Mark 9

1Ŋwə baa gì tɨ́ vəŋ laa, «Viŋ zɔ! Mə naysə tɨ́ viŋ yinsəŋ laa vɨɨ mɔ́ꞌ faŋ vəŋ tɨ̀ŋ feenə, kee ndɔ kukə me, buu ye nu yifwàŋ Nwi fuu nə wutə Nwi.»

Faŋ Pita nə Jeyms baa nə Jɔn nə yè feenə Yeso fuu baŋ

(Matiu 17.1-13; Lukas 9.28-36)

2Vəshi kɨ shɔɔ ntɔfə, Yeso ndi Pita nə Jeyms baa nə Jɔn, ghɔ vɨ vəŋ koꞌ gə̀ ŋkee fuu baŋ yidə. Faŋ vəŋ nə zìꞌ yifi, sheꞌ vəŋ vəŋ, ŋwaa Yeso kwiinə fɨ yikəꞌ vəŋ. 3Njwi si nə nɨndwaꞌlə, luu ŋkee səfusə laa buu, yuu kɨ kaꞌ tuu wə fɨ shɨ nsi kee sɔ̀ njwi, nyə fù nɨniŋ me. 4Elias ghɔ Mose fuu yikəꞌ vəŋ, kɨ gisə ghɔ vɨ Yeso. (Elias nə Mose nə luu nshiisə-ŋii sɔghɔ tɨ́ Nwi ywaŋ vɨsɨ.) 5Pita ye, gì tɨ́ Yeso laa, «Tii wia, bàw faŋ nsiŋ lùu feenə mɔ́ꞌ nə, laa yia fianə təta tətia, ŋgwɨɨ muꞌ nə ŋgwə Mose muꞌ nə ŋgwə Elias muꞌ.» 6Ŋwə nə gì nɨniŋ, buꞌ laa ŋwə nə kee kɨ̀ɨ nə nu tɨ́ kaꞌ ŋwə gì me. Vəŋ nə fee ŋkee dɨdɨꞌ. 7Mbɔꞌ kɨ nii koꞌ, shìtə vəŋ. Gɨ Nwi koꞌ fɨ taa mbɔꞌ yɔ́ laa, «Luu ŋkee ŋwiŋ ŋwaa nə, faŋ mə kàw ŋwə. Viŋ zɔnə ŋwə!» 8Vəŋ gwəkə ndèynə vədɨꞌ, kee baa yè wə me, ye sheꞌ Yeso nɨnɔŋ wi ghɔ vɨ vəŋ.

9Vəŋ kɨ nii siꞌ fɨ fuu baŋ yɔ́. Vəŋ kii sɨsiꞌ, Yeso shɨɨtə tɨ́ vəŋ laa kɨ vəŋ naysə nu ŋkɨə faŋ vəŋ nii ye nə, tɨ́ wə me, gə ziꞌ tɨ́ shi ŋkɨə faŋ yi ndɔ ywey fɨ shɨ yiku. 10Vəŋ nuŋ yigi yɔ́ taa fwisə vəŋ, ndɔ̀ kɨ kwaꞌtə, gì sheꞌ vəŋ vəŋ laa, «Ŋiꞌ yigi yɔ́ buꞌ məywey fɨ shɨ yiku sii lùu kɨkə?» 11Vəŋ kɨ nii bìtə tɨ́ ŋwə laa, «Sii yɨ̀ kə vɨɨ mədeesə ŋwaꞌlə Nwi gi laa Elias ndɔ ghaa jwi ŋkəə, buu wuu məbweysə vɨɨ Nwi jwi?» 12Ŋwə bəŋsə tɨ́ vəŋ laa, «Ɔŋ, vɨɨ vɔ́ gì yinsəŋ laa Elias jwi ŋkəə, lòotə vənu vənshə, mbə neꞌtə. Lùu nɨniŋ. Gə fɨ maa wuu məbweysə ghɔ́, vɨ nyɔ̀ꞌ kə taa ŋwaꞌlə Nwi buꞌ Wuu yinsəŋ Nwi? Maa vɨ nyɔ̀ꞌ laa ŋwə ndɔ ghaa ye ŋɨꞌ yiyaŋ, vɨɨ shia ŋwə. 13Gə fɨ maa Elias ghɔ́, mə naysə tɨ́ viŋ laa Elias duꞌtə ŋwə jwì. Vɨ yɨ nu ŋkɨə faŋ vɨ nə kàw maa ŋwə, yuu vɨ ŋwàꞌlə buꞌ ŋwə taa ŋwaꞌlə Nwi.»

Faŋ Yeso nə shùꞌ wuu zwitə bwə

(Matiu 17.14-21; Lukas 9.37-43)

14Yeso ghɔ vɨ vɨɨ məzwetə nu ki vɔ́ vətia nə, bəŋ jwì yɨ vɨɨ məzwetə nu ki vəmɔ́ꞌ, yè nwaa vɨɨ vəyaŋ yɨ vəŋ, nə vɨɨ mədeesə ŋwaꞌlə Nwi faŋ vəŋ sɔnə yigi ghɔ vɨ vəŋ. 15Nwaa vɨɨ vɔ́ ye Yeso, sàylə yighee muꞌ, nyɨŋ gə̀ shɔ̀ꞌtə ŋwə. 16Ŋwə bitə tɨ́ vɨɨ məzwetə nu ki laa, «Viŋ vɨ vəŋ sii gisə kə?» 17Wə mɔ́ꞌ fɨ taa nwaa vɨɨ vɔ́ bəŋsə tɨ́ ŋwə laa, «Tɨta, mə nii jwì nə ŋwiŋ ŋwaa tɨ́ ghɔ, buꞌ laa ŋwə kìi zwitə bwə faŋ ŋkə yɨsə ŋwə kee gɨgisə me. 18Ŋkə yaa kɨ ndɔ maa ŋwə, ŋkə mɔꞌ ŋwə nsi sheꞌ shəŋ ŋkɨə faŋ ŋwə lùu shɔ; təfwi fuu fɨ shuu ŋwə; ŋwə kwə gɨꞌ ghi, kɔꞌ kɨ nii tatə. Mə nii gì tɨ́ vɨɨ məzwetə nu kə laa vəŋ fuusə zwitə bwə kɔ́. Vəŋ kee kɨɨ fùusə me.» 19Yeso gi tɨ́ vəŋ laa, «Aŋ viŋ, ŋgwisə vɨɨ faŋ viŋ kee nùŋ fwi siŋ maa Nwi me. Mə sii taa shi yɨ viŋ tay kɨkə? Nsiŋ ndɔ mwəsə ndəəkə? - Viŋ jwi nə wee ghɔ́ shee!» 20Vɨ jwi nə wee ghɔ́ tɨ́ ŋwə. Zwitə bwə kɔ́ ye Yeso, kìasə wee ghɔ́ yighee muꞌ, mɔ̀ꞌ nsi. Ŋwə bɨŋlə. Təfwi fuu fɨ shuu ŋwə. 21Yeso bitə tɨ́ tɨɨ wee ghɔ́ laa ŋkə tày maa ŋwə ndwə kɨkə? Ŋwə gi laa, «Ŋkə lùu maa ŋwə shù fɨ nə faŋ vɨ bì ŋwə. 22Ghee yaŋ ŋkə mɔꞌ ŋwə taa wi, mɔꞌ ŋwə taa muu laa ŋkə ndisə ŋwə. Nɨniŋ, faŋ kaꞌ a yɨ̀ nu, bàw a kee gəŋ sia, gàŋtə yia.» 23Yeso gi tɨ́ ŋwə laa, «A sii gì laa faŋ kaꞌ mə yɨ̀ nu? Wə ntɨə faŋ ŋwə nùŋ fwi yi maa Nwi, kɨ kaꞌ nu kee ghɔ̀ꞌ ŋwə me.» 24Tɨɨ wee ghɔ́ tɔnə yigwia, gì laa, «Mə nùŋ fwi nyaa maa Nwi. Gaŋtə mə laa mə nuŋ fwi nyaa maa Nwi yinsəŋ!»

25Yeso ye laa vɨɨ nyɨŋkə jwi fàynə vəyaŋ, ŋwə shə tɨ́ zwitə bwə kɔ́, gì tɨ́ ŋkə laa, «Zwitə bwə, faŋ a yɨsə laa wee ŋwə̀ kee gì me, kee zɔ me, mə shə̀ tɨ́ ghɔ laa a fuu fɨ maa wee ŋwə̀! Kɨ ghɔ baa bəŋ jwi ŋìi taa ŋwaa ŋwə me!» 26Zwitə bwə kɔ́ yumə, nə̀ꞌsə wee ghɔ́ ŋkee nəŋay, fùu. Wee ghɔ́ kiasə, gù yaa ŋku wə. Vɨɨ vəyaŋ gi laa ŋwə kù. 27Yeso jia ŋwə fɨ maa kwiŋ wi, bɨ̀ŋsə ŋwə yizɔ, ŋwə ndɔ tɨ̀ŋnə.

28Yeso kɨ nii shɔ̀ɔ gə̀ ŋìi taa ŋii. Vɨɨ məzwetə nu ki bitə tɨ́ ŋwə sheꞌ vəŋ vəŋ laa, «Sii nii yɨ̀ kə yia kee kɨɨ fùusə zwitə bwə kì me?» 29Ŋwə gi tɨ́ vəŋ laa, «Kɨ kaꞌ wə kee fùusə kəŋ zwitə kɔ́ me, tɨ̀ lɨꞌ laa ŋwə shɔ̀ꞌtə ndwàŋ Nwi me.»

Faŋ Yeso nə baa nàysə nu yiku ki tɨ́ vɨɨ məzwetə nu ki

(Matiu 17.22-23; Lukas 9.43-45)

30Yeso ghɔ vɨ vɨɨ məzwetə nu ki kɨ nii ndɔ̀ fɨ yifi, shɔ̀ɔ fɨ kwiŋ Galilii. Ŋwə nə kee kàw laa wə kɨɨ me, 31buꞌ laa ŋwə nəə deesə vɨɨ məzwetə nu ki, gì tɨ́ vəŋ laa, «Vɨ ndɔ kɔ Wuu yinsəŋ Nwi tɨ́ vɨɨ, vəŋ zwi ŋwə. Luu nə, vəshi kɨ shɔɔ vətia, ŋwə ywey.» 32Vəŋ kee kɨɨ jia ŋiꞌ yigi yɔ́ me, fèe fɨ bitə tɨ́ ŋwə.

Wuu kwalə fɨ taa ŋwaa vɨɨ Nwi lùu ndə?

(Matiu 18.1-5; Lukas 9.46-48)

33Yeso ghɔ vɨ vɨɨ məzwetə nu ki gə zìꞌ ntɨꞌ Kapernaum. Faŋ vəŋ zìꞌ shɔ, ŋìi taa ŋii, Yeso bitə tɨ́ vəŋ laa, vəŋ nii toꞌ gisə laa kə jɨɨ? 34Vəŋ gay buꞌ laa vəŋ nəə toꞌ, gìsə jɨɨ laa, wuu kwalə fɨ taa ŋwaa vəŋ lùu ndə? 35Yeso duꞌnə nsi, tìi vɨɨ məzwetə nu ki njɔsə-bɔɔ, gì tɨ́ vəŋ laa, «Kɨ ghaŋ wə kəə lùu vɨsɨ, ŋwə kɨ tɨŋnə yiba, faꞌ tɨ́ vɨɨ vənshə.» 36Ŋwə kɨ nii ndì weembwa wuubwa, nùŋsə nɨntəŋ ŋwaa vəŋ, shàꞌ wee ghɔ́, gì tɨ́ vəŋ laa, 37«Wə ntɨə faŋ ŋwə ndì wee yaa wee ŋwə̀, kɨ gaŋtə ŋwə maa yizii nyaa, buu ŋwə gaŋtə luu mə,» baa nə laa, «Wə ntɨə faŋ ŋwə gàŋtə mə, gàŋtə luu Nwi faŋ ŋwə nə tɔ̀ŋ mə.»

Wə ntɨə ŋwə kee bee nsiŋ me, lùu wuu nwaa ŋwaa nsiŋ.

(Matiu 10.42; Lukas 9.49-52)

38Jɔn kɨ nii gì tɨ́ Yeso laa, «Tɨta, yia nə yè wə faŋ nsiŋ vɨ vəŋ kee toꞌ mɔ́ꞌ me, ŋwə nə fuusə vəzwitə vəbwəvə fɨ maa vɨɨ maa yizii yə. Yia twey tɨ́ ŋwə, buꞌ laa nsiŋ vɨ vəŋ kee toꞌ mɔ́ꞌ me.» 39Yeso zɔ nu kɔ́, gì tɨ́ vəŋ laa, «Kɨ viŋ baa fəŋ ŋwə me, buꞌ laa wə faŋ ŋwə faꞌ nu kwalə maa yizii nyaa, kaꞌ ŋwə kee baa gì nu bwə kɔ̀ŋ yizii nyaa me,» 40baa nə laa, «Wə ntɨə faŋ ŋwə kee bee nsiŋ me, lùu wuu nwaa ŋwaa nsiŋ.» 41Yeso baa gì tɨ́ vəŋ laa, «Viŋ zɔ! Mə gì tɨ́ viŋ laa, wə ntɨə faŋ ŋwə kɔ̀ ndaw muu viŋ nu, buꞌ laa viŋ lùu vɨɨ vaŋ, buu kɨ kaꞌ vəkeynə və wə ghɔ́ kee ndɔ ndi me. 42Luu nə, wə faŋ ŋwə yɨ̀ laa weembwa mɔ́ꞌ faŋ ŋwə nùŋ fwi yi maa mə, ndi jɨɨ Nwi, nu kɔ́ weꞌ tɨ́ wə ghɔ́, fɨ ghɔ vɨ ndi yiti bee yikwalə, gay me ŋwə, gə̀ mɔ̀ꞌ ŋwə taa mamuu.»

Bàw wuu Nwi kee kwàŋ ghɔ ki taa nu bwə me

(Matiu 5.13; 18.6-9; Lukas 14.34-35; 17.1-2)

43Yeso baa gì tɨ́ vəŋ laa, «Viŋ zɔ! Kɨ ghaŋ ghɔ kə yɨsə laa a yɨ nu bwə, shia, bàꞌsə, buꞌ laa ŋkə bàw laa a ndɔ ŋìi məbwey vəlwaŋ nə kwiŋ muꞌ, fɨ ghɔ a kii kwiŋ bɔɔ, ndɔ̀ ŋìi taa shəŋ vəŋku vənsisə vəbwəvə taa wi faŋ ŋwə kee yaa kɨ ndɨɨnə me, 44[faŋ vəntɔꞌ mbɨə faŋ mbə kwə vɨɨ nə, kee yaa kɨ kukə fɨ tey yi me; wisə kee ndɨɨnə fɨ fuŋ me.] 45Sheꞌ nɨniŋ, ghuu kə kɨ luu yɨ laa a ŋii nu bwə, yɨ̀ nu bwə, bàw a shia, bàꞌsə. Bàw laa a ndɔ ŋii məbwey vəlwaŋ yaa ndwey, fɨ ghɔ a kii ghuu bɔɔ, vɨ mɔꞌ ghɔ taa wi. 46[faŋ vəntɔꞌ mbɨə faŋ mbə kwə vɨɨ nə, kee yaa kɨ kukə fɨ tey yi me; wisə kee ndɨɨnə fɨ fuŋ me.] 47Kɨ ghaŋ yisɨ yə yɨsə a yɨ nu bwə, kɨlə, fùusə. Bàw laa a ndɔ ŋii yifwàŋ Nwi nə yisɨ yimuꞌ, fɨ ghɔ a kii sɨ bɔɔ, vɨ mɔꞌ ghɔ taa wi faŋ lùu shəŋ vəŋku vənsisə vəbwəvə, 48faŋ vəntɔꞌ mbɨə faŋ mbə kwə vɨɨ nə, kee yaa kɨ kukə fɨ tey yi me; wisə kee ndɨɨnə fɨ fuŋ me.

49Viŋ zɔ! Vɨ ndɔ mɔꞌ wi taa ŋwaa vɨɨ vənshə yaa vɨ yaa kɨ mɔꞌ fəŋway taa mbasə. 50Fəŋway bàw. Kɨ luu mfə kee baa kɨ ndɨŋ me, buu sii kaꞌ viŋ yɨ kə laa mfə baa lùu fəndɨŋ? Nɨniŋ, bàw viŋ luu vəndɨŋ yaa fəŋway, dùꞌ nyɔŋ viŋ viŋ.»

Currently Selected:

Mark 9: bav

Highlight

Copy