Jɔn 15

Faŋ Yeso lùu yaa tɨ taŋ jəənə

1Yeso baa gì tɨ́ vɨɨ məzwetə nu ki laa, «Mə lùu yaa tɨ taŋ jəənə. Tii ŋwaa lùu wə ntɨə faŋ ŋwə lootə vətɨ vɔ́. 2Ntaŋ tɨ̀ me ntaŋ faŋ ŋwə kee kwaanə vətaŋ me, buu vɨ taa fà ntaŋ ghɔ́, mèꞌ. Gə̀ fɨ maa ntaŋ faŋ ŋwə kwaanə jəə, ŋwə baa fìi, tɨ́ kaꞌ vətaŋ kɨ kwaanə shɔ jəə. 3Gə̀ fɨ maa viŋ, viŋ lùu yaa təntaŋ tɔ́ faŋ vɨ duꞌtə vɨ yɔꞌ, tɨ́ kaꞌ viŋ kɨ kwaanə jəə. Yigisə njyə faŋ mə nə gì tɨ́ viŋ, yɨsə làa viŋ ley. 4Bàw viŋ goꞌ taa ŋwaa mə, mə baa luu gòꞌ taa ŋwaa viŋ. Kaꞌ ntaŋ kee kwàanə vətaŋ me, tɨ̀ lɨꞌ laa ntaŋ ghɔ́ lùu mbɨɨ tɨ me. Sheꞌ nee, viŋ kee lùu taa ŋwaa mə me, buu kaꞌ viŋ kee kɨ kwaanə me. 5Mə lùu tɨ taŋ, viŋ luu təntaŋ ti. Wə ntɨə faŋ ŋwə lùu taa fwi mə, mə lùu taa fwi ŋwə. Wə ghɔ́ kɨ nii kwaanə vətaŋ vəyaŋ. Kaꞌ wə kee yɨ̀ nu me, tɨ̀ lɨꞌ laa mə lùu fɨ yiba jɨŋ ŋwə me. 6Wə tɨ̀ me wə faŋ ŋwə kee lùu taa ŋwaa mə me, buu vɨ taa shia ŋwə yaa təntaŋ tə tɨ tɔ́. Ntə yɔŋ, vɨ shaꞌ twàŋ taa wi, ntə kɨɨ, mè. 7Kɨ luu viŋ goꞌ taa fwi mə, buu yigisə nyaa goꞌ taa fwi siŋ nɨzi, buu viŋ taa kɔlə bitə kə, vɨ taa kɔ tɨ́ viŋ. 8Nu ŋkɨə faŋ yizii Tii ŋwaa taa kɨ kwalə shɔ, lùu faŋ viŋ taa kɨ kwaanə vətaŋ vəyaŋ, yɨsə vənu vəjəəvə, də nɨniŋ laa viŋ lùu vɨɨ məzwetə nu kaŋ.»

Ntɨ kɔ̀ŋ ŋkawnə

9«Mə kàw viŋ sheꞌ faŋ Tii ŋwaa kàw mə. Bàw viŋ goꞌsə taa ŋkawnə nyaa. 10Kaꞌ viŋ goꞌsə taa ŋkawnə nyaa faŋ viŋ nuŋsə ntɨsə saŋ, sheꞌ faŋ nshɨ-tɔ ŋwaa nə nùŋsə ntɨsə Tii ŋwaa, buu gòꞌsə taa ŋkawnə yi. 11Mə naysə nu kɔ́ tɨ́ viŋ, tɨ́ kaꞌ məŋaytə lwaŋ taa fwisə viŋ, sheꞌ faŋ ŋwə lwàŋ taa fwi mə. Bàw məŋaytə wiŋ lwaŋ taa fwisə viŋ bə. 12Ntɨ nyaa faŋ mə tɨ viŋ shɔ nə, lùu laa viŋ kɨ kawnə yiŋwaa yiŋ, sheꞌ faŋ mə nə kàw viŋ nə. 13Ŋkawnə njyə faŋ nyə kwàlə shɔ̀ɔ, lùu faŋ wə bìŋ yiku tɔ vɨɨmba vi. 14Viŋ lùu vɨɨmba vaŋ faŋ viŋ yɨ nu ŋkɨə faŋ mə tɨ̀sə viŋ shɔ nə. 15Mə kee baa tii viŋ nə vɨɨ faꞌ vaŋ me, buꞌ laa wuu faꞌ kee yaa kɨ kɨɨ nə nu ŋkɨə faŋ tii wi yɨ me. Mə tii viŋ nə vɨɨmba vaŋ, buꞌ laa mə nə nàysə vənu vənshə tɨ́ viŋ, faŋ mə nə zɔ̀ fɨ ghɔ Tii ŋwaa. 16Nə kee shòꞌ viŋ shòꞌ mə laa mə luu tii wiŋ me, nə shòꞌ mə shòꞌ viŋ laa viŋ luu vɨɨ məzwetə nu kaŋ, mə baa shoꞌ viŋ laa viŋ kɨ toꞌ fàꞌ maa yizii nyaa, vənu vəjəəvə fuu fɨ fuŋ, kee mè me. Nɨniŋ, kaꞌ viŋ ndwàŋ fa fɨ ghɔ tɨta Nwi maa yizii nyaa, ŋwə kɔ̀ tɨ́ viŋ. 17Lùu ntɨ nyaa nə, faŋ mə tɨ̀sə viŋ shɔ nə, laa viŋ kɨ kawnə yiŋwaa yiŋ.»

Faŋ mbi bee vɨɨ Nwi

18«Mbi kɨ luu kɨ bee viŋ, viŋ lumə laa, nyə nə fɔŋ bèe mə, buu kɨ bee viŋ. 19Viŋ nii toꞌ lùu vaŋ taa mbi, buu mbi kàw vaŋ vi. Luu nə, viŋ kee lùu vaŋ mbi nyə̀ me, buꞌ laa mə nə shòꞌ viŋ fɨ taa mbi laa viŋ luu vaŋ vaŋ. Mbi kɨ nii bee viŋ. 20Viŋ lumə nu ŋkɨə faŋ mə nii gì tɨ́ viŋ laa, wuu faꞌ kee shɔ̀ɔ tii wi me. Vɨ nə shòꞌ ghuu ŋaa, vɨ taa kɨ shoꞌ ghuu ghiŋ nɨzi. Faŋ vɨ nə jìa nu kaŋ, buu vɨ taa jia nu kiŋ nɨzi. 21Vənu vəbwəvə faŋ vɨ ndɔ yɨsə maa viŋ, vɨ yɨ̀ buꞌ yizii nyaa, buꞌ laa vəŋ kee kɨɨ nə wə ntɨə faŋ ŋwə nə tɔ̀ŋ mə taa mbi nyə̀ me. 22Mə nə toꞌ kee jwì kɨ gisə tɨ́ vəŋ me, buu nu bwə vəŋ kee lùu shɔ me. Luu nə, mə nə gì tɨ́ vəŋ, kaꞌ vəŋ kee baa mànə nu bwə vəŋ faŋ vəŋ yɨsə me. 23Wə ntɨə faŋ ŋwə bee mə, bee Tii ŋwaa nɨzi. 24Mə nə toꞌ kee kɨ yɨsə vənu mbɨə faŋ wə dɨday nə kee ta yiyɨsə taa ŋwaa vəŋ me, buu nu bwə vəŋ kee lùu shɔ me. Luu nə, vəŋ nə yè vənu vɔ́, baa kɨ bee mə, bee yia Tii ŋwaa vənshə. 25Ŋkə gày nɨniŋ maa məfaynə nə nu ŋkɨə faŋ vɨ nə nyɔ̀ꞌ taa ŋwaꞌlə Nwi laa, «Mə kee kɔlə gù nu me, vɨ bèe mə day.» #Sam 69.5. 26Luu nə, viŋ kɨ lumə laa wuu məgaŋtə jɨjwi. Yighee njyə faŋ mə taa gə̀ yɨ Tii ŋwaa, mə taa tɔŋ ŋwə, ŋwə jwi tɨ́ viŋ. Lùu Zwitə Ley Nwi faŋ ŋkə ndɔ fɨ ghɔ Tii ŋwaa, lùu ŋkə faŋ ŋkə ndɔ də nu yinsəŋ tɨ́ vɨɨ. Ŋkə ndɔ yɨsə vɨɨ kɨɨ nə yinsəŋ nyaa. 27Gə̀ fɨ maa viŋ, viŋ kɨ gisə tɨ́ vɨɨ kɔ̀ŋ mə nɨzi, buꞌ laa nsiŋ yaa luu mɔ́ꞌ shù fɨ maa vənzi.

Currently Selected:

Jɔn 15: bav

Highlight

Copy