Mark 4

Yigisə tii buꞌ wuu məmɔꞌ say ghinə

(Matiu 13.1-23; Lukas 8.4-15)

1Shi mɔ́ꞌ Yeso baa kii tey kɨ deesə nu Nwi mbɨɨ maghia. Vɨɨ vəyaŋ baa kɨ bàytə yɨ ŋwə. Nɨniŋ, ŋwə ŋii taa bay taa muu, dùꞌ tey yi. Vɨɨ vɔ́ tɨŋnə mbɨɨ maghia. 2Ŋwə fɨꞌtə vənu vəyaŋ tɨ́ vəŋ maa yigisə tii, gì tɨ́ vəŋ laa, 3«Viŋ zɔ! Wə mɔ́ꞌ nə gə̀ maa məmɔꞌ say ghinə. 4Faŋ ŋwə gə̀ kɨ mɔꞌ, say mɔ́ꞌ fiŋkə jɨɨ, mənwə jwi shwə̀tə. 5Say mɔ́ꞌ fiŋkə taa nsi ŋoꞌsə faŋ shɔꞌ jəə nə kee lùu shɔ me. Fɨkɨꞌ ŋə yasə tɔ̀ŋkə, faŋ shɔꞌ jəə nə kee lùu shɔ nə me. 6Shɨshwi bee, nsi ndɔŋ, say fee yɔŋ, buꞌ faŋ ghay ghi nə kee ŋìi nsi jəə me. 7Say mɔ́ꞌ fiŋkə taa təndɨꞌ tə nyawsə. Təndɨꞌ tə nyawsə koꞌ, ndìŋ say ghɔ́. Tuu kee mbuu yisay kee bìa shɔ me. 8Say mɔ́ꞌ fiŋkə taa shəŋ nsi yijəə. Say ghɔ́ ta, baa shɨshɔɔ faŋ ghɨ mɔ́ꞌ bìa. Yisay yimɔ́ꞌ kii vəghinə muu-ntia, ghɨ mɔ́ꞌ ziꞌ muu-ntɔfə, ghɨ mɔ́ꞌ waaghɨꞌ.» 9Yeso metə yigisə tii yɔ́, gì laa, «Wə ntɨə faŋ ŋwə kìi tuulə ghi zɔ, ŋwə zɔ!»

10Vɨɨ vɔ́ waꞌkə, vɨɨ mbɨə faŋ vəŋ nə luu yɨ ŋwə ghɔ vɨ vɨɨ vi njɔsə-bɔɔ bitə nu tɨ́ ŋwə kɔ̀ŋ yigisə tii yɔ́. 11Yeso gi tɨ́ vəŋ laa, «Nwi kɔ̀ ŋiꞌ nu yifwàŋ Nwi tɨ́ viŋ. Vɨɨ mbɨə faŋ vəŋ kee lùu vɨɨ vaŋ me, taa kɨ zɔ vənu sheꞌ maa ghaŋ tii.» 12Ŋwə gi nɨniŋ, baa gì faŋ vɨ nyɔ̀ꞌ taa ŋwaꞌlə Nwi laa,

«Ŋkə lùu nɨniŋ laa vəŋ kɨ ye, kee ye me,

zɔ, kee kɨɨ me,

tɨ́ kɨ kaꞌ vəŋ kee ndɔ kwiinə fwisə vəŋ me,

Nwi kee ndènə yibɨsə vəŋ me.» #Aysaya 6.9-10.

13Ŋwə baa gì tɨ́ vəŋ laa, «Viŋ kee kɨ̀ɨ nə ŋiꞌ yigisə tii nyə̀ me, buu viŋ sii taa kɨɨ nə ŋiꞌ təgi tə tii tənshə kɨkə? - Viŋ zɔ! Ŋkə lùu tɨ́ nee:

14Wuu məmɔꞌ say ghinə, mɔꞌ lùu yigisə Nwi. 15Vɨɨ mbɨə faŋ ŋgwisə say vəŋ fìŋkə jɨɨ, lùu vɨɨ mbɨə faŋ vɨ mɔ̀ꞌ yigisə Nwi, vəŋ kɨ zɔ, tɨɨ vəzwitə vəbwəvə jwi, shə̀ fɨ tɔ vəŋ, fì nu ŋkɨə faŋ vɨ mɔ̀ꞌ taa fwisə vəŋ, gə̀ nə ŋkə. 16Sheꞌ nee, vɨɨ mbɨə faŋ say vəŋ fìŋkə taa nsi ŋoꞌsə, lùu vɨɨ faŋ vəŋ zɔ̀ yigisə Nwi, bìŋ yighee muꞌ nə məŋaytə. 17Luu nə, ghay ghi kee lùu taa fwisə vəŋ me, bètə sheꞌ tɨtiꞌ, ŋɨꞌ taa kɨ ŋii vəŋ, vɨɨ nə shoꞌ ghuu vəŋ buꞌ nu Nwi, vəŋ ndì jɨɨ Nwi yighee muꞌ. 18Vɨɨ mɔ́ꞌ lùu mbɨə faŋ ŋgwisə say vəŋ fìŋkə taa təndɨꞌ tə nyawsə. Lùu vɨɨ mbɨə faŋ vəŋ yaa kɨ zɔ nu Nwi, 19vəŋ kɨkɔŋ ŋwaa vəŋ buꞌ nu vətɔ və shɨ nsi, kaw ka, mwə̀sə vətɔ vəmɔ́ꞌ. Mbə jia fwisə vəŋ, ndɔ̀ kà yigisə Nwi laa kɨ nyə see ŋgwisə yi me. 20Gə fɨ maa vɨɨ mbɨə faŋ ngwisə say vəŋ fìŋkə maa shɔꞌ jəə, lùu vɨɨ mbɨə faŋ vəŋ zɔ̀ yigisə Nwi, biŋ. Say vəŋ sɔꞌ, sèe yaŋ yaŋ. Vəŋ yɨ vənu vəjəəvə. Wə mɔ́ꞌ yɨ vənu vəjəəvə vətɨtiꞌ. Wə mɔ́ꞌ yɨ vənu vəjəəvə vəyaŋ. Wə mɔ́ꞌ ŋkee vəyaŋ shɔ̀ɔ ki.»

Faŋ Yeso nə fɨ̀ꞌnə nu Nwi nə kiꞌ

(Lukas 8.16-18)

21Yighee njyə faŋ Yeso nəə kɨ bii taa nwaa vɨɨ vəyaŋ vɔ́, ŋwə baa gì tɨ́ vəŋ laa, «Vɨ yaa kɨ shuꞌ kiꞌ taa ŋii laa vɨ kusə nə kay mu? tɨꞌnə me kwaŋ ŋiꞌ fwaŋ mu? Maa vɨ yaa kɨ tə kiꞌ fuu fa mətə kiꞌ kəshaꞌsə. 22Sheꞌ nee, Nwi kəə laa vənu vənshə faŋ mbə ndènə ndwə, ndɔ fuu ntee sɨ vɨɨ, baa nə laa tuu nu kee gòꞌ maa shəŋ mfiŋsə me. Nwi kəə laa ŋkə ndɔ fuu maa shəŋ ley vɨ ye. 23Wə ntɨə faŋ tuulə ghi lùu shɔ maa məzɔ, ŋwə zɔ!»

24Ŋwə baa gì tɨ́ vəŋ laa, «Viŋ kɨ ndɨɨnə maa nu ŋkɨə faŋ viŋ zɔ ndwə! - Mfɨꞌ njyə faŋ viŋ kɔ, lùu mfɨꞌ njyə faŋ viŋ ndɔ fi, shɔ̀ɔ faŋ viŋ nə kɔ nə. (Sheꞌ nee, Nwi ndɔ gaŋtə viŋ maa məkɨɨ nə ŋiꞌ yigisə nyaa sheꞌ faŋ viŋ kwaꞌtə yigi yɔ́ taa fwisə viŋ.) 25Nwi ndɔ baa kùꞌsə tɔ ley shɔ tɨ́ viŋ, buꞌ laa wə ntɨə faŋ ŋwə kìi, vɨ ndɔ kùꞌsə tɨ́ ŋwə. Wə ntɨə faŋ ŋwə kee yikii me, vɨ ndɔ fɨfi ŋkee tɨtiꞌ ŋgwə faŋ ŋwə kii fɨ ghɔ ŋwə.»

Yigisə tii buꞌ ŋgwisə say faŋ ŋə ta ŋgɨɨ-ŋə

26Yeso baa gì laa, «Nu yifwàŋ Nwi lùu yaa wə faŋ ŋwə sɔ̀ say taa biisə ŋwə, 27nɔŋ kɨ bwey vətuꞌ, ndɔ yenə nə shɨshwi, bwèy vətuꞌ, yènə nə shɨshwi. Say ghɔ́ nyɔꞌ, ta, ŋwə kee kɨ̀ɨ faŋ say ghɔ́ ta me, 28buꞌ laa nsi yɨ̀sə say ghɔ́ ta ŋgɨɨ-ŋə. Tɨɨlə ta koꞌ, yisay bia mbɨɨ fuŋ, sɨ say kɨ nii yifuu, yisay kɨ nii yibay. 29Say bay yɔŋ, wə ghɔ́ kɨ nii tey kɨ shwi, buꞌ faŋ yighee məshwi kùꞌ.»

Yigisə tii buꞌ ŋɨꞌ tɨ fulɨsɨgaa

(Matiu 13.31-32,34-35; Lukas 13.18-19)

30Yeso baa gì laa, «Gə̀ fɨ maa nu yifwàŋ Nwi, sii kaꞌ nsiŋ fɨ̀ꞌnə nu yifwàŋ Nwi nə kə? Nsiŋ ndi yigisə tii yikə, fɨ̀ꞌ shɔ? 31Viŋ zɔ! Yifwàŋ Nwi lùu yaa ŋɨꞌ tɨ fulɨsɨgaa faŋ vɨ mɔ̀ꞌ nsi. Ŋɨꞌ yi luu ŋkee yighilə fɨ taa sɨ vətɔ fɨ shɨ nsi. 32Vɨ mɔ̀ꞌ ŋɨꞌ yi, nyə ta, nyə gu ŋkee nshɨ tɨ kwalə. Təntaŋ tɔŋkə shɔ, tɨ́ kɨ kaꞌ mənwə faŋ mbə vɨɨlə fɨ taa yizɔ, fianə təzi fuu yi. Ndɨŋ ki shìtə mbə.»

33Yeso nəə fɨꞌtə nu Nwi tɨ́ vɨɨ nə təgi tə tii təyaŋ nee, tɨ́ kɨ kaꞌ vəŋ zɔ̀. 34Ŋwə nəə gisə tɨ́ vəŋ sheꞌ maa ghaŋ tii, kɨ gə̀ yiba maa vɨɨ məzwetə nu ki, twèlə tɨ́ vəŋ.

Faŋ Yeso nə bwàsə fɨŋ

(Matiu 8.18,23-27; Lukas 8.22-25)

35Kɨ luu laynəfu shi kɔ́, Yeso gi tɨ́ vɨɨ məzwetə nu ki laa, «Nsiŋ tɔŋ gə njɨɨ muu!» 36Ŋwə nə gì nɨniŋ faŋ ŋwə nə duꞌtə ŋwə lùu taa bay. Vəŋ meꞌtə nwaa vɨɨ vɔ́ vəyaŋ nə, ndì ŋwə, ghɔ vɨ vəŋ gə mɔ́ꞌ. Vəbay vəmɔ́ꞌ nə luu shɔ nɨzi, beꞌsə ŋwə. 37Vəŋ ndɔ nɨniŋ, fɨŋ kɨ nii yikoꞌ, vəba və muu ŋii taa bay kɔ́, ŋkə kəə lwaŋ. 38Nshɨ-tɔ Yeso nə luu ŋkee yiba taa bay, dùꞌ yɨ̀ꞌtə tɔ ki fuu mbəələ, kɨ bwey. Vəŋ yəŋ ŋwə, gì tɨ́ ŋwə laa, «Tɨta, nsiŋ taa ndi, ŋkə kee bɨ yimu?» 39Yeso ndɔ tɨ̀ŋnə, shə̀ tɨ́ fɨŋ kɔ́, gì tɨ́ muu mbɔ́ laa mbə bwa, kɨ mbə baa shɔɔ me. Fɨŋ kɔ́ kɨ nii yibwa, vədɨꞌ zu. 40Ŋwə kɨ nii gì tɨ́ vəŋ laa, «Viŋ sii fee kə? Viŋ kee nùŋ fwi yiŋ maa Nwi yimu?» 41Shuu vəŋ yɔŋ. Vəŋ fee ŋkee dɨdɨꞌ, gì vəŋ vəŋ laa, «Sii lùu ndə nə, faŋ fɨŋ nə muu zɔnə ŋwə?»

Currently Selected:

Mark 4: bav

Highlight

Copy