Jɔn 14

Faŋ Yeso lùu jɨɨ njyə faŋ kaꞌ vɨɨ shɔ̀ɔ fɨ fuŋ, gə̀ yɨ Nwi

1Yeso baa gì tɨ́ vəŋ laa, «Kɨ fwi siŋ kɨ lɔꞌ me! Viŋ nuŋ fwi siŋ maa Nwi, nə maa mə! 2Taa ŋii Tii ŋwaa njɨɨsə ndɔꞌ shɔ səyaŋ. Ŋkə nii toꞌ kee lùu nɨniŋ me, buu mə nàysə tɨ́ viŋ. Nɨniŋ, mə gə shɔ, gə lootə shəŋ tɨ́ viŋ. 3Mə taa gə lootə shəŋ duꞌnə tɨ́ viŋ, bə̀ŋ jwì ndì viŋ, viŋ jwi yɨ mə, laa shəŋ ŋkɨə faŋ mə dùꞌ shɔ, viŋ luu shɔ nɨzi. 4Shəŋ ŋkɨə faŋ mə gə shɔ, viŋ kɔꞌ kɨɨ nə jɨɨ maa məgə shɔ.» 5Tɔmas gi tɨ́ ŋwə laa, «Yia kee kɨɨ nə shəŋ ŋkɨə faŋ a gə shɔ me. Sii kaꞌ yia kɨ̀ɨ nə jɨɨ kɨkə?» 6Yeso gi tɨ́ ŋwə laa, «Lùu mə lùu jɨɨ yɔ́. Nu yinsəŋ nə məbwey vəlwaŋ ndɔ fɨ ghɔ mə nɨzi. Kaꞌ wə kee gə ye tɨta Nwi me, maa tɨ̀ lɨꞌ laa ŋwə shɔ̀ɔ fɨ maa mə me. 7Viŋ nii toꞌ kɨɨ nə mə, buu viŋ kɨ̀ɨ nə Tii ŋwaa nɨzi. Shù ndee viŋ kɨɨ nə ŋwə. Viŋ duꞌtə viŋ ye ŋwə.» 8Filip gi tɨ́ ŋwə laa, «Tɨta, də̀ Tii wə tɨ́ yia; ŋkə taa kùꞌnə tɨ́ yia.» 9Yeso gi tɨ́ ŋwə laa, «Filip, nsiŋ duꞌtə nsiŋ tày dɨdɨꞌ, a kee ta kɨ̀ɨ nə mə yimu? Wə ntɨə faŋ ŋwə yè mə, buu ŋwə yè luu Tii ŋwaa. A sii gì laa mə də Tii ŋwaa tɨ́ viŋ kɨkə? 10A kee yibiŋ laa yia tɨta Nwi lùu fa kəmuꞌ yimu? Laa mə lùu taa fwi Tii ŋwaa, Tii ŋwaa luu taa fwi mə yimu? Vənu mbɨə faŋ mə gisə, mə kee gisə nə wutə kaŋ me, luu tɨta Nwi faŋ ŋwə lùu taa fwi mə, faŋ ŋwə faꞌ vənu mbɨə faŋ mə yɨsə. 11Bàw viŋ biŋ laa yia tɨta Nwi lùu fa kəmuꞌ, laa ŋwə lùu taa fwi mə, mə luu taa fwi ŋwə. Viŋ kɨ luu kee biŋ yigisə nyaa me, bàw viŋ biŋ buꞌ vənu mbɨə faŋ mə yɨsə.

12Viŋ zɔ! Mə naysə tɨ́ viŋ yinsəŋ laa, wə ntɨə faŋ ŋwə nùŋ fwi yi maa mə, taa kɨ yɨ vənu mbɨə faŋ mə yɨ nɨzi. Ŋwə taa kɨ yɨsə vənu faŋ mbə shɔ̀ɔ mbɨə faŋ mə yɨ̀, buꞌ faŋ mə gə yɨ Tii ŋwaa. 13Fa tɨ̀ me fa faŋ viŋ ndwaŋ fɨ ghɔ Nwi maa yizii nyaa, buu mə taa yɨ̀sə laa viŋ kii, tɨ́ kaꞌ vɨɨ kɨ̀ɨ nə yikwalə Nwi fɨ yiba jɨŋ ŋwiŋ wi. 14Viŋ ndwaŋ fa maa yizii nyaa, buu mə taa kɔ tɨ́ viŋ.»

15Yeso baa gì laa, «Kɨ luu viŋ kaw mə, buu viŋ taa zɔnə ntɨsə saŋ. 16Mə ndɔ buꞌ ghɔ tɨ́ Tii ŋwaa, ŋwə taa kɔ wuu məgaŋtə tɨ́ viŋ faŋ lùu Zwitə Ley. Ŋwə goꞌsə taa ŋwaa viŋ yighee muꞌ. 17Lùu Zwitə yinsəŋ, faŋ kaꞌ ŋkə kee ŋìi taa fwi mbi me, buꞌ laa kaꞌ vəŋ kee yè zwitə kɔ́ me, kee kɨ̀ɨ nə ŋkə me. Gə̀ fɨ maa viŋ, viŋ kɔꞌ kɨɨ nə zwitə kɔ́, buꞌ laa ŋkə taa goꞌ tɨ́ viŋ, baa lùu taa fwisə viŋ. 18Nɨniŋ, mə kee mèꞌ viŋ laa viŋ luu vaŋ vəti me; mə ndɔ baa jwi ye viŋ. 19Goꞌ wee-fɨkɨꞌ, mbi nyə̀ kee baa yè mə me; taa kɨ ye sheꞌ viŋ ye mə. Viŋ taa ye laa mə bwey. Nɨniŋ, viŋ taa bwey nɨzi. 20Maa yighee yɔ́, viŋ taa kɨɨ laa, mə lùu taa fwi Tii ŋwaa, viŋ lùu taa fwi mə, mə lùu taa fwi viŋ nɨzi. 21Wə ntɨə faŋ ŋwə kɨɨ nə ntɨsə saŋ, nùŋsə taa fwi ŋwə, kɨ toꞌ maa ntɨsə sɔ́, buu lùu wə faŋ ŋwə kaw mə. Wə ntɨə faŋ ŋwə kaw mə tɨ́ nee, buu Tii ŋwaa baa luu kaw ŋwə. Nshɨ-tɔ ŋwaa kaw ŋwə nɨzi, yɨ laa ŋwə taa ye mə maa yinsəŋ.» 22Judas mɔ́ꞌ faŋ nə kee lùu Judas Iskariot me, bitə tɨ́ ŋwə laa, «Sii yɨ̀ kə a kəə də̀ ŋwaa wə sheꞌ tɨ́ yia, kee biŋ laa mbi ye ghɔ nɨzi me?» 23Yeso gi tɨ́ ŋwə laa, «Wə ntɨə faŋ ŋwə kaw mə, ŋwə taa kɨ nuŋsə yigisə nyaa nɨzi, Tii ŋwaa taa kaw ŋwə, yia Tii ŋwaa taa kɨ shi yia vɨ vəŋ. 24Wə ntɨə faŋ ŋwə kee kaw mə me, kee nùŋsə yigisə nyaa me. Nɨniŋ nə, yigisə nyaa faŋ viŋ zɔ nə, kee ndɔ fɨ ghɔ mə me, nyə ndɔ fɨ ghɔ tii ŋwaa, faŋ ŋwə nə tɔ̀ŋ mə nə.

25Lùu yigi nyaa faŋ mə naysə tɨ́ viŋ faŋ nsiŋ kɨ bii. 26Wuu məgaŋtə faŋ luu Zwitə Ley faŋ Nwi ndɔ tɔŋ tɨ́ viŋ buꞌ mə, ndɔ twelə vənu vənshə tɨ́ viŋ, baa lùmə vənu vənshə tɨ́ viŋ faŋ mə nə nàysə tɨ́ viŋ nə. 27Mə gə, mèꞌtə məduꞌ-nyɔŋ tɨ́ viŋ. Mə taa kɔ məduꞌ-nyɔŋ tɨ́ viŋ. Mə kee kɔ tɨ́ viŋ faŋ mbi kɔ nə me. Kɨ fwi siŋ lɔꞌ me, nduŋ kee kɨ sɨɨ viŋ me. 28Viŋ duꞌtə viŋ zɔ faŋ mə naysə tɨ́ viŋ laa, mə taa meꞌtə viŋ, gə̀ baa bə̀ŋ jwì yè viŋ. Kɨ luu viŋ kaw mə, viŋ kɨ ŋaytə faŋ mə gə yɨ Tii ŋwaa, buꞌ laa Tii ŋwaa kwàlə shɔ̀ɔ mə. 29Mə naysə vənu vɔ́ tɨ́ viŋ ndwə, faŋ mbə kee ta yigay me, tɨ́ kaꞌ viŋ ndɔ biŋ yigisə nyaa faŋ mbə taa gày. 30Mə kee baa gisə vənu vəyaŋ tɨ́ viŋ me, buꞌ laa Satan faŋ ŋwə sɔꞌ mbi nyə̀, lùu nshənə maa məjwi. Luu nə, kaꞌ Satan kee ghɔ̀ꞌ mə me. 31Mə yɨ sheꞌ nu ŋkɨə faŋ Tii ŋwaa gì laa mə yɨ, tɨ́ kaꞌ mbi nyə̀ kɨɨ laa mə kaw Tii ŋwaa. - Ŋkə kuꞌ. Viŋ ndɔ, nsiŋ gə!»

Currently Selected:

Jɔn 14: bav

Highlight

Copy