Jɔn 13

Faŋ Yeso nə də̀ laa ŋkə bàw maa məsuꞌsə ŋwaa nsi

(Matiu 23.11-12; Lukas 22.24-28)

1Shi zwisə Pasa nəə kəə kuꞌ, Yeso kɨɨ laa yighee yi maa məndɔ fɨ shɨ nsi, gə̀ yɨ Tii wi kùꞌnə. Ŋwə nə kàw vɨɨ vi faŋ vəŋ nə lùu taa mbi. Ŋwə nə kàw vəŋ mètə, də̀ ŋkawnə yi tɨ́ vəŋ tɨ́ nee: 2Vəŋ kii zɨ fa laynəfu, tɨ́ tɨɨ vəzwitə vəbwəvə yaa duꞌtə ŋwə kwaŋ nu bwə taa fwi Judas, wee Saymon Iskariot, laa ŋwə fiŋ Yeso. 3Yeso kɨɨ nɨzi laa, tɨta Nwi nə nùŋsə vənu vənshə ghɔ ŋwə, baa nə laa ŋwə nə ndɔ̀ fɨ yɨ Nwi, baa bəŋ gə̀ yɨ Nwi, 4Yeso ndɔ yizɔ fɨ shəŋ məzɨ, shòꞌ njwi yi fɨ maa ŋwə nùŋsə, ndì ŋkɔŋ, ndìŋ ŋiꞌ ŋwə, 5kɨ nii kwàŋ muu taa kay, tey kɨ sɔ ghuu vɨɨ məzwetə nu ki, tɔŋsə nə ŋkɔŋ ŋkɨə faŋ ŋwə nii ndìŋ nə. 6Ŋwə yɨ nɨniŋ, zìꞌ maa Saymon Pita, Pita gi tɨ́ ŋwə laa, «Tɨta, sɔ ghɔ sɔ ghuu ŋaa lee?» 7Yeso bəŋsə tɨ́ ŋwə laa, «A kee ta kɨ̀ɨ nə nu ŋkɨə faŋ mə yɨsə ndwə me, a ndɔ kɨɨ yighee yiba.» 8Pita gi tɨ́ ŋwə laa, «Kɨ ghɔ sɔ ghuu ŋaa me! Kaꞌ mə kee biŋ me.» Yeso bəŋsə tɨ́ ŋwə laa, «Mə kee sɔ ghuu ghə me, buu kaꞌ nsoo kee lùu fa kəmuꞌ me.» 9Pita gi tɨ́ ŋwə laa, «Kɨ ghɔ sɔ sheꞌ ghuu ŋaa me; sɔ ghɔ ŋaa nə tɔ kaŋ nɨzi.» 10Yeso gi tɨ́ ŋwə laa, «Wə ntɨə faŋ ŋwə nə sɔ̀ ŋwaa wi, kaꞌ nu kee baa ghɔꞌ ŋwə laa ŋwə baa bə̀ŋsə sɔ̀ me, ŋwə baa kɨ nii sɔ̀ sheꞌ ghuu ghi, buꞌ faŋ ŋwaa wi lèy. Viŋ duꞌtə viŋ ley, kee lèy vənshə me.» 11Ŋwə nə gì nɨniŋ, buꞌ laa ŋwə nəə kɔꞌ kɨɨ nə wə ntɨə faŋ ŋwə taa fiŋ ŋwə. Lùu ŋiꞌ nu ŋkɨə faŋ ŋwə nə gì laa vəŋ kee lèy vənshə me.

12Yeso metə maa məsɔ ghuu vəŋ, mɔ̀ꞌ njwi yi, dùꞌ nsi, gì tɨ́ vəŋ laa, «Viŋ kɨɨ nə ŋiꞌ nu ŋkɨə faŋ mə yɨ̀ maa viŋ mu? 13Maa viŋ tii mə nə «Wuu mədeesə», nə «tɨta». Viŋ tii yinsəŋ, mə lùu nɨniŋ. 14Faŋ mə lùu wuu mədeesə wiŋ, baa lùu tɨta wiŋ, sɔ̀ ghuu ghiŋ nə, nu kiŋ lùu laa viŋ kɨ sɔ ghuu ghiŋ wə nə wə nɨzi. 15Mə nii də̀ shwenə nu tɨ́ viŋ, laa viŋ baa kɨ luu yɨ faŋ mə yɨ̀sə maa viŋ nə. 16Viŋ zɔ! Mə gì tɨ́ viŋ yinsəŋ laa, buꞌ kee shɔ̀ɔ tii wi me, wuu ntɔŋ kee shɔ̀ɔ wə ntɨə faŋ ŋwə tɔ̀ŋ ŋwə me. 17Viŋ kɨɨ nə nu kɔ́, kɨ yɨ nɨniŋ, buu mənɔŋ-bwaŋnə lùu tɨ́ viŋ. 18Mə kee gisə nɨniŋ kɔ̀ŋ viŋ vənshə me, mə kɔꞌ kɨɨ nə vɨɨ mbɨə faŋ mə shòꞌ vəŋ laa lùu vɨɨ vaŋ. Ŋkə lùu nɨniŋ laa nu ŋkɨə faŋ ŋkə lùu taa ŋwaꞌlə Nwi faynə, laa «Wə ntɨə faŋ yia vɨ vəŋ zɨ bee kəmuꞌ, kiasə gù wuu mbeenə ŋwaa.» #Sam 41.10. 19Mə naysə nu kɔ́ tɨ́ viŋ ndwə faŋ ŋkə kee ta yigay me, laa ŋkə taa gay, viŋ biŋ mə laa mə lùu wə ntɨə faŋ mə lùu, baa nə laa yigi yɔ́ kɔ̀ŋ mə. 20Viŋ zɔ! Mə naysə tɨ́ viŋ yinsəŋ laa wə ntɨə faŋ ŋwə ndì wuu ntɔŋ ŋwaa taa ŋii ŋwə, ndì luu nshɨ-tɔ ŋwaa. Wə ntɨə faŋ ŋwə ndì mə, ndì luu wə ntɨə faŋ ŋwə nə tɔ̀ŋ mə taa mbi nyə̀.»

Faŋ Yeso nə nàysə tɨ́ vɨɨ məzwetə nu ki laa Judas taa fiŋ yi

(Matiu 26.20-25; Mark 14.17-21; Lukas 22.21-23)

21Faŋ Yeso nə gì vənu vɔ́ nə, fwi yi ghaysə ŋwə ŋkee dɨdɨꞌ. Ŋwə kɨ nii gì tɨ́ vəŋ ntee laa, «Viŋ zɔ! Mə naysə tɨ́ viŋ yinsəŋ laa, wə muꞌ fɨ taa ŋwaa viŋ, taa fiŋ mə.» 22Vɨɨ məzwetə nu ki shaꞌsə yitɔ vəŋ, wə ndeynə liŋ wi, wə ndeynə liŋ wi, vəŋ kee kɨ̀ɨ nə wə ntɨə faŋ ŋwə gisə kɔ̀ŋ ŋwə me. 23Wə muꞌ fɨ taa ŋwaa vɨɨ məzwetə nu Yeso nə luu shɔ faŋ ŋwə nə dùꞌ yɨ Yeso. Lùu ŋgwə faŋ Yeso nə kàw ŋwə shɔ̀ɔ. 24Saymon Pita katə ŋwə, gì tɨ́ ŋwə laa ŋwə bitə wə ghɔ́ tɨ́ Yeso, faŋ Yeso gisə kɔ̀ŋ ŋwə nə. 25Nɨniŋ, wuu məzwetə nu Yeso ghɔ́, yɨꞌtə maa Yeso, bìtə tɨ́ ŋwə laa, «Tɨta, wə ghɔ́ lùu ndə?» 26Yeso bəŋsə tɨ́ vəŋ laa, «Lùu wə ntɨə faŋ mə taa bɨꞌ bee, shù taa kay, kɔ̀ tɨ́ ŋwə.» Ŋwə gi nɨniŋ, ndì bee, bɨꞌ, shù taa mbasə, kɔ̀ tɨ́ Judas, wee Saymon Iskariot. 27Sheꞌ yighee muꞌ faŋ Saymon fi bee kɔ́, zwitə bwə Satan ŋii taa fwi ŋwə. Yeso gi tɨ́ ŋwə laa, «Nu ŋkɨə faŋ a kəə yɨ̀, yasə kɔ̀ꞌlə gə̀ yɨ̀sə.» 28Vɨɨ məzwetə nu Yeso vəmɔ́ꞌ faŋ vəŋ nə luu yifi, kee kɨ̀ɨ nə ŋiꞌ nu ŋkɨə faŋ Yeso gisə tɨ́ Judas me. 29Vəŋ bɨꞌtə laa yighee mɔ́ꞌ Yeso tɨtɔŋ ŋwə, laa ŋwə gə ywàŋ vətɔ maa məzɨ shi zwisə Pasa; yighee mɔ́ꞌ laa ŋwə gə kɔ̀ vətɔ tɨ́ mbəəsə. Vəŋ nəə bɨꞌtə nɨniŋ, buꞌ laa Judas nə luu wə ntɨə faŋ ŋwə nəə nuŋsə ka vəŋ. 30Judas nə fì bee kɔ́, zɨ, kɨ nii fùu fu, faŋ fu duꞌtə fu jɨ.

Faŋ Yeso nə nàysə tɨ́ Pita laa ŋwə taa twey yi

(Matiu 26.31-35; Mark 14.27-31; Lukas 22.31-34)

31Faŋ Judas nə gə̀ nɨniŋ nə, Yeso gi tɨ́ vɨɨ məzwetə nu ki laa, «Yighee kùꞌnə faŋ vɨɨ taa ye yikwalə Wuu yinsəŋ Nwi. Vɨ taa ye yikwalə Nwi nɨzi buꞌ ŋwə. 32Faŋ vɨɨ taa ye yikwalə Nwi buꞌ Wuu yinsəŋ Nwi, Nwi baa kɨ kɔ yikwalə tɨ́ ŋwə nɨzi sheꞌ ndwə ndwə. 33Vaŋ vaŋ, yighee kee baa gòꞌ ntaŋ, faŋ mə taa mèꞌtə viŋ me. Viŋ taa kɨ kəə mə, luu nə, shəŋ ŋkɨə faŋ mə gə shɔ, kaꞌ viŋ kee gə̀ shɔ me, yuu mə nə duꞌtə mə naysə tɨ́ vɨɨ Jus nə. Mə baa luu naysə nu kɔ́ tɨ́ viŋ ndwə. 34Nɨniŋ, mə tɨ viŋ nə ntɨ yifi laa, viŋ kɨ kawnə yiŋwaa yiŋ. Bàw viŋ kɨ kawnə yiŋwaa yiŋ sheꞌ faŋ mə nə kaw viŋ nə. 35Nu ŋkɨə faŋ vɨɨ vənshə ndɔ kɨ kɨɨ fɨ fuŋ laa viŋ lùu vɨɨ məzwetə nu kaŋ, lùu faŋ viŋ taa kɨ kawnə yiŋwaa yiŋ.» 36Saymon Pita bitə tɨ́ ŋwə laa, «Tɨta, a sii gə fə?» Yeso bəŋsə tɨ́ ŋwə laa, «Shəŋ ŋkɨə faŋ mə gə shɔ, kaꞌ a kee bèꞌsə mə ndwə me. Luu nə, a ndɔ kɨ beꞌsə mə shɔ fɨ yiba.» 37Saymon Pita gi laa, «Sii yɨ̀ kə laa kaꞌ mə kee bèꞌsə ghɔ ndwə me? Mə biŋ ŋkee maa məku buꞌ ghɔ.» 38Yeso gi tɨ́ ŋwə laa, «A kəə ku buꞌ mə lee? Mə naysə ŋkee nu yinsəŋ tɨ́ ghɔ laa, ŋkɨꞌ taa kee taw me, a twey ghee tia laa a kee kɨ̀ɨ nə mə me.»

Currently Selected:

Jɔn 13: bav

Highlight

Copy