Mark 8

Faŋ Yeso nə zə̀ wə ŋkaŋsə yishwe

(Matiu 15.32-39)

1Nə luu maa yighee yɔ́, vɨɨ baa kɨ baytə yɨ Yeso ŋkee vəyaŋ, kee bee kìi fazɨ me. Yeso tii vɨɨ məzwetə nu ki yɨ ŋwə, gì tɨ́ vəŋ laa, 2«Gəŋsə kòo mə maa vɨɨ və̀. Vəŋ duꞌ yɨ mə ndwə vəshi vətia, kee kìi fazɨ me. 3Kɨ ghaŋ mə gi laa vəŋ gə shiŋii nə jɨŋ, buu vəŋ taa bwakə, kùkə jɨɨsə, buꞌ laa vɨɨ mɔ́ꞌ jwì ŋkee fɨ ntaŋsə.» 4Vɨɨ məzwetə nu ki bəŋsə tɨ́ ŋwə laa, «Sii kaꞌ wə zə̀ vɨɨ və̀ nə bee taa tɔɔ waꞌsə ŋwə̀ kɨkə?» 5Ŋwə bitə tɨ́ vəŋ laa, «Viŋ kìi yighɨsə bee yisəꞌ?» Vəŋ laa kwatia. 6Ŋwə kɨ nii gì tɨ́ vɨɨ vɔ́ laa vəŋ duꞌnə nsi. Ŋwə ndi yighɨsə bee yɔ́ kwatia nə, bwàŋ Nwi, bɨꞌ, kɔ̀ tɨ́ vɨɨ məzwetə nu ki laa vəŋ gaa tɨ́ vɨɨ vɔ́. Nɨniŋ, vəŋ gaa tɨ́ vɨɨ vɔ́. 7Vaŋ-susə vəmɔ́ꞌ nə luu shɔ ghɔ vəŋ nɨzi. Yeso tu mənɔŋ-bwaŋnə shɔ, gì laa vɨ gaa tɨ́ vɨɨ nɨzi. Vəŋ gaasə. 8Vɨɨ vɔ́ zɨ zwə̀kə. Vɨ bwilə vəbɨꞌ və bee faŋ mbə bə̀, lwèsə ŋkɔɔsə kwatia. 9Vɨɨ mbɨə faŋ vəŋ nə zɨ̀ fazɨ kɔ́, nə luu yaa ŋkaŋsə yishwe. Faŋ vəŋ nə zɨ zwə̀kə nɨniŋ, Yeso kɔ bwey-jəə tɨ́ vəŋ, 10ndɔ̀ yighee muꞌ, ŋìi taa bay ghɔ vɨ vɨɨ məzwetə nu ki, gə̀ kwiŋ Dalmanuta.

Yeso ghɔ vɨɨ Farisii

(Matiu 16.1-12)

11Vɨɨ fɨ taa nwaa vɨɨ Farisii fuu jwì nə yigi maa Yeso, kəə laa ŋwə də shwenə fɨ yizɔ, bitə nɨniŋ maa məmɔŋ ŋwə. 12Yeso sɔŋ ŋkee fɨ taa njyoꞌ ŋwə, gì laa, «Ŋgwi nyə̀ sii kəə shwenə buꞌ kə? Mə gì tɨ́ viŋ yinsəŋ laa tuu kee shwenə vɨ ndɔ kee kɔ tɨ́ ŋgwi nyə̀ me.» 13Ŋwə nə gì nɨniŋ, mèꞌtə vəŋ, baa kii ŋii taa bay, gə̀ njɨɨ yi.

14Yeso ghɔ vɨ vɨɨ məzwetə nu ki ndɔ nɨniŋ, vɨɨ məzwetə nu ki ndenə maa mətoꞌ nə bee, kii sheꞌ ghɨ bee muꞌ taa bay vəŋ. 15Fɨkɨꞌ, Yeso gi tɨ́ vəŋ laa, «Viŋ kɨ tɔfə, shiinə yiŋwaa fɨ maa nu ŋkɨə faŋ ŋkə ndɔ̀ fɨ taa nwaa vɨɨ Farisii nə fɨ taa nwaa vɨɨ Herod, faŋ ŋkə lùu yaa fa faŋ vɨ yaa kɨ kwaŋ taa bee, ŋkə mwà.» 16Vəŋ zɔ nu kɔ́, kwàꞌtə tɔ vəŋ, gì sheꞌ vəŋ vəŋ laa, «Ŋwə nə bee gì tɨ́ nee buꞌ laa nsiŋ kee kìi bee yimu?» 17Ŋwə kɨɨ nə mbɨꞌtə vəŋ yɔ́, gì tɨ́ vəŋ laa, «Viŋ sii kwaꞌtə tɔ kiŋ kɔ̀ŋ nu bee, faŋ bee kee lùu ghɔ viŋ me buꞌ kə? Viŋ kee ta yitɔfə yimu? Tɔ kiŋ kee ta yiley yimu? Fwisə siŋ kɨ bii ŋkwəŋ mu? 18Sɨ ghiŋ shɔ, viŋ kee yɨye yimu? Tuulə ghiŋ shɔ, viŋ kee zɨzɔ yimu? 19Maa viŋ lùmə nu yighɨsə bee yì. Yighee njyə faŋ mə yaa ndi yighɨsə bee tee, bɨ̀ꞌtə, kɔ̀ tɨ́ vɨɨ ŋkaŋsə tee nə, viŋ nə bàytə vəbɨꞌ və bee, lwèsə ŋkɔɔsə səꞌ?» Vəŋ gi tɨ́ ŋwə laa, ŋkɔɔsə njɔsə-bɔɔ. 20Ŋwə baa bìtə tɨ́ vəŋ laa, «Yighee njyə faŋ mə yaa ndi yighɨsə bee kwatia, bɨ̀ꞌtə, kɔ̀ tɨ́ vɨɨ ŋkaŋsə yishwe nə, viŋ nə bàytə vəbɨꞌ və bee ŋkɔɔsə səꞌ?» Vəŋ laa, ŋkɔɔsə kwatia. 21Ŋwə baa kɨ gì tɨ̀ vəŋ laa, «Tɔ kiŋ kee ta yiley yimu?»

Faŋ Yeso nə shùꞌ wuu sɨ fɨsə

22Yeso ghɔ vɨ vɨɨ vi kɨ nii shɔɔ gə̀ zìꞌ ntɨꞌ Betsayda. Vɨɨ jwi nə wuu sɨ fɨsə tɨ́ ŋwə, bùꞌ ghɔ tɨ́ ŋwə laa ŋwə kɔŋ wə ghɔ́. 23Ŋwə jia wuu sɨ fɨsə ghɔ́ fɨ maa kwiŋ wi, ghɔ ŋwə fuu fɨ taa ntɨꞌ. Ŋwə kɨ nii tù mənti taa sɨ ŋwə, ndɔ̀ mɔ̀ꞌ ghɔ ghi maa ŋwə, bìtə tɨ́ ŋwə laa ŋwə yè fa mu? 24Wə ghɔ́ ndeynə yizɔ, gì laa, «Mə yè vɨɨ, vəŋ fɨnə vətɨ tɨtoꞌ.» 25Ŋwə baa mɔ̀ꞌ ghɔ ghi maa sɨ wə ghɔ́, yɨ̀sə ŋwə ndeynə yizɔ. Wə ghɔ́ bwaŋnə, yè vətɔ vənshə ŋkee vəley. 26Yeso tɔŋ ŋwə laa ŋwə gə shiŋii, gì laa, «Kɨ shɔɔ fɨ taa ntɨꞌ, naysə nu kɔ́ tɨ́ wə me!»

Mbɨꞌtə vɨɨ nə Pita kɔ̀ŋ Yeso

(Matiu 16.13-20; Lukas 9.18-21; Jɔn 6.67-71)

27Yeso ghɔ vɨ vɨɨ məzwetə nu ki baa ndɔ, gə̀ taa ntɨꞌsə faŋ nsə kia ntɨꞌ Sisaria Filipi. Vəŋ kii toꞌ fɨ jɨɨ, ŋwə bitə tɨ́ vɨɨ məzwetə nu ki laa, «Vɨɨ sɨ gì laa mə lùu ndə?» 28Vəŋ gi tɨ́ ŋwə laa, «Vɨɨ mɔ́ꞌ gì laa a lùu Jɔn, wuu məkɔ muu mə Nwi; vɨɨ mɔ́ꞌ gi laa a lùu Elias; vɨɨ mɔ́ꞌ laa a lùu ŋgwə muꞌ fɨ taa nwaa nshiisə-ŋii sɔghɔ fɨ ywaŋ-vɨsɨ.» 29Ŋwə baa kɨ bìtə tɨ́ vəŋ laa, «Gə fɨ maa viŋ, viŋ gì ŋkiŋ laa mə lùu ndə?» Pita bəŋsə tɨ́ ŋwə laa, «A luu Kristo.» (Faŋ lùu laa wə faŋ Nwi tɔ̀ɔlə ŋwə.) 30Ŋwə zɔ, lɨ̀ꞌtə tɨ́ vəŋ laa, kɨ vəŋ naysə nu kɔ́ tɨ́ wə me.

Faŋ Yeso nə nàysə nu ŋɨꞌ ki tɨ́ vɨɨ məzwetə nu ki

(Matiu 16.21-23; Lukas 9.22)

31Yeso kɨ nii tey kɨ deesə vɨɨ məzwetə nu ki laa Wuu yinsəŋ Nwi ndɔ ghaa ye ŋɨꞌ yiyaŋ. Vɨɨ ndɔ twey ŋwə, zwì ŋwə. Ŋkee vɨɨ taa fɨ taa ŋii Nwi ghɔ vɨ vɨɨ kwalə məfeꞌ Nwi nə vɨɨ mədeesə ŋwaꞌlə Nwi ndɔ twey ŋwə, zwì ŋwə. Luu nə, vəshi kɨ shɔɔ vətia, ŋwə baa ywèy fɨ shɨ yiku. 32Ŋwə nə gì nu kɔ́ tɨ́ vəŋ ntee. Pita kɨ nii ndì ŋwə, sùꞌtə ghɔ ŋwə, tey kɨ twey nu kɔ́ tɨ́ ŋwə. 33Ŋwə kiasə ŋwaa wi, yè vɨɨ məzwetə nu ki, shə̀ tɨ́ Pita, gì laa, «Suꞌtə fɨ yiba jɨŋ mə, Satan. A kee bɨꞌtə nu Nwi me. A bɨꞌtə luu mbɨꞌtə vɨɨ mbi.»

Nu məbeꞌsə Yeso

(Matiu 16.24-28; Lukas 9.23-27)

34Yeso kɨ nii baa tìi nwaa vɨɨ vəyaŋ faŋ vəŋ nə bàytə yifi, ghɔ vɨ vɨɨ məzwetə nu ki, laa vəŋ shəŋtə jwi yɨ ŋwə. Ŋwə kɨ nii gì tɨ́ vəŋ laa, «Wə ntɨə faŋ ŋwə kəə jwì fɨ yiba jɨŋ mə, bàw ŋwə twey nu ŋwaa ki, bìŋ maa məshaꞌ fəŋkɔꞌ fə ŋkɨꞌsə fi, bèꞌsə mə (ŋkee maa shəŋ ŋɨꞌ). 35Mə gì tɨ́ nee buꞌ laa, wə ntɨə faŋ ŋwə kəə gaŋtə məbwey wi shɨ nsi, ndɔ ndisə ŋwaa wi. Luu nə, wə ntɨə faŋ ŋwə ndìsə ŋwaa wi buꞌ mə, tɨꞌnə me buꞌ ntɔŋ Nwi yijəə, ndɔ bweysə ŋwaa wi. 36Sii kɨ kaꞌ ŋkə gaŋtə wə nə kə, faŋ ŋwə kìi mbi yinshə, lèe məbwey vəlwaŋ wi?»

37Ŋwə baa gì laa, «Sii kɨ kaꞌ wə kɔ̀ kə maa məfi məbwey vəlwaŋ? - Viŋ zɔ! Kɨ tɔ wə dɨɨ maa mə nə yigisə nyaa vɨsɨ ŋgwisə vɨɨ nyə̀ faŋ vəŋ buulə məkee mə Nwi, yɨsə vənu vəbwəvə me. 38Kɨ ghaŋ tɔ wə dɨɨ maa Wuu yinsəŋ Nwi nə mədeesə wi taa mbi yibwə nyə̀, buu tɔ ki ndɔ dɨɨ maa wə ghɔ́ nɨzi maa yighee njyə faŋ ghɔ vɨ nshiisə-ŋiisə Nwi ndɔ jwi mɔ́ꞌ taa nu yifwàŋ Nwi.»

Currently Selected:

Mark 8: bav

Highlight

Copy