Jɔn 16

1Mə naysə vənu vɔ́ tɨ́ viŋ, laa kɨ viŋ meꞌtə nu kaŋ me, faŋ vɨɨ taa tey kɨ kɔ ŋɨꞌ tɨ́ viŋ. 2Yighee jɨjwi faŋ vəŋ taa jɔŋ viŋ fɨ taa ŋii məshəŋtə Nwi. Yighee jɨjwi faŋ wə tɨ̀ me wə faŋ ŋwə ndɔ zwi viŋ, kɨ bɨꞌtə laa yi faꞌ faꞌ jəə tɨ́ Nwi. 3Vəŋ taa yɨ̀sə vənu vɔ́, buꞌ laa vəŋ kee kɨɨ nə Tii ŋwaa me, kee kɨɨ nə mə me. 4Mə naysə nu ŋɨꞌ kɔ́ tɨ́ viŋ laa, ŋkə taa gay, viŋ kɨ lumə laa mə nə nàysə tɨ́ viŋ laa ŋkə ndɔ gay nɨniŋ.»

Faŋ Yeso nə nàysə tɨ́ vɨɨ məzwetə nu ki laa ghɔ vɨ vəŋ kee baa shi tày me

Yeso baa gì tɨ́ vəŋ laa, «Mə nə kee nàysə vənu vɔ́ tɨ́ viŋ shù fɨ nə faŋ nsiŋ nə tey kɨ duꞌ me, faŋ nsiŋ nəə shi mɔ́ꞌ nə. 5Mə naysə vənu vɔ́ tɨ́ viŋ ndwə, buꞌ laa mə taa baa bəŋ gə yɨ Tii ŋwaa faŋ ŋwə nə tɔ̀ŋ mə mbi nyə̀. Nɨniŋ, tuu wə fɨ taa ŋwaa viŋ kee bitə laa mə sii gə fə me. 6Məluŋ lwàŋ taa fwisə viŋ, faŋ mə naysə̀ vənu və̀ tɨ́ viŋ nə. 7Mə naysə ŋkee nu yinsəŋ tɨ́ viŋ laa, lùu nu jəə tɨ́ viŋ faŋ mə gə nɨniŋ nə. Kaꞌ Zwitə Ley Nwi kee ndɔ jwi maa viŋ me, maa tɨ̀ lɨꞌ laa mə bɨ gə, gə̀ tɔ̀ŋ wuu məgaŋtə ghɔ́ tɨ́ viŋ me. 8Yighee njyə faŋ ŋwə ndɔ jwi, ŋwə ndɔ ŋaꞌ sɨ mbi maa məkɨɨ nə vənu vəbwəvə, nə vənu faŋ mbə lùu vəloomə, baa nə faŋ Nwi ndɔ shia nsɔꞌsə vɨɨ. 9Lùu nu bwə buꞌ laa vəŋ nə kee bìŋ mə me. 10Nu ŋkɨə faŋ ŋkə də̀ laa mə lùu wuu loomə, lùu faŋ mə gə yɨ tɨta Nwi, viŋ kee baa yè mə me. 11Nu nsɔꞌ kɔ́ lùu laa vɨ kwàŋ Satan, faŋ ŋwə sɔꞌ mbi nyə̀ nə, taa nsɔꞌ. 12Vənu vəyaŋ kɨ bii ghɔ mə maa mənaysə tɨ́ viŋ, luu nə, kaꞌ viŋ kee ta jìa vənu vɔ́ ndwə me. 13Nɨniŋ, Zwitə yinsəŋ kɔ́ ndɔ kɨ jwi, də jɨɨ tɨ́ viŋ, viŋ kɨɨ nə vənu vənshə faŋ mbə lùu vəbi. Zwitə kɔ́ kee gisə maa nshɨ-tɔ wi me, kɨ gisə sheꞌ nu ŋkɨə faŋ ŋkə zɔ̀ fɨ ghɔ Nwi, baa naysə vənu faŋ mbə ndɔ gay fɨ yiba. 14Ŋkə ndɔ kɨ koꞌsə yizii nyaa, buꞌ laa ŋkə ndɔ kɨ fi luu nu kaŋ, twelə tɨ́ viŋ. 15Vənu vənshə faŋ lùu vənu və Tii ŋwaa, lùu vənu vaŋ nɨzi. Lùu ŋiꞌ nu ŋkɨə faŋ mə gì laa ŋkə ndɔ kɨ fi nu kaŋ, twelə tɨ́ viŋ nə.»

16Yeso baa gì tɨ́ vəŋ laa, «Goꞌ sheꞌ wee-fɨkɨꞌ, viŋ kee baa yè mə me, ŋkə baa betə sheꞌ tɨtiꞌ nee, viŋ baa ye mə.» 17Vɨɨ məzwetə nu ki vəmɔ́ꞌ gi sheꞌ vəŋ vəŋ laa, «Ŋiꞌ nu ŋkɨə faŋ ŋwə gì tɨ́ nsiŋ nee nə, lùu laa kə, faŋ ŋwə gì laa, gòꞌ wee-fɨkɨꞌ nee, vɨ kee baa ye ŋwə me, ŋkə taa baa kɨ betə tɨtiꞌ, vɨ baa ye ŋwə, nə ŋiꞌ nu ŋkɨə faŋ ŋwə gì laa yi gə yɨ Tii wi, lùu kəŋ nu tɨ́ kə?» 18Vəŋ baa gì laa, «Ŋiꞌ wee-fɨkɨꞌ nee, faŋ ŋwə nii gì nə, ŋkə sii də̀ laa kə.» Yigi yɔ́ kee lùu yiley tɨ́ vəŋ me. 19Yeso nəə kɔꞌ kɨɨ laa vəŋ kəə bitə ŋiꞌ yigi yɔ́ tɨ́ yi, ŋwə gi tɨ́ vəŋ laa, «Viŋ gɨgisə kɔ̀ŋ yigi yɔ́ mu? Maa mə nii nàysə tɨ́ viŋ laa wee-fɨkɨꞌ nee, viŋ kee baa yè mə me, taa baa betə fɨkɨꞌ, viŋ baa ye mə. Viŋ kee kɨɨ nə ŋiꞌ yigi kɔ́ yimu? 20Viŋ zɔ! Mə naysə tɨ́ viŋ yinsəŋ laa, viŋ ndɔ gwia, kɨ shɨŋsə. Luu nə, mbi kɨ ŋaytə. Viŋ kɨ lɨluŋ, luu nə, məluŋ wiŋ ndɔ kiasə gù məŋaytə. 21Wəzwi yaa kɨ kəə bi, ŋwə kɨ luŋ, buꞌ faŋ yighee yi kùꞌ. Luu nə, ŋwə taa bi wee, ŋwə kee baa lùmə ŋɨꞌ yɔ́ me; ŋwə bee kɨ ŋɨŋaytə buꞌ laa wuu fi fùu mbi. 22Sheꞌ nee, viŋ lùu ndwə lɨluŋ. Luu nə, fwi siŋ ndɔ kɨ ŋaytə faŋ mə ndɔ baa jwi ye viŋ. Nɨniŋ, tuu wə kee lùu shɔ, tɨ́ kaꞌ ŋwə baa fì məŋaytə wiŋ fɨ ghɔ viŋ me. 23Ndɔ luu maa shi kɔ́, viŋ kee baa bitə tuu nu shee me. Viŋ zɔ! Mə naysə tɨ́ viŋ yinsəŋ laa, fa tɨ̀ me fa faŋ viŋ taa ndwaŋ fɨ ghɔ Tii ŋwaa maa yizii nyaa, ŋwə taa kɔ tɨ́ viŋ. 24Jwi kɔ tɔ və-ndee, viŋ kee ta ndwàŋ fa fɨ ghɔ Tii ŋwaa maa yizii nyaa me. Bàw viŋ buꞌ ghɔ, ndwàŋ vətɔ fɨ ghɔ Tii ŋwaa, yuu kii, laa məŋaytə lwaŋ taa fwisə viŋ.»

25Yeso baa gì tɨ́ vɨɨ məzwetə nu ki laa, «Mə nəə gisə vənu vɔ́ tɨ́ viŋ maa ghaŋ tii. Yighee ndɔ kuꞌ, faŋ mə kee ndɔ baa kɨ gisə tɨ́ viŋ maa yigisə tii me, twelə vənu kɔ̀ŋ tɨta Nwi tɨ́ viŋ ntee, ley ley. 26Ndɔ luu maa shi kɔ́, viŋ ndwaŋ vətɔ fɨ ghɔ Tii ŋwaa maa yizii nyaa. Mə kee gi laa mə ndɔ buꞌ ghɔ tɨ́ Tii ŋwaa tɔ viŋ me, 27buꞌ laa nshɨ-tɔ Tii ŋwaa kaw viŋ. Ŋwə kaw viŋ, buꞌ faŋ viŋ kaw mə, baa biŋ laa mə nə ndɔ̀ fɨ yɨ ŋwə. 28Mə nə ndɔ̀ fɨ yɨ Tii ŋwaa, jwi mbi nyə̀. Nɨniŋ, mə baa mèꞌtə mbi nyə̀ ndwə, bə̀ŋ gə̀ yɨ Tii ŋwaa.» 29Vɨɨ məzwetə nu ki gi tɨ́ ŋwə laa, «Əhəŋ, a gisə ndwə ntee, a kee baa gisə maa ghaŋ tii me. 30Yia kɔꞌ kɨɨ ndwə laa a kɨɨ nə vənu vənshə, nu kee ghɔꞌ ghɔ me. A kɨ̀ɨ nə vənu faŋ wə kəə bitə tɨ́ ghɔ. Nɨniŋ, yia biŋ laa a nə ndɔ̀ fɨ ghɔ Nwi.» 31Yeso bəŋsə tɨ́ vəŋ laa, «Viŋ bìŋ ŋkee yinsəŋ mu? 32Viŋ kɔꞌ kɨɨ laa yighee taa kuꞌ, nyə duꞌtə nyə kuꞌ, faŋ viŋ taa nyɨŋkə vənshə, wə kɨ gə fu ŋwə, wə kɨ gə fu ŋwə. Viŋ taa meꞌtə mə nɨnɔŋ. Luu nə, mə kee taa luu nɨnɔŋ me, buꞌ laa yia Tii ŋwaa lùu mɔ́ꞌ ghee nshə. 33Mə naysə nu kɔ́ tɨ́ viŋ, tɨ́ kaꞌ nsiŋ lùu fa kəmuꞌ, fwi yiŋ duꞌ nyɔŋ. Viŋ taa ye ŋɨꞌ taa mbi nyə̀, viŋ ka fwi siŋ, buꞌ laa mə duꞌtə mə ghɔꞌ mbi nyə̀.»

Currently Selected:

Jɔn 16: bav

Highlight

Copy