Jɔn 20

Faŋ Yeso nə ywèy fɨ shɨ yiku

(Matiu 28.1-8; Mark 16.1-8; Lukas 24.1-12)

1Shi zwisə kɔ́ kɨ shɔɔ, fu kɨ lee maa shi vɨsɨ maa yiwiŋ, Meri Madalin fuu kɨ gə shuu swi Yeso ŋkee taa wee-leefu, faŋ fu kee ta yigaasə me. Ŋwə ziꞌ yifi, ye laa vɨ bàꞌsə ŋoꞌ njyə faŋ vɨ yaa nùŋ shuu swi yɔ́. 2Ŋwə nyɨŋ gə̀ yè Saymon Pita, nə wuu məzwetə nu Yeso mɔ́ꞌ, ŋgwə faŋ Yeso nə kàw ŋwə shɔ̀ɔ nə. Meri naysə tɨ́ vəŋ laa, «Vɨ fùusə ŋku tɨta ŋwaa-nsiŋ fɨ taa swi. Yia kee kɨɨ nə shəŋ ŋkɨə faŋ vɨ gə̀ nùŋ ŋwə shɔ me.» 3Pita ghɔ liŋ wi ghɔ́ ndɔ fɨ nsi, nyɨŋ gə̀ maa kwiŋ swi ghɔ́. 4Wuu məzwetə nu Yeso ghɔ́ faŋ ghɔ Pita ndɔ̀ kɨ nyɨŋ gə mɔ́ꞌ nə, nyɨŋ shɔ̀ɔ Pita, fì vɨsɨ, gə̀ zìꞌ shuu swi yɔ́ vɨsɨ, 5gùŋnə nsi, ndèynə taa swi ghɔ́, yè njwisə fusə nsɨə faŋ vɨ nə ndìŋ Yeso taa tey yi nə, faŋ nsə nɔ̀ŋ taa swi. Ŋwə nə kee ŋii gə̀ taa swi yɔ́ me. 6Fɨkɨꞌ Pita, faŋ ŋwə nə beꞌsə ŋwə fɨ yiba nə, jwi zìꞌ shɔ nɨzi, ŋìi taa swi yɔ́ yighee muꞌ, yè njwisə sɔ́ faŋ nsə nə nɔ̀ŋ taa swi yɔ́, 7nə njwi njyə faŋ vɨ nə kà tɔ Yeso shɔ nə. Yinjii nə dùꞌ nɨŋkwiŋ, tɨ́ vɨ buꞌnə, nùŋ shɔ. 8Liŋ wi ghɔ́ faŋ ŋwə nii jwì vɨsɨ nə, baa kɨ nii luu ŋìi taa swi yɔ́ nɨzi, yè vənu vɔ́, biŋ laa Yeso ywèy fɨ shɨ yiku. 9Jwi kɔ tɨ́ shi kɔ́, vəŋ nə kee ta kɨ̀ɨ nə ŋiꞌ yigi njyə faŋ vɨ nə nyɔ̀ꞌ taa ŋwaꞌlə Nwi laa, wuu məbweysə vɨɨ Nwi ndɔ ku, baa ywey fɨ shɨ yiku me. 10Vɨɨ məzwetə nu Yeso vɔ́ baa bə̀ŋ gə̀ shiŋii.

Faŋ Yeso nə fùu yikəꞌ Meri Madalin

(Matiu 28.9-10; Mark 16.9-11)

11Meri baa kɨ bəŋ jwì shuu swi yɔ́, jwì tɨ̀ŋnə fu, kɨ gwia. Faŋ ŋwə nəə gwia, guŋnə, ndeynə taa swi ghɔ́, 12yè nshiisə-ŋiisə Nwi səbɔɔ, faŋ vəŋ nə mɔ̀ꞌ njwisə fusə. Vəŋ nə dùꞌ maa shəŋ ŋkɨə faŋ vɨ nə nùŋsə ŋku Yeso shɔ nə, wuu mɔ́ꞌ duꞌ shəŋ ŋkɨə faŋ tɔ Yeso nə nɔ̀ŋ shɔ. Wə mɔ́ꞌ duꞌ shəŋ ŋkɨə faŋ ghuu ghi nə nɔ̀ŋ shɔ. 13Nshiisə-ŋiisə Nwi sɔ́ bitə tɨ́ Meri laa, «A gwia kə, yaa?» Ŋwə gi tɨ́ vəŋ laa, «Vɨ bàꞌsə tɨta ŋwaa, gə̀ nə ŋwə. Mə kee kɨ̀ɨ nə shəŋ ŋkɨə faŋ vɨ gə̀ nùŋ ŋwə shɔ me.» 14Ŋwə gi nɨniŋ, kìasə ŋwaa wi, yè Yeso faŋ ŋwə nə tɨ̀ŋnə yifi, luu nə, sɨ ghi kee ley laa lùu Yeso me. 15Yeso gi tɨ́ ŋwə laa, «A gwia kə, yaa? A kəə ndə?» Meri nəə bɨꞌtə laa lùu wə ntɨə faŋ ŋwə faꞌ taa yindɨɨ yifi. Ŋwə gi tɨ́ Yeso laa, «Tɨta, kɨ luu laa ndì ghɔ ndì ŋwə, a də̀ shəŋ ŋkɨə faŋ a gə̀ nùŋ ŋwə shɔ shee, tɨ́ kaꞌ mə gə baa ndì ŋwə fɨ fuŋ.» 16Yeso kɨ nii tìi ŋwə laa, «Meri!» Ŋwə kiasə ŋwaa wi, bìŋ maa ghaŋ Hibru laa, «Raboni.» Ŋiꞌ raboni lùu laa, wuu mədeesə kwalə. 17Yeso gi tɨ́ ŋwə laa, «Kaa kɔŋ mə me, buꞌ laa mə kee ta gə̀ yizɔ yɨ Tii ŋwaa me. Gə yè vaŋ-nshwi vaŋ-nsoo, nàysə tɨ́ vəŋ laa mə taa koꞌ gə̀ yizɔ yɨ Tii ŋwaa, faŋ lùu Tii wiŋ nɨzi. Lùu ŋwə lùu Nwi ŋwaa, baa lùu Nwi wiŋ nɨzi.» 18Meri ndɔ gə̀, gə̀ nàysə tɨ́ vɨɨ məzwetə nu Yeso laa yi yè Yeso, baa nàysə yigi njyə faŋ Yeso nii gì tɨ́ ŋwə nə nɨzi.

Faŋ Yeso nə fùu yikəꞌ vɨɨ məzwetə nu ki

(Matiu 28.16-20; Mark 16.14-18; Lukas 24.36-49)

19Kɨ lùu laynəfu maa shi kɔ́, faŋ nə luu shi vɨsɨ fɨ taa yiwiŋ, vɨɨ məzwetə nu Yeso baytə taa ŋii yimɔ́ꞌ, fə̀ŋ shuufɔ, buꞌ laa vəŋ nəə fee vɨɨ Jus. Faŋ vəŋ nə luu yifi, Yeso fuu taa ŋwaa vəŋ, shɔ̀ꞌtə vəŋ laa, «Mənɔŋ-bwaŋnə tɔ viŋ.» 20Ŋwə gi nɨniŋ, ndɔ̀ də̀ ghɔ ghi tɨ́ vəŋ, nə way yiŋii wi. Vɨɨ məzwetə nu ki ŋaytə ŋkee dɨdɨꞌ faŋ vəŋ nə ye tɨta Yeso nə. 21Yeso baa gì tɨ́ vəŋ laa, «Mənɔŋ-bwaŋnə tɔ viŋ. Tɨta Nwi nə tɔ̀ŋ mə nə ntɔŋ. Nɨniŋ, mə tɔŋ viŋ ndwə nə ntɔŋ Nwi yɔ́.» 22Ŋwə nə gì nɨniŋ mètə, ndɔ̀ tàw zwitə maa vəŋ, gì laa, «Viŋ fi Zwitə Ley Nwi. 23Kɨ luu viŋ ndɔ ndenə yibɨsə wə mɔ́ꞌ, buu Nwi taa ndenə yibɨsə wə ghɔ́ nɨzi. Gə̀ fɨ maa wə ntɨə faŋ viŋ kee ndènə yibɨsə yi me, yibɨsə yi yɔ́ goꞌ tɔ ŋwə.

Faŋ Yeso nə fùu yikəꞌ Tɔmas

24Maa yighee yɔ́ faŋ Yeso nə bɨ jwì də̀ ŋwaa wi tɨ́ vɨɨ məzwetə nu ki, Tɔmas nə kee lùu shɔ ghɔ vɨ vəŋ mɔ́ꞌ me. Tɔmas ghɔ́ nə luu fɨ taa ŋwaa vɨɨ məzwetə nu Yeso njɔsə-bɔɔ nə. Lùu ŋwə faŋ vɨ tii ŋwə nə Siꞌye nə. 25Tɔmas ghɔ́ bəŋ jwì, vəŋ naysə tɨ́ ŋwə laa vəŋ yè tɨta Yeso. Tɔmas bəŋsə tɨ́ vəŋ laa, «Mə kee biŋ laa nu kɔ́ lùu yinsəŋ me, maa laa mə ye yifɨɨ mbey, faŋ vɨ nə bèy ghɔ ŋwə nə me, ndɔ baa kɔ̀ŋ wee-ghɔ ŋwaa maa yifɨɨ yi, mɔ̀ꞌ ghɔ kaŋ maa way yiŋii wi me.» 26Vəshi shɔɔ yifɔŋ, vɨɨ məzwetə nu Yeso baa bàytə taa ŋii, Tɔmas luu shɔ ghɔ vɨ vəŋ mɔ́ꞌ. Faŋ vəŋ nə kɔlə fə̀ŋ shuu ŋii, Yeso fuu taa ŋwaa vəŋ, shɔꞌtə vəŋ, gì laa, «Mənɔŋ-bwaŋnə tɔ viŋ,» 27kɨ nii gì tɨ́ Tɔmas laa, «Kɔŋ wee-ghɔ wə taa ghɔ mə ye. Nesə kwiŋ wə, kɔŋ ghɔ kə way yiŋii mə. Kɨ tɔ kə baa shii me; biŋ laa lùu mə.» 28Tɔmas gi tɨ́ Yeso laa, «Tɨta ŋwaa, Nwi ŋwaa!» 29Yeso gi tɨ́ ŋwə laa, «A bìŋ mə, buꞌ laa a ye mə nə yisɨ yə. Mənɔŋ-bwaŋnə ndɔ luu tɔ vɨɨ mbɨə faŋ vəŋ kee yè vənu və̀ nə sɨ me, biŋ vənu vɔ́.»

Ŋiꞌ ŋwaꞌlə Jɔn

30Yeso nə baa yɨ̀ vənu və shuu yɔŋvə vəyaŋ, vɨɨ məzwetə nu ki ye, vɨ kee nyɔ̀ꞌ vənu vɔ́ taa ŋwaꞌlə ŋwə̀ me. 31Vənu mbɨə faŋ vɨ nyɔ̀ꞌ feenə, vɨ nyɔ̀ꞌ laa viŋ biŋ laa Yeso luu wə ntɨə faŋ Nwi nə shoꞌ, wuu məbweysə ŋwaa-nsiŋ, Wee Nwi. Viŋ biŋ yizii yi, nùŋ fwi siŋ maa ŋwə, buu kìi məbwey vəlwaŋ.

Currently Selected:

Jɔn 20: bav

Highlight

Copy