Jɔn 19

1Nɨniŋ, Pilate gi laa vɨ jia Yeso, sàŋ ŋwə nə vəkɔtə. 2Vəsoogeꞌ ba yisɔꞌ nə nyawsə laməŋkwi, bèe tɔ Yeso, laa lùu yisɔꞌ vəfwàŋ, ndɔ̀ baa ndì njwi yibay, mɔ̀ꞌ maa ŋwə, laa lùu njwi vəfwàŋ. 3Vəŋ kɨ nii tey kɨ jwi, tuŋ nsəꞌ tɨ́ ŋwə, gisə laa, «Yia shɔꞌtə ghɔ mɔɔ, fwàŋ vɨɨ Jus.» Vəŋ nə jwì tàw ŋwə nɨniŋ, ndɔ̀ sàŋ ŋwə fɨ maa yikəꞌ yi.

4Pilate baa fùu jwi shəŋ ŋkɨə faŋ vɨɨ Jus nə luu shɔ nə, gì tɨ́ vəŋ laa, «Viŋ zɔ, mə taa fuusə wə ŋwə̀, laa viŋ kɨɨ yinsəŋ laa mə kee yè bɨkə wi me.» 5Nɨniŋ, Yeso fuu fu, faŋ ŋwə nəə kɨ bii nə yisɔꞌ nyawsə yì tɔ ŋwə nə, nə njwi vəfwàŋ yì maa ŋwə nə. Pilate gi tɨ́ vəŋ laa, «Viŋ ye wə ghɔ́.» 6Vɨɨ kwalə məfeꞌ Nwi ghɔ vɨ vɨɨ faꞌ vəŋ ye Yeso, yùmə laa, «Vɨ bey ŋwə fuu fəŋkɔꞌ fə ŋkɨꞌsə! Vɨ bey ŋwə fuu fəŋkɔꞌ fə ŋkɨꞌsə!» Pilate gi tɨ́ vəŋ laa, «Viŋ ndi ŋwə ŋgɨɨ-viŋ, gə̀ bèy ŋwə fuu fəŋkɔꞌ fə ŋkɨꞌsə. Gə fɨ maa mə, mə kee yè nu bwə ki me.» 7Vɨɨ Jus vɔ́ gi laa, «Nuŋsə yia yimɔ́ꞌ lùu shɔ laa vɨ yɨsə kəŋ wə ŋwə̀ ku, buꞌ laa ŋwə taw Nwi, gì laa yi lùu Wee Nwi.» 8Pilate zɔ nu kɔ́, laa Yeso gi laa yi luu Wee Nwi, ŋwə baa mètə fèe, 9bə̀ŋ ŋìi taa ŋii ntoꞌ ghɔ Yeso, bìtə tɨ́ Yeso laa ŋwə sii ndɔ̀ fɨ fə? Yeso kee bəŋsə nu tɨ́ ŋwə me. 10Nɨniŋ, Pilate gi tɨ́ ŋwə laa, «Sii yɨ̀ kə a kee kɔ bəŋsə shee me? A kee kɨɨ laa mə kìi wutə tɨ́ kaꞌ mə meꞌtə ghɔ yimu? Mə baa kìi wutə tɨ́ kaꞌ mə bey ghɔ fuu fəŋkɔꞌ fə ŋkɨꞌsə.» 11Yeso bəŋsə tɨ́ ŋwə laa, «Nə toꞌ maa kɔ Nwi kɔ̀ wutə kɔ́ tɨ́ ghɔ me, buu kaꞌ a kee kìi wutə tɔ mə me. Nɨniŋ, nu bwə wə ntɨə faŋ ŋwə nii kɔ̀ mə tɨ́ ghɔ nə, shɔɔ ŋkɨə faŋ yɨ̀ ghɔ.» 12Faŋ Pilate nə zɔ̀ nee, kɨ kəə meꞌtə Yeso. Luu nə, vɨɨ Jus baa mètə yɨyumə laa, kɨ luu ŋwə meꞌtə Yeso buu kaꞌ ŋwə kee baa lùu wuu jəə tɨ́ fwàŋ kwalə Kaysa me, buꞌ faŋ ŋwə meꞌtə wə faŋ ŋwə kəə laa yi luu fwàŋ. 13Pilate zɔ nu kɔ́, fùusə Yeso fu, dùꞌnə fuu ŋkaw məshia nsɔꞌ maa shəŋ ŋkɨə faŋ vɨ nəə tii nə taa shiŋii ŋoꞌsə. Yizii shəŋ kɔ́ yimɔ́ꞌ luu laa Gabata maa ghaŋ Hibru. 14Shi ŋkɨə faŋ nu kɔ́ nə gày nə, nə luu maa shi ŋkɨə faŋ fu taa ndɔ lee lùu shi zwisə, maa yighee Pasa. Nə luu maa vəshɨshwi ntɔfə nshia-ndoo-mbisɨ. Pilate gi tɨ́ vɨɨ Jus vɔ́ laa, «Viŋ ye fwàŋ wiŋ ghɔ́.» 15Vəŋ yumə laa, vɨ baꞌsə ŋwə, bèy ŋwə fuu fəŋkɔꞌ fə ŋkɨꞌsə laa ŋwə ku. Pilate gi tɨ́ vəŋ laa, «Viŋ kəə laa mə bey fwàŋ wiŋ fuu fəŋkɔꞌ fə ŋkɨꞌsə lee?» Vɨɨ kwalə məfeꞌ Nwi bəŋsə tɨ́ ŋwə laa, vəŋ kii fwàŋ sheꞌ muꞌ, faŋ lùu Kaysa, (fwàŋ kwalə ghɔ́ fɨ shɨ Rom.) 16Nɨniŋ, Pilate shoꞌtə Yeso tɨ́ vəŋ, tɨ́ kaꞌ vɨ bey ŋwə fuu fəŋkɔꞌ fə ŋkɨꞌsə.

Faŋ vɨ nə bèy Yeso fuu fəŋkɔꞌ fə ŋkɨꞌsə

(Matiu 27.32-44; Mark 15.21-32; Lukas 23.26-43)

Vəsogeꞌ kɨ nii ndì Yeso, gə̀ nə ŋwə. 17Vəŋ gə nɨniŋ, Yeso shaꞌ fəŋkɔꞌ fə ŋkɨꞌsə fi ŋgɨɨ-ŋwə, ndɔ̀ gə̀ nɨniŋ maa shəŋ mɔ́ꞌ faŋ vɨ tii nə shəŋ ghutə tɔ wə. Yizii shəŋ kɔ́ maa ghaŋ Hibru nə luu Golgota. 18Vəŋ nə zìꞌ yifi, bèy Yeso fuu fəŋkɔꞌ fə ŋkɨꞌsə. Maa yighee yɔ́ vɨ baa bèy vɨɨ vəmɔ́ꞌ vəbɔɔ, wə mɔ́ꞌ maa kwiŋ Yeso muꞌ, wuu mɔ́ꞌ maa kwiŋ muꞌ, Yeso luu nɨntəŋ ŋwaa vəŋ. 19Pilate nə nyɔ̀ꞌ tɔ fəŋkɔꞌ fə ŋkɨꞌsə fə Yeso laa, «Yeso, wuu Nazaret, fwàŋ vɨɨ Jus.» 20Vɨ nə nyɔ̀ꞌ nu kɔ́ maa təghaŋ tətia, maa ghaŋ Hibru, faŋ luu sheꞌ ghaŋ vɨɨ Jus nə, nə maa ghaŋ Rom, nə maa ghaŋ Griik. Vɨɨ Jus vəyaŋ nə tìi nu kɔ́, buꞌ laa shəŋ kɔ́ nə kee lùu ntaŋ fɨ taa shɨ me. 21Nɨniŋ, vɨɨ kwalə məfeꞌ Nwi və vɨɨ Jus gə yè Pilate, gì tɨ́ ŋwə laa, kɨ ŋwə nyɔꞌ laa fwàŋ vɨɨ Jus me. Bàw ŋwə nyɔꞌ laa, wə ŋwə̀ nə gì laa yi luu fwàŋ vɨɨ Jus. 22Pilate bəŋsə tɨ́ vəŋ laa, «Nu ŋkɨə faŋ mə nii nyɔ̀ꞌ, mə nyɔ̀ꞌ yighee muꞌ.»

23Faŋ vəsogeꞌ bey Yeso fuu fəŋkɔꞌ fə ŋkɨꞌsə mètə, ndì njwi si, gàasə vəshəŋ yishwe, sogeꞌ tɨ̀ me sogeꞌ ndi njii, goꞌ njwi yi yimɔꞌ, faŋ vɨ nə kee ta njwi yimɔꞌ yɔ́ me, vɨ nə tətuŋ, shù fɨ tɔ yi, ziꞌ ŋiꞌ yi. 24Vəŋ gi vəŋ vəŋ laa, «Kɨ nsiŋ setə me, nsiŋ tuŋ beꞌ shɔ, yè wə ntɨə faŋ ŋwə taa zɨ.» Ŋkə nə gày nɨniŋ maa məfaynə nə nu ŋkɨə faŋ ŋkə lùu taa ŋwaꞌlə Nwi laa,

«Vəŋ nə gàtə njwi saŋ vəŋ vəŋ,

tùŋ beꞌ maa njwi nyaa yimɔꞌ.» #Sam 22.19. Luu sheꞌ faŋ vəsogeꞌ vɔ́ nə yɨ̀.

25Faŋ vɨ nə bèy Yeso fuu fəŋkɔꞌ fə ŋkɨꞌsə nə, nshu Yeso ghɔ weenshu wi wəzwi, nə Meri zu Klopas, nə Meri Madalin tɨŋnə ŋiꞌ fəŋkɔꞌ fə ŋkɨꞌsə fə Yeso. 26Yeso ye nshu wi ghɔ wuu məzwetə nu ki ŋgwə faŋ Yeso nə kàw ŋwə shɔ̀ɔ nə, faŋ vəŋ nə tɨŋnə yifi, ŋwə gi tɨ́ nshu wi laa, «Yaa ŋwaa, ye ŋwiŋ wə nə,» 27baa kɨ nii bə̀ŋsə gì tɨ́ wuu məzwetə nu ki ghɔ́ laa, «Ye nshu wə nə.» Shù fɨ maa shi kɔ́, wuu məzwetə nu Yeso ghɔ́ ndi nshu Yeso, gə nə ŋwə shiŋii.

Faŋ Yeso nə kù

(Matiu 27.45-56; Mark 15.33-41; Lukas 23.44-49)

28Yiŋkii kɨ mè, tɨ́ Yeso kɨɨ laa yi mètə vənu vi vənshə, kɨ nii gì laa, «Fwi nyaa yɔŋ.» Nɨniŋ, ŋkə fàynə nə nu faŋ ŋkə lùu taa ŋwaꞌlə Nwi. #Sam 22.16; 69.22. 29Kay nə luu yifi nə məluꞌ məshəsə taa tey yi. Vəŋ ndi kushaa, shù taa tey yi, fa tɔ yigiŋ faŋ vɨ tii nə Isop, nèsə tɨ́ ŋwə, jia shuu ŋwə. 30Yeso swiŋ məluꞌ mbɔ́, ndɔ̀ gì laa, «Ŋkə mè,» mɔ̀ꞌ me wi way muꞌ, kɨ nii yiku.

31Shi kɔ́ nə luu shi ŋkɨə faŋ vɨ yaa kɨ lootə yiŋwaa, kɨꞌ shi zwisə Nwi. Gə̀ fɨ maa nshinə vəŋ, ŋku wə kee yaa kɨ luu fuu fəŋkɔꞌ fə ŋkɨꞌsə maa shi zwisə vəŋ me. Shi zwisə kɔ́ nə luu ŋkee shi kwalə nɨzi. Nɨniŋ, vɨɨ Jus gə bùꞌ ghɔ tɨ́ Pilate laa ŋwə yɨ vɨ gə bɨꞌtə fəŋ vɨɨ vì fuu məŋkɔꞌ mə ŋkɨꞌsə nə, laa vəŋ yasə kukə, vɨ sùꞌsə vəŋ, təə. 32Nɨniŋ, vəsogeꞌ jwi, bɨ̀ꞌtə fəŋ mfɔŋ wə, baa bɨ̀ꞌtə ŋgə wuu mɔ́ꞌ faŋ vɨ nə bèy vəŋ ghɔ vɨ Yeso mɔ́ꞌ nə. 33Faŋ vəŋ nə jwi zìꞌ maa Yeso, ye laa Yeso nii duꞌtə ŋwə ku. Nɨniŋ, vəŋ kee baa bɨ̀ꞌtə fəŋ ghi me. 34Luu nə, sogeꞌ mɔ́ꞌ ndi yighaw yi, sɔ̀ way yiŋii Yeso, mənshi nə muu fuu fɨ maa Yeso. 35Wə ntɨə faŋ ŋwə ŋwàꞌlə nu kɔ́, nə yè nu kɔ́ nə sɨ, nàysə tɨ́ vɨɨ. Ŋwə naysə nu yinsəŋ. Ŋwə kɔꞌ kɨɨ laa ŋwə gisə yinsəŋ. Ŋwə naysə nu kɔ́ tɨ́ viŋ, tɨ́ kaꞌ viŋ bìŋ Yeso. 36Nu kɔ́ nə gày maa məfaynə maa nu ŋkɨə faŋ vɨ nə nyɔ̀ꞌ taa ŋwaꞌlə Nwi ŋkee fɨshi laa, «Vɨ ndɔ kee bɨꞌ tuu wutə ŋwaa ki me.» #Eksodɔs 12.46; Sam 34.21. 37Vɨ nə baa nyɔ̀ꞌ maa shəŋ mɔ́ꞌ taa ŋwaꞌlə Nwi laa, «Vɨɨ ndɔ ye wə ntɨə faŋ vəŋ nə ndɨəsə ŋwə.» #Zakaraya 12.10.

Faŋ vɨ nə tə̀ə Yeso

(Matiu 27.57-61; Mark 15.42-47; Lukas 23.50-56)

38Yiŋkii kɨ mè, wə mɔ́ꞌ jwi yifi, yizii yi luu Josef fɨ ntɨꞌ Arimatia. Ŋwə nə luu wə faŋ ŋwə nəə beꞌsə Yeso, kee beꞌsə ntee me, buꞌ laa ŋwə nəə fee vɨɨ kwalə vɨɨ Jus. Josef ghɔ́ gə ye Pilate, ndwàŋ ŋwə laa ŋwə kɔ ŋku Yeso, yi gə təə. Pilate biŋ. Josef gə ndì ŋku Yeso. 39Wə mɔ́ꞌ nə gə̀ shɔ nɨzi. Wə ghɔ́ lùu Nikodemɔs faŋ ŋwə nə jwì yɨ Yeso vətuꞌ yighee vɨsɨ nə. Ŋwə nə jwì nə vəfɔ nə lamenda faŋ vɨ tii nə mir nə alos. Mbə nə dɨɨ, lùu yaa vəmba və fəŋway vəbɔɔ. 40Josef ghɔ Nikodemɔs ndi ŋku Yeso, kà ŋwə taa njwisə fusə nə lamenda ghɔ́ faŋ lumə ki luu ŋkee kəjəə, faŋ luu ŋgunə vɨɨ Jus maa mətəə wə nɨniŋ. 41Yindɨɨ yimɔ́ꞌ nə luu maa shəŋ kɔ́ faŋ vɨ nə bèy Yeso shɔ fuu fəŋkɔꞌ fə ŋkɨꞌsə nə. Swi mɔ́ꞌ nə luu shɔ taa yindɨɨ yɔ́, faŋ vɨ nə tə̀ə taa ŋoꞌ. Vɨ nə kee ta təə wə shɔ me. 42Nɨniŋ, faŋ shi kɔ́ nə luu shi faŋ vɨ lootə yiŋwaa buꞌ shi zwisə nə, vəŋ kwaŋ Yeso taa swi yɔ́, buꞌ laa shəŋ kɔ́ nə luu nshənə.

Currently Selected:

Jɔn 19: bav

Highlight

Copy