Jɔn 18

Faŋ vɨ nə jìa Yeso

(Matiu 26.47-56; Mark 14.43-50; Lukas 22.47-53)

1Yeso nə shɔ̀ꞌtə Nwi tɨ́ nee mètə, kɨ nii fùu fu ghɔ vɨ vɨɨ məzwetə nu ki, tɔ̀ŋ muu mə Kedron, gə̀ maa shəŋ kəmɔ́ꞌ faŋ yindɨɨ yimɔ́ꞌ nə luu shɔ. Vəŋ gə ŋìi taa yindɨɨ yɔ́. 2Judas, wuu məfiŋ Yeso, nə kɨ̀ɨ nə shəŋ kɔ́ nɨzi, buꞌ laa Yeso ghɔ vɨ vɨɨ məzwetə nu ki nə duꞌtə vəŋ faynə shɔ ghee yaŋ. 3Nɨniŋ, Judas ndi vəsogeꞌ nə vɨɨ faꞌ fɨ taa ŋii Nwi yikwalə faŋ nə tɔ̀ŋ vɨɨ kwalə məfeꞌ Nwi nə vɨɨ Farisii tɔ̀ŋ vəŋ. Judas ghɔ vɨ vɨɨ vɔ́ gə maa shəŋ kɔ́ nə təkiꞌ nə vətɔ və yighaw. 4Vəŋ ziꞌ yifi, Yeso fuu fɨ taa yindɨɨ yɔ́, tɨ́ ŋwə nə kɔꞌ kɨɨ nə vənu vənshə faŋ mbə kəə gay maa ŋwə. Ŋwə fuu, bìtə tɨ́ vəŋ laa, «Viŋ kəə ndə?» 5Vəŋ bəŋsə tɨ́ ŋwə laa vəŋ kəə Yeso, wuu Nazaret wì. Yeso gi tɨ́ vəŋ laa, «Ye mə nə.» Judas, wuu məfiŋ Yeso ghɔ́, nə tɨ̀ŋnə ghɔ vɨ vəŋ. 6Faŋ Yeso nə gì tɨ́ vəŋ laa, «Ye mə nə,» vəŋ bəŋ gə̀ nə yiba yiba, gùkə nsi. 7Yeso baa kɨ bitə tɨ́ vəŋ laa vəŋ kəə ndə? Vəŋ baa gi laa vəŋ kəə Yeso, wuu Nazaret wì. 8Yeso baa kii bəŋsə tɨ́ vəŋ laa, «Maa mə duꞌtə mə gì tɨ́ viŋ laa lùu mə. Viŋ kɨ luu kɨ kəə mə, viŋ meꞌtə vɨɨ vaŋ və̀, vəŋ gə nə ŋwaa vəŋ.» 9Ŋwə nə gì nɨniŋ laa nu ŋkɨə faŋ ŋwə nə nàysə yighee vɨsɨ faynə, laa kɨ tuu wə muꞌ fɨ taa ŋwaa vɨɨ vi faŋ Nwi nə kɔ̀ tɨ́ yi nə, ndi me. 10Baꞌ yighaw nə luu ghɔ Saymon Pita. Pita shoꞌ baꞌ ki kɔ́, sàŋ maa wuu faꞌ wuu kwalə məfeꞌ Nwi, shia tuulə ki maꞌnə. Yizii wuu faꞌ ghɔ́ nə luu Malkɔs. 11Yeso gi tɨ́ Pita laa ŋwə kwaŋ baꞌ ki taa kɔ. «Nə kaꞌ mə kee nu ndaw njyə faŋ tɨta Nwi kɔ̀ shee nə yimu?» 12Tɨɨ vəsogeꞌ ghɔ vəsogeꞌ vi, nə vɨɨ faꞌ vɨɨ Jus vɔ́ kɨ nii jìa Yeso, kà ŋwə, 13ndì ŋwə, ghɔ vɨ vəŋ bɨ gə ye Anas, buꞌ laa Anas ghɔ́ nə luu shi Kayafas, tɨɨ zu Kayafas, faŋ nə luu wuu kwalə məfeꞌ Nwi maa ŋuꞌ yɔ́. 14Kayafas ghɔ́ nə luu wə ntɨə faŋ ŋwə nə gì tɨ́ vɨɨ Jus laa bàw wə muꞌ ku tɔ vɨɨ vənshə.

Faŋ vɨɨ kwalə məfeꞌ Nwi nə shìa nsɔꞌ tɔ Yeso, Pita twey Yeso

(Matiu 26.59-75; Mark 14.55-72; Lukas 22.55-71)

15Saymon Pita ghɔ wuu məzwetə nu Yeso mɔ́ꞌ beꞌsə Yeso. Wuu məzwetə ghɔ́ nə luu wə faŋ Anas, wuu kwalə məfeꞌ Nwi, nə kɨ̀ɨ nə ŋwə. Nɨniŋ, ŋwə gə ŋìi ntoꞌ Anas faŋ vɨ nəə kɨ bii tii ŋwə nə wuu kwalə məfeꞌ Nwi nə, yighee njyə faŋ vɨ nə ŋìi nə Yeso shɔ nə. 16Pita nə tɨ̀ŋnə sheꞌ shuu ŋkɔꞌ. Wuu məzwetə wì faŋ wuu kwalə məfeꞌ Nwi nə kɨ̀ɨ nə ŋwə nə, fuu gə̀ gì tɨ́ wə ntɨə faŋ ŋwə nə shii shuu ŋkɔꞌ laa, ŋwə meꞌtə Pita ŋii. Ŋwə kɨ nii gə ndì Pita, ghɔ ŋwə ŋii. 17Wuu məshii shuu ŋkɔꞌ ghɔ́, faŋ nə luu wəzwi, gi tɨ́ Pita laa, «Maa a lùu fɨ maa vɨɨ məzwetə nu Yeso vì?» Pita twey. 18Vətuꞌ shi kɔ́ vədɨꞌ nə luu ŋkee vəyoonə. Nɨniŋ, vɨɨ faꞌ vɨɨ məfeꞌ Nwi dwi wisə yishɨ wi, kɨ zwasə. Pita nə tɨ̀ŋ shɔ nɨzi, kɨ zwasə wisə.

19Wuu kwalə məfeꞌ Nwi bitə vənu tɨ́ Yeso kɔ̀ŋ vɨɨ məzwetə nu ki nə mədeesə wi. 20Yeso bəŋsə tɨ́ ŋwə laa, «Mə nəə gisə yigi nyaa ntee tɨ́ vɨɨ vənshə. Mə nəə deesə taa ndɔꞌ məshəŋtə ghiŋ, nə taa ŋii Nwi yikwalə, faŋ lùu shəŋ ŋkɨə faŋ vɨɨ Jus vənshə faynə shɔ. Mə nəə kee gisə fɨ taa vəndenə me. 21Sii yɨ̀ kə, buu a bitə shee laa mə deesə kə tɨ́ vɨɨ? Kaꞌ a bìtə tɨ́ vɨɨ mbɨə faŋ vəŋ nə zɔ̀ nu ŋkɨə faŋ mə gisə nə. Vɨɨ vɔ́ kɔꞌ kɨɨ nə nu ŋkɨə faŋ mə nə gì tɨ́ vəŋ.» 22Faŋ Yeso nə gì yigi nyə̀, wuu faꞌ mɔ́ꞌ faŋ ŋwə nə tɨ̀ŋnə yifi, saŋ Yeso, ndɔ̀ gì tɨ́ ŋwə laa, «Ŋkə kùꞌnə tɨ́ kaꞌ a gisə tɨ́ wuu kwalə məfeꞌ Nwi maa kəŋ jɨɨ nyə̀ nee mu?» 23Yeso gi tɨ́ wuu faꞌ ghɔ́ laa, «Yigisə nyaa kɨ luu kee lùu yiloomə me, a nàysə nu ŋkɨə faŋ ŋkə kee lùu kəloomə me shee. Luu nə, mə kee gi gù nu me, sii yɨ̀ kə, buu a saŋ mə?» 24Anas kɨ nii tɔ̀ŋ Yeso tɨ́ wuu kwalə məfeꞌ Nwi Kayafas, nə kuusə maa ŋwə.

25Saymon Pita nəə kɨ bii tɨŋnə yifi, zwasə wisə, vɨɨ mɔ́ꞌ gi tɨ́ ŋwə laa, «A kee lùu fɨ maa vɨɨ məzwetə nu Yeso yimu?» Pita baa twèy, gì laa kee lùu yi me. 26Wuu faꞌ wuu kwalə məfeꞌ Nwi mɔ́ꞌ, faŋ nə luu weenshu wə ntɨə faŋ Pita nə shìa tuulə ki nə, gì tɨ́ Pita laa, «Yinsəŋ, mə nii ye ghɔ taa yindɨɨ yì, viŋ vɨ Yeso.» 27Pita baa kii twey, gì laa kee lùu yi me. Sheꞌ yighee yɔ́ ŋkɨꞌ taw.

Faŋ goməna Pilate nə shìa nsɔꞌ tɔ Yeso

(Matiu 27.1-2,11-31; Mark 15.1-20; Lukas 23.1-5,13-25)

28Kɨ luu ŋkee taa wee-leefu, vɨ fuusə Yeso fɨ fu Kayafas, gə̀ nə ŋwə fu goməna. Luu nə, vɨɨ Jus vɔ́ kee ŋìi taa ŋii nsɔꞌsə me, buꞌ laa goməna nə kee lùu wuu Jus me. Nuŋsə vəŋ nə luu laa wə kɨ luu ŋìi taa ŋii wə faŋ kee luu wuu Jus me, buu ŋwə kee baa lùu wuu ley me. Kaꞌ ŋwə kee baa zɨ fazɨ Pasa me. 29Nɨniŋ, goməna Pilate fuu fu, ye vəŋ fu, bìtə tɨ́ vəŋ laa, «Viŋ jìa wə ŋwə̀ laa ŋwə yɨ̀ kə bwə?» 30Vəŋ bəŋsə tɨ́ ŋwə laa, «Wə ŋwə̀ nəə toꞌ kee lùu wuu bwə me, buu yia kee jwì nə ŋwə tɨ́ ghɔ me.» 31Pilate gi tɨ́ vəŋ laa vəŋ ndi ŋwə, gə̀ nə ŋwə, gə̀ shìa nsɔꞌ yi ŋgɨɨ-vəŋ, faŋ nuŋsə vəŋ də̀. Vəŋ gi laa, vəŋ kee kìi wutə maa məshia nsɔꞌ wə, laa vɨ zwi ŋwə me. 32Ŋkə nə gày nɨniŋ, laa Yeso ku yiku maa jɨɨ njyə faŋ ŋwə nə duꞌtə ŋwə naysə tɨ́ vɨɨ laa yi ndɔ ku nyə. 33Pilate bəŋ baa ŋìi taa ŋii ntoꞌ, tìi Yeso laa ŋwə jwi. Yeso jwi, ŋwə bitə tɨ́ Yeso laa, «A luu fwàŋ vɨɨ Jus mu?» 34Yeso bəŋsə tɨ́ ŋwə laa, «Nu kə̀ faŋ a bitə̀ nə, lùu mbɨꞌtə yə mu? Mu a bìtə buꞌ yigisə vɨɨ?» 35Pilate bəŋsə tɨ́ ŋwə laa, «Mə kee lùu wuu Jus me. Maa jwì vɨɨ və ghɔ vɨ ŋkee vɨɨ kwalə məfeꞌ Nwi, jwì nə ghɔ, kɔ̀ ghɔ tɨ́ mə. A yɨ̀ kə bwə, buu vəŋ jia ghɔ?» 36Yeso bəŋsə tɨ́ ŋwə laa, «Nu yifwàŋ kaŋ kee lùu nu shɨ nsi kə̀ me. Nii toꞌ lùu laa nu yifwàŋ kaŋ lùu nu shɨ nsi kə̀, buu vɨɨ vaŋ nywenə maa nu yifwàŋ kaŋ, tɨ́ kaꞌ vəŋ tɨ̀ꞌtə vɨɨ Jus fɨ vəŋ kɔŋ mə. Luu nə, nu yifwàŋ kaŋ kee lùu nu fɨ feenə me.» 37Pilate gi tɨ́ ŋwə laa, «Ŋkə bee nə də̀ laa a luu fwàŋ mu?» Yeso bəŋsə tɨ́ ŋwə laa «A gì yinsəŋ laa mə luu fwàŋ. Nu ŋkɨə faŋ mə jwì ŋkə shɨ nsi luu sheꞌ kəmuꞌ. Ŋkə lùu laa mə də nu ŋkɨə faŋ lùu yinsəŋ tɨ́ vɨɨ. Lùu ŋiꞌ nu ŋkɨə faŋ vɨ nə bì mə taa mbi. Wə tɨ̀ me wə faŋ ŋwə kaw nu yinsəŋ, zɔnə yigisə nyaa.» 38Pilate gi tɨ́ ŋwə laa, «Nu yinsəŋ sii lùu kə?» Ŋwə gi nɨniŋ, baa fùu fu, gə̀ yè vɨɨ Jus, gì tɨ́ vəŋ laa, «Mə kee ye tuu nu kəmuꞌ faŋ wə ŋwə̀ gù me.» 39Ŋwə nə gì nɨniŋ, baa gì laa, «Maa viŋ yaa kɨ bitə wuu ŋii mfiŋ muꞌ fɨ ghɔ mə, laa mə meꞌtə ŋwə, ŋwə gə maa shi Pasa. Nɨniŋ, viŋ kəə laa mə fuusə fwàŋ vɨɨ Jus ŋwə̀, kɔ̀ tɨ́ viŋ mu?» 40Vəŋ baa kɨ yùmə ŋkee nəŋay, gì laa, «Bey, kee lùu wə ntɨə faŋ a taa fuusə me. Yia kəə laa a fuusə Barabas, kɔ̀ tɨ́ yia.» Barabas ghɔ́ nə luu ndɔꞌ bwə.

Currently Selected:

Jɔn 18: bav

Highlight

Copy