Mark 7

Faŋ Yeso nə shə̀ tɨ́ vɨɨ Farisii buꞌ nuŋsə vəŋ

(Matiu 15.1-9)

1Nwaa vɨɨ Jus vəmɔ́ꞌ faŋ vɨ tii vəŋ nə vɨɨ Farisii, nə vɨɨ mədeesə ŋwaꞌlə Nwi vəmɔ́ꞌ, faŋ vəŋ nə ndɔ̀ fɨ ntɨꞌ Jerusalem, baytə yɨ Yeso, 2ye laa vɨɨ vəmɔ́ꞌ fɨ taa ŋwaa vɨɨ məzwetə nu Yeso zɨ nə ghɔ faŋ vəŋ kee yisɔ me. 3Vɨɨ Farisii vɔ́ ghɔ vɨ vɨɨ Jus vənshə, yaa kɨ biitə zɨ, vəŋ sɔ̀ ghɔ vəŋ laa ŋə ley ŋkee jəə, baa lèy tɨ́ Nwi. Nə luu nuŋsə vəŋ faŋ vɨɨ vɨsɨ nə nùŋsə. 4Vəŋ yaa kɨ kuunə fɨ taa yiwiŋ, vəŋ bɨ sɔ̀ yiŋwaa ŋkəə, buu zɨ fa. Nuŋsə vəŋ nə baa lùu yiyaŋ faŋ vəŋ nə nùŋsə, yaa məsɔ ndawsə nə vəntɨɨ baa nə vəntɨɨ və muu. 5Nɨniŋ, vɨɨ Farisii ghɔ vɨ vɨɨ mədeesə ŋwaꞌlə Nwi bitə tɨ́ Yeso laa, «Sii yɨ̀ kə vɨɨ məzwetə nu kə kee toꞌ fɨ maa nuŋsə njyə yuu vɨɨ vɨsɨ nə nuŋsə nə me? Vəŋ zɨ fazɨ nə ghɔ kee sɔ̀ me buꞌ kə?» 6Yeso bəŋsə tɨ́ vəŋ laa, «Aŋ viŋ, vɨɨ məboꞌ ŋwaa. Nshiiŋii-sɔghɔ Aysaya nə nàysə nu faŋ Nwi nə kwàŋ taa fwi ŋwə buꞌ viŋ ŋkee jəə. Ŋwə nə ŋwàꞌlə laa Nwi gì laa,

«Vɨɨ shɨ və̀ bəŋsə mə sheꞌ nə shuu vəŋ,

kee bəŋsə mə nə fwisə leysə me.

Fwisə vəŋ luu ntaŋ fɨ yɨ mə.

7Vəŋ bəŋsə mə dayday,

buꞌ laa vəŋ deesə vənu yaa ntɨsə Nwi,

faŋ lùu sheꞌ ntɨsə vɨɨ.» #Aysaya 29.13.

8Sheꞌ nee, viŋ mèꞌ ntɨsə Nwi, kɨ jia luu nuŋsə faŋ vɨɨ nùŋsə.»

9Yeso baa gì tɨ́ vəŋ laa, «Lùu jɨɨ yijəə faŋ viŋ twey ntɨsə Nwi maa mənuŋ nuŋsə yiŋ mu? 10Maa tii ŋwaa-nsiŋ Mose nə nyɔ̀ꞌ taa ŋwaꞌlə Nwi laa, «Kɨ zɔnə tii wə nə nshu wə,» #Eksodɔs 20.12. baa nə laa, «Wə ntɨə faŋ ŋwə gì nu bwə kɔ̀ŋ tii wi nə nshu wi, vɨ yɨsə ŋwə kù.» #Eksodɔs 21.17. 11Luu nə, viŋ gì ŋkiŋ laa lùu nu jəə, faŋ wə gì tɨ́ tii wi laa, «Vətɔ vənshə faŋ mə nə kəə kɨ kɔ tɨ́ ghɔ, lùu vəkɔ və Nwi.» 12Nɨniŋ, viŋ biŋ laa ŋwə kee baa yɨ̀ nu jəə maa tii wi nə nshu wi me. 13Lùu faŋ viŋ yaa kɨ yɨsə laa yigisə Nwi gu fa dayday buꞌ nuŋsə yiŋ faŋ viŋ nùŋsə nə, yɨ kəŋ vənu və̀ vəyaŋ.»

Nu ŋkɨə faŋ ŋkə yɨ laa wə kee ley vɨsɨ Nwi me

(Matiu 15.10-20)

14Yeso nə gì nɨniŋ, kɨ nii baa tìi nwaa vɨɨ vəyaŋ vɔ́ yɨ ŋwə, gì tɨ́ vəŋ laa, «Bàw viŋ vənshə zɔ nu ŋkɨə faŋ mə taa gi tɨ́ viŋ, kɨɨ nə ŋiꞌ ki. 15Viŋ zɔ! Fa kee lùu shɔ, tɨ́ kɨ kaꞌ ŋkə ŋìi taa ŋwaa wə, yɨ̀sə ŋwə kee lùu ley me. Vənu mbɨə faŋ mbə fuu fɨ taa ŋwaa wə, lùu mbɨə faŋ mbə yɨsə ŋwə kee lùu ley me. 16Wə kìi tuulə ghi maa məzɔ, ŋwə kɨ zɔ!»

17Kɨ lùu yighee njyə faŋ Yeso nə mèꞌtə nwaa vɨɨ vɔ́, gə̀ ŋìi taa ŋii, vɨɨ məzwetə nu ki bitə ŋiꞌ yigisə tii yɔ́ tɨ́ ŋwə. 18Ŋwə gi tɨ́ vəŋ laa, «Viŋ nɨzi, tɔ kiŋ kee ta yiley yimu? Viŋ kee yikɨɨ laa vətɔ vənshə faŋ mbə ndɔ fɨ fu, ŋii taa ŋwaa wə, kaꞌ mbə kee kɨ yɨsə ŋwə kee lùu wuu ley yimu? 19Maa vətɔ vɔ́ kee ŋii taa fwi wə me, mbə ŋii luu taa njyoꞌ ŋwə, fuu gə taa ŋkwi. - Nɨniŋ, fazɨ kənshə lùu kəley. 20Luu nə, vətɔ mbɨə faŋ mbə fuu fɨ taa ŋwaa wə lùu vətɔ mbɨə faŋ mbə yɨsə laa ŋwə kee ley vɨsɨ Nwi me, 21buꞌ laa vənu vəbwəvə fuu fɨ taa ŋwaa wə, fɨ taa fwi ŋwə. Vənu vəbwəvə yaa mbɨꞌtə yibwə, nə nu mətoꞌ vəsakə, nə nu vəndɔꞌ, nə nu məzwi wə, 22nə nu mətii vəki, nə nu məsəsə vətɔ, nə nu yibɨsə njyoꞌ, nə nu kəmfuŋsə, nə nu məzɨ shɨ, nə məshiasə vɨɨ, nə nu məndeynə vɨɨ nə sɨ bwənə, nə mənda wə, nə məkoꞌsə ŋwaa, nə nu mfaw, 23vənu vəbwənə vɔ́ vənshə ndɔ fɨ taa fwi wə, yɨsə laa ŋwə kee ley me.»

Nu wəzwi Siria fɨ ntɨꞌ Fənishia

(Matiu 15.21-28)

24Yeso kɨ nii baa ndɔ̀ fɨ shɨ vəŋ, gə̀ kwiŋ məshɨ mə Tayra nə Sidon, ŋii fu wə mɔ́ꞌ, kee kàw laa wə kɨɨ me. Nɨniŋ, ŋwə ndenə yidu. 25Wəzwi mɔ́ꞌ faŋ zwitə bwə nə luu taa ŋwaa ŋwiŋ wi, zɔ laa ŋwə shɔ, jwi gù ghuu ŋwə. 26Wəzwi ghɔ́ nə luu wuu Griik, faŋ vɨ nə bi ŋwə ntɨꞌ Fənishia fɨ shɨ Siria. Ŋwə jwi bùꞌ ghɔ tɨ́ Yeso laa ŋwə fuusə zwitə bwə fɨ maa ŋwiŋ wi. 27Nɨniŋ, Yeso gi tɨ́ ŋwə laa, «Meꞌtə vɨ zə vaŋ ŋkəə. Ŋkə kee yikuꞌnə laa vɨ ndi bee vaŋmbwaa, mɔ̀ꞌ tɨ́ vaŋ-busə me.» 28Wəzwi ghɔ́ bəŋsə tɨ́ ŋwə laa, «Ɔŋ, tɨta, lùu nɨniŋ. Luu nə, vaŋ-busə yaa kɨ zɨ vəbɨꞌ və bee faŋ mbə fiŋkə nsi fɨ ghɔ vaŋmbwaa.» 29Yeso zɔ yigi yɔ́, gì tɨ́ ŋwə laa, «Buꞌ yigi yə nyə̀ nee, mə gàŋtə ghɔ. Gə shiŋii, zwitə bwə kɔ́ fùu fɨ taa ŋwaa ŋwiŋ wə.» 30Wəzwi ghɔ́ bəŋ gə shiŋii, yè ŋwiŋ wi faŋ ŋwə nɔ̀ŋ jəə jəə, tɨ́ zwitə bwə kɔ́ fùu fɨ maa ŋwə.

Faŋ Yeso nə shùꞌ nshii tuulə faŋ nə luu bɨbɨ nɨzi

(Matiu 15.29-31)

31Yeso baa ndɔ̀ fɨ yɨ shɨ Tayra, shɔ̀ɔ fɨ shɨ Sidon, shɔ̀ɔ fɨ kwiŋ Dekapoli, gə̀ taa maghia Galilii. 32Ŋwə ziꞌ shɔ, vɨ jwi nə nshii tuulə mɔ́ꞌ tɨ́ ŋwə, faŋ ŋwə nə luu wuu ŋkwəŋ nɨzi, bùꞌ ghɔ tɨ́ Yeso laa ŋwə mɔꞌ ghɔ ki maa wə ghɔ́. 33Yeso ndi wə ghɔ́, ghɔ ŋwə ndɔ fɨ taa ŋwaa vɨɨ vəyaŋ, gə̀. Ŋwə kɨ nii kwàŋ vaŋ-ghɔ vi taa tuulə wə ghɔ́, tutə mənti, kɔ̀ŋ nditə wə ghɔ́ nə mənti mbɔ́, 34ndèynə yizɔ, sɔŋ, gì tɨ́ ŋwə laa, «Efata», faŋ lùu laa «Ŋaꞌnə». 35Sheꞌ yighee muꞌ, tuulə ghi ghɔ́ ŋaꞌnə, nditə ki toꞌ, ŋwə gi ŋkee ley. 36Yeso lɨꞌtə tɨ́ vɨɨ vɔ́ laa kɨ vəŋ naysə tɨ́ wə me. Luu nə, yuu ŋwə lɨ̀ꞌtə tɨ́ vəŋ, vəŋ baa kɨ gɨgi shɔ̀ɔ. 37Shuu vəŋ yɔŋ shɔ̀ɔ ki. Vəŋ nə gisə laa, «Yeso yɨ vənu vənshə vəjəə, yɨsə vɨɨ tuulə shiinə zɔnə, vəbɨbɨ gì.»

Currently Selected:

Mark 7: bav

Highlight

Copy