Mark 5

Faŋ Yeso nə fùusə vəzwitə vəbwəvə fɨ maa wə shɨ Gerasa

(Matiu 8.28-34; Lukas 8.26-39)

1Yeso ghɔ vɨ vɨɨ vi tɔŋ gə njɨɨ maghia njɨɨ yi shɨ Gerasa. 2Yeso kɨ fùu fɨ taa bay, wə mɔ́ꞌ fuu fɨ tɔɔ vəŋku və nsisə, jwi yɨ ŋwə. Zwitə bwə nə luu maa ŋwə. 3Ŋwə nəə shi tɔɔ vəŋku və nsisə. Nə kɨ kaꞌ vɨ kee kà ŋwə tuu nə sumə bwey me. 4Vɨ yaa kɨ kwaŋ mfiŋ fəŋ ŋwə, ndɔ ka kwiŋ ghi nə sumə bwey, ŋwə shètə sumə ghɔ́ nə mfiŋ. Wə nə kee kìi wutə, tɨ́ kɨ kaꞌ ŋwə jìa wə ghɔ́, bwàsə ŋwə me. 5Vətuꞌ nə shɨshwi ŋwə nə luu taa təswi, toꞌ fɨ fuŋ, koꞌ fuu baŋsə, toꞌ yumə, toꞌ sɨɨtə ŋwaa wi taa ŋoꞌsə. 6Wə ghɔ́ ye Yeso fɨ ntaŋ, nyɨŋ jwì, gwènə ŋwə, 7yùmə ŋkee nəŋay, gì laa, «Sɨ kìi kə, Yeso, Wee Nwi Nshɔɔ-mbi? Maa yizii Nwi, mə buꞌ ghɔ, kɨ ghaysə mə me!» 8Ŋwə nə gì nɨniŋ buꞌ laa Yeso nii gì tɨ́ zwitə bwə kɔ́ laa ŋkə fuu fɨ maa ŋwə. 9Yeso kɨ nii bìtə tɨ́ ŋwə laa, «Yizii yə lùu kə?» Ŋwə laa, «Yizii nyaa lùu Ŋkaŋsə, buꞌ laa yia lùu vəyaŋ.» 10Mbə buꞌ ghɔ tɨ́ Yeso ŋkee dɨdɨꞌ laa kɨ ŋwə jɔŋ vəŋ fɨ maa shəŋ kɔ́ me.

11Maa yighee yɔ́ nwaa vəŋkwinyaa kwalə nə luu shɔ maa shəŋ kɔ́, zɨ fɨ mbɨɨ kweꞌ. 12Vəzwitə vəbwəvə vɔ́ buꞌ ghɔ tɨ́ Yeso, gì laa, «Tɔŋ yia taa ŋwaa vəŋkwinyaa və̀, yia gə ŋìi taa ŋwaa vəŋ.» 13Yeso biŋ. Vəzwitə vəbwəvə vɔ́ fuu fɨ maa wə ghɔ́, gə̀ ŋìi taa ŋwaa vəŋkwinyaa vɔ́. Nwaa vəŋkwinyaa ghɔ́ kɨ nii nyɨŋ tùŋnə, siꞌ gə̀ taa muu, gùkə shɔ, nù muu kùkə. Vəŋkwinyaa vɔ́ nə luu yaa ŋkaŋsə səbɔɔ.

14Vɨɨ mbɨə faŋ vəŋ nə shii vəŋkwinyaa vɔ́, nyɨŋkə gə̀ nàysə taa shɨ, nə taa ntɨꞌsə. Vɨɨ kɨ nii fùu jwì maa məye nu ŋkɨə faŋ ŋkə nii gày shɔ nə. 15Vəŋ jwi yɨ Yeso, yè wə ntɨə faŋ vəzwitə vəbwəvə nə luu maa ŋwə ŋkaŋsə nə. Wə ghɔ́ nə dùꞌ nsi, tɨ́ ŋwə mɔꞌ njwisə, tɔ ki ley. Vəŋ fee. 16Vɨɨ mbɨə faŋ vəŋ nə yè, naysə nu ŋkɨə faŋ ŋkə nii gày maa wuu zwitə bwə ghɔ́ nə vəŋkwinyaa. 17Vɨɨ zɔ, tey kɨ buꞌ ghɔ tɨ́ Yeso laa ŋwə ndɔ fɨ yɨ shɨ vəŋ. 18Yeso biŋ, baa kii ŋii taa bay, wuu zwitə bwə ghɔ́ buꞌ ghɔ tɨ́ ŋwə laa ghɔ ŋwə gə mɔ́ꞌ. 19Yeso twey, gì tɨ́ ŋwə laa, «Gə shiŋii yɨ vɨɨ və, nàysə nu ŋkɨə faŋ Nwi yɨ̀sə maa ghɔ tɨ́ vəŋ, baa nə faŋ ŋwə kèe gəŋ sə, gàŋtə ghɔ.» 20Ŋwə ndɔ, tey kɨ naysə nu kwalə ŋkɨə faŋ Yeso yɨ̀sə maa yi tɨ́ vɨɨ shɨ Dekapoli. Shuu vɨɨ vənshə yɔŋ.

Faŋ Yeso nə ywèysə wee Jayrəs, shùꞌ wəzwi faŋ ŋwə nəə zɨzasə ŋuꞌsə njɔsə-bɔɔ

(Matiu 9.18-26; Lukas 8.40-56)

21Yeso baa kɨ tɔŋ maghia taa bay, gə̀ njɨɨ yi. Vɨɨ baa kɨ bàytə ŋkee vəyaŋ yɨ ŋwə, yuu ŋwə nə luu mbɨɨ muu. 22Wə mɔ́ꞌ kɨ nii jwì faŋ nə luu wə fɨ taa ŋwaa vɨɨ kwalə fɨ taa ŋii məshɔꞌtə Nwi. Yizii wə ghɔ́ luu Jayrəs. Ŋwə jwi yè Yeso, gu ghuu ŋwə, 23bùꞌ ghɔ tɨ́ ŋwə dɨdɨꞌ, gì laa, «Ŋwiŋ ŋwaa wəzwi kəə ku. Bàw a jwi, mɔ̀ꞌ ghɔ maa ŋwə, ŋwə yaysə, bwèy.» 24Yeso gə ghɔ ŋwə. Vɨɨ vəyaŋ beꞌsə vəŋ, toꞌ fiitə ŋwə.

25Wəzwi mɔ́ꞌ nə luu shɔ taa ŋwaa vɨɨ vɔ́ faŋ ŋwə nə luu kwii day maa ŋuꞌsə njɔsə-bɔɔ, 26tòꞌ ndɔꞌ vəfɔ yaŋ, yè ŋɨꞌ shɔ, bɨ̀sə ka wi nshə, kee bee bwàŋnə me. Nyə kɨ jɨjwi shɔ̀ɔ yighee vɨsɨ. 27Ŋwə zɔ vənu və Yeso, jwì fɨ yiba jɨŋ ŋwə taa ŋwaa vɨɨ, kɔ̀ŋ njwi Yeso, 28buꞌ laa ŋwə nəə bɨꞌtə laa yi taa kɔŋ sheꞌ njwisə Yeso, buu yi taa bwaŋnə. 29Ŋwə kɔŋ njwi Yeso, kwii day ghɔ́ mè fɨ maa ŋwə yighee muꞌ. Ŋwə zɔ ŋwaa wi laa yi duꞌtə yi bwaŋnə fɨ maa za. 30Yeso zɔ faŋ wutə mɔ́ꞌ fùu fɨ maa ŋwə, kìasə ŋwaa, bìtə tɨ́ vɨɨ vɔ́ laa, «Kɔ̀ŋ ndə kɔ̀ŋ njwi nyaa?» 31Vɨɨ məzwetə nu ki gi tɨ́ ŋwə laa, «A ye faŋ vɨɨ bèꞌsə vəyaŋ, fìitə ghɔ. A sii gì laa kɔ̀ŋ ndə kɔ̀ŋ ghɔ kɨkə?» 32Ŋwə kɨ nɨndeynə sheꞌ maa məye laa nu kɔ́ yɨ̀ ndə. 33Wəzwi ghɔ́ faŋ ŋwə nə kɨ̀ɨ nə nu ŋkɨə faŋ ŋkə nii gày maa ŋwə nə, kɨ nii jwì nə məfee nə məlaꞌ, gu vɨsɨ Yeso, nàysə nu ki kɔ́ kənshə tɨ́ ŋwə. 34Yeso gi tɨ́ ŋwə laa, «Ŋwiŋ ŋwaa, a nùŋ fwi yə maa mə, buu a bwaŋnə̀. Gə nə mənɔŋ-bwaŋnə! Za kɔ́ mè fɨ maa ghɔ.»

35Sheꞌ faŋ Yeso kɨ bii gisə, vɨɨ mɔ́ꞌ jwi fɨ fu tɨɨ ŋii məshɔꞌtə Nwi, gì laa, «Ŋwiŋ wə kù. Kɨ ghɔ baa kɔ ŋɨꞌ tɨ́ tɨta ŋwaa-nsiŋ me!» 36Yeso zɔ yigi yɔ́, gì tɨ́ tɨɨ ŋii məshɔꞌtə Nwi ghɔ́ laa, «Kɨ ghɔ fee me! Jia fwi yə!» 37Yeso kɨ gə̀ shɔ, kee biŋ laa wə beꞌsə ŋwə me, tɨ̀ lɨꞌ sheꞌ Pita nə Jeyms baa nə Jɔn, weenshu Jeyms. 38Vəŋ gə ŋìi fu tɨɨ ŋii məshɔꞌtə Nwi, yè vədɨꞌ luu ŋkee vəbuulə. Vɨɨ nəə yumə ŋkee nəŋay. 39Ŋwə ŋii taa ŋii yɔ́, gì tɨ́ vəŋ laa, «Viŋ sii bɨŋ gwia kə? Wee ghɔ́ kee yiku me, ŋwə bɨbwey.» 40Vəŋ shɨꞌ ŋwə. Ŋwə jɔŋ vəŋ laa vəŋ fuu, kɨ nii ndì tɨɨ wee ghɔ́ nə nshu wi nə vɨɨ mbɨə faŋ ghɔ vɨ vəŋ lùu mɔ́ꞌ nə, gə̀ maa shəŋ ŋkɨə faŋ ŋku wee ghɔ́ lùu shɔ, 41jìa wee ghɔ́ fɨ kwiŋ ŋwə, gì laa, «Talita kumi», faŋ lùu laa, «Wee-wəzwi, ndɔ yizɔ!» 42Sheꞌ yighee muꞌ, wee ghɔ́ ndɔ kɨ toꞌ. Ŋwə nə luu ŋuꞌ njɔsə-bɔɔ. Vəŋ bwa maa nu kɔ́. 43Yeso gi tɨ́ vəŋ nəŋay laa, kɨ vəŋ yɨsə wə kɨɨ me, ndɔ̀ gì tɨ́ vəŋ laa vəŋ kɔ fa wee ghɔ́ zɨ.

Currently Selected:

Mark 5: bav

Highlight

Copy