wee Jɔn, a kaw mə shɔ̀ɔ vɨɨ və̀ mu?» Pita bəŋsə tɨ́ ŋwə laa, «Ɔŋ, tɨta, a kɨɨ laa mə kàw ghɔ.» Yeso gi tɨ́ ŋwə laa, «Kɨ shiinə vaŋ-bisə-njɨɨ vaŋ shee,» 16ndɔ̀ bàa kɨ bìtə tɨ́ ŋwə laa, «Saymon, wee Jɔn, a kàw mə mu?» Pita bəŋsə tɨ́ ŋwə laa, «Ɔŋ, tɨta, a kɔꞌ kɨɨ laa mə kàw ghɔ.» Yeso baa kɨ gì tɨ́ ŋwə laa, «Kɨ shiinə bisə-njɨɨ saŋ,» 17ndɔ̀ bàa kɨ bìtə tɨ́ ŋwə lwesə ghee tia laa, «Saymon, wee Jɔn, a kàw mə mu?» Ŋkə za Pita, buꞌ faŋ Yeso bìtə tɨ́ ŋwə ghee tia laa ŋwə kàw yi mu. Ŋwə gi tɨ́ Yeso laa, «Tɨta, a kɔꞌ kɨɨ nə vənu vənshə. A kɔꞌ kɨɨ laa mə kàw ghɔ.» Yeso gi tɨ́ ŋwə laa, «Kɨ kɨꞌ bisə-njɨɨ saŋ! 18Zɔ mɔɔ! Mə naysə tɨ́ ghɔ yinsəŋ laa, yighee njyə faŋ a nəə kɨ bii weembwa, a nəə shuŋ kɔtə kə ŋgɨɨ-ghɔ, ndɔ gə shəŋ ŋkɨə faŋ a kàw. Luu nə, yighee njyə faŋ a ndɔ dwaŋ, a ndɔ nesə kwiŋ ghə, vɨ kɨ shuŋ kɔtə kə, ndi ghɔ, gə nə ghɔ shəŋ ŋkɨə faŋ a kee kaw gə̀ shɔ me.» 19Yeso nə gì nɨniŋ maa mədə jɨɨ yiku Pita, faŋ vɨ ndɔ zwi ŋwə, ŋwə bəŋsə Nwi shɔ. Yeso nə gì nɨniŋ, baa gì tɨ́ Pita laa ŋwə beꞌsə yi. 20Vəŋ gə, Pita kiasə ŋwaa wi, yè wuu məzwetə nu Yeso ŋgwə faŋ Yeso nə kàw ŋwə shɔ̀ɔ nə, faŋ ŋwə nə beꞌsə vəŋ. Lùu ŋwə faŋ ŋwə nə yɨ̀ꞌtə shuu fwi Yeso maa yighee njyə faŋ vəŋ nə zɨ fazɨ vətuꞌ nə, ŋwə nə bìtə tɨ́ Yeso laa, «Tɨta, ndɔ fiŋ ndə fiŋ ghɔ.» 21Faŋ Pita nə yè wuu məzwetə ghɔ́, gi tɨ́ Yeso laa, «Tɨta, nu wə ŋwə̀ lùu kɨkə?» 22Yeso gi tɨ́ ŋwə laa, «Kɨ ghaŋ laa fwi nyaa bàw laa ŋwə ndɔ goꞌ mbi zìꞌ maa yighee njyə faŋ mə ndɔ baa bəŋ jwì, nsɔꞌ yə shɔ lùu laa kə? - Gə̀ fɨ maa ghɔ, beꞌsə mə.» 23Nɨniŋ, yigi yimɔ́ꞌ saynə taa ŋwaa vɨɨ Yeso, laa wuu məzwetə nu Yeso ghɔ́ kee ndɔ ku me. Luu nə, Yeso nə kee gì laa ŋwə ndɔ kee ku me. Ŋwə nə gì laa, taa kɨ ghaŋ laa fwi yi bàw laa ŋwə goꞌ mbi zìꞌ maa yighee njyə faŋ yi ndɔ baa bə̀ŋ jwì mbi, nsɔꞌ Pita shɔ lùu laa kə?

Yigi kɔ̀ŋ wə ntɨə faŋ ŋwə nə nyɔ̀ꞌ ŋwaꞌlə ŋwə̀

24Nyɔ̀ꞌ wuu məzwetə nu Yeso faŋ ŋwə nə yè vənu vɔ́ nə yisɨ, nyɔ̀ꞌ ŋwaꞌlə ŋwə̀. Wə ghɔ́ nəə fɨꞌtə vənu vɔ́ tɨ́ vɨɨ nɨzi. Yia kɔꞌ kɨɨ laa nu ŋkɨə faŋ ŋwə nə gì nə, lùu yinsəŋ. 25Vənu vəmɔ́ꞌ kɨ bii vəyaŋ faŋ Yeso nə yɨ̀sə. Mə bɨꞌtə laa vɨ toꞌ kɨ nyɔꞌ vənu vɔ́ vənshə tɔ tɔ, buu kaꞌ mbi yinshə kee kùꞌnə maa mənuŋ vəŋwaꞌlə vɔ́ faŋ vɨ nyɔ̀ꞌ me.

Currently Selected:

Jɔn 21: bav

Highlight

Copy