Jɔn 11

Faŋ Yeso nə ywèysə Lasarɔs fɨ shɨ yiku

1Wə mɔ́ꞌ nə luu shɔ ntɨꞌ Betani, shɨ Judia, zɨzasə. Yizii wə ghɔ́ luu Lasarɔs. Vaŋ-nshwi vi vəki nə luu shɔ nɨzi. Təzii təvəŋ luu Meri nə Marta. 2Nə luu Meri ŋgwə faŋ ŋwə nə zwisə məŋgwə mə shwaŋ ndɔŋnə ghuu Yeso, baa tɔ̀ŋsə ghuu Yeso nə nyuŋsə tɔ si nə. Lasarɔs, weenshu Meri ghɔ́, nə zɨzasə. 3Vaŋ-nshwi Lasarɔs tɔŋ ntɔŋ tɨ́ Yeso laa, «Ŋkee wuumba wə Lasarɔs faŋ a kàw ŋwə, zɨzasə.» 4Yeso zɔ ntɔŋ yɔ́, gì laa, kɨ za kɔ́ kee taa jwi nə yiku me. Ŋkə lùu sheꞌ laa vɨɨ taa ye yikwalə Nwi, laa vɨ taa kɨ kɔ feenə tɨ́ Wee Nwi. 5Yeso nəə kaw Marta nə Meri nə Lasarɔs. 6Luu nə, yighee njyə faŋ ŋwə nə zɔ nu za Lasarɔs kɔ́, ŋwə nə baa bètə, shì vəshi vəbɔɔ maa shəŋ ŋkɨə faŋ ŋwə nə luu shɔ nə, 7buu gì tɨ́ vɨɨ məzwetə nu ki laa, «Nsiŋ bəŋ gə shɨ Judia.» 8Vɨɨ məzwetə nu ki gi tɨ́ ŋwə laa, «Ebee tɨta, sheꞌ ndwə faŋ vɨɨ Jus kəə tumə ghɔ nə ŋoꞌsə zwi, a kəə bəŋ gə kwiŋ yɔ́ lee?» 9Yeso bəŋsə tɨ́ vəŋ laa shi ŋkwəŋ luu vələə njɔsə-bɔɔ, wə faŋ ŋwə toꞌ nə shɨshwi, kaꞌ ŋwə kee tùŋ ghuu ki me, buꞌ faŋ shɨshwi mbi ŋwə̀ dəsə jɨɨ tɨ́ ŋwə yijəə. 10Yaa kɨ tuŋ wə ntɨə faŋ ŋwə toꞌ vətuꞌ taa mfiŋsə tuŋ ghuu ki, buꞌ laa ŋwə toꞌ taa mfiŋsə, kee kìi ndiꞌ me. 11Ŋwə nə gì nɨniŋ, baa gi tɨ́ vəŋ laa, «Wuumba ŋwaa-nsiŋ Lasarɔs bɨbwey. Mə taa gə shɔ, gə̀ yəŋ ŋwə.» 12Vɨɨ məzwetə nu ki gi tɨ́ ŋwə laa, «Tɨta, ŋwə bɨbwey, buu ŋwə taa bwaŋnə.» 13Nɨniŋ nə, yigisə Yeso yɔ́ nə luu laa Lasarɔs kù, luu nə, vɨɨ məzwetə nu ki nə bɨꞌtə laa ŋwə gì yinsəŋ laa Lasarɔs bɨbwey. 14Nɨniŋ, Yeso tɔ ntee laa, Lasarɔs ku, 15baa gì laa, «Mə ŋaytə laa mə nii kee lùu shɔ me buꞌ viŋ, buꞌ laa vənu və̀ gay nee tɨ́ kaꞌ viŋ nùŋ fwi siŋ maa mə. Viŋ ndɔ, nsiŋ gə, nsiŋ gə yè ŋwə.» 16Tɔmas faŋ vɨ tii ŋwə nə Siꞌye nə, gi tɨ́ vəliŋ vi laa, «Viŋ kɨ nshɔ, nsiŋ vɨ vəŋ gə mɔ́ꞌ, tɨ́ la nsiŋ vɨ vəŋ kukə mɔ́ꞌ.»

17Nɨniŋ, vəŋ ndɔ, gə̀ ziꞌ Betani. Faŋ vəŋ nə ziꞌ yifi, zɔ laa shù fɨ nə faŋ vɨ tə̀ə Lasarɔs, lùu vəshi yishwe. 18Ntɨꞌ Betani yɔ́ nə luu nshənə fɨ ntɨꞌ Jerusalem. Ŋkə nə luu sheꞌ yaa vəkilomita vətia. 19Nɨniŋ, vɨɨ Jus nə jwì shɔ vəyaŋ maa məjwi kee yiku yɔ́ tɨ́ Marta nə Meri faŋ weenshu vəŋ kù. 20Faŋ Marta nə zɔ laa Yeso jɨjwi shɔ, ŋwə ndɔ fɨ nsi, fùu fu, gə̀ fàynə ghɔ Yeso jɨɨ. Meri duꞌ taa ŋii, shiŋii. 21Faŋ Marta nə yè Yeso jɨɨ, gì tɨ́ ŋwə laa, «A yaa toꞌ lùu feenə, buu weenshu ŋwaa yaa kee yiku me. 22Nɨniŋ, mə kɔꞌ kɨɨ laa, fa tɨ̀ me fa faŋ a ndwaŋ fɨ ghɔ Nwi, Nwi taa kɔ, faŋ weenshu ŋwaa kɔlə duꞌtə ŋwə ku nə.» 23Yeso gi tɨ́ ŋwə laa, «Weenshu wə taa ywey fɨ shɨ yiku.» 24Marta bəŋsə tɨ́ ŋwə laa, «Mə kɔꞌ kɨɨ laa ŋwə ndɔ ywey fɨ shɨ yiku maa shi ŋkɨə faŋ vɨɨ vənshə ndɔ kɨ ywey fɨ shɨ yiku maa vəndwə və mbi.» 25Yeso bəŋsə tɨ́ ŋwə laa, «Məywey fɨ shɨ yiku nə məbwey vəlwaŋ ndɔ̀ fɨ ghɔ mə. Wə tɨ̀ me wə faŋ ŋwə nùŋ fwi yi maa mə, baa kɔlə kɨku, ŋwə ndɔ kii məbwey vəlwaŋ. 26Wə ntɨə faŋ ŋwə lùu yinyay ndwə ndwə, nùŋ fwi yi maa mə, kaꞌ ŋwə kee ku me, gòꞌsə yighee muꞌ. A bìŋ nɨniŋ mu?» 27Ŋwə bəŋsə tɨ́ ŋwə laa, «Ɔŋ tɨta, mə kɔꞌ kɨɨ laa a lùu wuu məbweysə vɨɨ, Wee Nwi, ŋgwə faŋ Nwi nə gì laa ŋwə ndɔ jwi taa mbi nə.» 28Marta nə gì yigi yɔ́, shɔ̀ɔ gə̀ tìi weenshu wi Meri, shùmə tɨ́ ŋwə sheꞌ bwaŋnə laa, «Tii ŋwaa-nsiŋ jwì. Ŋwə tii ghɔ.» 29Meri zɔ, ndɔ̀ fɨ nsi, gə shəŋ ŋkɨə faŋ Yeso lùu shɔ, gə̀ fàynə ghɔ ŋwə. 30Yighee yɔ́, Yeso nə kee ta ŋii ŋkee taa ntɨꞌ yɔ́ me, ŋwə nəə kɨ bii sheꞌ shəŋ ŋkɨə faŋ Marta nii fɔŋ yè ŋwə shɔ nə. 31Vɨɨ mbɨə faŋ ghɔ vɨ vəŋ nə luu taa ŋii, faŋ vəŋ jwi kee yiku tɨ́ Meri nə, ye faŋ Meri ndɔ̀ fɨ nsi fùu fu titi nə. Vəŋ baa luu ndɔ̀ bèꞌsə ŋwə, buꞌ laa vəŋ nəə bɨꞌtə laa ŋwə gə shuu swi Lasarɔs, gə kɨ gwia yifi. 32Meri gə zìꞌ shəŋ ŋkɨə faŋ Yeso nə luu shɔ nə, nɔ̀ŋ nsi ghuu Yeso, gì tɨ́ ŋwə laa, «Tɨta a yaa toꞌ lùu feenə, buu weenshu ŋwaa yaa kee yiku me.» 33Yeso ye faŋ ŋwə gwìa, vɨɨ mbɨə faŋ ghɔ vɨ vəŋ nə jwì mɔ́ꞌ, baa kɨ luu gwia, fwi Yeso shə. Ŋkə baa za ŋwə fɨ taa fwi ŋwə nɨzi. 34Ŋwə bitə laa, vɨ nə tə̀ə ŋwə fə? Vəŋ gi tɨ́ ŋwə laa ŋwə jwi ye. 35Vəŋ gə, Yeso gwia. 36Vɨɨ Jus vɔ́ gi laa, «Viŋ ye faŋ ŋwə nə kàw Lasarɔs.» 37Luu nə, vɨɨ mɔ́ꞌ gi laa, «Ŋwə nə yɨ̀ laa wuu sɨ fɨsə yenə; ŋwə nə kee kìi wutə maa məyɨsə laa wə ŋwə̀ kee ku yimu?» 38Fwi Yeso baa mètə shə. Ŋwə gə ziꞌ shuu swi Lasarɔs. Swi ghɔ́ nə luu ŋɔŋ faŋ vɨ nə fəŋ shuu wi nə ŋoꞌ yikwalə. 39Yeso gi tɨ́ vəŋ laa vəŋ baꞌsə ŋoꞌ yɔ́ fɨ shuu swi. Marta, weenshu Lasarɔs faŋ ŋwə nə kù nə, gi tɨ́ Yeso laa, «Tɨta, ŋku wə kɔ́ taa kɨ luŋ, buꞌ laa ndwə lùu vəshi yishwe faŋ ŋwə nə kù nə.» 40Yeso gi tɨ́ ŋwə laa, «Maa mə nii gì tɨ́ ghɔ laa a nùŋ fwi maa mə, buu a taa ye yikwalə Nwi.» 41Vəŋ baꞌsə ŋoꞌ yɔ́. Yeso ndeynə yizɔ, gì laa, «Tɨta, mə bwaŋ ghɔ, buꞌ laa a zɔ̀ gɨ nyaa. 42Mə kɔꞌ kɨɨ laa a zɔ gɨ nyaa ghee nshə. Mə gi nee buꞌ vɨɨ mbɨə faŋ vəŋ tɨŋnə feenə, tɨ́ kaꞌ vəŋ bìŋ laa tɔ̀ŋ ghɔ tɔ̀ŋ mə taa mbi nyə̀.» 43Ŋwə nə gì yigi nyə̀, mètə, ndɔ̀ baa gì ŋkee nəŋay laa, «Lasarɔs, fuu fu!» 44Sheꞌ yighee yɔ́, Lasarɔs faŋ ŋwə yaa ku nə, ndɔ fùu fu, vɨɨ ye, tɨ́ vɨ nə ka njwi tɔ ŋwə nə ghuu ghi, ndìŋ sɨ ghi nə njwi. Yeso gi laa vɨ keꞌtə vətɔ vɔ́ fɨ maa ŋwə, tɨ́ kaꞌ ŋwə kɨ toꞌ.

Faŋ vɨ nə kà yighaw tɔ Yeso

(Matiu 26.1-5; Mark 14.1-2; Lukas 22.1-2)

45Vɨɨ vəyaŋ fɨ taa nwaa vɨɨ Jus faŋ vəŋ nə jwì, jwi kee yiku tɨ́ vɨ Meri nə, ye nu ŋkɨə faŋ Yeso nə yɨ̀, kɨ nii nùŋ fwi vəŋ maa ŋwə. 46Luu nə, vɨɨ mɔ́ꞌ fɨ taa ŋwaa vəŋ gə yè vɨɨ Farisii, nàysə nu ŋkɨə faŋ Yeso nə yɨ̀ tɨ́ vəŋ. 47Vɨɨ məfeꞌ Nwi nə vɨɨ Farisii faynə taa ŋii məshia nsɔꞌsə, gì laa, «Nsiŋ yɨ kɨkə nə wə ŋwə̀ faŋ ŋwə yɨsə vəshwenə və shuu yɔŋvə vəyaŋ nee nə? 48Nsiŋ kɨ luu meꞌtə ŋwə, buu vɨɨ vənshə taa biŋ ŋwə. Vɨɨ Rom taa kɨ ye laa vɨɨ vənshə beꞌsə ŋwə, buu vəŋ taa jwi kɨ sɔꞌ ŋii Nwi yikwalə nyaa-nsiŋ, fì shɨ kaŋ-nsiŋ kənshə.» 49Wuu vəŋ mɔ́ꞌ faŋ nə luu wuu kwalə məfeꞌ Nwi maa ŋuꞌ yɔ́, yizii yi nə luu Kayafas, gi tɨ́ vəŋ laa, «Viŋ kee kɨɨ nə nu me. 50Viŋ kee yikɨɨ laa ŋkə bàw tɨ́ viŋ laa wə muꞌ ku tɔ vɨɨ, shɔ̀ɔ fɨ ghɔ shɨ kaŋ-nsiŋ ndi ŋkwəŋ yimu?» 51Ŋwə nə kee gì nɨniŋ maa tɔ ki me. Nə kwàŋ Nwi taa fwi ŋwə, buꞌ laa ŋwə nə luu wuu kwalə məfeꞌ Nwi maa ŋuꞌ yɔ́. Nə luu mbɨꞌtə Nwi laa Yeso ndɔ ku tɔ vɨɨ, 52baa nə laa ŋwə nə kee ku sheꞌ buꞌ vɨɨ Jus me, ŋwə nə kù tɔ vɨɨ vənshə faŋ vəŋ lùu vaŋ Nwi, taa məshɨ mənshə fɨ mbi maa məfaynə vəŋ. 53Nɨniŋ, shù fɨ maa shi kɔ́, vəŋ nə kɔꞌnə faŋ vəŋ taa zwi ŋwə. 54Yeso kee baa kɨ toꞌ ntee fɨ taa shɨ Judia me, ŋwə ndɔ fɨ yifi gə maa kwiŋ mɔ́ꞌ, faŋ luu yɨ tɔɔ waꞌsə, maa ntɨꞌ yimɔ́ꞌ faŋ vɨ tii nə Efrem. Yeso gə kɨ shi shɔ ghɔ vɨ vɨɨ məzwetə nu ki.

55Yighee Pasa vɨɨ Jus kɨ kuꞌ, vɨɨ vəyaŋ fɨ maa vəshəŋ vənshə ndɔ koꞌ gə ntɨꞌ Jerusalem maa məlootə yiŋwaa vəŋ, buu shi Pasa taa kuꞌ. 56Vɨɨ vɔ́ nəə kəə Yeso, fàynə taa ŋii Nwi yikwalə, kɨ gisə wə nə wə laa, «A sii bɨꞌtə laa kə? Ŋwə kee taa jwi maa Pasa ŋwə̀ yimu?» 57Vɨɨ kwalə məfeꞌ Nwi, nə vɨɨ Farisii nə duꞌtə vəŋ gi ghee yaŋ laa, wə kɨ luu kɨ̀ɨ nə shəŋ ŋkɨə faŋ ŋwə lùu shɔ, wə ghɔ́ naysə, vɨ gə jia ŋwə.

Currently Selected:

Jɔn 11: bav

Highlight

Copy