Jɔn 12

Faŋ Meri nə zwisə Yeso nə məŋgwə

(Matiu 26.6-13; Mark 14.3-9)

1Vəshi goꞌ ntɔfə, shi Pasa kuꞌ, Yeso bəŋ jwi ntɨꞌ Betani, faŋ lùu shəŋ ŋkɨə faŋ ŋwə nə ywèysə Lasarɔs fɨ shɨ yiku nə. Lasarɔs nə shi taa ntɨꞌ yɔ́. 2Vɨ naanə fazɨ, tìa Yeso shɔ. Marta nə gaasə fazɨ kɔ́. Lasarɔs nə luu shɔ nɨzi, ghɔ vɨ vəŋ nə zɨ mɔ́ꞌ. 3Meri jwi shəŋ ŋkɨə faŋ Yeso nə duꞌ shɔ nə, jwi nə lamenda mɔ́ꞌ faŋ vɨ tii nə nardo, shwaŋ wi luu ŋkee ndɔŋ. Ŋwə jwi nə lamenda ghɔ́, tùtə ghuu Yeso, ndɔ̀ tɔ̀ŋsə ghuu Yeso nə nyuŋsə tɔ si. Lumə ki kɨ nii lùŋ taa ŋii nshə. 4Judas Iskariot faŋ lùu fɨ maa vɨɨ məzwetə nu Yeso, [ŋgwə faŋ ŋwə nəə ndɔ fiŋ Yeso nə,] gi laa, 5«Sii nii yɨ̀ kə, vɨ kee fiŋ lamenda ŋwə̀ maa vəmba və ka vəbɔɔ, ndì ka ghɔ́, kɔ̀ tɨ́ mbəəsə me?» 6Faŋ ŋwə nə gì nɨniŋ nə, kee gi buꞌ mbəəsə faŋ ŋwə kee gəŋsə vəŋ me. Ŋwə nə gì nɨniŋ, buꞌ laa ŋwə nə luu ndɔꞌ. Ŋwaꞌ ka vəŋ nəə toꞌ fɨ ghɔ ŋwə nɨzi, ŋwə yaa kɨ fuusə fɨ fuŋ, faŋ wə kee yikɨɨ me. 7Yeso gi tɨ́ ŋwə laa ŋwə meꞌtə Meri shɔ. «Baw ŋwə yɨ nɨniŋ nə məŋgwə mbə̀, kɨ kɨꞌ shi yiku kaŋ. 8Viŋ vɨ mbəəsə lùu ghee nshə. Gə̀ fɨ maa mə, nsiŋ kee taa luu ghee nshə me.»

9Vɨɨ vəyaŋ zɔ laa Yeso lùu shɔ, jwì yifi, kee jwi sheꞌ buꞌ Yeso me; vəŋ jwi maa məye Lasarɔs nɨzi, faŋ Yeso nə ywèysə ŋwə fɨ shɨ yiku nə. 10Nɨniŋ, vɨɨ kwalə məfeꞌ Nwi ka yighaw laa vɨ zwi Lasarɔs nɨzi, 11buꞌ laa vɨɨ Jus nəə gə shɔ vəyaŋ buꞌ ŋwə, kɨ nii nùŋ fwi vəŋ maa Yeso.

Faŋ Yeso nə ŋìi ntɨꞌ Jerusalem, vɨ gwenə ŋwə yaa vɨ gwènə fwàŋ

(Matiu 21.1-11; Mark 11.1-11; Lukas 19.28-40)

12Fu kɨ lee, ŋkee nwaa vɨɨ vəyaŋ faŋ vəŋ nə jwì buꞌ nu shi zwisə nə, kɨ zɔ, zɔ laa Yeso jɨjwi Jerusalem, 13vəŋ ndi vəshay və yitee, fuu gə̀, ghɔ vɨ vəŋ faynə. Vəŋ nə luꞌ laa, «Hosana! Mənɔŋ-bwaŋnə fuu tɔ wə ntɨə faŋ ŋwə jɨjwi maa yizii tɨta Nwi. Ŋwə jwi yuu fwàŋ vɨɨ Isirayl.» 14Yeso ye wee-jiakasə, kòꞌ fuu yi. Ŋkə faynə maa nu ŋkɨə faŋ ŋkə lùu taa ŋwaꞌlə Nwi laa,

15«Vɨɨ Zayon, kɨ viŋ kɨ fee me. Viŋ ye!

Fwàŋ wiŋ jɨjwi, ŋwə kòꞌ fuu wee-jiakasə.» #Zakaraya 9.9.

16Faŋ nu kɔ́ nə fɔŋ lùu, vɨɨ məzwetə nu Yeso kee ta kɨ̀ɨ nə ŋiꞌ ki me. Nə luu sheꞌ maa yighee njyə faŋ Nwi kɔ̀ yikwalə tɨ́ Yeso, buu vəŋ lumə laa lùu nu ŋkɨə faŋ vɨ nə nyɔ̀ꞌ taa ŋwaꞌlə Nwi, laa ŋkə ndɔ gay, faŋ vɨ yɨ̀ maa Yeso nə. 17Vɨɨ mbɨə faŋ ghɔ vɨ Yeso nə luu mɔ́ꞌ yighee njyə faŋ Yeso nə fùusə Lasarɔs fɨ taa swi, ywèysə ŋwə fɨ shɨ yiku nə, vəŋ gi nu kɔ́ ntee faŋ vəŋ yè. 18Lùu nu ŋkɨə faŋ ŋkə nə yɨ̀sə laa vɨɨ vəyaŋ baytə yɨ ŋwə, buꞌ laa vəŋ nə zɔ̀ nu shuu yɔŋ ŋkɨə faŋ ŋwə nə yɨ. 19Vɨɨ Farisii gi sheꞌ vəŋ vəŋ laa, «Sii kaꞌ vɨ baa yɨ̀ kə? Ye faŋ mbi yinshə beꞌsə ŋwə.»

Faŋ vɨɨ Griik nə kəə ye Yeso, ŋwə kɨ nii yikɨɨ laa yighee yi kuꞌ

(Matiu 16.24-25; Mark 8.34-35; Lukas 9.23-24)

20Fɨ taa ŋwaa vɨɨ mbɨə faŋ vəŋ nə gə̀ ntɨꞌ Jerusalem maa məbəŋsə Nwi maa shi zwisə nə, vɨɨ shɨ Griis mɔ́ꞌ nə luu shɔ. 21Vɨɨ Griik vɔ́ gə ye Filip, faŋ ŋwə nə ndɔ̀ fɨ ntɨꞌ Betsayda, fɨ shɨ Galilii. Vəŋ gi tɨ́ Filip laa, «Tɨta, yia kəə ye Yeso.» 22Filip ndɔ gə̀ naysə nu kɔ́ tɨ́ Andru. Vəŋ vəbɔɔ kɨ nii gə nàysə tɨ́ Yeso. 23Faŋ Yeso nə zɔ laa vɨɨ Griik kəə ye ŋwə nə, ŋwə kɨɨ laa yighee yi kɨkuꞌ. Ŋwə gi tɨ́ vəŋ laa, «Yighee kɨ kuꞌ faŋ vɨɨ vənshə taa ye yikwalə Wuu yinsəŋ Nwi. 24Viŋ zɔ! Mə naysə nu yinsəŋ tɨ́ viŋ buꞌ yisay. Mbuu yisay kee ŋìi taa shɔꞌ ku me, nyə goꞌ sheꞌ nɨniŋ. Luu nə, nyə fìŋ taa shɔꞌ ku, nyə nyɔ̀ꞌ, kɨ nii lùu yighee njyə faŋ nyə taa sɔꞌ kìi say yaŋ yaŋ. 25Wə ntɨə faŋ ŋwə kaw məzɨ ŋwaa shɨ nsi nyə̀, ndɔ ndisə məbwey wi. Luu nə, wə ntɨə faŋ ŋwə kee kaw məzɨ ŋwaa wi shɨ nsi nyə̀ me, ndɔ kii məbwey faŋ ŋwə gòꞌsə yighee muꞌ. 26Wə faŋ ŋwə kəə laa yi luu wuu faꞌ ŋwaa, ŋwə kɨ beꞌsə mə. Mə kɔlə gə dùꞌ fə, yia ŋwə dùꞌ mɔ́ꞌ. Wə faŋ ŋwə beꞌsə mə laa yi lùu wuu faꞌ ŋwaa, ŋwə ndɔ kii yizii yikwalə fɨ ghɔ Tii ŋwaa. 27Fwi nyaa kɔ mə nə ŋɨꞌ ndwə. Bàw mə gì tɨ́ Tii ŋwaa laa ŋwə fuusə mə fɨ taa ŋɨꞌ nyə̀ mu? Bey, kaꞌ mə kee gì nɨniŋ me, buꞌ laa ŋɨꞌ nyə̀ luu sheꞌ ŋiꞌ nu ŋkɨə faŋ mə nə jwì mbi nyə̀ buꞌ ŋkə.» 28Nɨniŋ, Yeso shɔꞌtə Nwi, gì laa, «Tɨta ŋwaa, mə taa yɨsə nu ŋkɨə tɨ́ kaꞌ yizii yə kɨ kwalə.» Yeso metə yigi yɔ́, gɨ jwi fɨ taa yizɔ laa, «Mə duꞌtə mə də yikwalə nyaa ntee. Mə ndɔ baa kii də yikwalə nyaa.» 29Vɨɨ mbɨə faŋ vəŋ nə lùu yifi, nə zɔ gɨ yɔ́, gì laa, duŋ yighuu. Vɨɨ mɔ́ꞌ gi laa gisə nshiiŋii Nwi tɨ́ ŋwə. 30Yeso bəŋsə tɨ́ vəŋ laa, «Gɨ nyə̀ nii kee gì buꞌ mə me, gɨ yɔ́ nii gì buꞌ viŋ. 31Yighee kuꞌ faŋ Nwi taa sɔꞌ nsɔꞌsə vɨɨ taa mbi nyə̀. Yighee kuꞌ faŋ vɨ taa jɔŋ tɨɨ mbi, Satan, fɨ taa mbi nyə̀. 32Gə fɨ maa mə, vɨ ndɔ bɨŋsə mə, shaꞌsə yizɔ, buu mə kɨ nii tìi vɨɨ vənshə maa mə.» 33Yeso nə gì yigi nyə̀, tɨ́ kaꞌ vɨɨ kɨ̀ɨ nə nu kɔ̀ŋ yiku njyə faŋ ŋwə ndɔ ku nyə, (laa vɨ ndɔ bey yi fuu fəŋkɔꞌ fə ŋkɨꞌsə, bɨ̀ŋsə tə yizɔ.) 34Nwaa vɨɨ ghɔ́ gi tɨ́ ŋwə laa, «Yia zɔ̀ faŋ vɨ nə ŋwàꞌlə taa ŋwaꞌlə Nwi laa, Kristo, wuu məbweysə ŋwaa-nsiŋ faŋ Nwi tɔ̀ŋ, ndɔ goꞌsə yighee muꞌ. Sii yɨ̀ kə buu a gi laa vɨ ndɔ bɨŋsə Wuu yinsəŋ Nwi? Ŋwə sii lùu ndə?» 35Yeso gi tɨ́ vəŋ laa, «Məley taa lùu ghɔ viŋ sheꞌ maa wee-fɨ-yighee. Bàw viŋ toꞌ gə vɨsɨ vɨsɨ maa yighee njyə faŋ məley ghɔ́ lùu ghɔ viŋ nə, buꞌ mfiŋsə taa kɔlə viŋ jɨɨ. Wə faŋ ŋwə toꞌ fɨ taa mfiŋsə, kee yaa kɨ kɨɨ nə fɔɔ ŋwə gə me. 36Bàw viŋ biŋ məley ghɔ́ faŋ ŋwə kɨ bii ghɔ viŋ nə, tɨ́ kaꞌ viŋ ndɔ lùu vɨɨ faŋ vəŋ kìi məley nɨzi.» Yeso nə gì yigi yɔ́, gə̀ kə̀ə shəŋ ndenə shɔ, laa vɨɨ kee baa yè ŋwə me.

Faŋ vɨɨ kwalə vɨɨ Jus nə baa mètə twèy Yeso

37Faŋ Yeso nə kɔlə yɨ̀sə vəshwenə və shuu yɔŋvə vɨsɨ vɨɨ nə, vəŋ kee bee nùŋ fwi vəŋ maa ŋwə me. 38Vənu vɔ́ nə gay, fàynə nu ŋkɨə faŋ nshiiŋii-sɔghɔ Aysaya nə nyɔ̀ꞌ. Ŋwə nə ŋwàꞌlə laa lee,

«Mɔꞌmbi, sii bìŋ ndə bìŋ nu ŋkɨə faŋ yia gisə?

Wə lùu shɔ faŋ ŋwə kɨɨ nə wutə Mɔꞌmbi mu?» #Aysaya 53.1.

39Ŋiꞌ nu ŋkɨə faŋ ŋkə nə yɨ̀ laa vɨɨ vɔ́ kee bìŋ Yeso me, lùu nu ŋkɨə faŋ Aysaya nə baa nyɔ̀ꞌ, nàysə laa,

40«Nwi shìtə sɨ vəŋ baa yɨ̀ vəŋ luu vɨɨ vətɔ vəshiivə,

tɨ́ kaꞌ vəŋ kee yè məley me,

kee kwìinə fwisə vəŋ maa məkɨɨ nə nu yinsəŋ me,

kee kwiinə nshinə vəŋ, tɨ́ kaꞌ Nwi shuꞌ vəŋ me.» #Aysaya 6.9-10.

41Aysaya nə gì vənu vɔ́ buꞌ laa ŋwə nə kɨ̀ɨ nə yikwalə Yeso. Ŋwə nəə gisə vənu vɔ́ kɔ̀ŋ Yeso. 42Nɨniŋ nə, ŋkee vɨɨ kwalə vɨɨ Jus vəyaŋ nə bìŋ Yeso, luu nə, kee bìŋ ntee me, buꞌ laa vəŋ nəə fee vɨɨ Farisii, buꞌ vɨ fuusə vəŋ fɨ taa ŋii məshəŋtə vəŋ yighee muꞌ. 43Vəŋ nə kàw maa məmwa yikəꞌ vɨɨ, shɔ̀ɔ maa məmwa yikəꞌ Nwi.

Yigisə Yeso ndɔ sɔꞌ vɨɨ maa vəshi vəndwə

44Nə luu maa yighee yɔ́, Yeso gi ŋkee nəŋay laa, «Wə ntɨə faŋ ŋwə nùŋsə fwi yi maa mə, kee nùŋsə luu sheꞌ maa mə me, ŋwə nùŋsə lùu maa Nwi faŋ ŋwə nə tɔ̀ŋ mə. 45Wə ntɨə faŋ ŋwə yè mə, yè luu Nwi faŋ ŋwə nə tɔ̀ŋ mə nə. 46Mə fùu mbi yaa kiꞌ, laa wə tɨ̀ me wə faŋ ŋwə nùŋ fwi yi maa mə, kee baa tòꞌ fɨ taa mfiŋsə me. 47Wə kɨ luu zɔ̀ yigisə nyaa, kee biŋ beꞌsə mə me, kee ndɔ sɔꞌ mə sɔꞌ nsɔꞌ yi me, buꞌ laa mə nə kee jwì mbi laa mə ndɔ kɨ sɔꞌ nsɔꞌsə vɨɨ shia me. Mə nə jwì maa məbweysə vɨɨ. 48Luu nə, wə ntɨə faŋ ŋwə twèy mə, kee biŋ nu ŋkɨə faŋ mə gisə me, buu wuu məkwaŋ ŋwə taa nsɔꞌ shɔ. Lùu yigisə nyaa faŋ mə nə gì, faŋ nyə ndɔ kwaŋ ŋwə taa nsɔꞌ maa vəshi vəndwə. 49Lùu nɨniŋ buꞌ laa mə nəə kee gisə sheꞌ nə nshɨ-tɔ ŋwaa me. Tii ŋwaa faŋ ŋwə nə tɔ̀ŋ mə, nə tɨ̀ mə nə nu ŋkɨə faŋ mə taa kɨ naysə, baa nə yigi njyə faŋ mə taa kɨ gisə. 50Mə kɔꞌ kɨɨ laa, ntɨ yi yɔ́ kɔ məbwey faŋ ŋwə gòꞌsə yighee muꞌ. Nɨniŋ, mə gisə vənu vənshə sheꞌ faŋ tɨta Nwi nə nàysə shee.»

Currently Selected:

Jɔn 12: bav

Highlight

Copy